رواية أحببت من لا يرانى الفصل الثانى والعشرون 22 – بقلم سحر السحرتي

 رواية أحببت من لا يرانى الفصل الثانى والعشرون 22 – بقلم سحر السحرتي 

احببت من لا يراني 

حلقة ٢٢

*كالعاده قفز ادهم وجد شيش البلكونه مفتوح ودخل 

*تظاهرت سماء انها فزع-ت 

:بسم الله في حد يدخل بالشكل ده انت و اختك عندكم نفس الحساسيه مش بتخبطوا على الباب 

*جذبها الى حضنه و عانقها عناق طويل كاد أن يعتصرها من شدة الاشتياق وعيناه اغرورقت بالدموع

*أدرك بهذا الحضن أنه كان يحبها دون أن يشعر لم يكن يشتاق للمياء كما اشتاق لها هذا الشهر كادت روحه أن تسحب منه

*وهي بدورها تعلقت برقبته وقبل ان تنطق قال لها 

:وحشتيني قوي يا سماء قوي 

*كانت مترددة لكنها اخرجتها بكل مشاعر الحب نطقت بها عينيها قبل لسانها

: انت وحشتني اكتر يا ادهم 

*امسك الطفلين وظل يقبلهم بحب واشتياق 

:وحشتوني قوي يا حبايبي انا اسف بجد انا السبب

*كان الصغيرين يضحكون كلما قبلهم 

*شعر بمدى خسارتهم حينما ابتعدا عنه 

*شعر بمدى غبائه كيف يستبدل تلك البديعة الرائعة بتلك البش-عة الأنانية 

*عاد وجذب سماء لحضنه مع الطفلين 

:اوعديني انكم مش هتبعدوا عني مره ثانيه 

*صمتت ولم تجيبه 

:سماء اوعديني 

:ما اقدرش ادي لك الوعد ده لو فضل وضعنا على ما هو عليه اسفه هضطر ابعد … انا عارفه انك محتاج وقت وانا هسيب لك فتره كويسه لكن مش هقدر اعيش انا وولادي حياتنا كلها بالشكل ده في الظل ولا كأنك تعرفنا

:عارف و هحاول احل الوضع بسرعه بس ما تبعديش عني ثاني …. انت ما تعرفيش حالتي كانت ازاي وانتم بعيد عني …. انا هبات هنا النهارده 

:ازاي يا ادهم مش هينفع كفايه كلام والدتك المرة اللي فاتت ارجوك مش هقدر اسمعه ثاني ده جرح-ني قوي 

: انا ظبطت الموضوع ده … بس انت رجعتي ازاي

: وحشتني و حسيت انك وحشت الولاد قلت اننا زرنا ابوهم شهر و هنبقى نسافر تاني لان شغله كثير ومش بيقعد معانا 

:تعالوا في حضني وحشتوني قوي

 :لا خليهم معاك اشبع منهم و هروح احضر العشا هتاكل معايا انا لسه ما اكلتش 

:طبعا انا وحشني اكلك وكل حاجه بتعمليها بس عايز اشبع منك انت كمان 

: هقعد معاك بعد ما يناموا نشبع من حضن بعض 

*ذهبت لتحضر الطعام شرد في جملتها (نشبع من حضن بعض) كيف لم يراها ؟ كيف كانت مخفية داخل مكنونات قلبه دون أن يشعر ؟

*بعد دقائق 

:ايه الريحه الحلوه دي

: بصراحه كان عندي امل انك تاكل معايا فحضرت طاجن الباميه اللي انت بتحبه 

:انت ما فيش منك اثنين انا فعلا جعان

 :طيب هاكلك بايدي وخلي الاولاد على حجرك 

: انا مش واخد على الدلع ده

: دي حاجه تفرحني اني بعمل حاجه ما حدش عملها قبلي 

بقلمي سحر السحرتي 

*نام الطفلين و وضعتهم سماء في السرير الخاص بهم بعدها ضمها ادهم داخل حضنه وقبل راسها و خدها 

:الواحد مش بيعرف قيمه الحاجه الحلوه الا لما تبعد عنه

:وانا حاجه حلوه 

:انت احلى حاجه دخلت حياتي  .. سماء خلينا نتكلم بصراحه شويه من غير زعل … انا حبيتك بس مش درجه الحب اللي واحده في جمالك تستحقه ….بس حاسس مع الوقت انه هيكبر 

