رواية مغامرات عائلية الجزء الثاني – الفصل السادس عشر
16
بارت 16
دلفت دينا و قالت : جدوووو
عبدالله : في ايه خضتيني يا بنتي
دينا و هي تلهث : حبيبة .. حبيبة هتولد .. قالت انها تعبانة اوي
سعاد بشهقة : ايييه ؟! .. وسعي كدة
صعدت لاعلى بسرعة و تبعتها النساء
حلا : بس ده مش ميعادها .. يمكن يحصل زي المرة الي فاتت
دينا : لا المرادي شكلها بجد .. انا هطلع احضر حاجتها
فارس بحزم : كارما مية سخنة بسرعة .. لارا اطلعي هاتي جزمتي … حلا حضري حاجة خفيفة ناكلها بالسكة .. مصطفى روح هات مفاتيح العربية .. يلا بسرعة متنحين ليييه ؟!
حلا : ايييه ده ما تتلم يا فارس .. انا هروح اشوفها
كارما : بني ادم رخم
مصطفى : الا هما بيستخدمو المية السخنة ليه يا فارس ؟!
فارس : معرفش .. يمكن عشان الواد يستحمى بيها
ايهاب : بطل ظرافة يالا مش وقتك .. روح حضر العربية عشان يودوها المستشفى
فارس : ايه الي احضره فيها بالزبط ؟ مهي متلقحة برا و المفتاح مع اوس ليه الاوفر ده ؟!
كارما : يا ابني طلعها من الباركينج و اركنها قدام الباب عشان يطلعو بسرعة و ما يتأخروش
لارا : انتو ليه محسسيني انها هتولد دلوقتي حالا ؟ دي لسا ما بتصوتش اصلا و علميا لسا هتاخد وقت لغاية ما البيبي ينزل بجد .. عادي الحكاية مش محتاجة جو الافلام ده
كارما : مش وقت فلسفة.. انتي عمرك شوفتي وحدة بتولد قبل كدة ؟
لارا : لا
كارما : يبقى اسكتي .. عشان فريدة لما جاها الطلق يا دوبك وصلنا المستشفى من هنا اسر نزل من هنا
في الاعلى .. كانت حبيبة تتألم و تبكي من شدة الالم
سحر : لا ده طلق رسمي .. لازم تروح المستشفى
سعاد : قومي يا حبيبتي نجهزك يلا
حبيبة ببكاء : مش قادرة استحمل يماما
سعاد : معلش استحملي شوية مش فاضل كتير على ما تشيلي ابنك .. فكري كدة و بس
اوس بقلق : البسي هنا مفيش داعي تتحركي كتير
سحر : لازم تتحرك عشان تساعد نفسها و تولد
اوس : مهو مش على حساب صحتها .. مش شايفاها بتتلوى قدامك ازاي ؟؟
سحر : ما هيا دي الولادة يا ابني .. انت كدة بتوترها اكتر .. انزل حضر العربية و احنا جايين وراك
اوس : مش هسيبها لوحدها
حبيبة و هي تمسك به : اوس ما تسيبنيش .. ااااااااااااااه .. مش قادرة استحمل
دلفت دينا بسرعة و قالت : انتو مستنين ايه ؟! يلا يا حبيبة جهزتلك شنطتك و هنروح .. ما تخافيش هتولدي بسرعة و كل الوجع ده يروح في ساعتها .. حاولي اتنفسي .. شهيق و زفير يلا اعملي كدة
حبيبة و هي تتنفس : شهيق .. و زفير .. شهيق و زفير .. دينا اوعي تسيبيني خليكي معايا ارجوكي
دينا : مش هسيبك خالص .. حاولي تتنفسي و تحافظي على طاقتك عشان تحطيها كلها بالولادة .. يلا قومي يا حبيبتي
خديجة : حبيبة اقري اية الكرسي و رددي الاذكار و ربنا هيسهلها ان شاء الله
*****************
بعد وقت قصير ذهبت حبيبة للمستشفى
خولة باستغراب : انتو رايحين فين ؟
زياد : هنروحلهم المستشفى مش معقول نفضل على اعصابنا كدة
خولة : و الله ؟ القبيلة دي كلها هتروح المستشفى ؟؟
فارس : ايوة يا طنط عايزين نحضر الولادة و نشوف البيبي اول ما يتولد
خديجة : تحضر ايه يا اهبل .. اتلم و بلاش هطل .. مفيش مرواح على حتة
غادة : اصلا امن المستشفى مش هيقبل يدخلكم كلكم .. انتو مش شايفين العدد ؟
حلا : على الاقل اروح انا .. دي اختي الي بتولد
خديجة : اول ما تولد هيكلمونا و نروحلها مش عايزين نوترها .. اقعدو عاقلين يلا
حلا : طب اشمعنا دينا الي راحت معاها ؟ انا اختها و انا الي لازم اروح
خولة : هي شبطت بدينا و مرضيتش تسيبها .. المهم دلوقتي تولد على خير و بعدها تروحيلها
مصطفى : الله هبقى عم للمرة التانية
فارس : و انا هبقى جوز خالته المفترية كمان
حلا : ما تبطلو المعيلة دي .. انا هموت من الخضة
فريدة : عادي يا حلا ده وجع لحظي .. هيا تولد و بعدها هتبقى كويسة .. انا قومت من تاني يوم و الله
لارا : انتي قوية و قادرة بس دي مسهوكة و هتفضل تتدلع
حلا : لارا اقصري الشر و اتكتمي مش عايزة اجيبك من شعرك انا وعدت جدو مش هضرب حد تاني
لارا : يختي مهيا بتدلع خلقة ربانية ما بالك لو ولادة ؟!
