رواية هنا يسكن شيخي – الفصل السادس
بوظتيلهم اليوم ولا لأ زي ما اتفقنا؟
يا نوح معرفتش أعمل حاجه ، خالتك قفشت الحوار .
قصدك ايه !!! انهم كتبوا الكتاب خلاص
ـــــــــــــــــــــــــــــــ
عن اذنكم يا جماعه اسندوها معايا جوه ، هي من الزحمة بتجيلها الحالة دي ، كملوا انتم كتب الكتاب ..
ماما دخلت معاها الأوضة وبكل هدوء جابت برفيوم من على التسريحه رشته عليها وفاقت .
قالت لها : أنا عارفه يا إسراء إنك فشكلتي خطوبتك النهارده وإن أعصابك تعبانه بس افرحي معانا زي ما كنا فرحنا معاكي ، وأنا شايفه إنك ترتاحي شويه كده على السرير لحد ما اليوم يخلص الجو زحمة بره ومش هتستحملي .
لأ يا خالتو متخافيش بقيت كويسه .
لسه يا إسراء مبقتيش كويسه للأسف
إسراء بلعت ريقها واتوترت وماما سابتها وخرجت .
ــــــــــــــــــــــــــــــــــــــــــــــــــــــــــــــــــــــــــــــــــــــــ
بارك الله لكما وبارك عليكما وجمع بينكما في خير
أخيرا الكتاب انكتب ..
بدر رفع راسه علشان يشوف يقين زوجته اللي مشفهاش غير مره واحده وهي بتضحك له في حفلة الدار ..
ابتسملها وقالها مبروك يا زوجة بدر الدين عبدالوهاب المصون.
ضحكت وقالت له انت أول مره تبصلي وتضحك في وشي .
قبل كده مكنش من حقي أرفع عيني فيكي رغم إن قلبي دايما كان شايفك ، دلوقتي حقي وحلالي زي ما ربنا سبحانه وتعالى أمرنا يا زوجي المصون ..
انا مكنتش سامعه صوت حد من اللي بيباركوا ، أنا سامعه صوته هو بس..
فجأه لقيته بيطلع من جيبه علبه وفيها خاتم بيلمع زي أفلام الكارتون ، لبسهولي وإيدي كانت متلجه.
ايدك متلجه كده ليه ؟ انا عاوزك تطمني ، متخافيش من أي حاجه غير من ربنا سبحانه وتعالى ، أنا هنا جنبك علشان تكوني مبسوطة .
اشمعنا أنا ؟
ابتسم لي ابتسامه جميله أوي وقال: خطفتي الشيخ بدر الدين عبدالوهاب بابتسامة عريضة كده في يوم من الأيام ، من يومها وأنا مستني اليوم اللي أشوفك فيه تاني وأنتِ زوجتي ..
طب كنت حزين ليه وانت نازل على السلم؟
الغيره يا يقين ، أنا غيور جدا وخصوصا لو كان الحد دا حبيبي ، وأنا قلبي لم تسكنه أي تاء مربوطة عموما غيرك بعد أمي .
ضحكت من كلامه وهزاره وقولتله : يعني مبتحبش المكرونه بالبشاميل
متدخليش الأكل في المواضيع دي فضلا وبعدين البشاميل مذكر ، وطالما حضر البشاميل فالمكرونه تلتزم الصمت
طب ليه سميتني يقين ؟
علشان كان عندي يقين في الله سبحانه وتعالى إني هاخد حاجه محدش خدها ، والحمد لله ، كرمني وزيادة …
سرحت شويه وهو قاعد جنبي واتكسفت اسأله امتى ميعاد الفرح ، أنا حساني مش جاهزة لسه إني أروح بيته وكمان كل حاجه جت بسرعة .
قطع شرودي وقالي عاوزك تطمني خالص وبالنسبة لميعاد الفرح بإذن الله وقت ما تحسي إنك جاهزة للعمره .
