رواية زواج بالإكراه الفصل الثامن بقلم سارة مجاهد
رواية زواج بالإكراه بقلم سارة مجاهد
البارت(8)
ونتركهم ونذهب لسمير ومجدى
مجدى: ها ياسمير وصل
سمير:خلاص الامن بيقول انه بقي عالبوابه اهو
مجدى: طيب استر يارب
وبعد وقت قليل
سمير: اهو وصل اهو…..اهلا وسهلا شرفتنا اتفضل
لينظر له حوريه ومروان وفي نفس واحد: يانهااااااااااار اسووووووود
مجدى: اتفضل يا مولانا شرفتنا
المأذون: زواج مبارك ان شاء الله يا جماعه
سمير: متشكرين اتفضل
عند حوريه ومروان
حوريه مصدومه: مش ممكن ..مش معقول
مروان مصدوم هو الاخر: فعلا مش ممكن ومش معقول كمان
فتنظر له حوريه بغضب بالغ: انت كنت عارف بالكلام ده
مروان: عارف ازاى وانا متفاجئ زيي زيك دلوقتى
حوريه: لا يمكن الكلام ده يحصل ده علي جثتى
مروان ويشاور ليوسف ابن عمه ليذهب له
مروان بغضب: ايه الحكايه يا يوسف والمأذون ده جاى ليه
يوسف: مأذون جاى فرح وفيه عريس وعروسه هيكون ايه ااه بالمناسبه مبروك ياعروسه
حوريه بدون نفس: عقباالك
يوسف بحرج: احم..المهم مأذون وفرح هيكون ايه ياعم مروان مبرووك ابوك وحماك هيكتبو الكتاب دلوقتى والدخله بعد شهر زى ماهى
مروان ويخبط كف علي كف: لا اله الا الله…ازاى الكلام ده هو انا طرطور مش ياخدو رأيي يا يوسف مش انا اللي هتجوز
حوريه: وانا كمان طرطوره ولا ايه مش ياخدو رأيي مانا كمان اللي هتجوز
مروان: اسكتى انتى بقي عشان انا مش طايقك دلوقت
حوريه بنرفزه: يعنى انا اللي طايقاك..اووف بقي..وتعقد ذراعيها امامها
يوسف: استهدوا بالله يا جماعه خلاص انتو محطوطين قدام امر واقع والكتاب هيتكتب دلوقتى
وتأتى لهم بسنت وهى غير مصدقه لما يحدث
بسنت: حوريه الحقي يا حوريه دول هيكتبو الكتاب دلوقتى
حوريه وكادت ان تبكى: شوفتى يابسنت ابويا بيعمل فيا ايه انا خلاص تعبت ومش قادره استحمل اكتر من كدا
بسنت: اهدى يا حوريه خلاص احنا قدام امر واقع والمأذون هنا والكتاب هيتكتب هيتكتب ومافيش فايده من اللي هنعمله
فينظر لها يوسف ويستمع لكلماتها فهى نفس كلماته التى قالها منذ قليل فأعجب بها بشده واحس انه يعرفها منذ سنين فتنظر له وتجده يسلط نظره عليها فتخجل وتخفض نظرها للاسفل ف الحال
ونتركهم ف غضبهم قليلا ونذهب الي ياسين الذي كان يجول بنظره علي ريناد الي ان وجدها تدلف من باب الفيلا فيسرع لها ليستقبلها
ياسين: كنت خايف لا ماتجيش
ريناد بابتسامه: لا ازاى دى خطوبه استاذ مروان رئيسي ف الشغل ازاى ما اجيش
ياسين: لا مش خطوبه بس دا كتب كتاب كمان
ريناد: والله…ربنا يسعدهم ويهنيهم يارب
ياسين بحب: عقبالك ياريناد
ريناد بخجل: ميرسي عقبالك انت كمان
ياسين: ربنا يخليكى…بس ياترى هتعزمينى
ريناد: علي ايييه
ياسين: علي فرحك
ريناد بوجه عابس: لا اه اه اكيد
ياسين: بس انا ممكن ماكونش فاضي يوميها
ريناد بخيبه امل: ليه بقي
ياسين: ممكن اكون مشغول عادى بتحصل..طب ايه رأيك عندى فكره حلوه
ريناد بحزن: ايه هى
ياسين بخبث: نعمل فرحنا انا وانتى ف يوم واحد وف قاعه واحده كمان اييييه رأيك
ريناد باندهاش: هاااا
ياسين: هاا ايه بس تعالي معايا دا الموضوع كبيييير
ونذهب مره اخرى الي مروان الذي يشع غضبه علي كل من حوله
مروان:لا انا لازم اقوم اوقف المهزله دى
يوسف: اهدى يا مروان خلاص اللي حصل حصل والمأذون هيبتدى الاجراءات دلوقتى
مروان: يايوسف سبنى اقوم..اوعى…..ويذهب لوالده ويترك يوسف مع حوريه وبسنت
