رواية أحببت من لا يرانى الفصل الثالث والعشرون 23 – بقلم سحر السحرتي

 رواية أحببت من لا يرانى الفصل الثالث والعشرون 23 – بقلم سحر السحرتي 

احببت من لا يراني 

حلقة ٢٣

*اخرجت سماء لعبه ذات الوان زاهيه فتنفس ادهم بارتياح و رد بخ-بث 

:يااااه لقيتيها فين كانت ضايعة مني

:لا والله هتعملهم عليا لقيتها  جنب المسجل ده … بقى انت لما بنعمل سباق للعيال ونشوف هيزحفوا و هيروحوا لمين انت بقى تقعد تشاور لهم بيها واقول العيال بتحبك اكثر .. غير المسجل اللي بتحطه جنبهم وتشغل كلمه بابا عشان ينطقوها قبل ماما

*ضحك من قلبه كعادتها تغير مزاجه للاحسن

:الحرب خ-دعه وبعدين انا استخدمتها كام مره وبقوا بطبيعتهم بيزحفوا و يجروا عليا لوحدهم 

*امسكته من شعره و جذبته 

:انت مفكرني هافيا انا بسيب حقي بمزاجي إما نسيتهم اسمك خالص ماشي يا ادهم

*ضحك بشدة وهو ينزل يدها من على شعره

: بس ايه المفاجاه الحلوه دي ماما وسماح 

:لا وكمان عمار هههههه 

:انت بتس-تهبلي عمار ازاي يقعد معانا يعني

*امسكته من ياقة قميصه وهي تدلل 

: انت بتغ-ير عليا يا دومتي

: اكيد يا حبيبتي اينعم عمار اخويا بس ما يصحش يقعد معانا

:لا هيجي يزورها ويمشي … بس هيتغدى معانا النهارده

: امال هو فين 

:معاها جوه في اوضتها بيطمن عليها 

*وفجاه وجد اطفاله يزحفون سريعا اليه عندما سمعوا صوته

: شفتي بقى لا سحر ولا شعوذه سمعوا صوتي لوحدهم جايين 

: ما انكرش طبعا ان روحهم فيك عيال هب-لة زي امهم

: وانا بم-وت في الهب-لة وعيالها

: نعم 

*جذبها واحتضنها هذا الحضن الذي ينسيه تعب اليوم كله

*حمل الصغيرين ودخل يبدل ملابسه وعاد وهو يلاعبهم وجلس بجانب والدته

:شايف يا ادهم الخلفه حلوه ازاي 

:بصراحه ما كنتش متخيل ان ممكن احبهم بالشكل ده و اتعلق بيهم …. لما سماء اختفت شهر ما كنتش طايق نفسي 

:حافظ عليهم يا ابني

:من ساعه ما وصلتي حاسس بحاجه غريبه في كلامك ما تقولي عندك ايه دوغري انا حافظك يا فوز

: ابوك قال لي ان لمياء قررت ترجع مع عمك لان جوازتها باظت وطلع عندها مشاكل في الحمل بسبب الحبوب اللي اخذتها زي اختك بس هي حالتها اصعب 

:طب وانا مالي ترجع او لا

: يعني مش هتحن لو شفتها ونرجع لنفس الدوامة

: انا عندي سماء واولادي بالدنيا ما اقدرش استغنى عن حد فيهم 

*استمعت سماء الى اخر حوارهم وزادت مخاوفها لا تدري هل فعلا هو صادق ؟ ام مجرد كلام يطمئن والدته به 

*ندهت عليهم

:يلا يا ادهم يلا يا طنط الغداء جاهز 

: قلتي لعمار وسماح

: اه و سبقونا على السفره 

*جذبها لحضنه وهم في طريقهم لتناول الطعام فقد لمحها وهي تسمعهم كي تطمئن لكنه لا يعلم النساء جيدا 