حلا : انتي مالك ؟؟ ما تخليكي بنفسك جاتك القرف
كارما بنرفزة : ما بس انتي و هيا .. حتى و البنت بتولد عايزين تتخانقو ؟؟
غادة : ده بدل ما تقعدو تدعولها ؟ البنت بحالة صعبة و لازم ندعيلها عشان ربنا يسهل ولادتها
فريدة : عندك حق .. استهدي بالله يا حلا و روحي نامي لو حصل حاجة هيقولولنا اكيد
اتى حسين و قال : مالكم في ايه ؟ ليه متجمعين كدة ؟
خولة : قال عايزين يروحو المستشفى
حسين بصدمة : كل دول ؟ هتعملولهم ايه لو رحتولهم يعني ؟؟
حلا : يا بابا انا قلقانة على حبيبة لازم اكون جنبها
حسين : ما مامتك و سحر و دينا معاها .. ما تخافيش لسا ما ولدتش .. اول ما تولد هيقولولنا
حلا بغصة : طب سيبتني اروح اطمن عليها بس .. دي بتتعب من اي حاجة
حسين : بكرا الصبح هنروحلها يا حبيبتي .. ما تقلقيش عليها بقا
فارس : انا هروح اكلم زيزي و اقولها
فريدة : اوعى .. انت اتجننت ؟ احنا ما صدقنا خلصنا منها
خولة : اما تولد البنت الاول و بعدين نعملكم كل الي عايزينه .. اتلمو بقا
********************
في صباح اليوم التالي
تميم : ما تقلش ربك هيسهلها .. اهدى يا اوس بقالك ساعة رايح جاي
اوس بتوتر : بقالها من امبارح يا تميم .. لغاية الان ما خرجتش
تميم : عادي الطلق بياخد وقت .. اهدى انت كدة و استهدي بالله … ان شاء الله كل حاجة هتبقى كويسة
خرجت سحر
اوس بلهفة : طمنيني يماما حصل ايه ؟
سحر : لسا مفيش حاجة .. حبيبة مش مساعدة نفسها ابدا
اوس : طب ينفع اشوفها ؟
سحر : لا مينفعش .. اطمن يا حبيبي هتبقى كويسة و الله .. دي حاجة طبيعية
تميم : كل القلق ده هيروح لما تشيل ابنك بايديك .. بس اهدى شوية
سحر : انا خرجت اطمنك بس .. هدخلها تاني دي متبتة بدينا و مش سايباها ابدا
التفت اوس ناحية الممر وجد افراد العائلة قادمين اليهم
اوس : و دول ايه الي جابهم ؟؟!
تميم بضحك : ده جيش التتار و لا ايه ؟
فارس و هو يلهث : طمنونا ؟ القرن طش ؟
اوس : يعني ايه ؟!
فارس : معرفش سمعتهم بيقولو كدة على اليوتيوب لما الوحدة تولد
حلا بقلق : سيبك منه و قولي حبيبة وضعها ايه
اوس : معرفش بيقولو لسا بتطلق
حسين : ان شاء الله هتقوم بالسلامة
تميم : دول كلهم جايين ليه يا اونكل ؟!!!