حوريه: انا كمان يا بسنت هقوم اروح لبابا دا ماكانش اتفاقنا من الاول لازم اشوف حل
بسنت: خلاص يا حوريه اهدى اللي هتعمليه مش هيجى منه فايده وباباكى هينفذ اللي ف دماغه
حوريه: لا يمكن يا بسنت يحصل لا يمكن..وتذهب هى الاخرى لوالدها وتترك بسنت ويوسف وبعد سكوت دام لثوانى يبدأ يوسف بالكلام
يوسف: احم ..هو انتى تبقي صاحبه حوريه
بسنت بابتسامه: صاحبتها بس.. احنا اكتر من الاخوات من صغرنا واحنا مع بعض
يوسف: امممم ربنا يخليكو لبعض…وعقباالك
بسنت: ميرسي…بس لو هتجوز بالطريقه دى يبقي لا هقعد كدا احسن
يوسف: حوريه ومروان مش هما المثال لكل الجوازات اللي بتحصل تقدرى تقولي حاله نادره او مش نادره اوى اكيد ف زيهم بس تقدرى تقولي السبب ف اللي بيحصلهم دلوقتى ابهاتهم ومش لازم كل اللي بيتجوز يكون ف ظروف حوريه ومروان يكون متجوز غصب يعنى
بسنت: امممم ممكن برضو…بس حضرتك ماقولتليش انت تبقي مين
يوسف بابتسامه تظهر وسامته: انا يوسف ابن عم مروان
بسنت بصوت منخفض لنفسها: شكلك يا يوسف مش زى ابن عمك شكلك حاجه تانيه خاالص
يوسف بابتسامه: اممم بتقولي حاجه
بسنت: هاا لا ابدا بقول اتشرفت بيك يعنى
يوسف بابتسامه ساحره: انا اكتر والله
عند مروان وهو يتحدث مع والده ووالدته: ايه الكلام ده يابابا انت بتلوى دراعى بقي..احنا مااتفقناش ع كدا من الاول
مجدى: مروان خلاص انا وعمك سمير اتفقنا اننا هنعملهالكو مفاجأه يوم الخطوبه ونجيب المأذون
مروان ويلوى شفتيه: ونعم المفاجأت الصرااحه
مجدى: وبعدين انت مدايق ليه مش كدا كدا كنتو هتتجوزو بعد شهر ايه يعنى اللي هيفرق من اننا نكتبه النهارده او بعض شهر
مروان: برضو اكون عارف مش اتفاجئ زيي زى المعازيم اللي قاعده دى
هويدا: خلاص ياميرو بقي افرح يا حبيبي وعديها
مروان: انتى كنتى عارفه ان كل ده هيحصل ياماما وما قولتليش
هويدا: يا حبيبي ابوك كان محلفنى وانا وعدته انى مش هقول لحد الصراحه
مروان بضيق: مااشي يا ماما مااشي يا بابا اما نشوف اخرتها ايه..ويتركهم ويغادر ويذهب ليوسف وبسنت ليجدهم منهمكين ف الحديث مع بعضهم
يوسف: ها يا مروان عملت ايه
مروان: هعمل ايه يعنى لله الامر من قبل ومن بعد
يوسف: مش قولتلك مافيش فايده
مروان وينظر لبسنت: ودى راحت فين هى كمان
بسنت وتغضب من اسلوبه: الله يكون ف عونك يا حوريه دا بيرمى دبش مش بيتكلم
مروان: يا انسه بكلمك ع فكره
بسنت: بسنت اسمى بسنت
مروان: طيب يا بسنت حوريه راحت فين
بسنت: راحت لباباها ثوانى اناديلها …وتذهب لها
اما مروان فينظر ليوسف بطرف عينه: بس ايه الحكايه يا سي جو
يوسف: حكايه ايه يا عمونا خليك ف حالك انت بس
مروان: يعنى شايفك منهمك اوووى ف الكلام مع ست بسنت..بقولك ايه الحق نفسك قبل ماتقع دى يابنى صاحبتها واكيد طبعها نكدى زيها الحق نفسك زى مابقولك احسنلك
يوسف: تؤ مش نكديه ..وبعدين مين قال ان خطيبتك نكديه اكيد انت عشان مش طايقها شايفها كدا واكيد هى كمان شايفاك انيل هههه
مروان: بنت ال…تفتكر
يوسف: هههه اكيد دى مش طايقاك يابنى
مروان بضيق: ولا انا
وقبل ذلك بدقائق نذهب لحوريه وهى تتحدث مع والديها
حوريه شبه باكيه: يابابا حضرتك ماقولتليش ان كل ده هيحصل من الاول
سمير: واهو حصل يا حوريه خلاص الموضوع منتهى
حوريه: يا بابا احنا متفقين انها هتبقي خطوبه بس مااتفقناش انه يبقي فيه كتب كتاب
سمير: وانا مجدى اتفقنا اننا هنكتبه النهارده ونعملهالكو مفاجأه
حوريه: مفاجأه!!
