رواية فرصة اخيرة الفصل الثانى 2 – بقلم رنا سليمان

رواية فرصة اخيرة الفصل الثانى 2 – بقلم رنا سليمان 

“٢”

_عايزه تدافعي عني وانا متهم في قضية قتل جوزك ازاي يا ريم!

_معنديش حل تاني غير كدة علشان اعرف الحقيقة……..عمو جمال ادي القضية لمحامي تاني غيري وانا كدة مش هقدر اعرف اي حاجة عن القضية الا لو كُنت المحامية بتاعتك يا كارم……..اهم حاجة عندي اني اعرف مين القاتل الحقيقي وياخد جزائه سواء انت او غيرك

_صدقيني يا ريم انا معملتش كدة………انا اه اتخانقت مع مازن واه رفعت عليه المسدس لكن والله مش انا اللي عملت كدة انا حتي مش فاكر اية اللي حصل بعد كدة

_لازم تفتكر يا كارم اللي حصل علشان اقدر اساعدك واساعد نفسي اني اعرف القاتل الحقيقي……….قولي كل اللي حصل يا كارم من غير ما تنسي حاجة 

_حُبك ليه هيخليكي مش مصدقة اللي هقوله

_المطلوب منك انك تقولي اللي حصل ………اني اصدق كلامك او لا دي بتاعتي انا مش بتاعتك انت………ممكن من فضلك تحكيلي

_حاضر………امبارح الساعه ٨ تقريبا جاتلي رساله علي تلفوني وكان مكتوب فيها “مازن صاحبك في شقته اللي هيتجوز فيها ومعاه واحدة لو بتحبه فعلا حاول تروحله وتعرفه ان اللي بيعمله دا هيخسره حياته وان مراته متستحقش دا”

_ثانيه واحدة………وهو مين اللي هيبعتلك الرسالة دي وليه اصلا يبعتلك انت اصلا مش انا

_ساعتها انا كمان استغربت ومكنتش فاهم حاجة……..اتصلت بيه وسألته هو فين قالي انه في الشقه بيجهز حاجات فيها علشان الفرح بكرة…….ساعتها قفلت الموبايل ومهتمتش بالرسالة وقولت اكيد واحد بيهزر …….كملت شغلي عادي لحد ما اتبعتتلي رسالة تانية من نفس الرقم الغريب وكان فيها صورة لمازن وكان مع بنت وكان حضنها وباين عليه انه مبسوط ومكتوب تحت الصورة “لاخر مرة هحذرك لو مقولتش لصاحبك يعقل ويبعد عن السكة اللي ماشي فيها دي هتكون دي نهايته وبدل ما يخش دنيا هيخرج منها لو فكر يكمل في اللي بيعمله دا وكمل في اذية ريم

_هو انا المفروض اصدق الكلام الفارغ اللي انت بتقوله دا………وهو مين اللي هيبعتلك رسايل تهديد بالشكل دا وبيقول بكل وضوح انه هيقتل مازن………وبعدين اصلا في الوقت اللي انت بتقول عليه دا كان مازن بيكلمني ازاي كان بيخوني في نفس الوقت اللي كان بيكلمني وبيقولي انه اسعد واحد في الدنيا علشان فاضل كام ساعة وبس وهنكون لبعض ………اصدقك انت ولا اصدقه هو 

_حضرة الظابط اخد مني التلفون لو حابة تشوف الرسايل بنفسك اتفضلي ………انا عمري ما هكذب عليكي يا ريم انا بحكيلك اللي حصل بالظبط

اتنهدت وغمضت عيني وانا مش قادرة اصدقه وفي نفس الوقت معنديش حل تاني غير اني افضل معاه للاخر واحاول اوصل للحقيقة 

_كمل

_حاولت اكلم الرقم اللي اتبعتتلي منه الرسالة وافهم هو مين وعايز اية منكم بس كان خارج الخدمة ………جريت علي العمارة اللي انا ساكن فيها واللي انتو كمان كنتو هتسكنوا فيها……..طلعت علي الشقه بتاعتكم وقعدت اخبط……..فتحلي بس بعد تلات دقايق تقريبا اول ما فتح بصلي ب استغراب وكان باين عليه القلق

يوم الحادثة 

_كارم………في حاجة ولا اية

_مالك يا مازن متوتر كدة ليه

_لا ابدا……..ولا متوتر ولا حاجة انا بس مستغرب انت جاي تعمل اية هنا

_انا جاتلي رسالة غريبة وقولت اجي اوريهالك يمكن تعرف حاجة عنها

_رسالة ………رسالة اي دي وبعدين انا مالي بالرسايل اللي هتجيلك يعني

_مهي رسالة تخصك وتخص ريم كمان

_تخصني انا وريم! رسالة اية دي يا كارم

فتحت تلفوني وفتحت الرسايل وورتهاله فضل باصص فيها شوية وبعدين اداني التلفون 

_اي الهبل دا بس يا كارم انت هتصدق الكلام الفاضي دا يعني دا تلاقيه واحد بيهزر بس هزار بايخ شوية

_مانا كنت فاكر كدة في الاول بردو بس لما شوفت صورتك اتاكدت ان دا مش هزار يا مازن

_لا يا كارم الصور دي مش حقيقية متخافش انا اكيد مش هعمل كدة لاني بحب ريم ولا يمكن اخونها

_متاكد انك بتحبها يا مازن

_قصدك اي يا كارم اكيد طبعا بحبها

بدات احس بدوخة وبقيت شايف كل اللي حواليا منغمش ………حاولت امسك في اقرب كرسي قدامي قبل ما اقع وكملت كلامي 

