رواية الحرباء الفصل الثالث عشر والاخير 13 – بقلم انس توفيق
جهزوا اوضه لحنان فى البدروم نزلوا فيها سرير وكل هدومها وبقوا ياخدوها الصبح تخدم تغسل وتمسح وتكنس وتاكل واخر اليوم تنزل تنام فى البدروم وممنوع منعا باتا تشوف نرمين او حتى تلمح طيفها ورغم ان البنات كانوا بيشتموها ويكلموها بقرف لكن ما بيتقلوش عليها فى الشغل علشان الحمل والدكتور وليد كان بييجى يتابعها مره كل اسبوعين
حنان استسلمت للوضع تماما لدرجة احيانا كانوا ينزلوها الجنينه تنضفها والباب مفتوح وهم ناس مسالمين ومحبوبين لا فيه امن ولا كاميرات مافيش غير غفير لكن ما فكرتش ابدا تهرب حتفضل لحد ما نرمين تطردها وساعتها حتمشى من سكات لا حتتحايل ولا تترجى تمشى وبس وعلى قد ما هى خايفه من اليوم اللى حترجع للشارع على قد ما هى مستنياه بفارغ الصبر لانها حاسسه ان ده بيت نضيف وانها نقطه سوده فيه
…………………………..
نرمين عاشت فتره فى منتهى العصبيه زعيق واوامر وشتيمه لكل الشغالات وحتى امانى اختها لدرجة ان فاطمه الشغاله مشيت ما قدرتش تستحمل سوء المعامله لكن سعاد ونهى كانوا بيقفوا قدامها يترعشوا من الخوف لكن اتحملوا وفضلوا معاها
سعاد : احضر العشا يا دكتوره ؟
نرمين : ماليش نفس للعشا مش عاوزه زفت امشى اطلعى بره
سعاد قربت منها وفضلت واقفه قدامها ساكته
نرمين : واقفه كده ليه عاوزه ايه ؟
سعاد : بادور على الدكتوره نرمين الحنينه اللى عمرها ما زعلتنا ولا زعلت حد ولا عمرها قسيت علينا
نرمين : الله يرحمها ماتت مدبوحه بسكينة الغدر واللى قدامك دى اللى باقى منها لو مش عاجبك امشى وانا حاديكى مكافاه كويسه بس لو فضلتى هو ده اللى عندى واوامرى تتنفذ بالحرف مفهوم ؟
سعاد ركعت قدامها وباست ايدها وقالت
سعاد : ما اقدرش امشى مهما عملتى فيا مش حامشى حتى لو عملتى اكتر من كده حتى لو طردتينى مش حامشى وافرش على الرصيف قدام الفيلا لحد ما تحنى عليا وترجعينى
دموعها نزلت ومدت ايدها تطبطب على خد سعاد بحنيه بس سحبت ايدها وزعقت
نرمين : كلكوا بتقولوا كده كلكوا كدابين امشى اطلعى بره مش عاوزه اشوف حد
سعاد : تحت امرك بس اهدى
زقتها بالرجل فى صدرها بعنف وقعتها على الارض
نرمين : مالكيش دعوه اهدى واللا اتعفرت امشى غورى بره
سعاد قامت وهى بتترعش
سعاد : حاضر حاضر حاخرج
وراحت ناحية الباب لكن قبل ما تخرج نرمين جريت عليها وحضنتها
نرمين : سعاد سعاد انا اسفه ارجوكى ما تزعليش منى
سعاد : وغلاوتك يا دكتوره ما زعلانه ولا عمرى حازعل منك ولو قطعتى من لحمى انا بس خايفه عليكى من الحزن ونفسى ترجعى زى زمان لكن والله لو دبحتينى تحت رجلك مش حاسيبك لا انا ولا نهى
…………………………..
اللى تبات فيه تصبح فيه كل يوم تلهى نفسها فى الشغل وبالليل تنزل البدروم تعيش مع ذكريات عمرها كله . عمرها اللى ما تعرفش قد ايه الدكتور سننها وهى حتى ما تعرفش عندها كام سنه . وهو العمر ايه غير ذكريات وهى ذكرياتها كلها مره بتتمنى تنساها لكن حتى نعمة النسيان اتحرمت منها
…………………….
نرمين بدات بعد فتره ترجع لطبيعتها وتقلل من عصبيتها وصممت تروح لفاطمه لحد بيتها تعتذر لها وتطلب منها ترجع وبدات تحاول تنسى التجربه المؤلمه اللى عاشتها وتتمسك بالامل وتحلم كل يوم
لحد يوم صحيت بدرى دخلت الحمام وخرجت بسرعه تصحى ادهم
نرمين : ادهم ادهم اصحى
ادهم : فيه ايه ؟ هى الساعه كام ؟
نرمين : لسه بدرى بس عاوزه اوريك حاجه خد شوف كده . شرطتين
…………………….