استغربت يعني ايه جاهزة للعمره وسألته بهدوء: يعني ايه ؟
قالي وقت ما تحسي نفسك ملهوفة كده إنك تزوري بيت الله .
بس مافيش حد مش نفسه يزور بيت الله ، أنا نفسي من زمان .
ضحك وقالي ملهوفة مش نفسك ، ودا يفرق .
طب امتى أعرف إني ملهوفة ؟
قالي بكره بإذن الله هجبلك كتاب ، أول ما تخلصيه تحكيهولي .
انا بحب القراية جدا ، فأكيد هخلصه بسرعة .
خلصيه واشرحيلي انتي كإنك المعلمة بتاعتي ، واللي يقف قدامك ابعتيلي اشرحهولك .
ضحكت وقولتله : أنا المعلمة بتاعتك.
ابتسم وقالي : كلنا بنتعلم من بعض مهما الإنسان بلغ من العلم .
استأذنك أنا علشان أروح علشان مطولش على عم علي وزوجته .
طب خليك شويه كمان
وقت ما تحبي تشوفيني ابعتيلي رسالة واجيلك بإذن الله
كده هتعيش عندنا على طول
ياريت أنا كنت طمعان في النعناع اللي في البلكونة دي من بدري .
طب خلاص هستناك بكره ونشرب شاي بالنعناع في البلكونه وتجبلي معاك الكتاب .
خلاص تمام بإذن الله ، بس ممكن أطلب منك طلب .
اه أكيد اتفضل .
عاوز سرك يكون مع أمك وتكون هي صاحبتك لحد ما ربنا يوقعك في بنت حلال شبهك .
قصدك إسراء ؟
بلاش نجيب سيرة حد وناخد ذنب عليه ، لكن أنا غصب عني مش مرتاح ، فنصيحة بوجه عام مش أكتر .
حاضر أنا واثقه فيك
ــــــــــــــــــــــــــــــــــــــــ
ما شاء الله يا بدر يابني ، البنت زي السكر ربنا يباركلك فيها ، عقبال ما نفرح بأحمد .
شكرا ربنا يعزك يارب ، الحمد لله ربنا كرمني من وسعه .
أحمد فضل ساكت كتير وسرحان ،بدر قطع شروده
مالك يا أحمد سرحان كده ليه ؟
الصراحه يا بدر في حاجه شغلاني.
خير يارب .
البنت اللي وقعت في الأرض ، طول الوقت كانت عماله تسأل فيا كتير جدا وفجأه وقعت في الأرض بدون مقدمات .
بدر باهتمام: سألتك عن ايه ؟
عنك ، بتحب ايه ، بتكره ايه ، قالتلي إنها عاوزه رقمك تسألك في فتوى ، بس أنا اعتذرت عن الكلام معاها لإني حسيت بطاقة سلبية من ناحيتها يا بدر ، وعرفت من مرات عم علي إنها صاحبة العروسة وبنت خالتها ، وخايف أحسن تكون عروستك شبهها كده وانت مش واخد بالك .
بدر سكت وقاله متقلقش ، الحمد لله إني فهمت يقين كل حاجه كإن قلبي كان حاسس ، وأنا اتأكدت من اللي في قلبي لما انت أكدتلي .
طب الحمد لله ، ربنا يكفيك شرها يا أخويا .
يارب
ــــــــــــــــــــــــــــــــــــــــــــــ
ايه دا يا هدير ، خاتم ألماظ مره واحده !!!!!
مش عارفه والله يا إسراء مش بفهم في الحاجات دي ، بس كتر خيره على أي حال .
هاتي كده أقيسه
اتلجلجت وقولتلها : لأ ، أصل مينفعش ، ماما قالتلي فال وحش تقلعي خاتم الخطوبه .
بصتلي بصه وحشه وقالتلي : يعني هتلبسي ألماظ رايح جاي !!
ربنا يسهل ، عن إذنك علشان أغير هدومي .
طب هاتيلي بيجامة أنا كمان ، أنا قولت لنوح هبات معاكي النهارده علشان نرغي سوا .