*شعرت سماح ببعض الالم 

عمار :اوعي تكوني هتولدي استني بس لما ناكل هههههه 

سماء : حلو رزقك في رجليك اطمن يا عمار هولدها لك 

:نعم يا اختي انت مفكره مراتي جام-وسه من اللي بتولديهم

:دى انا ايدي حنينة اينعم انا بقالي كثير بعيد عن الملاعب بس هفتكر واحده واحده

: ادهم ابعد مراتك عن مراتي

ادهم :يا ابني بدل المصاريف و البهدله ومراتي دكتوره شاطره قوي 

سماح :انتم سايبيني بتألم و عمالين تهزروا قوم يا عمار وديني المستشفى الناس دى جيبني يعذب-وني مش يخدموني

سماء : طب استني اكشف عليك الاول 

:بنت انت ابعدي عني

: هههههه بتكلم بجد ممكن تكوني لسه بدري هتقعدي هناك و تزهقي أو تمشورينا على الفاضي 

: اشمعنى انت رحتي المستشفى على طول

 :يا بنتي انا ما كلمتش الاسعاف الا لما الميه نزلت وقعدت كتير بتألم 

فوزيه :صح يا سماح اول ولاده بتتاخر و بتاخذ وقت

سماء :تعالي بس جوه اشوفك انا شاطره يا بنتي والله ما تخا-فيش 

*بعد ان كشفت عليها

: انت اكلتي حاجه عملت لك غازات ده مش طلق ولاده …. ادخل يا عمار لازم اكلها اليومين دول يتظبط وانا هظبطها 

عمار:عامله ايه دلوقتي يا حبيبتي 

:الحمد لله احسن ما فيش اي حاجه

 :ايه ده يا سماء انت طلعت بتفهمي 

:نعم يا اخويا طول عمري بفهم اقعد بقى جنبها شويه على ما اعمل لها مشروب يهديها

ادهم: شفت حبيبتي احسن دكتوره ازاي

عمار: ولو معاها دكتوراه من بارة مش هتولد مراتي انت فاهم 

*ضحكوا جميعا وكالعادة سماء دائما تجلب المرح والسعادة للجميع 

*بعد عده ايام رزقت سماح بولد جميل اسمته عمر 

سماء :مبروك يا موحه ادهم ناوي يعمل لك عقيقه كبيره بس بعد عشره ايام يكون بابا نزل و باباك كمان نازل معاه عشان يطمن عليك

*كانت تتحدث بشئ من الحزن والقلق فهمتها سماح لعشرتها وصداقتها الطويلة

:انت كويسه

: اه ليه بتقولي كده ده انا مبسوطه انك قمتي بالسلامه ولسه ادهم مبلغني خبر العقيقه 

:يمكن عشان كده … سماء ادهم بيحبك 

:تفتكري لو شافها هيحن لها وينساني

:استحاله شفتي انت غيرتيه ازاي … الكام يوم اللي قعدتهم معاكم شفت ادهم مختلف عمري ما كنت اتصور ضحكته حلوة كدة ووشه منور من السعادة 