:يعني خلاص نسيت لمياء 

: هبقى كد-اب لو قلت اه … عايزك تفهميني حبها كان بيجري في دمي بقاله سنين من واحنا صغيرين فاكيد مش هنساها في يوم وليله

: طب ولو حصل انك اتحطيت في يوم قدام اختيار بيني وبينها هتعمل ايه

: ما فيش مجال للكلام ده لان عمره ما هيحصل

: ادهم رد على السؤال لو سمحت لو رجعت و حبت ترجع لك بشرط انك تسيبني هتعمل ايه 

:ارد على ايه ده من المستحيلات عمرها ما هترجع ولو رجعت مش انا الراجل اللي يملى عنيها

:فهمت خلاص اجابتك وصلت 

: فهمتي ايه 

: خلاص يا ادهم عايزه الحق انام قبل ما حد من الاولاد يصحى و يسهرني تصبح على خير   

: مش هتقعدي معايا شويه زي ما قلتي 

: معلش تعبانه طول اليوم مع الاولاد وكنت بنظف الشقة كانت مقفولة شهر انت ناسي 

*اغلقت الحوار وفي قلبها غ-صه و تخ-وف من حدوث شيء مثل ذلك و متوقعه اجابه ادهم 

*حاول ادهم ضمها داخل حضنه لكنها رفضت ففهم انها لا تشعر بالامان معه لامتناعه عن الاجابه 

*فضل ان يجيبها بافعاله مع الايام 

*في الصباح استيقظت وكانت اثار الدموع في عينيها 

:صباح الخير احضر لك فطار 

:صباح النور لا هفطر مع ماما عشان ما تشكش …. بس مال عينيك

: ابدا ولا حاجه هتقدر تيجي النهارده تقعد معانا شويه 

:هحاول بس مش هبات لازم ابان طبيعي 

:فهماك 

:انت زعلتي

:لا مقدره و فاهمه 

*عاد الى حجرته وخرج وجد والدته قد اعدت الفطار 

:هو انت عرفتي منين اني صحيت

: ماعرفتش كنت داخله اصلا اصحيك 

:مش قلت لك هصحى لوحدي

 :صعبت عليا لا اتعشيت و اتاخرت على الفطار

: طيب يا حبيبتي بس بجد الفتره دي لما ببقى هلكان من التعب بلاش تصحيني انا عندي 

النوم احسن من الاكل 

:طب بقول لك احنا هنروح نقعد عند سماح في البيت بتاعها اصلها زهقت من القعده هنا 

:لا انا مش رايح 

:مش رايح فين مش انت ده انا وسماح 

*شعر بسعاده لم تكتمل حينما أكملت كلامها 

:اه هتطولي هناك 

:اه على ما تزهق من هناك وتحب تغير جو 

:طيب هبقى اجي اطمن عليك

:بقولك ابقى ارجع شقتك يا ادهم 

:ليه ما انا قاعد هنا 

:اصل هرش الشقه اسكت مش لقيت فار دخل الشقة ولسة ما طلعت

: لا والله 

 : بجد ….. وبعدين سماء رجعت والشيطان انت عارفه ما انا فهمتك قبل كده 

*رسم اندهاشه مزيفة

: بجد سماء رجعت امتى

: يعني ما تعرفش رجعت امبارح 

:هعرف منين ما حدش بلغني وهي مش بتكلمني بعد كلامك معاها

 :طيب هبعت لك واحده كل فتره تنظف لك شقتك

: لا ما تتعبيش نفسك انا هتصرف

*قالت بصرامة 

 :ادهم تقعد في شقتك 

:حاضر يا ماما في ايه هو انا عيل صغير 

:مش العيل الصغير بس اللي بيحتاج نصيحه وتوجيه 

:فاهم يا امي حاضر 

*دخل عمار غرفه ادهم لينصحه كما اتفق مع خالته

: ابسط يا عم دي فرصه كويسه تقعد بقى مع مراتك وعيالك من غير خ-وف أو قلق

 :فرصه ازاي 

:انت قدام الناس طالع بيت ابوك وتقوم داخل شقه عمك

: وماما اللي نبهت علي كذا مره اروح شقتي

 :ومين هيقول لها و هنبه على سماح تبلغك قبل ما يرجعوا وانت عارف خالتي بتتحرك دلوقتي بالعافيه يعني عمرها ما هتطب عليك 