انا بلعت ريقي واتخضيت : تمام يا إسراء ، الدولاب عندك خدي اللي تعجبك .
دخلت أوضة ماما أغير فيها وسيبتلها الأوضة كلها
ماما بقولك ، إسراء قالتلي هتبات معانا النهارده .
عادي يا بنتي ، تبات يعني هتاكلك يعني .
بس ماما نفسها مكنتش مرتاحه بس مش عاوزه تقلقني معاها .
دخلت أنام وإسراء لقيتها نايمه على السرير وبتلعب في التليفون .
نمت جنبها وأنا متوتره
فجأه لقيت بدر باعتلي رساله
متنسيش تقرأي أذكار المساء وبعتلي الأذكار .
كل ساعة ألاقي ماما داخله الأوضه تقولنا نمتوا ولا لسه ؟
المهم أخيرا من التعب نمت..
صحيت الصبح ملقتش إسراء جنبي ، غسلت وشي واتوضيت ودخلت علشان أصلي .
صليت الحمد لله وبعتت لبدر
صباح الخير يا زوجي المصون
لقيته بيرد عليا في ساعتها : صباح النور يا قلب بدر المصون
صليتي الفجر؟
لأ الصراحة متعودتش أصليه
طيب بإذن الله ربنا يكرمك وتحافظي على صلاة الفجر ، وبإذن الله في بيتنا هصحيكي تصلي ورايا على طول .
يااااااه نفسي أصلي وراك بجد
بإذن الله قريبا ، ها قرأتي الأذكار ؟
قرأتها امبارح أما بعتتهالي .
أقصد أذكار الصباح
هو في أذكار للصباح ؟
اه طبعا ، علشان ربنا يباركلك في يومك وتقربي من ربنا أكتر وبتمنع الحسد والسحر إلى آخره يعني.
حاضر ابعتهالي هقرأها وبإذن الله أحافظ عليها .
ــــــــــــــــ
قرأت الأذكار وقولتله هسرح شعري وأكلمك .
وأنا بسرح شعري لقيت فيه خصلة كده مقصوصه ، بس مهتمتش الصراحه ، المهم سرحت ورجعت لقيته بيرن عليا
ألو ، عامل ايه؟
الحمد لله بخير ، أخبارك ايه؟
الحمد لله كويسه جدا جدااااا
يارب في أفضل حال ، بإذن الله هصلي المغرب وهعدي عليكم شويه ونشرب شاي بالنعناع.
تمام وهعملك كيكة ، أنا بعملها حلو أوي .
حمستيني ، كده هاجي دلوقتي .
ياريت ، المهم متنساش الكتاب .
أكيد ، أنا من امبارح وأنا مجهزه على المكتب ، كمان ساعة بإذن الله افتحي التليفزيون على قناة صحبة القرآن .
هتطلع في التليفزيون ؟
اه بإذن الله
ـــــــــــــــــــــــــــــــــ
ماما هي إسراء مشيت امتى؟
انا صحيت ملقتهاش ، ورنيت عليها مش بترد .
ماشي بقولك ، هو حلال أقعد قدامه بشعري؟
اه يا بنتي مش بقا جوزك خلاص
أحسن يكون حرام ، ومكسوفه اسأله الصراحه
مش عارفه والله متحيرينيش
طب يلا علشان برنامج الشيخ بدر هيبدأ دلوقتي.
الحلقة كانت بتتكلم عن ضوابط الخطبة ومعاملة الزوج للزوجة والعكس ..
فجأه المذيع سأله وقاله وهنفرح بيك امتى يا شيخنا .
الحمد لله ربنا كرمني وتمت الخطبة وعقد القرآن في ليلة الأمس ، والزواج بإذن الله عن قريب .
طب ألف مبروك يا شيخنا ، بس صفحتك مش عليها إنك تزوجت أو غيره
الله يبارك فيك يارب ، كنت حابب أعلن أمام المشاهدين وكمان أمام زوجتي التي تشاهدنا الآن ، مكنتش حابب إنها تكون مجرد معلومة وخلاص ، ولا أريد الحديث عن حياتي بوجه عام ، فلنكمل درسنا فضلا …
انا والله مش عارفه أقولكم الغرفة لا تسع أجنحتي ، دا الكوكب كله لا يسع أجنحتي .