:هو اللي كان عايز يتغير بسبب الال-م اللي هي سبتته له … غير أنه بيحب الولاد قوي 

: و بيحبك انت كمان انا عارفه بقولك ايه

*أرادت تغيير الموضوع حتى تفرح صديقتها بمولودها فابتسمت

: سيبك مني الواد ده هيتجوز بقى كارما

:مش هلاقي طبعا احلى منها بس هتبقى اكبر منه بسنه 

:صحيح يلا هي و حظها و يا رب يطلع حظها احسن من حظ امها 

:انت مش مريحاني خالص

:انا هروح اجيب لك اكل ما تاخديش في بالك

*ذهبت ودخل عمار 

: عامله ايه يا حبيبتي دلوقتي 

: احسن الحمد لله بس قلقانة على سماء 

: ليه مالها دى اسعد مننا بولادتك

: انت عارف ان لمياء هترجع

: ما ترجع فيها ايه ما كان مسيرها ترجع اصلا 

: سماء خاي-فه ادهم يرجع يحن لها

: تفتكري ما اظنش انا شفت حبها في عينيه 

: ربنا يخيب ظننا احسن سماء هت-توجع قوي انا حاسه بيها ومش عارفه اطمنها ازاي 

: انت مهما تقولي عمرها ما هتطمن

: امال الحل ايه انا بحسها قلقانة قوي ممكن يجرالها حاجه من التفكير 

: مفيش غير اني اكلم ادهم يطمنها بالحب 

: يا ريت يا عمار 

*دخلت سماء ومعها الطعام 

: الاكل يا ام كلالا لازم يتمسح كله العيل ينزل من هنا يتحط مكانه فرخة بلدي

: هههههه طب ما انت ولدتي اثنين ما حطيناش مكانهم حاجه وكنت مغلباني في الاكل 

: انا طول عمري ظروفي غير باقي الناس … هسيبك تأكلي انت وعمار

*بعد ان خرجت 

: شفت يا عمار مش قلت لك 

: فعلا واضح عليها 

*دخل عمار مع ادهم في غرفه المكتب 

: ايه يا عمار مدخلني هنا عايز اشوف العيال 

: لا شوف ام العيال الأول 

: سماء مالها 

: هو انت مش حاسس انها متغيرة شويه 

: اه اصلها بتعمل مجهود الشغل والعيال وسماح

: ادهم انت عمرك ما كنت غ-بي

: اه فاهم  … هي قلقانة ومتوترة أن لمياء راجعة حاسس بيها بس مش عارف اعمل ايه 

: انت شايف انها قلقانة ومتوترة بس دى الحزن هينط من عينها

: وانت بقى مراقب مراتي عشان تلاحظ عينيها

: مش انا اللي لاحظت يا ح-مار سماح اللي قالتلي اقولك لان سماء مقيمة معاها مش عارفه تكلمك … وبعدين تعالى هنا انت بتغير عليها مني

: بصراحه بغير عليها من الهوا

: انت ما كنتش كدة مع لمياء 

: مش عارف حبي لسماء مختلف احساسي بيها مختلف تصدق اوقات بغير عليها من كريم ابني وهي بتبوسه 

: حد يغير من ابنه 

: مين فينا اللي حم-ار دلوقتي بغير من اسمه عشان خطيبها 

: خطيبها مات خلاص خلينا في طليقتك اللي جاية

: دلني اعمل ايه 

: حبها اكثر يا ادهم كدة هتطمن

*نفذ ادهم نصيحه عمار ولكن هيهات فقد كان القلق يتملك منها شيئاً فشيئا 

*يوم احتفال العقيقه عاد من 

السفر سلطان وعاصم ولمياء وكان في استقبلهم عمار وذهب بهم الى منزل العائله لان ادهم مشغول مع تحضيرات العقيقة 

*عاد الجميع الى منزل العائله ليحضروا الحفل بجانب احبابهم في المنطقة 

*التقت سماء بسلطان وقبلت يده و احتضنته 

:وحشتني قوي يا بابا حمد لله على سلامتك … مبسوطه انك رجعت تمشي تاني ونورت دنيتنا

*همس سلطان :انت كمان وحشتيني يا سماء بس زعلان منك ما لقيتيش غير بنتي عشان ترسمي على جوزها … وقت العتاب هأجله لبعدين عشان الناس و الحفله 

*اجتمعت الدموع في عين سماء وشعرت بص-دمة كبيرة من كلامه 

:انت بتقول ايه يا بابا انت تعرف عني كده

: قلت مش هعتب عليك دلوقتي لينا قاعده طويله مع بعض خلي الناس تفرح بالمولود

:حاضر يا بابا 

*تظاهرت انها منشغله باولادها وذهبت لاخذهم من يد عاصم

:عن اذنك يا عمي عشان اغير لهم و يناموا ده ميعادهم

فوزيه :نيميهم في اوضه ادهم عشان بعيد عن الدوشة

:حاضر يا طنط 

*بعد أن ناموا خرجت من الغرفه في حين ان ادهم انتهى وصعد ليسلم على الجميع بعد انتهائه من الذب-ح