ناديه: خلاص يا حوريه الناس بدأت تبص علينا روحى اقعدى ف الكوشه جمب عريسك يا حبيبتى
حوريه: ماما انتى كنتى عارفه؟
ناديه: والله يا بنتى ما كنت اعرف حاجه انا عارفه زيي زيكم دلوقتى والله
حوريه بحزم: بابا انا مش موافقه ع كتب الكتاب ولو ضغطو عليا هقول للمأذون انى مش موافقه وطبعا عمره ماهيكتبه لان الجوازه كدا تبقي باطله ولو ضغطو اكتر مش هوافق عالخطوبه دى من الاساس
سمير بغضب بالغ: طب اعمليها يا حوريه وقسما عظما لا تشوفي هعمل فيكى ايه انتى فاااااااااااهمه
ناديه: اهدى يا سمير ماينفعش كدا الناس بتبص علينا
وتأتى لهم بسنت: حوريه يا حبيبتى مروان بيسأل عليكى
سمير: اتفضلي يا عروسه روحى لعريسك واضحكى ف وشه كدا بدل ماانتى مصدراله الوش الخشب من الصبح..اتفضلي
بسنت: خلاص ياعمو انا هاخدها ونروحله..بعد اذنك…وتأخذها بسنت ويذهبو للكوشه
بسنت: حوريه ابوس ايدك عدى الليله شوفتى ابوكى كان عامل ازاى دا ودانه كانت بتطلع دخان دا شويه وكان هيولع فيكى وانتى واقفه
حوريه بدموع: لله الامر من قبل ومن بعد
بسنت باستغراب: سبحان الله
حوريه: ف اييه
بسنت مبتسمه: اصل دى نفس الجمله اللي مروان قالها لما رجع من عند باباه
حوريه : عادى توارد خواطر
بسنت مداعبه حوريه: وممكن نقول برضو القلوب عند بعضها
حوريه: اخرسي يابسنت يلا بينا…وتذهب وتجلس بجانب مروان
مروان: ياريت تمسحى الدموع دى عشان الناس بدأت تاخد بالها
حوريه من بين دموعها: تعرف تسكت دلوقتى احسن والله العظيم اسيبلكو الدنيا كلها وامشي
مروان: والله العظيم ماحد عاوز يعمل كدا غيري..وظلو ينظرون امامهم
عند سمير وهو يستقبل دكتور معتز
سمير: اهلا اهلا دكتور معتز الفرح ماكانش هيبقاله طعم لو ماكنتش جييت
دكتور معتز: اذيك يا سمير الف مبروك والله حوريه كبرت وبقت عروسه اهى ربنا يهنيها ويسعدها ياارب
سمير: ربنا يخليك يا معتز..اتفضل اقعد وخد راحتك علي بال ما المأذون يكتب الكتاب
دكتور معتز: ماشاء الله هتكتبو الكتاب كمان
سمير: ايوه ياسيدى وان شاء الله الدخله هتبقي بعد شهر من دلوقتى
دكتور معتز: ماشاء الله ربنا يسعدهم ..حوريه تستاهل كل خير
سمير: تسلم يامعتز اتفضل يا حبيبي اقعد
ونذهب لياسين ابو دم خفيف
ريناد: هههههه والله يا ياسين انت طلع دمك خفيف بشكل
ياسين: انتى لسه شوفتى حااجه دا انا بسخن بس
ريناد: ههههه كماان
ياسين: اومااااال…وبعدها تأتى لهم بنت لتسلم عليه
البنت: ياااسو انت هنا واحشنى كتيير
ياسين وينظر لريناد الذي وجد معالم وجهها تغيرت 180درجه
ياسين قاصد مايفعله: هاى جينا عامله ايه
جينا: انا تمام…انت اللي عامل ايه وحشتنى ايامك يا ياسوو اووى
ياسين: والله يا جينا انتى اللي وحشانى كتير..ها قوليلي اخبارك ايه والدنيا عامله معاكى ايه