جبت الرقم من على الشاشة وبعد محاولات الرقم رد
السلام عليكم يا شيخ بدر .
ابتسم ابتسامة عريقة كده وقالي وعليكم السلام ورحمة الله وبركاته
ألف مبروك على الخطوبة وعقبال الزواج والعمره
ابتسم بدر وكإنه اتأكد من إنها يقين وقالها : يارب اللهم آمين دعواتك …
كنت حابه اسألك سؤال يا شيخنا ، هل مثلا لو واحده اكتب كتابها وكان في إشهار وكده ، بس لسه مافيش فرح وكده ، أما خطيبها دا يجي يزورهم ، ينفع تقعد قدامه بشعرها ولا حرام ؟
ابتسم بدر وقالها : ينفع بإذن الله والله أعلم.
ــــــــــــــــــــــــــــــــــــــــــ
ها يا إسراء عملتي ايه؟
انا وديت خصلة شعرها وخصلة شعرك للشيخ وهو قالي هيتصرف متقلقش ، دا أنا مجرباه مره في خطيبي اللي فات ، عاوزه أقولك إنه كان رايح يخطبها هي والشيخ دا خلاه خطبني أنا .
طب تمام ، علشان بخاف من أفكارك أصلا ، اه صحيح قوليلي سيبتي خطيبك دا ليه؟
بقا الشيخ بدر قدامنا ونبص ورانا يا غبي…
طب تمام ، قالك الحوار دا هيشتغل امتى ؟
قالي العشاء كده
طب هتروحي؟
لأ طبعا ، احنا نقعد وهي هتجيلنا لحد عندنا ، مبروووك يا نوح
ــــــــــــــــــــــــــــــــــــــــــــــــ
بعد المغرب
لبست فستان كده بسيط وواسع وبأكمام وسرحت شعري بس حوار الخصلة دي مضيقاني أوي ، أول مره اخد بالي منها ، هو في تقصيف يعمل كده؟! ، المهم الباب خبط ، جريت علشان افتح لقيت ماما قالتلي ادخلي المطبخ هاتي العصير ، واتقلي حبه على ما يدخل ويعد .
دخل وجايب معاه شنطه كده وقعد في الصالون
دخلت وأنا شايله العصير وهو قاعد وباصص في الأرض
السلام عليكم
ضحك ورفع راسه وقالي وعليكم السلام ورحمة الله وبركاته وقال حاجات في سره عرفت بعدين إنه قال ما شاء الله تبارك الله .
قعدت قدامه وقولتله عامل ايه يا شيخنا؟
ضحك وقالي حسيتك هتسأليني على الهوا أحط شوكولاته على الكيكة ولا لأ ؟
لأ مش للدرجادي ، أنا ممكن أما نروح بيتنا أرن أقولك هترجع امتى؟
اه إذا كان كده ماشي ،بس خدي بالك أما بسمع صوتك بضحك وانا مش عاوز الناس تفتكر إني بضحك للستات وكده ، وكمان محبش حد يعرف عنك حاجه
اتضايقت وسكتت
والله ما قصدي أضايقك ، أنا بحب أحافظ على بيتي بس ، مش عاوز إعلام أو غيره يدخل بيتي ، وكمان محبش حد يسئ بيا الظن ، وزي ما تحبي ،احنا لسه في الأول وبنتعرف على طبع بعض ..
انا مش معترضة
اومال شكلك غضبان ليه؟
علشان مقولتليش ايه رأيك في شعري .
ضحك ضحكة حلوه كده وبصلي وقالي حلو ما شاء الله
مره واحده لقيته سكت وبيقرب ايده من شعري
ايه دا
عندي تقصيف وكده
من امتى ؟
والله مش عارفه صحيت لقيتني كده قولت يمكن مخدتش بالي قبل كده منه
لأ احكيلي ايه حصل بعد ما روحت امبارح بالتفصيل .