*كانت سماء تتابعه بنظراتها وهو يسلم على لمياء والن-ار تاكلها من الداخل 

*ارادت سماح انقاذها فندهت عليها 

:تعالي شوفي عمر يا سماء

: ماله يا سماح ممكن تستني شويه ولا مستعجله

: اه مستعجله ادخلي شوفيه

 *بعد ان دخلت

: في ايه بتدخليني ليه ابنك نايم 

:هي دلوقتي بالنسبه له بنت عمه وبس وانت عارفه عمه بالنسبه له اغلى عليه من ابوه 

:عارفه هو انا قلت حاجه

: امال الدموع اللي في عينيك دي ايه

:ولا حاجه يا سماح

بقلمي سحر السحرتي 

*احتضنتها بحب 

: ولا حاجه ازاي انت عارفه انا بحبك اكتر من اختي قولي مالك

: انا كنت بسلم على بابا قال لي كلام غريب

 *وبعد ان علمت ما حدث

: يظهر انها قدرت تقلبه عليك طول عمرها بتعرف تقلبه على اي حد وهي هناك كانت معاه فتره طويله… بس انت ما تسكتيش لازم يعرف اللي حصل وسبب جوازكم بدل ما يظ-لمك

:يعني هف-ضح نفسي

:خلاص ادهم اللي يحكي له 

:لا احنا بعد الغداء نمشي على طول مش قادره اقعد حاسه ان في حاجه بتخنقني

: اهدي كده واستغفري دى شيطان بيلعب بيكي 

*سمعوا نداء فوزيه لهم

: تعالوا بقى الاكل وصل

 *جلس الجميع يضحك ويتكلم ولمياء نظرها مركز مع ادهم لكنه لا ينظر لها وقد كان يرحب بوالده وعمه 

*كانت سماء تجلس شارده تحاول ان تتماسك الى ان همس لها

 :مش بتاكلي ليه يا حبيبتي

: هاه ابدا باكل اهو … احنا هنروح بعد الاكل

: ايه رايك نبات هنا في غرفتي عشان اقدر اقعد مع بابا وعمي شويه بما أن بكره اجازه 

:بابا وعمي …  اه اللي تشوفه 

*بعد الغداء جلس الجميع وقامت سماء بعمل مشروبات ساخنه للجميع وقبل ان تهم بالدخول تحدثت لمياء

: استني يا سماء عشان عندي كلمتين عايزه اقولهم قدام الكل وانت اولهم 

:خير يا ابله لمياء

*توجهت لمياء بنظرها الى ادهم 

:انا كنت عايزه اعتذر لادهم على اللي عملته معاه قدامكم واتمنى يسامحني

ادهم :خلاص يا لمياء انت دلوقتي بنت عمي وبس 

*تدللت وهي تتحدث 

: يعني مش زعلان مني

: لا انا نسيتك ونسيت اللي حصل

: متأكد يا ادهم … واذا قلت لك اني ما قدرتش انساك هتقول ايه

: هقول دي مشكلتك حليها مع نفسك 

فوزيه بحزم : لمياء كل شيء قسمه ونصيب وادهم دلوقتي اتجوز ومعاه عيال عقبالك يا حبيبتي … و هتفضلوا طول عمركم ولاد عم وبس

:اتجوز اللي خطفته مني وفرقت بينا 

فوزيه :ما فيش حد فرق بينكم يا لمياء هو اتجوز بعد ما سبتيه او بمعنى اصح بعد ما خلعتيه وسماء عمرها ما اتدخلت بينكم او حاولت تلفت نظره و تشده لها زي ما بنات كثير بتعمل غير أننا كلنا متأكدين من اخلاقها 

:اتجوز بعد ما سبته بشهرين بس كان ممكن ارجع له هو ما حاولش

:لمياء هو دلوقتي بقى مسؤول عن بيت وعيال اقفلي الموضوع ده لانه استحالة يرجع لك وكنت عايزاه يحاول ازاي وانت اتجوزتي على طول بعد الطلاق و عملاله حظر … فضيناها خلاص 

:يا طنط ادهم ده حقي انا حب سنين ولازم يرجع لي …. انا موافقه تفضل سماء على ذمته بالرغم من ان هي اللي كانت فرقت ما بينا 