:تصدق فكره انت عندك حق انت احلى صديق واخ وجوز اخت وابن خالة

: حيلك مالك مبسوط قوي كده هو انت غيرت رأيك من ناحية سماء انا كان قصدي تقعد مع العيال وتشبع منهم

: تصدق لو قلت لك حاسس اني بحبها من زمان 

: لا مش مصدق اخيرا اعترفت

: انت كنت فاهم 

: يا ابني انا فاهمك أكثر ما انت فاهم نفسك بس عايز أحذرك

: تحذرني من ايه

: سماء قلبها رقيق بلاش تكس-رها كلنا عارفين ظروفها هي تعبت قوي في حياتها خليك جنبها

: مقدرش طبعا اعمل حاجه توجعها

: اتمنى

: بس تفتكر بتحبني زي ما بحبها

: لا 

: يا خسارة 

: بتحبك اكثر ما انت بتحبها كلنا قرأنا ده في عينيها ومن زمان 

: انت بتتكلم جد ما قلتليش ليه 

: دائما كنت بحاول المح للطور اللي هنا

: الطور اللي هنا سمعت منك الجمله دي قبل جوازي من لمياء…. انت قصدك 

: حمد لله على السلامه بقى عندك مخ اسيبك عندي شغل

: استنى بس فهمني 

: ادهم مش محتاج حاجه الرؤية بقت واضحة دلوقتي سلام 

*اوصل ادهم والدته واخته الى مسكنها 

*عاد سريعا و فتح شقة عمه بالمفتاح ونادى على سماء

: ايه ده يا ادهم انت دخلت هنا ازاي طنط ممكن تشوفك

 :عندي مفاجاه هتفرحك قوي قد ما انا فرحان 

*بعد ان اخبرها احتضنته و كأنها اعجبت بالفكره … وهو ايضا احتضنها بقوه 

:وكمان هاخد النهارده اجازه و هقضي اليوم كله معاكم

: ده انا كده لازم احتفل بيك واعمل لك اكله حلوه قوي من اللي انت بتحبها

 :لا ما تضيعيش الوقت في الطبخ هنطلب من بره ومن بكره اعملي اللي انت عايزاه وكمان هعرفك هرجع امتى عشان نتعشى مع بعض دايما 

:  ياااه يا ادهم ده حلم حياتي اعيش معاك كام يوم واحس اني متجوزاك بجد 

:هي دي اقصى طموحاتك

 :انت كنت حلم صعب يتحقق اتجوزتك مع ايقاف التنفيذ وربنا رزقني بأطفال منك كمان… وحاسة أن الاولاد غيروا مشاعرك من ناحيتي

: الولاد دول احلى حاجه عشان منك ومشاعري دائما ما كنتش فاهمها ولا قادر احدد هي ايه بس كانت موجوده 

:خلاص ادخل غير هدومك وتعالى نلاعب الاولاد شويه 

:قصدك اجيب بالاول شنطه هدومي … بس غرفتك صغيره نظفي بقى اي غرفه كبيره عشان ننقل فيها انا وانت 

:الشقه كلها نظيفه يا استاذ اختار اللي تعجبك

 :معقول بتلاقي وقت مع الاولاد للتنظيف

: عادي دي مش شغلانه و باخذها واحده واحده 

:طيب ناخد غرفه ولاد عمي عشان جنب غرفتك نقدر نسمع الاولاد لو عيطوا 

:طيب بسرعه هات هدومك على ما اطلب اكل لينا على ذوقي ولة تحب تطلب انت 

:لا طبعا طول عمرك ذوقك حلو 

*وقبل خدها

*مر اسبوع كان ادهم سعيد بوجوده مع سماء و اطفاله 

بقلمي سحر السحرتي 

*كانت تهتم بجميع تفاصيل حياته كما نصحتها والدته إلى أن طلب منها

: سماء هو ينفع نتعامل كأزواج

: ما احنا عايشين كأزواج مش انت بقالك اسبوع قاعد معانا هو انت ناقصك حاجه  

: ايوه ناقصني اهم حاجه اني اخدك في حضني 

: ما انا كل يوم بنام في حضنك

: سماء بطلي است-هبال بقى يعني انت مش فاهمه قصدي 

: انت قصدك … لا .. لا … مش هقدر انت عارف ليه 

: انا من يوم ما قعدت معاكم أجلت طلبي لما تاخدي عليا شويه و تطمني تعالى نجرب ولو حسيتي انك مش قادره هحترم رغبتك 