آه كم اخشى غدى هذا وارجوه اقترابا
كنت استدنيه ولكن هبته لما اهابا
نهى نزلت البدروم ودخلت على حنان وهى بتزغرط
نهى : خبر بمليون جنيه الدكتوره الهانم بنت الاصول ستى وستك وست الناس كلها حامل ربنا نصفها ونصرها على اللى بيكرهوها ويغلوا عليها علشان ضميرها نضيف وقلبها ابيض
حنان : حامل ؟ بجد ؟
نهى : ايه مش مصدقه ؟ لا صدقى اصل ربنا عادل ما يرضاش بالظلم ودايما مع المنكسرين جابر اصلها مدت ايدها كتير واتعضت من كلاب ما يساووش ضافرها وربنا عوضها حتخلف ولد فى النور معروف اصله وفصله وحسبه ونسبه معروف ابوه مين وامه مين مش عيل ابن حرام جاى فى الضلمه مالوش اصل
حنان : ربنا يديها ويراضيها
نهى : وانتى تعرفى ربنا يا بنت الكلب علشان تدعيلها ؟
حنان : حتى لو ما كنتش اعرفه هو يعرفنى ويا عالم يمكن يرحمنى ويتوب عليا بس مهما كان انا فرحانه وبادعيلها من قلبى
………………………
نرمين عملت حفله كبيره وعزمت كل اصحابها وقرايبها وكانت زى البدر فى تمامه والفرحه مش سايعاها والكل كان فرحان علشانها وادهم كان حيطير من الفرحه وكل شويه يحضنها ويبوس ايدها وراسها وفجاه لقوا كريم رشدى داخل عليهم
نرمين : كريم ؟ ايه اللى جابه ؟
ادهم : انا يا حبيبتى اللى عزمته ده ابن عمتك والاصول لازم اعزمه فى يوم زى ده
نرمين : وده بقى علشان تختبرنى واللا علشان تثبتلى انك اتغيرت ؟
ادهم : اختبرك ؟ هاهاها انا واثق فيكى مليون فى الميه بس ما يمنعش اغير غليكى وغيرتى تبقى زياده شويه ومين يكون معاه القمر ده وما يغيرش عليه من نسمة هوا لو هفهفت على خده
نرمين : الله الله بقينا بنقول شعر كمان يا باشمهندس
ادهم : هو الشعر يتقال فى مين غير فى نرمين ؟
نرمين : خلاص يا عم سماح والماضى كله نسيته
كريم : الف الف مبروك
ادهم : الله يبارك فيك يا كريم انا سعيد جدا انك جيت
كريم : ما اقدرش ما اجيش دول اهلى الف الف مليون مبروك يا نرمين
مسك ايدها يبوسها بشياكه
نرمين : ميرسى يا كريم سعيده انك جيت
كريم : طيب اسيبكم لفرحتكم واروح اشوف البوفيه فين التورته والحلويات
سابهم وعينيه بتدور عليها فى الحفله كلها لحد ما لقاها
كريم : بونسوار يا امانى
باس ايدها بشياكه كعادته
امانى : بونسوار يا كريم اخبارك ايه ؟
كريم : كويس لسه عايش باحضر لفيلم جديد بس بعيد عن الرومانسيه هاملت بس برؤيه عصريه
امانى : حلو التغيير مطلوب برضه ربنا يوفقك
كريم : امانى ممكن اتكلم معاكى شويه على انفراد ؟
امانى : مالوش داعى يا كريم كلامنا لا حيقدم ولا حياخر انا مش حاغير رايى والموضوع ده قفلته من زمان وحتى مشاعرى اتغيرت
كريم : صدقينى انا اتغيرت ارجوكى ادينى فرصه
امانى : افهمنى يا كريم انت خلاص بالنسبه لى بقيت شخص عادى مش كريم اللى حبيته زمان الحب ده خلاص انتهى يعنى حتى لو اتغيرت مش حيفرق معايا بس حقيقى حافرح لانك ابن عمتى
كريم : ميرسى يا امانى انا اسف لو ازعجتك بس لو حتفرحى بس علشان القرابه بيننا ده سبب كافى قوى علشان اتغير وافرحك انا باتمنالك السعاده من كل قلبى عن اذنك
مشى بسرعه من غير ما يبص وراه وامانى بتتابعه بعينيها وهى بتتنهد بحسره وتقول فى سرها
امانى : خساره يا كريم ياريتك تتغير علشان نفسك وعلشان جمهورك
ولفت لقت وليد وراها
وليد : ا ا ا امانى انا اصلى كنت عاوز اقول …. يعنى ….. قصدى …… هو انتى عامله ايه ؟
امانى : انا كويسه وليد انت عاوز تقول حاجه ؟
وليد : اه لا قصدى اه انا مش … مش عارف انا ….