ادهم : ايه الكلام الفارغ ده انا عمري ما هعمل كده في سماء 

:انت لسه بتحبني و اتجوزتها لما اتدحلبت زي الح-رباية ورسمت عليك الاهتمام وأنها بتواسيك طبعا بعد اللي انا عملته … وكنت طول عمري اقول لك انها بتحبك وانت ما صدقتنيش وده كان سبب معظم المشاكل اللي كانت بينا … غير ان كل اللي كان مضايقني فيك انت غيرته اشتغلت مهندس واخذت فيلا بعيد عن هنا ايه اللي يمنع دلوقتي نرجع لبعض 

:انا عملت ده عشان ولادي مش عشان سماء طلبته مني لانها راضية بيا باي وظيفة واي مكان 

سلطان : اسمع بس يا ادهم لمياء غلطت و ندمت وانا اضمنها لك دلوقتي و افتكر سماء مش هترفض

فوزيه : ايه الكلام ده يا معلم بنتك هي اللي سابت ابني و خلعته انت كنت سافرت هو انت وصلك كلام ثاني 

سلطان : للاسف انا كنت السبب حست انها مغص-وبه تقبله لاني كنت بخيرها بين مستقبلها وبين الخطوبه …. لكن دلوقتي هي راجعه بإرادتها وكلنا عارفين ادهم بيحبها قد ايه من زمان  … وسماء غلطت لما اتجوزت ادهم بعد ما طلق بشهرين ما اديتلوش فرصه يرجع لمراته 

:يا معلم لمياء لو كانت عايزه ترجع كانت رجعت لان ما حدش عرف بجواز ادهم غير بعد حوالي سنه فبلاش الحجه دي شوفوا كلام ثاني تحاولوا تقنعونا بيه … غير انها اتجوزت وراجعة بعد ما جوازتها باظت

لمياء : عندك حق يا طنط وانا اسفه يا ادهم كمان مره عرفت غلطتي وندمت وقدرت قيمتك  … محتاجه اعرف رايك انا لسه بحبك و متاكده انك كمان لسه بتحبني هتختار مين فينا يا ادهم

بقلمي سحر السحرتي 

*وكانت تنظر بخ-بث لسماء 

*كانت سماء تحول نظرها بين ادهم ولمياء والدموع في عينيها تقول له في نفسها 

: لا ما تعملش كده فيا يا ادهم 

*كان ادهم ينقل نظراته هو الآخر بين سماء و لمياء لكن قبل ان ينطق سقطت سماء فاقده اليوم الوعي 

*فردت لمياء باست-هزاء 

:ايوه بقى مش هنخلص من حركاتها البلدي دي … قديمه العبي غيرها

ادهم :اخرسي … سماء … سماء حبيبتي ردي عليا 

*لم ترد فحملها واسرع بها الى المستشفى ورفض ان تكشف عليها لمياء 

*خرج الطبيب من غرفه الكشف 

:دخلت في غيبوبه جسمها رافض يرجع للوعي عندها صدمه كبيره 

*جلس ادهم حزينا مهموما وكان عمار بجانبه

: معلش يا ادهم بكره هتبقى كويسه

 :انا السبب مفكره اني هختار لمياء ما تعرفش انها الحياه بالنسبة ليا

:بس ايه اللي لمياء بتقوله وازاي اقنعت عمك ان سماء خطفتك منها

: طول عمرها خ-بيثه لكن دى بعدها مش هسمح لها

:ادهم هو انت ممكن فعلا ترجع للمياء

: ارجع لمين هو انا كنت متجوز  …دي واحده انان-يه لدرجه عاليه … انت متخيل لو رجعت لها هتتغير وتهتم بيا لا هما يومين وخلاص…  انا فاهمها هي لو كانت لقيتني اتجوزت واحده غير سماء كانت فكرت ترجع ولا كنت خطرت على بالها بس هو زي ما يكون تار بايت مع سماء 