: بس يا ادهم 

: من غير بس نحاول ولو فشلنا نشوف دكتوره متخصصة تعالج الذكرى المؤلمة دي و صدقيني هكون حنين معاكي

*لم تستطيع الرفض وأصبح ادهم زوجها بالفعل والقول وكانت لحظاته السعيده عندما يكون بقربها 

*لقد استشعر مدى حبها له و تعلقها به

*بعد ان انتهى من القرب الحلال وجد دموعها فف-زع تصور أنه من الذكرى السابقة 

: سماء انت كويسه 

: اه ما تقلقش 

: انا وجعتك انا كنت حريص اكون حنين معاكي عشان الذكرى القديمة تختفي

: اه انت كنت حنين قوي 

: امال في ايه … الذكري اللي فاتت 

*نظرت له بح-زن ولم ترد

: ارجوك خلينا نتكلم بصراحه عشان نبني حياتنا مع بعض من غير ما حد يشيل من الثاني 

: انت كنت حنين وانت بتدبح-ني

: ازاي مش فاهم 

: انت بجد مش فاهم ما حسيتش قلت لي ايه

: قلت لك ايه مش فاكر

: قلت بحبك يا لمياء 

بقلمي سحر السحرتي 

*وانهارت في البكاء 

: ليه يا ادهم تعمل كده فيا كفايه وجع انا تعبت قوي كان نفسي احتياجك ليا يبقى حب مش رغبة

: صدقيني لو نطقتها بحكم التعود مش بحكم الاحساس 

*ضمها إلى حضنه بقوة 

: اسف يا حبيبتي لو وجعتك بس ذلة لسان ومش هكررها انت وعدتيني تقفي جمبي و تديني وقت 

: بس مش بالتج-ريح ده 

: اسف اسف لو كررتها اطرديني بارة الشقه… اقولك خلي عنتر يعضني 

: هههههه ما تهونش عليا

: حبيبتي طيبه دائما 

: بس فكره اني اطردك فكره كويسه 

: قلبتي ش-ريره 

*ضحكت ومر الخطأ على خير فهي بقلب ابيض سامحته عندما ضمها لحضنه وشعرت بصدق مشاعره

*بدأ في المقارنة بينها وبين لمياء التي كانت دائما تنفر من وجوده وليس القرب منه فدائما سماء تستقبله بالاحتضان و تقبل خده ولا تنفر ابدا من رائحته أو يرى ذلك في عينيها 

*اتصل عمار على ادهم 

:ايه يا كبير محدش بيشوفك ليه كده خالتي هتشك فيك 

:موجود مش عارف اتحرك

: هي المدام محددة إقامتك ولة ايه دى حتى سماء طيبه 

: لا انا اللي ما بصدق اخلص شغل واجري على البيت يا اخي دى انا ما كنتش متجوز

: اشمعنى يعني 

: تخيل سماء بتزعل مني لو نزلت من غير فطار دي مرة قالت لي لو ما فطرتش ما تجيش تبات هنا 

: معقول للدرجه دي هو انت ما كنتش بتفطر قبل كده 

: يا عم لا بفطر ولا بتغدى غير اني مش قادر ابعد عن العيال … تخيل ساعات كريم يزق كارما من حضني تحس انهم بيتخانقوا عليا احساس حلو قوي لمياء كانت حرماني من الحب و الخلفة

: مش قلت لك سماء مفيش منها وياما نصحتك سيبك من لمياء 

:يمكن ربنا عمل كده عشان احس بقيمه سماء

: يا ابني انا نفسي حاسس بقيمه سماء

 :ده انت رخ-م و قفيل اقفل… اقفل 

:استنى بس سماح عايزه تشوف العيال وحشوها  قلت لها هروح اجيبهم وقلت قدام خالتي انك هتيجي معايا عشان مش هينفع اطلع لسماء لوحدي