امانى : وليد انت عاوز تتجوزنى ؟
وليد : وحياة ربنا اه بس مش عارف كل ما اشوفك جسمى يتلبش ولسانى يتربط وما اعرفش اقول كلمتين على بعض
وركع على ركبه واحده قدامها وباس ايدها وقال
وليد : بقالى خمس سنين عاوز اقولها ومش قادر انا باحبك يا امانى تتجوزينى ؟
امانى : يخرب بيتك الناس كلها عماله تتفرج علينا موافقه يا لوح
…………………………..
واخيرا جه اليوم اللى بتستناه وخايفه منه الدكتور زارها للمره الرابعه معنى كده انها بقالها شهرين فى البدروم والنهارده اخيرا نزلت نهى تقول لها ان الست عاوزاها مشيت وراها وهى شارده فى افكارها
حنان ( سرا ) اكيد حتطردنى حامشى وانا ساكته حازعل وانا ماشيه لكن مش حافتح بقى ولا اترجى يمكن يكون نفسى تسامحنى واعيش خدامه تحت رجليها لاخر يوم فى عمرى لكن لا انا ما استاهلش ما ينفعش اعيش فى البيت النضيف ده ولا ينفع اصلا المس التراب اللى بتدوسه واحده زى نرمين ستى وست اهلى كلهم .
اهلى ؟ يعنى ايه اهلى ؟ هم مين اهلى هم فين ؟ انا نبت شيطانى لا ليا اهل ولا ليا اصل ولا فصل قالتلى حاتكفل بيكى واجوزك وابقى اهلك يا ريتنى رضيت لكن الشيطان الملعون غوانى
نهى : سرحانه فى ايه يا بنت الكلب ؟ اوضة ستك اهيه
حنان : اه اه صحيح
نهى خبطت وفتحت الباب ودخلت وحنان وراها
نهى : البت اهيه يا دكتوره يا ست الكل ياللى خيرك على الكل
نرمين بصت عليها باحتقار
نرمين : طبعا عرفتى الخبر
حنان : مبروك يا ستى ربنا يديكى ويراضيكى
نرمين كانت قاعده رجل على رجل وماسكه شنطتها فتحتها وطلعت زرمة فلوس مبلغ كبير ومدت ايدها
نرمين : خدى دول وامشى ومش عاوزه اشوف وشك تانى ولا حتى صدفه
حنان : اعمل بيهم ايه ؟
نرمين : اعتبرى نفسك سرقتيهم وخلعتى بدل ما تطلعى من المولد بلا حمص اهو تصرفى منهم لحد ما تولدى وتقدرى تشتغلى اصل شغل الشوارع اللى بتشتغليه ما ينفعش مع الحوامل
حنان : كتر خيرك يا ستى
مدت ايدها تاخد الفلوس ومسكت ايد نرمين باستها ونرمين سحبت ايدها بعنف
نرمين : ما تلمسيش ايدى
حنان : عندك حق اللى زيى انجس ايدك اقدر امشى ؟
نرمين : يا نهى ادوها شنطه تاخد فيها هدومها الهدوم اللى انا اشتريتهالها لما جبتها من الشارع بجلابيه مقطعه
حنان : كتر الف خيرك يا ستى ممكن اقول حاجه قبل ما امشى ؟
نرمين : عاوزه تقولى ايه ؟
حنان : تصدقى او ما تصدقيش انا عمرى ما ندمت على حاجه فى حياتى غير اللى عملته معاكى ومن قلبى فرحانه علشانك انا حزينه انى حامشى من هنا بس فى نفس الوقت فرحانه انى ماشيه لانى حاسسه انى باوسخ البيت النضيف ده وانى ما يصحش ادخله ولا حتى اعدى من قدامه انا حامشى واوعدك عمرك ما تشوفى وشى تانى
خرجت حنان وهى فى السابع وبعد تلات شهور لقوا سبت فى الجنينه فيه طفله عمرها شهر ومعاها بطاقة حنان وورقه مكتوبه بخط عيل صغير
《يتيمه مالهاش اب ودلوقت ما بقاش ليها ام لو عاوزه تربيها لله يمكن تطلع احسن من امها ولو مش عاوزه حطيها فى ملجا وادعيلى ربنا يغفرلى 》
- اقرأ ايضا روايات ترند – كوكب الروايات
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.