فريدة : كلهم شبطو عايزين ييجو معانا
تميم : ليه ؟؟ حد قالكم انها داخلة حرب ؟
كارما : ما احنا قلقانين عليها .. يمكن تحتاجنا بحاجة كدة و لا كدة
تميم : و هتعملو ايه ؟ ما كنتو تجيبو جدو و بابا و عمي ايهاب و تكمل الحكاية بقا
خديجة : انا هروح اشوفهم خليكم هنا يا بنات
اوس : مش عايز اشوف حد من المتخلفين دول قدامي .. انا عفاريت الدنيا كلها بتتنطط بوشي مش ناقص جنانهم
تميم : زياد .. روحهم البيت مفيش داعي نعمل قلق المستشفى مليانة عيانين
فريدة : صح لازم نروح و نبقى نرجعلهم لما تولد
حلا : و المصحف ما هتحرك من هنا قبل ما اشوفها و اطمن عليها
فارس : يا رب تجيب بنت يا رب
زياد: ما تتلم يا فارس .. ده احنا عارفين انه ولد من ست شهور
فارس : عادي يمكن اتقلب في بطنها بعدين .. لو جات بنت هتجوزها انا
حلا : فارس مش وقت خفة دمك دي .. عايزين نطمن ع البت
بعد دقائق .. خرجت سحر و خديجة معا
سحر : الحمدلله وضعها بقا احسن .. شوية و هتولد
اوس بتوتر اكبر : طب و سيبتيها ليه ؟ خليكي جنبها
سحر : ما ينفعش غير شخص واحد بس .. حبيبة متبتة بايد دينا لغاية الان و ما رضيتش تسيبها تخرج من الاوضة
خديجة : اطمن يا ابني شوية و هتشيلو ابنكم و تفرحو بيه
زياد : اوس اهي دينا جات
خرجت دينا تزحف على الارض و هي تشعر بدوار قوي
اوس : في اييييه ؟
دينا بارتخاء : اااه معدتي اتقلبت .. اااه هرجع .. حد يجيبلي كيس فاضي و النبي
حلا : ليه ايه الي حصل
دينا : يلهوي على الي شوفته .. اعاااا هموت .. انا خلاص مش عايزة لا اتجوز و لا اخلف .. قال كنت بقولها نفسي اجرب الشعور قال
غادة : يعني ولدت و لا لا فهمينا
دينا : لسا .. دي طلعت عنينا كلنا .. لما الدكتورة قالتلها ادفعي لتحت قامت رازعها بالقلم
حلا بغضب : الدكتورة ضربتها ؟!!!!
دينا : لا هي الي ضربت الدكتورة و اتعصبت علينا كلنا
كارما : حبيبة تضرب ؟!!!! مستحيل
دينا : اقسم بالله صوبعها علمت على وش الدكتورة
اوس بعصبية : المهم هيا وضعها ايييه ؟
دينا : انت متعصب كدة ليه ؟ هو انت و مراتك علينا ؟
سحر : بطلو رغي بقا .. زياد خودهم كلهم و روحهم مش ناقصين فضايح في المستشفى
حلا : انا مش هروح قبل ما اشوفها
فارس : مش هنتعتع من هنا قبل ما نشيل النونو
زياد : دلوقتي هيجي الامن و هيخرجنا كلنا .. لازم نص يروح و نص يفضل
كارما : طب احنا ممكن نقعد تحت و بس تخرج من جوة نبقى نيحي نشوفهم
فارس : فكرة و الله .. اهو نتسلى مع الممرضات شوية
حلا بحدة : فارس احنا بالمستشفى ما تخلينيش احجزلك سرير هنا
فارس : في قسم الولادة ؟!
حلا : لا في تلاجة الموتى .. اتلم بقا مش وقت رخامتك
فارس : طب انا هنزل اشتري اكل اجيبلك معايا ؟
دينا : ما تتلم بقا يا فارس .. انزل هات مية
*****************
بعد وقت
خرجت سحر تحمل الطفل بين يديها
سحر بسعادة : الف مبروك يا حبيبي .. سمي بالله و شيله
اخذه اوس من يديها و يخالطه شعور الرهبة و السعادة .. كان يتأمل وجهه الصغير بسرحان و كأنه يحمل روحه بين يديه
حلا : الله صغنن خالص .. فيه شبه مني
دينا : فين الشبه يختي ؟ ما كل الاطفال الي هنا شبه بعض
فارس : هات يا اوس اشيله
اوس : لا .. ماما حبيبة فين ليه ما خرجتش ؟
سحر : اطمن يا حبيبي هتخرج بعد شوية
فارس : ما بلاش رخامة و هات اشيله انا متعود ع الشيل و اسر قعد معايا مدة كويسة
اوس : قولت لا .. محدش هيشيله غيري
حلا : انا خالته و لازم اشيله هات من ايدك
حسين : حلا .. فارس .. اتلمو و سيبو الراجل يشوف ابنه
كارما : طب انا عايزة ابوسه على الاقل
سحر : اوعي … ده بيبي صغير مناعته ضعيفة يمكن يلقط اي حاجة