جينا: يااااه دى عملت كتيير اتجوزت واتطلقت وسافرت واشتغلت ورجعت لا دا كتيير كتيير
ياسين: امممم ربنا معاكى ويعينك يا جيجى
جينا: ها وانت اخبارك ايه اتجوزت ..وتنظر لريناد نظره ذات معنى
ياسين: ها لا ما اتجوزتش بس بس خطبت
وتندهش ريناد مما قاله
جينا: اوه ماى جاد خطبت يا ياسوو يا خساره وانا اللي لما شوفتك قولت هنرجع اللي مضي وانقضي
ياسين: لا خلاص بقي يا جينا خطبنا واتلمينا وتاب علينا ربنا الحمدلله
جينا: ودى خطيبتك
ريناد وكادت ان تنطق فاسرع ياسين بالاجابه: ايوه ريناد خطيبتى ودى جينا يا ريناد زميلتى انا ومروان من ايام الكليه
جينا: اه هاى ريناد مبروك عالخطوبه ومبروك عليكى يااسو اقصد ياسين……..طيب يا ياسين اتمنى اشوفك تانى وماتكونش دى اخر مره
ياسين: اكيد طبعا
جينا: طيب يا جماعه سي يو بقي
ياسين: بااى جينا
وبعدها تذهب جينا وتظل ريناد وهى ع وشك الانفجار
ياسين قاصد مايقوله: ها يا جينا كنا بنقول ايه
ريناد: انا ريناد يا ياسو اقصد ياياسين
ياسين: هههههه انتى اتعديتى منها.. اسف ياريناد اصل اتلخبطت شويه ها كنا بنقول ايه بقي
ومازالت ريناد صامته ولا ترد عليه
ياسين: مالك ياريناد ساكته ليه
ريناد: انا ماشيه يا ياسين ..بعد اذنك
ياسين: استنى بس هتمشي وهتسبينى اقف لوحدى
ريناد بحزن: ماتروح تقف مع جينا وهى تسليك
اما ياسين كان فرح جدا مما تقوله: اممم قولتيلي..ايه ده ياريناد احنا بنغير ولا ايه..ويغمز لها
وترتبك ريناد: ها اغير هغير ليه يعنى هو انت جوزى ولااا خطيبي
ياسين: اه خطيبك
ريناد: ايييه ازااى يعنى
ياسين: انتى مش كنتى واقفه وانا بقول لجينا انك خطيبتى
ريناد: اه صحيح انت ازاى تقولها كدا
ياسين ويعدل لياقه قميصه وهو مبتسم: ماهو علي اعتبار ما سوف يكون ان شاء الله…ويغمز لها بعينيه
وترتبك ريناد مما قاله وفرحه ف نفس الوقت: ايه اللي انت بتقوله ده يا ياسين..وتبتسم ع جانبي شفتيها
ياسين: بقول اللي كان لازم يتقال من زمان بقول اللي انتى كان نفسك ان انا اقوله مش كدا ياريناد
ريناد: بص يا ياسين
ياسين: مش هبص يا ريناد انا نفسي اسمعك..ريناد انا بحبك ونفسي تكونى حلالي وام عيالي نفسي انا وانتى ف يوم من الايام نقعد ف الكوشه كدا زى مروان وحوريه …ريناد اوعى تكونى فاكره انى مش حاسس بيكى من زمان لا كنت حاسس وعارف وكنت مستنى اليوم اللي اجى واقولك فيه انى بحبك..ايه رايك ياريناد
ريناد بحزن: طب وجينا
ياسين: جينا ايه بس الله يخربيتها عليا النعمه انا كنت بكلمها ومش فاكرغيراسمها جينا كانت صاحبه مروان بالاكتر بس هى كانت بتعمل عليكى الحبه دول عشان تغيري يعنى وكدزه…وبصراحه انا خدتها كارت عشان اخليكى تغيري كمان
ريناد:……………..