غيرت هدومي وصليت وجيت أنام ولقيتك باعتلي الأذكار قرأتها ونمت .
اه صحيح وإسراء باتت معايا إمبارح وصحيت الصبح زي ما تكون اختفت .
هي متعوده تبات معاكي ؟
لأ خالص ، دي أول مره
فجأه العشاء أذنت
هتنزل تصلي في الجامع اللي جنبنا وتيجي تقعد معايا صح ، متقولش انك هتروح
ادخلي اتوضي وتعالي هصلي هنا بيكي زي ما كان نفسك ..
طلعت لقيته بينادي عليا وقالي تعالي من فضلك أقعدي جنبي مش قدامي
قعدت وأنا مكسوفه
حط ايده على راسي وغمض عينه
وفضل يقرأ في سره كتير جداا وجبينه عرقان ، وأنا عماله أتاوب كتير جدا ، قولت أكيد اتحسدت عليه .
ومره واحده قام من غير مقدمات يصلي ركعتين حمد وشكر لله وفضل يبكي وهو بيصلي ..
خلص وقالي يلا نصلي العشاء..
لبست الطرحه وجيت لقيته بيشاورلي ألبس شراب في رجلي
قولتله في شيوخ قالوا عادي
قالي في أراء كتير اتقالت حول تغطية القدم ، فإحنا من باب الأسلم نغطي رجلينا مش هنخسر حاجه ولا ايه
دخلت لبست شراب ورجعت ، لقيته فارش مصليتين ورا بعض
وقف وقام الصلاة ، ماما سمعته وهو بيقيم
اصبر يا شيخ بدر هلبس الإسدال وجايه اهه
في ثواني ماما جت
صوته حلو ، حلو لدرجة كنت بعيط ، قرأ من سورة البقرة
” واتبعوا ما تتلوا الشياطين على ملك سليمان…. ”
انا كنت بعيط من حلاوة صوته ..
خلص صلاة وصلى السنة وقال الأذكار
واداني كتاب والشنطه اللي معاه ببث فيها لقيت هدوم للعمرة وقالي وقت ما تحسي إنك جاهزة الهدوم أهي ، حبيت تكون اول هدية أجبهالك
وقال لماما قبل ما يمشي
خدي بالك منها يا أمي ، متخليش حد يبات جنبها تاني فضلا .
ماما سكتت وقالتله حاضر ومشي .
ــــــ
احكيلي ايه حصل
مافيش يا ماما ، شعري لقيته مقصوص حته كده وسأل كتير وقرألي قرآن وصلينا وبس ، بس شكلي كنت محسوده ..
اييييه!!! مقصوووص
ماما خدت التليفون ودخلت أوضتها وعملت مكالمة معرفش عنها حاجه لحد دلوقتي
ـــــــــــــــــــــــــــــــــــــــــــــــــــــ
ها يا شيخ ايه الأخبار ؟
انا كل ما اجي أعمله يبوظ ، لحد ما الشعر مبقاش نافع للأسف ، عاوز خصلة جديده
خصلة جديده!!! دا انا اتمنعت أدخل بيتهم تاني ،الله يخربيتك
ـــــــــــــــــــــــــــــــــــــــــــــ
بعد ٥ شهور
في الطيارة
مبسوطة؟
جدا يا بدر ، قضيت رمضان كله في بيت الرحمن ، هحتاج ايه تاني من الدنيا
عقبال السنة الجايه بإذن الله
بإذن الله ربنا ما يقطعهالنا عادة
متحمسة تشوفي الشيخ بدر ساكن فين ؟
حطت إيدها على قلبها وقالت ” هنا يسكن شيخي ”
- اقرأ ايضا روايات ترند – كوكب الروايات
يتبع.. (رواية هنا يسكن شيخي) اضغط على اسم الرواية لتجد الفهرس كاملاً بجميع الفصول.