_قصدي انت فاهمه يا مازن………انا وانت عارفين كويس اوي انك عمرك لا حبيت ولا هتحب ريم كل الحكايه انك بتحب فلوسها وبس واتجوزتها علشان تكتبلك كل حاجة ب اسمها ليك انت وساعتها كنت هتطلقها

بدا يعلي صوته

_انت اتجننت يا كارم ايه اللي بتقوله دا………انا عمري ما افكر كدة انا بحب ريم بجد وعُمري ما فكرت في اللي انت بتقوله دا 

باب اوضة من الاوض اتفتح وخرجت منه واحدة…….مكنتش قادر احدد ملامحها ولا كُنت شايفها كويس شاورت عليها وانا بحاول امسك نفسي قبل ما اقع

بدا يعلي صوته اكتر

_انا مش قولتلك متطلعيش من جوا لحد ما اقولك

_هو دا اللي بتحبها يا مازن……..هو دا اللي عمرك ما هتزعلها………بس الغلط غلطي انا ……..انا اللي صدقتك وصدقت انها هتحبها بجد ومبعدتكش عنها من الاول انا اللي غلطان من الاول 

_بقولك اي يا كارم انا وانت فاهمين بعض كويس انت عارف اني هتجوزها علشان فلوسها وعلشان طمعي بس انا كمان عارف السر اللي عندك واللي انا واثق كويس اوي اني لو قولته ل ريم هتخسرك وهتنسي انك كنت في يوم اقرب واحد ليها بعد اهلها………احسنلك تسكت زي ما انا كمان هسكت علشان كل واحد يعيش مبسوط في حياته

لمحت مسدس علي الترابيزه ……..مكنتش فاهم اي اللي يخلي مازن يبقي معاه مسدس وبيعمل بيه اية اخدت المسدس ووجهته ناحيته 

_انت بتعمل اية يا كارم……..اعقل يا كارم اللي بتعمله دا هيخسرك حياتك وحياتي اعقل وتعالي نتكلم بالعقل

“ريم”

_وبعدين……..كمل

_مش فاكر……..دي كانت اخر حاجة فاكرها وبعدها لقيته مرمي علي الارض وغرقان في دمه وانا مرمي جمبه وفي ايدي المسدس………حاولت اهرب من المكان بس لقيت الباب مقفول بالمفتاح ومش عارف مين اللي قفله يمكن تكون البنت اللي كانت معاه وشافت كل حاجة 

_انا مش عارفه اصدقك ولا اعمل اية……….مش قادرة اصدق كلمة من اللي انت قولته دا وفي نفس الوقت لازم امشي معاك للاخر علشان اعرف الحقيقه فين

_دا اللي حصل بجد يا ريم انا ولا زودت كلمة ولا نقصت كلمة كل اللي حصل قولته بالحرف

اتنهدت بتعب وحاولت اتماسك قدامه واتكلمت

_الكلام اللي انت قولت دلوقتي دا قولته لاي حد تاني

_الظابط حاول يخليني اتكلم بس انا مقولتش اي حاجة 

_تمام………مينفعش اي حد مهما كان مين يعني اللي انت قولته دا يا كارم………ايا كان هو مين

_مش محتاجة تقولي

_في سوال تاني عايزة اسألهولك ………انت قبل ما تروح ل مازن اكلت او شربت اي حاجة في المستشفى 

_كان في شوكلاته عندي علي المكتب لما خرجت من العمليات لقيتها عندي  وكان معاها ورقة مكتوب فيها حاجة بس انا مش فاكر كان مكتوب عليها اي بصراحة

_اكلتها كلها 

_ايوة لانها مكنتش اتغديت قبل العمليه وطلعت منها جعان ف لما شوفت الشوكلاتة علي مكتبي اكلتها ……….هي ممكن يكون فيها حاجة فعلا

_علي كلامك دا اكيد كان فيها حاجة وعلشان كدة انت مش فاكر اي حاجة من اللي حصلت في اليوم دا………علي العموم متقلقش انا هحاول اعرف كل حاجة وانت لو افتكرت اي حاجة يا كارم قولي لو سمحت 

_ريم………انا معنديش مشكله اني اكمل باقي عمري هنا او حتي اتعدم بس الاهم بالنسبة لي انك تكوني واثقة ومتاكدة اني عمري ما هعمل حاجة تاذيكي ابدا

هزيت راسي ب ماشي

_هنشوف يا كارم اكيد لو انت مظلوم هيبان 

سيبته وخرجت وانا في دماغي الف سوال ومش لاقيه ليهم اجابة ولا هقدر اعرف اجابتهم لان اللي عنده الإجابات دي مبقاش موجود خلاص

خرجت من القسم وركبت العربية……..بدات اعيط وانا مرجعه راسي ل ورا ومش عارفة اعمل اية واللي بعمله دا صح ولا غلط…….بصيت في الساعه لقيتها ١١ الا ربع ………سوقت لحد المقابر علشان اشوفه لاخر مرة قبل ما يمشي ومشفهوش تاني

في قصر كبير ……..قاعد في اوضة فيها كذا شاشة وكلهم جايبين صور ريم وهي في العربية ……..كُنت قاعد بكلم الصورة وانا بعيط 

_سامحيني يا ريم ………كل اللي عملته دا علشان مصلحتك ………كان لازم اخلصك من اللي اسمه مازن دا لانه كان عايز يدمرك ……….وكمان انا مش واثق في كارم علشان كدة عملت كدة……….كل دا علشان اشوفك مبسوطة وعايشة حياة سعيدة……….يمكن مش هتفهميني دلوقتي بس الاكيد انه هيجي يوم تعرفي فيه ان كل دا كان علشان مصلحتك انتي

…….يتبع…….

فرصة_اخيرة 

رنا_سليمان

• تابع الفصل التالى ” رواية فرصة اخيرة  ” اضغط على اسم الرواية