:خلاص هنستناك 

*ذهبوا جميعا لسماح و قضوا الوقت في الضحك واللعب مع الاطفال

*همست فوزيه في اذن ادهم 

: بتبات فين يا ادهم 

: في شقة مراتي والله 

*امسكت ضحكتها فهي تفهم 

:شايفة يعني العيال واخدين عليك كأنهم بيشفوك باستمرار 

: اه ساعات ببعت الصبي اللي عندي ينزلهم من عند سماء العب معاهم شويه 

: طب وعلى ايه وجع القلب ده ما تتجوز واديك شفت العيال حلوين ازاي 

: حاضر يا ماما هدور على واحده كويسه 

: كانت قدامنا و ضيعتها جتك وكسة

: ايه يا ماما مش تشبعي من العيال قبل سماء ما تروح

*توجهت بالكلام 

: صحيح يا سماء ما تباتي معانا النهارده اصل العيال وحشوني قوي 

: معلش يا طنط مقدرش مش عامله حسابي وجوزي مش هيوافق ابات في مكان فيه راجل 

: هو عمار غريب وبعدين جوزك مسافر هيتحكم فيك وهو بعيد

: حقه يغ-ير عليا اصله طلع بيحبني قوي

*فنظر لها بإعجاب من مراعاة شعوره فهو فعلا يغير عليها من نفسه 

: يا بنتي اسمعي الكلام اقعدي معانا يومين منه تغيري جو انت والعيال ومنه نشبع منهم

ادهم: في ايه يا ماما ممكن تعمليلها مشكله مع جوزها

: وانت مالك محموق كده ليه 

: هتبقي مبسوطة وهما زعلانين مع بعض 

: يعني انت مش هتوافق مراتك تبات وعمار زي اخوها

: لا مش هوافق ايه اللي يخليها مش واخدة راحتها في بيتها

سماح: خلاص يا ماما لو العيال وحشينك قوي نرجع بيت بابا 

ادهم: ترجعي فين دى هوا شقتك خلى وشك ينور و كلبظتي وبقيتي فله

: ايه كلبظتي دي و حساك مش عايزني ارجع عند ماما 

: لا ازاي بس حسيت ان هنا في طاقة إيجابية إنما هناك البيت قديم ومليان طاقة سلبية هتتعبك

: هههههه انت شايف كده 

: قوي صح يا عمار 

*و غمز له كي يؤكد كلامه

: طبعا خلينا نشبع من شقتنا شويه ما تنسيش هتولدي و تقعدي عند خالتي فترة 

سماح : ماشي اللي تشوفوه انا كنت عايزه ماما تشبع من العيال 

ادهم: كل ما تحب تشوفهم هبقى اخلي الصبي عندي ياخدهم من سماء واجبهم حتى تريح منهم شويه 

فوزيه: الام مش بتستريح بعيد عن عيالها عموما ابقى هاتهم انت وعمار زي ما عملت النهارده وسماء تكون معاكم

*عادت سماء الى المنزل مع ادهم فاحتضنها على غير العادة 

: عشان ايه الحضن ده

: عشان رفضتي تباتي عند ماما وما حطتنيش قدام الأمر الواقع لانك عارفه اني مش هقدر اعترض

: انا فعلا مش بحب ازعلك بس معلش اضطريت اكدب و اقول انك بتغير و بتحبني قوي عشان يقتنعوا