: يعني لما شفتها ما حنيتش لها

: لا طبعا بالعكس حسيت بقرف من ناحيتها ازاي استحملتها طول الفترة دى 

:و ناوي تعمل ايه معاها

 :لازم عمي يعرف ظروف جوازي من سماء لان في شرخ دلوقتي في علاقتهم مع بعض 

:بس انت كده بتف-ضح مراتك

 :هي ما غلطتش المفروض انا اللي يبقى وشي في الارض 

:تفوق بس و اتفاهم معاها 

:انا خاي-ف عليها قوي يا عمار سماء حساسه ده السبب انها دخلت في غيبوبه

: ما تقلقش مساله وقت و هتفوق أن شاء الله 

*بعد مرور اسبوع كان ادهم يزور سماء كعادته لم يجدها في الغرفه فسأل الممرضه 

:ما اعرفش كانت هنا الصبح

 :يعني ايه ما تعرفيش هو احنا قاعدين في تكيه من غير بواب فين الزف-ت المدير 

*بعد شجار لم يوصله الى شئ أو اين ذهبت اتصل علي عمار

: ايوه يا ادهم كنت لسه هكلمك سماء وصلت هنا تعالى بسرعه لأنها في حاله غريبه جدا

 :غريبه ازاي

: لما تيجي هتعرف

 *اسرع ادهم بالعوده وقبل احتضانها اوقفته وهو يقول لها 

:سماء حبيبتي حمد لله على السلامه

:لو سمحت خليك مكانك ما تقربش مني

: في ايه يا سماء مالك

 *والتفت بنظره فوجد شخص غريب يجلس

:مين ده اللي قاعد 

:ده المأذون عشان ننفصل بهدوء من غير مشاكل 

:ليه يا سماء انا بحبك وعمري ما هرجع للمياء مهما حصل انت فقدت الوعي قبل ما ارد عليها 

:عارف ايه اللي دخلني في الغيبوبه وايه اللي خرجني منها 

:لا ما اعرفش بس اكيد مش انا لاني جاوبتك زمان لما سألتي قبل كده لو حصل هتختار مين وكنت حاسس قبلها بكام يوم حاولت على قد ما اقدر اطمنك

*بدأت في البكاء 

: قبل الغيبوبه شفت الاجابه في عينيك اه لسانك عجز انه ينطقها وده اللي خلاني دخلت في الغيبوبه ما استحملتش واللي خرجني منها كريم خطيبي  … مسك ايدي و شدني وقال لي ولادك محتاجينك قومي عشانهم … وفعلا قررت اقوم وابعد عن العلاقه الس-امه دي

: بتسمي علاقتنا س-امه ده ما كانش في اسعد مننا

:اه بس كان وضع مؤقت لغايه لما ترجع لحبك الكبير … عارف كام مره قلت لي بحبك يا لمياء وانت معايا 

: اكيد يا سماء ده كان في الاول انت عارفه كنت متعلق بيها قد ايه …. صحيح اخدت وقت على ما نسيتها وانت استحملتيني … لكن بعد كده اكتشفت انك انت حبي الكبير والوحيد انا اكتشفت ان اللي قبلك ما كانش حب كان تعود

: ده مجرد كلام انا مش هحط نفسي في خانه اختيارات يا اتقبل يا اترفض … ارجع لحبيبتك وهي عندها استعداد تتغير و هتسعدك صدقني لكن انا خلاص كفايه التفكير اكل من روحي كثير 

:تفكير ايه اللي اكل من روحك

 :يا ترى هيسيبني امتى ؟ يا ترى هيرجع لها ؟ انت اتجوزتني  مش باختيارك 

: ازاي انا اخترت اتجوزك

: كنت مجبر ما اتقدمتش وطلبت تتجوزني وعارف ليه كويس 

: القدر اللي جمعنا … سماء انا مش هسيبك انت او ولادي 

:هتسيبني وبالنسبه للاولاد اكيد مش هقدر ابعدك عنهم لاني متاكده من حبك ليهم و عشقهم ليك

 :طب ممكن نرجع البيت تهدي و تفكري شويه انت لسه تعبانه 

:هخف اول ما تطلقني عشان هيبقى عندي سبب انسى حبك و اشيلك من قلبي واخلص من الن-ار اللي بتاكل فيا كل يوم 

فوزيه :يا بنتي بلاش الكلام ده استهدي بالله انت فعلا لسه تعبانه واللي انت عايزاه هخلي ادهم ينفذه … وتأكدي انك غاليه علينا كلنا 