ياسين: ماتردى يابنت الحلال والا والله لو مارديتى عليا حالا هروح الحق جينا قبل ماتمشي حتى نلحق نرجع اللي مضي وانقضي
ريناد بلهفه: بحبك يا ياسين
ياسين بفرحه: الله اكبر الله اكبر ظهر الحق وزهق الباطل اخيييرا ياشيخه نشفتى ريقي احمدك ياارب
ريناد بضحك: مجنوون
ياسين بحب: بحبك اقسم بالله
ريناد بحب: بموت فيك اقسم بالله
عند مروان
يوسف: الواد ده ماله اتجنن باين عليه
مروان: لا بدام واقف مع ريناد وبيكبر كدا ومبصوت يبقي حصل
يوسف: هو ايه اللي حصل
مروان: هبقي اقولك بعدين..المهم دلوقتى روح قول لبابا المأذون هيكتب امته انا زهقت من الخنقه دى وعاوز اخلص من ام الليله دى بقي
حوريه بصوت منخفض: والله انا اللي اتخنقت منك ياشيخ
مروان: هاا سامع برطمه
حوريه: اديك قولت برطمه وبعدين اطلع من دماغي بقي
مروان بزهق: روح يا يوسف استعجلهم خلينى اخلص بقي
يوسف: حااضر يا مروان
ويذهب يوسف لعمه
يوسف: ايه ياعمى مش يلا
مجدى: ماشي يايوسف روح نادى ياسين يلا عشان انت وهو اللي هتشهدو عالعقد
يوسف: حااضر…ويذهب لياسين ليجده هو وريناد يضحكون سويا
يوسف: انت ياعمنا مش يلا
ياسين: يلا ايه يا عم يوسف خلاص هتكتبو الكتاب
يوسف: اه وعمك مجدى عاوزنا انا وانت اللي نشهد عالعقد..يلا بقي
ياسين: مااشي…سلام مؤقت ياريناد شويه وراجعلك يا جميل
ريناد بابتسامه: اوك
وذهبو جميعا واجتمعو حول بعضهم حيث يجلس المأذون ف المنتصف وع يمينه مروان وع يساره سمير ويقف بجانبهم الشهود ياسين ويوسف
المأذون: اومال العروسه فين يا جماعه عشان نسألها
سمير: العروسه موافقه اتوكل ع الله ياشيخنا
المأذون: لا يا استاذ سمير لا يجوز يجب مشاوره العروس الاول
سمير: ماشي تعالي يا حوريه
المأذون: ها يابنتى موافقه عالجواز من الاستاذ مروان
حوريه وتنظر لوالدها وهو ينظرلها نظرات ناريه
حوريه بدون نفس: موافقه
المأذون: توكلنا علي الله
ويبدأ المأذون بمراسم كتب الكتاب
ياسين بصوت منخفض ليوسف: مش ملاحظ يا يوسف ان انا وانت اللي موعودين اننا نشهد ع جوازات مروان
يوسف: هههههه ششش يخربيتك وطى صوتك مش وقته
المأذون: قول ورايا يا استاذ سمير انى استخرت الله العظيم علي ان ازوجك موكلتى حوريه سمير الشهاوى البكر الرشيد علي كتاب الله وسنه رسوله وعلي الصداق المسمى بيننا عاجله واجله والحضور شهود علي ذلك والله خير الشاهدين….فيردد سمير ماقاله المأذون
المأذون: قول ورايا يا استاذ مروان ويبدأ المأذون يقول لمروان ما سيقوله فيردد بعده: انى استخرت الله العظيم وقبلت زواج موكلتك الانسه حوريه سمير الشهاوى البكر الرشيد علي كتاب الله وسنه رسوله وعلي الصداق المسمى بيننا عاجله واجله والحضور شهود علي ذلك والله خير الشاهدين
المأذون: امضه الشهود..ويمضي يوسف وياسين
المأذون: امضي يا استاذ مروان تعالي ياعروسه امضي..فيمضي كلا منهم وهم سينفجرون من الداخل
ويقف المأذون ويقول بصوت مرتفع: باارك الله لكما وباارك عليكما وجمع بينكما ف خيير
لتدخل هى علي هذه الجمله لينظر لها مروان ويوسف وياسين وف نفس واحد: يانهاار فوحلقي
*******************
يتبع……
لمتابعة البارت التاسع اضغط هنا