رواية خارج قانون الحب الجزء الثاني – الفصل الخامس
|5|
|5|
” أنا اللامُبالاة في مُنتصف الحديث الجاد ، أنا الضحكة المُلفتة في منتصف عزاء حزين ، وأنا .. نظرة الإستهانة في أعين مُتهم حُكم عليه بالموت ”
#بقلمي
كينان بقلق : حاجة إيه يا زعيم ؟
وطى بدر راسه ومش عارف يقول إيه ، كينان باصصله مستنيه يتكلم
بدر بهدوء حزين : متثقش في مراتك
كينان الدم غلي في عروقه وقال بعصبية : إنت بتقول آيييه !! يعني شكوكي صح ؟؟
بدر بتضييق عين : إنت كنت بتعاملها وحش في المستشفى عشان شاكك فيها ؟
كور كينان إيده وعينيه إتملت شر وهو طالعلها ، بدر مسكه من الجاكيت بتاعه وقاله : ولاا يا كينان إهدى ، رأيي تيجي معايا نتكلم عشان الحوار هنا هيخليها تاخد بالها
كينان من بين سنانه : هطلع أخلص عليها ، هطلع …
كتم بدر بوقه وهو بيبص بطرف عينه ع السلم فوق ، بعدين رجع نظرته لكينان وقال : إتقل تاخد حاجة نضيفة ، تعالالي كدا وفهمني حصل إيه خلاك تشك وأنا هقولك اللي عندي .. بعدها يا باشا تعمل اللي تعمله أنا مش هتدخل أوعدك ، فل ؟
كينان غمض عينه جامد وخد نفسه وهو بيقول : فل ، هنتكلم فين ؟
بدر : هنتكلم هنا بس بهدوء ، مينفعش نخرج بعد اللي أنا لسه عاملة عاوزين الجو يهدى شوية ، فاهمني !
كينان بتمالك أعصاب : تمام
سحبه بدر من جاكيته وقعدوا في المطبخ ..
بدر بيقرب راسه لكينان وبيقول : إحكيلي ، حصل إيه عشان تشُك فيها ؟
كينان بغضب وهو بيخبط بصوابعه على الترابيزة : في المستشفى كان كل شوية يجيلها إتصال لحد ما دخلت الحمام وراها لقيتها بتقول لواحد متقعدش تتصل عليا هيشكوا فيا
رجع بدر ظهره لورا وقال بسُخرية : وإنت فاكر إنها بتخونك مع واحد ؟
كينان بتكشيرة : ما إنت لسه قايل برا !
بدر ببرود : هي بتخونك وبتخوننا كُلنا ، بس مش الخيانة اللي في دماغك
كينان بنظرة إستغراب : يعني ؟
بدر بنحنحة : إحم ، جاية علينا
سونيا وهي بتبصلهم : قاطعتكم عن حاجة ؟
بدر ساند إيديه على الترابيزة وبيفتح ولاعته ويقفلها وهو بيغمز وبيقول : تؤ
سونيا : كنت عاوزة أشرب بس
كينان بنظرة ونبرة غريبة : إشربي ..
خدت إزازة مياه وخرجت وبص بدر على مدخل المطبخ إتأكد إنها طلعت على السلم ، راح مقرب لكينان وقايله : إحجزلنا تذاكر طيران على مصر ، إوعى تتهور وتعمل حاجة هنا عشان كله عارف إن إحنا رايحين أميريكا أربعة ف لازم نرجع أربعة
كينان بغيظ : سيبها على الله
بدر بضحكة لإن دي كلمته : لا يا شيخ !
كينان إبتسم بعدين كشر تاني وقال : إنت قولت بتخوننا كلنا ؟
بدر بتأكيد : قبل ما أموت الزعيم قال إنها شريكته .. وأكيد إتجوزتك لسبب
شاف سيا جاية راح قام وقف وهو متنح فيها ، سيا بعيون حمرا : مش عاوزة أقعد في الأوضة ، زهقت من القعدة فيها
بتبص لبدر لقته بيتأمل تفاصيلها وهو ساكت راحت قالتله بإستغراب : بتبصلي كدا ليه
ضحك وهو بياخد نفسه : م مش عارف ! بس إنتي حابة نعمل إيه وهعملهولك
كينان بتحذير : يا زعيم إنت نسيت إنك قولت مينفعش تخرج عشان ..
بصله بدر بتبريقة سكتته عشان ميتكلمش قدام سيا
سيا بتساؤل وهي مكتفة إيديها وساندة على الحيطة : عشان إيه يا كينان ، حصل إيه أنا معرفهوش ؟
بدر غمض عينه وفتحها وهو بيقرب ل سيا ، كان هيحاوطها بإيده بس فضل مثبت إيده في الهوا وهو بيقول : عشان عاوز خصوصية بيني وبينك ، عاوز أقعد بدر وسيا سوا وبس ، من غير ناس .. من غير دوشة حوالينا
كينان بنحنحة : إحم ، أنا برا يا زعيم هشرب سيجارة
سيا بتعب : هو كينان زعلان ؟
بدر بيبصلها ومتنح : تؤ
سيا بتميل راسها : طب إنت زعلان ؟
بدر بيبتسم وبيقربلها : تؤ
سيا بتريقة : عيد ميلاد ال تؤ ولا إيه ؟
بدر بحُب : عيد ميلادنا إحنا ، أنا برضو تعبان ، ما تيجي نركن تعبي وتعبك ونكون مع بعض
بيمسك راسها ويقربها ليه وهو بيشم ريحة شعرها وبيقول : الجنة ، النعيم بعينه في ريحتك
حضنته سيا وهي بتعيط وبتقول : أنا بحبك أوي ، بس نفسيتي تعبانة من كُل حاجة
رفعها بدر بين إيديه ف ميلت راسها على كتفه وغمضت عينيها ، طلع بيها ع السلم عشان يروحوا أوضتهم ..
