رواية ظلم وتنمر – الفصل السادس
رفيف: وأنا بردوا خايفة مش كفاية سحب مننا درجات أعمال السنة بتاعت التكاليف
ودخلوا فعلا في مجموعتهم وحصل اللي كانوا متوقعينه
وكل يوم ويوم امتحان لحد ما خلصوا امتحانات العملي وخدوا أسبوع أجازة لامتحان الفاينل
شروق كانت بتذاكر بجد ومابتضيعش ولا فرصة حاطة حلمها قصاد عينيها وعايزه توصله
فات الأسبوع وبدأت امتحانات الفاينل أخيرا وأخر تيرم
لوجي: أهي أختنا الدحيحة وصلت
رفيف بضحك: ماعرفش بتطلع الأولى إزاي كل سنة دا احنا مرفهين عنها ومابننجح بمقبول كل سنة ومرة نطلع شايلين مادة ولا اتنين
لوجي: واكلة بعقل الدكاترة حلاوة وبتشارك في كل محاضرة عشان الدكاترة تعرف اسمها ويقفلولها أعمال السنة
رفيف: بت مش سالكة بنت الزبالة دي
وفضلوا يضحكوا عليها وكانت واقفة بعيد عنهم بس شايفاهم وهما عمالين يشاوروا عليها ويضحكوا بس مش عارفه بيقولوا إيه
فضلت تركز في الملخص اللي عاملاه وماتركزش عليهم
وفاتت أيام الامتحانات وكانت مرهقة جدا من الامتحانات والمذاكرة
بعد أسبوع كانوا منتظرين النتيجة، وكان رحيم رجع الصعيد أجازته وهو مقرر يعرف أهله إنه عايز يخطب شروق بس مستني النتيجة تطلع ويطمن وبعدها يفاتحهم
هو عارف عنها كل حاجة وبيتمناها زوجة وحبيبة وكل حاجة ليه مش زي البنات اللي كان بيشوفهم وصعب يلاقي واحدة زيها
كان بيروح مع والده الأرض ويشوف المحصول ورجع معه بعد الضهر، وكانت والدته مجهزالهم الغدا
شروق كانت كلمت صاحب الصيدلية عشان تتدرب فيها لحد ووافق وكانت واخدة ليه فلوس العلاج بعد لما والدتها قبضت
الصيدلي: هاتي يا شروق الروشتة دي واعملي زي ما علمتك واللي مش تعرفيه وريه ليا
شروق: ماشي، وبصت في الروشتة وبدأت تجيب العلاج زي ما مكتوب والدكتور اتأكد من اللي مكتوب
وقال حاسبيها وعرفتها الحساب
الصيدلي: دماغك حلوة يا شروق بتفهمي بسرعة ماتعبتنيش معاكي في التدريب
شروق: الحمد لله
وبتفوت الأيام وأخيرا جت لحظة الدخول عاللينك عشان تعرف النتيجة
كانت وقتها في الصيدلية ومتوترة كتبت البيانات وبتدعي ربنا وابتسمت بفرحة ودموع وهي شايفة تقديراتها زي كل سنة
الصيدلي: ها يا شروق عملتي إيه
بصتله شروق بفرحة وقالت: امتياز زي كل سنة
الصيدلي بابتسامة: مبارك يا شروق ربنا مابيضيعش تعب حد وأنتِ تعبتي وسعيتي وربنا كرمك
شروق: الحمد لله، هتصل بماما أفرحها
بقلم إيسو إبراهيم
الصيدلي: ماشي
واتصلت على والدتها تعرفها النتيجة وتطمنها وتفرحها إن خلاص هانت وفاضل بس التعيين وتستنى الجواب من الكلية
كانت والدتها قاعدة قلقانة بسبب بنتها وبتدعيلها، لقيت شروق بترن عليها ردت بسرعة وقالت: ها يا حبيبتي عملتي إيه
شروق بفرحة: الحمد لله ربنا وفقني ونجحت يا حبيبتي
فرحت والدتها جدا وقالت: مبارك يا حبيبة أمك دايما رافعة راسي
شروق: الحمد لله ربنا كرمني
عند لوجي ورفيف كانوا زعلانين جدا وإنهم رسبوا في مادتين وهيروحوا يمتحنوها ويبقوا دور تاني وتكتب في الشهادة وأهلهم عاقبتهم وحرموهم من الخروج
عند رحيم كان عارف النتيجة أول ما ظهرت في الكنترول من يومين بس كان مستني شروق تعرفها وتظهر عالموقع
راح يشوف والده فين لقاه قاعد بيشرب شاي وبيكلم حد
قعد جنبه لحد لما يخلص، لكن لاحظ إنه بيتكلم عن عروسة
بعد لما خلص رحيم قال: كنت رايد أكلمك في موضوع يا بوي
والده: وأنا كُمان يا ولدي كنت عايز أخبرك عن موضوع
رحيم: خير يا بوي
والده: عروسة مليحة ومتعلمة زي ما أنت رايد لحد تالتة ثانوي من البلد اللي جمبينا والكل بيشكر فيها وفي عيلتهم
رحيم: بس يا بوي دي مش معها شهادة جامعية
والده: أنت هتعمل إيه باللي متعلمة، المهم واحدة ليها حسب ونسب واسم عيلتها مسمع في البلد وأحسن ناس وتعرف تتحمل المسؤولية يا ولدي وتريحك وتفهمك وتشوف طلباتك وتحبنا وتعرف تربي عيالك عالأصول
رحيم بتوتر: بس أنا في بالي واحدة
والده باستغراب: مين هي وبنت مين ولو معروفين وكويسين نروح نطلب يدها ليك يا ولدي
دخلت والدته في اللحظة دي وقالت: مين هي يا ولدي
رحيم: كانت طالبة عندي في الكلية وعارف عنها كل حاجة وهتبقى معيدة هي كمان عشان كانت شاطرة وبتجيب امتياز كل سنة
والده: ودي بنت مين وعيلتها مين
رحيم بتوتر: احم هي اسمها شروق، ووالدها متوفي ليها أخ ووالدتها اللي متولية مسؤوليتهم هي عمرها ما اتكلمت معايا غير في أي حاجة تخص الدراسة ولا بينا أي حاجة ولا بينت ليها أي حاجة بس أعرف عنها كل حاجة لأن الشقة اللي أنا ساكن فيها قصاد بيتها بشوية
والدته: أمها بتشتغل ولا عيلتهم مين
رحيم: اه عاملة نظافة وعلى قد حالهم
والده بعصبية: أنت اتجننت يا رحيم، عايز تاخد واحدة أقل من مستوانا
الفصل التالي اضغط هنا
يتبع.. (رواية ظلم وتنمر) اضغط على اسم الرواية لتجد الفهرس كاملاً بجميع الفصول.