:يا طنط بلاش يعطل المأذون اكثر من كده 

:طب استني ابوك دقائق وهيكون هنا وعمك عاصم كمان 

:المعلم سلطان ما بقاش ابويا خلاص انتهت العلاقه دي ما بينا لان اول ما اتحط في موقف انه يختار يقف جنب مين اختار يقف جنب بنته اللي من صلبه حتى ما فكرش يسمع مني حاجه

:هنقول له و هيعرف كل حاجه

: ما يهمنيش يعرف انا ما بقاش يفرق معايا حد غير ولادي هاخدهم وامشي

ادهم :مش هتمشي ولا هتاخدي الولاد 

بقلمي سحر السحرتي 

*في ذلك الوقت دخل كل من سلطان وعاصم ولحقت بهم لمياء لتتطفل على ما سيحدث 

عاصم :حمد لله على سلامتك يا سماء 

:الله يسلمك يا عمي … لو سمحت ليا طلب عندك خلي ادهم يطلقني بهدوء انا ماليش حد دلوقتي يقف جنبي

سلطان : ليه يا بنتي ما لمياء موافقه انك تفضلي مراته عشان العيال

 :معلش يا معلم سلطان هي توافق على شيء يخصها لكن انا ما اقبلش على نفسي فضله غيري

لمياء : عين العقل و صدقيني مش همنع ادهم عن عياله وممكن اعاملهم كأنهم ولادي بالضبط

: تمنعيه او لا شيء ما يفرقش معايا انا قادره اقوم بالدورين الاب والام هو يشوف اللي يناسبه وانا موافقه 

ادهم: يا سلام عمالين تقسموا فيا كأني ما ليش رأي … طلاق مش هطلق وجواز من لمياء مش هيحصل يا عمي من المستحيلات لاني بحب سماء ومقدرش استغنى عنها أو اجرح-ها بجوازي من واحدة ثانيه 

سلطان :لا يا ادهم هتتجوز لمياء انت احق واحد بيها وقلت لك غلطت ايه هنعلق لها المش-نقه واديها هتبقى في بيتك ربيها على راحتك ولا عايز يجي لي جلطه ثانيه

:بعد الشر بس اسف مش هتجوزها و اضيع من ايدي مراتي اللي بحبها 

: عايز تخس-ر عمك عشان خاطر سماء

سماء :لا طبعا وانا ما يرضينيش أنه يخسرك عشان عارفه معزتك عنده … المأذون اهو يطلقني و يتجوز لمياء في نفس الوقت

فوزيه :اكيد مش هيرضي عمه و يغ-ضب امه … انا مش موافقه يتجوز لمياء و أظن رضا الام يكسب لو عاملين مسابقه رضا …. بقى عايزيني استبدل واحده زي سماء بواحده زي لمياء ..  ده انا اول مره احس ان ابني اتجوز كانت مع سماء ..  اول مره اشوفه سعيد و وشه منور وفيه صحة ..  بياكل كويس هدومه نضيفه بتهتم بيه و بعياله … اللي الست لمياء ضحكت عليه وقالت انه ما بيخلفش … والست اللي بترفض تخلف من جوزها ملهاش غير معنى واحد … بس دلوقتي احلو في عينيها … ده بعدها على جث-تي 

لمياء: يا طنط انا اتغيرت ومن زمان انا وادهم واحنا بنحب بعض

: انت ما بتعرفيش في الحب يا لمياء وعمري ما اتمنيتك زوجه لابني لاني عمري ما شفت حبه في عينيك سماء بتعشق التراب اللي بيمشي عليه وعارفه ازاي تسعده وجودها دلوقتي معاه من غير ما تعمل حاجه بقى يسعده انا شفت ده في عين ابني وحبك خلاص اختفى من عينه وقلبه

عاصم :ادهم صاحب القرار يا فوزيه وانا من رأي سلطان انه يرجع لبنت عمه

: انت موافق عشان بيغطوا عليك وعلى جوازتك هناك وده اللي خلاك ساكت على اخلاق بنت اخوك ورفضت تقول لابنك انها كانت مرتبطه بواحد وهي مخطوبه