: انت ما كدبتيش انا فعلا بغير وبحبك أكثر ما انت حاسة

بقلمي سحر السحرتي 

*مر على وجود ادهم مع سماء شهرين كان الاطفال أتموا ٦ شهور وايبوعين 

*وفي يوم كاد ان يدخل الشقه لولا انها ص-رخت بصوت ضعيف 

:استنى ادخل بالراحه 

*فهمس لها :ايه في ايه

: اقعد على الارض و ازحف وانت قاعد 

:ليه همسح الارض

: ما تسمع الكلام وانت ساكت وبعدين انا اصلا لسه ماسحه كويس 

:طب فهميني في ايه 

:هتشوف دلوقتي بنفسك مفاجاه تحفه 

*وجد الطفلين يزحفون بالمقعده وسماء تقلدهم وهم يضحكون 

*فزحف مثلها حتى ارتمى كريم داخل حضنه وبعدها كارما 

*قام كريم بجذب شعر كارما فأنبته سماء

 :واد يا زف-ت مش هتبطل حركتك دي هض-ربك  

*نظر له ادهم بحزم 

:كريم حبيب بابا كخ كارما لا اختك حبيبتك

*فضحك كريم و كارما

: شفت متغاظ ازاي من كارما عشان شعرها طالع حلو زي شعري وشعره طالع اكرت لشعرك 

: نعم هو مين ده اللي شعره اكرت

: ما تركزش

 *تحدث ادهم بحماس

: بس ايه المفاجاه الحلوه دي 

:شفت من الصبح واحنا بنلعب مع بعض كده

 :انا كمان عندي مفاجاه بس بعد الغداء

: غداء … غداء ايه … هو مين اللي غداء ده

:انت ما طبختيش

:اسفه قعدت العب معاهم ونسيت

: ولا يهمك يا حبيبتي اطلبي حاجه على ما استحمى واغير هدومي

 :بهزر معاك وانا اقدر ااكل حبيبي من بره عملت مكرونه و بانيه حاجه في السريع كده 

*امسك يدها وقبلها

 :انت نعمه كبيره ربنا يقدرني و اسعدك 

:هجري اجهز الاكل وانت خلص عشان اعرف المفاجاه شوقتني 

*بعد الغداء جلس على السرير وفي حضنه كريم وهي تحتضن كارما وفتح اللاب توب على بعض الصور لكمبوند

: ايه ده يا ادهم انا مش فاهمه حاجه

 :دي فيلا صغيره في كومباوند مع جنينه ايه رايك 

:شكلها حلو قوي بس مالها دي

: هشتريها

: ليه

: هنعيش فيها عشان الاولاد تقدر تكبر وتلعب في مستوى يليق بيهم والشمس تدخل غرفهم 

:وماله هنا

 :المنطقه اتغيرت عن زمان وبقوا الاطفال في الشوارع بتقول الفاظ مش عايز اولادي يكبروا وهما بيسمعوها … ايه رايك اشتريها ولا نشوف حاجه ثانيه

: هو انت هتشتريها و تنقلنا هناك و تيجي معانا 

:طبعا امال هتروحوا لوحدكم 

:والناس هناك هتعرف انك جوزي وانك ابوهم 

:لا الناس هناك مش هتعرف 

*بدأت الدموع تلتمع في عينيها فضمها الى حضنه واعاد 

:الناس هناك مش هتعرف بس وهنا كمان هيعرفوا يا حبيبتي انا خلاص ما اقدرش استغنى عن البيت و الدفا وحبك … هعلن للناس كلها انك مراتي وان دول ولادي

: طب و هتقول لهم ايه

:هقول اني خبيت عشان صحه عمي لو عرف كان ممكن يزعل انما هو دلوقتي اتحسن و فاتحته و اقنعته وفرح لنا

: وانت هتعمل كده فعلا 

:لا طبعا

 *بدأت الدموع من جديد تلتمع في عينيها 

:ايه يا حبيبتي سيبيني اكمل انا بقول لك لا طبعا لاني عملت فعلا وهو فرح قوي وقال لي ان المره دي احسنت الاختيار

*ارتمت داخل حضنه 

:بجد يا ادهم انا بحبك قوي

 :وانا كمان بحبك قوي غير اني عندي مفاجاه كمان

: لا كده كثير عليا 

:انا نويت افتح مكتب هندسي و هشتغل مهندس 

:نعم ليه هو انا اشتكيت لك 

:مش عشانك عشان ولادي ما حدش فيهم يحس بالخجل ان ابوه جزار

: طب وبابا

:بلغته وموافق

:ايه سر التغيير ده انا عارفه انه كان سبب الخلاف بينك انت و طليقتك وياما طلبت منك تشتغل مهندس و تنقلوا من المنطقة 

: هههههه مش عايزه تقولي اسمها … اه كان سبب الخلاف 

:وعارفه كمان انك كنت بتنفذ لها كل طلباتها لكن ده كان مرفوض تماما

 :عندك حق بس لو كانت بتطلبه باسلوب كويس او لو كنا خلفنا يمكن كنت فكرت وعملت زيي دلوقتي 

: متأكد انك بتعمله عشان الولاد 

: كلميني بصراحه ليه بتقولي كده 

: يعني مش بتعمله عشان لما يوصل لها الخبر تندم انها سابتك

: سماء هي دلوقتي انتهت من حياتي نهائي ولا بقت بتعدي على تفكيري لحظه واحده 

:انت مقتنع بالخطوه دي انا بالنسبه لي ما فيش مشكله ولما الاولاد يحسوا ان امهم فخوره بأبوهم هما كمان هيبقوا فخورين 