* في أوضة كينان
سونيا قاعدة على السرير وماسكة الفون عمالة تتصل وهي بتاكل ظوافرها
بيجيلها الرد التلقائي : الجهاز مُغلق أو خارج منطقة التغطية
سونيا بعصبية من غير ما تاخد بالها : ما ترد بقى !!!
دخل كينان فجأة وقفل الباب وهو بيبتسم وبيقول : هو مين اللي يرد بقى ؟
سونيا بتوتر ورعب : ا الدليفري ، طلبت بيتزا بس الشبكة مش مجمعة خالص
قلع كينان قميصة ورماه ع الارض وهو بيدور في الشنطة بتاعته
سونيا بتغيير الموضوع : هتاخد شاور ؟
كينان أحرجها وهو ماسك هدومه وداخل : أه عقبالك ، عشان تنضفي من برا ومن جوا
دخل الحمام ورزع الباب ، قعدت هي تخبط على رجليها وبتقول لنفسها : شك فيا ، والله شك فيا ، رد يا زفتت . * متعرفش أن بدر قتله *
عدا اليوم على كدا ، كينان بيتعامل ببرود مع سونيا وبدر غرقان مع سيا ..
* صباح تاني يوم
نزل بدر على السلم وهو لابس قميص كُحلي وبنطلون إسود
لقى كينان واقف وماسك الفون
بتاعه
بدر بتعب : صباح الخير
كينان بتوهان : صباح النور يا زعيم ، حجزت خلاص .. أربع مقاعد على طيارة إنهاردة هنتحرك على العصر نوصل هناك على أول الليل كدا
بدر وهو حاطط إيده على دماغه : عظيم !
نزلت سيا كمان شوية على السلم وهي لابسة فُستان أزرق غامق لايق على قميص بدر ، فستان بسيط تقعد بيه
كينان قال بهزار من غير نفس : إنتوا مطقمين مع بعض ولا إيه ؟
سيا بإبتسامة حزينة : صباح الخير يا كينان
كينان بنفس إبتسامة سيا : صباحو يا برنسيسة ، أنا بلغت الزعيم هنسافر العصر ..
سيا هزت راسها وهي بتبص لكينان بحزن ، غطى عينه وقال إنه هيطلع يغير هدومه هو كمان
طلع كينان على السلم ف مسكت سيا إيد بدر ، بص على إيديها اللي ماسكة إيده ف قالت بهدوء : كينان ماله ؟ دا كان سُكرة القعدة .. ليه هزاره بقى باهت كدا
بدر مسك دقنه وهو بيقول : متشغليش بالك هو بس متخانق مع مراته ، تشربي قهوة ؟
سيا بهزة راس : لا ، ماليش نفس ليها ولا لريحتها
نزلت سونيا على السلم ف بدر ملامحه بقت غاضبة ، لاحظت سيا دا ف بصت على سونيا وعليه
سيا ل سونيا : صباح الخير ، مبقاش حد يشوفك يعني ؟
سونيا بحالة مُزرية ، شعرها مش مترتب ونازلة بالبيجاما وبتقول وهي بتتاوب : النوم ، بنام كتير الأيام دي
بدر بتلميح وهو بيلعب في ولاعته كالعادة : ليه ؟ في حاجة شاغلة تفكيرك ؟
فاقت سونيا وهي بتبصله وقالت وهي بتبلع ريقها : حاجة زي إيه يعني ؟
بدر بصلها بطرف عينه بعدين بص ل سيا وقالها : هروح أنا وكينان نجيب حاجة ناكلها عشان هنسافر إنهاردة
سيا : ماشي يا حبيبي
خرج بدر ف قالت سونيا بصدمة : هنسافر إنهاردة ؟
سيا بتعب : أها
* قدام المطعم
كينان كان واقف بيطلب الأكل ، وبدر ماسك الجورنال الاميريكي بيقرأ الخبر ، جثة الزعيم لقوها والكاميرات شافت واحد في نفس الشارع اللي إتقتل فيه الراجل لابس إسود ومقدروش يحددوا دا مين ..
كينان بسؤال : سبايسي ولا عادي يا زعيم ؟
بدر ببرود : سبايسي ..
رن فون بدر ، الخط اللي جابه في الأيام اللي قعدوا فيها ..
كان فون بيت ف عرف إنها اكيد سيا
رد عليها ف قالت بتعب : إتأخرتوا كدا ليه يا بدر
بدر بتنهيدة : جايين أهو ، محتاجة حاجة ؟
سيا سكتت وفجأة صرخت بصوت عالي وهي بترمي الفون : ألحقنننييي يا بدررر ، إلحقننيي ااااااه
بدر بص للفون وجري ركب العربية ، كينان شاف بيركب راح فاتح باب العربية اللي جنبة بسرعة وركب
ساق بدر العربية بأقصى سُرعة ..
يتبع ..
#خارج_قانون_الحب٢
#روزان_مصطفى
#بقلمييييي
البارت الجاي مش هيخليكم تاخدوا نفسكم من اللي هيحصل ، هسيبكم لتوقعاتكم .. ♤
تفاعلوا عشان الجاي ينزل أسرع ..
الفصل التالي: اضغط هنا
يتبع.. (رواية خارج قانون الحب الجزء الثاني) اضغط على اسم الرواية لتجد الفهرس كاملاً بجميع الفصول.