ادهم :نعم كانت ايه 

فوزيه :اه وطبعا كل واحد فيهم ماسك ذله على الثاني 

ادهم :بابا انت كنت عارف و سبتني اتجوزها ويا ترى كانت لسه على علاقه بيه بعد الجواز 

عمار : اهدى يا ادهم لو سمحت 

*وتوجه بنظره للماذون 

:اسف يا شيخنا اتفضل دلوقتي لان عندنا مشكله عائليه وده مبلغ صغير عشان وقتك اللي ضاع 

*بعد انصراف المأذون 

سماء :لو سمحت يا عمار انا همشي اروح شقتي ولما تتفق مع ابن خالتك على ميعاد الطلاق بلغني … اتفضل يا معلم سلطان انا رجعت الشقه باسمك وشكرا على الايام الجميله اللي عشتها معاك و سامحني اني خطفت جوز بنتك

ادهم : انت راجعه الفيلا تعالى اوصلك

:لا راجعه شقتي 

:دي فين بقى وجبتيها منين

:ممكن تسيبني امشي دلوقتي و حل مشاكلك معاهم وعمار عارف انا فين

: انا جوزك مش عمار انا اللي لازم ابقى عارف انت فين 

:كلها يومين وتبقى طليقي 

*تحدث والش-رر يتطاير من عينيه

:طب ادخلي جوه عند سماح والعيال لو سمحتي دلوقتي 

: مش هدخل يا ادهم 

: لو سمحت يا سماء ارجوكي ادخلي 

*رات الغض-ب في عينيه فدخلت وهي تبكي 

سماح :في ايه يا سماء ما انا قلت لك انه بيحبك انت ليه مصره تنفذي اللي هي عايزاه

:لا يا سماح انا شفت حبها في عينه

: ده وهم خدي ولادك في حضنك شايفه انت وحشاهم ازاي ..  خليني اشوف هيعملوا ايه بره ولو عمر صحي نادي عليا 

*في الخارج سلطان 

:كلام ايه ده يا عاصم اللي مراتك بتقوله انا بنتي كانت بتعرف واحد وهي مخطوبه 

لمياء :يا بابا ده كان زميلي و بيطاردني فخ-فت على نفسي منه و اوهمته اني مرتبطه بيه ولما رجعت و استقريت و حسيت اني في امان بعدت عنه وقطعت علاقتي بيه 

فوزيه :مش هو ده اللي اتجوزتيه بعد ما خلعتي ابني يبقى ازاي بعدتي عنه

: ما انا لما سافرت ثاني وعرف اني أطلقت كلمني وقال إنه مش قادر ينساني والح عليا عشان اتجوزه

ادهم :وانت عرفتي كل ده امتى وليه ما بلغتنيش يا ماما 

:انا لسه عارفاه قبل ابوك ما ينزل لما بنت عمي كلمتني تبلغني انها شافت المحروس ابوك مع واحده طلبت منها تجيب لي الاخبار

:وانت يا بابا خ-فت على نفسك فخليتني قرطاس اتجوز واحده بتخ-وني من قبل الجواز

:يا ابني انا قلت طيش شباب و اتأكدت انها قطعت معاه اول ما اتجوزتك هي مش بتكدب في النقطه دي 

:ولما هي قطعت معاه اتجوزته ازاي بعد ما خلعتني على طول تفتكر زي ما قالت اتكلم معاها واقنعها

 :انا ما اعرفش تفاصيل انا فتشت وراها لما اتجوزتك بعد ما أطلقت تقريبا قاطعتها و بطلت اكلمها و معرفش عنها حاجه 

لمياء: يا ادهم احلفلك أن ده اللي حصل 

: انت تخرصي خالص مش عايز اسمع صوتك… 

$ هل ستقبل سماء العودة لادهم مرة أخرى ؟ وهل بسهولة انتهت علاقتها بسلطان؟

• تابع الفصل التالى ” رواية أحببت من لا يرانى  ” اضغط على اسم الرواية