:عارف ومتأكد بس لازم اعمل مستقبل افضل لاولادي لان روحي بقت فيهم 

:طيب هنروح نزور مامتك امتى و نبلغها

:انا لسه راجع من عندها واخر الاسبوع هترجع شقتها مع سماح عشان هدب-ح واعمل حفله ابلغ الناس بجوازنا و ان صحه عمي اتحسنت و هيرجع قريب … و هعمل لك فرح اول ما يرجع عشان يسلمك ليا

: انت بتهزر فرح ايه و معانا عيالنا

 :عايز اعوضك و تلبسي فستان الفرح اللي مامتك كانت مفصلاه ليكي … انا شفتك وانت بتطلعيه من الدولاب تتفرجي عليه ودموعك بتنزل

: انا كنت بعيط عشان ماما كانت بتبقى وحشاني

 :يعني مش عشان حرمتك من حاجات كثير

: لا طبعا

:بطلي كد-ب انا عاشرتك فتره قصيره بس سهل الواحد يفهمك ولازم اعوضك

: عوضني بحبك بس يا ادهم وخليك دائما معايا … اوعى تسيبني

: انت اللي اوعي تسيبيني … هتوعديني الوعد اللي رفضتيه 

:اوعدك يا ادهم انا اسيب روحي ولا اسيبك 

:وانا اتمنى اكون جاوبتك على سؤالك بالفعل مش بالكلام

: سؤال ايه

 :لو اتحطيت في اختيار بينك وبين لمياء 

:معقول هتختارني انا كنت متوقعه العكس عشان كده ما ضغطتش عليك في الاجابة

 :حسيت ومهما جاوبتك وقلت هختارك انت كنت هتفضلي مش مطمنه فضلت اطمنك عملي 

*قامت باحتضانه والبكاء داخل حضنه

 :لا ده مش وقت عياط

: امال وقت ايه 

:نيمي العيال وتعالى اقول لك ده وقت ايه

*لك-مته في كتفه بخفة

 *قام ادهم بتنفيذ كل ما اتفق مع سماء عليه وكان في انتظار وصول عمه 

*تأجل وصول عمه شهرين ففضل ادهم الانتقال الى الفيلا مبكرا كي يستطيع اطفاله الجلوس في الشمس والهواء النقي في حديقه الفيلا

 *قام بتوظيف مربيه لتساعد سماء ومساعده لامور المنزل فقد ارادت سماء العوده لعملها الذي تحبه مع وعد  انه لن يؤثر على بيتها 

*عادت سماء للعمل في العياده البيطريه وليس المزرعه فهي لم تعد تناسبها واصبحت بعيده عن مسكنها

 *اعد ادهم بيت لعنتر في الجنينه و فاجئ سماء بذلك 

*انشغل ادهم في تاسيس مكتبه 

*عاد ذات يوم وجد والدته تجلس في الجنينه

: خير يا ماما في حاجه مالك 

: مخ-ضوض كده ليه 

:مفيش اصل ما اعرفش انك هنا

 :الولاد وحشوني كلمت سماء تجيبهم جت اخذتني انا وسماح وقالت ان فاضل عليها كام يوم وتولد عشان تبقى معاها وانها مش هينفع ترجع بالعيال هناك لان شغلك بقى قريب من هنا 

:هي عملت كده كل يوم احترامي لها بيزيد 

: سماء طول عمرها بنت اصول و بتعتبر سماح اختها ما تخليش احترامها بس اللي يزيد حبها كمان

: انا فعلا بحبها قوي

: متأكد يا ادهم

: ليه بتقولي كده

 :ابدا بطمن عليك 

:هروح اغير وارجع لك

 *دخل وجد سماء تنتظره وعينيها ممتلئه بالغ-ضب

 :في ايه مالك 

: بتخ-وني يا ادهم

:انا … انت مج-نونه مين قال لك كده 

:ما حدش قال لي انا اكتشفت لوحدي

$ هل فعلا ادهم يقوم بخيانة سماء؟ وما المعنى الخفي من وراء كلام والدته؟

& الحلقه الجايه فيها مفاجاه كبيره للجميع

• تابع الفصل التالى ” رواية أحببت من لا يرانى  ” اضغط على اسم الرواية