غادة : طب نشيله شوية بس يا طنط
زياد بهمس : اصبري انتي بس تخرج حبيبة و اوس مش هيسأل على الواد من اصله
غادة : ده متبت بيه كانه هيهرب منه
زياد بابتسامة : عشان فرحان بيه .. ياه امته هنعيش الشعور ده .. انا خللت و انا مستني اتجوز بس
غادة بخجل : مش فاضل كتير على فرحنا و نتجوز بقا و نعمل عيلة
زياد : بقولك ايه انا عايز كل 9 شهور عيل .. عايز نعمل عيلة كبيرة كدة و كلها عيال يتنططو فوق دماغنا
غادة : ربنا يكرمنا يا حبيبي
حلا : طنط انا جبتله هدوم جديدة معايا سيبني اغيرله عشان خاطري
سحر : بعدين .. ده احنا لسا ملبسينه دول حالا
بعد وقت قصير انتقلت حبيبة الى اوضة عادية
كان اوس بجانبها و يملس على شعرها برفق
اوس : الف سلامة عليكي يا حبيبتي .. انتي كويسة ؟
هزت رأسها بتعب
اوس : مرتاحة هنا ؟ اغيرلك الاوضة ؟
حبيبة بتعب واضح : ما تقلقش انا كويسة
اوس بقلق : هيا ليه تعبانة كدة ؟
سعاد : طبيعي عشان لسا والدة .. اطلعو برا يا عيال مش عايزين نضغط عليها
حلا : بقالنا من امبارح مستنين مش معقول نخرج و نسيبها .. حبيبة اجيبلك اكل ؟
حبيبة بارتخاء : لا .. عايزة .. انام
اوس : دينا روحي اندهي للدكتورة
سحر : يا ابني ما تخافش هو شوية تعب و هتبقى كويسة .. الدكتورة لسا مطمناك دلوقتي
دينا : ما ينفعش نفضل هنا كلنا .. لازم نخرج و نسيبها ترتاح شوية
سعاد : ايوة .. يلا يا عيال اطلعو برا
كان فارس يحمل الطفل و يدندن بصوت منخفض
خديجة : فارس هات البيبي من ايدك
فارس : لأ .. مش هسيبه
خديجة : ما ينفعش كدة بقالك ساعة بتخض بيه
فارس : اهو بمشي بالراحة كويس كدة ؟
فريدة : مش لازم تفضل شايله بعدين يتعود زي اسر
فارس : محدش ليه دعوة
زياد بهمس : بصي على اوس كدة
غادة : ماله ؟
زياد : مش قولتلك اول ما تخرج حبيبة مش هيركز مع حد
غادة بابتسامة : ربنا يخليهم لبعض .. تعالا نخرج و نسيبها ترتاح
********************
في المساء
دلفت الممرضة لتركيب المحلول لحبيبة و لكنها توقفت فجأة
الممرضة بصدمة : ايه كل العدد ده يفندم ؟!
خديجة : الله اكبر .. صلي ع النبي يا بنتي
الممرضة : عليه الصلاة و السلام .. بس ليه كل دول موجودين ؟ و ازاي الامن سمحلهم يدخلو ؟
دينا : في ايه بنتنا خلفت و جينا نطمن عليها
الممرضة : ما ينفعش كدة .. لازم تخرجو
لارا بغيظ : ليه كانت مستشفى الي خلفوكي ؟ اعملي شغلك من غير رغي
فريدة : بس يا بت اتلمي
كارما بضحك : و الله لو حلا موجودة كانت هتجيبها من شعرها
دلفت حلا مع خولة و قالت : يا مساء الفل .. النونو عامل ايه
حبيبة بضحكة : بقاله ساعة بيسأل عليكي
حلا : عيون خالته يا ناس .. هاتي اشيله شوية
حبيبة : لا سيبه نايم و مرتاح بحضني
تمتم بذهول : ايه الي بايدك ده يا حلا ؟
حلا : ايه ؟ دي حلة محشي ورق عنب
تميم بصدمة : جبتي حلة محشي على المستشفى يا حلا ؟!!! اكيد اتهبلتي بمخك
حلا : ما حبيبة بتحب الاكلة دي اوي و عمتي عملتها عشانها
تميم بشلل : لا لا .. قولي انك بتهزري
فريدة بضحك : دول مش هيطردونا دول هيولعو بالمستشفى
حلا بسخرية : ليه ممنوع الاكل هنا ؟
تميم : عمرك شوفتي حد بيجيب حلة على المستشفى يا غبية ؟؟ دي ولادة مش رحلة
حلا : و مالو .. البت لسا والدة و لازم تاكل و تتغذى
فارس : خودي من ايدي يا غادة .. افرشي يا حلا ع الارض و يلا ناكل
سعاد : ما تتلم انت و هيا .. خولة ازاي تجاريها على هبلها ده ؟!
خولة : فضلت تزن فوق دماغي لغاية ما صدعت منها و عملتلها الي هيا عايزاه
حسين : فارس خود خطيبتك و امشو من هنا .. و خود الحلة دي معاك يلا
فارس : ايه ده باباكي عايزنا نخرج لوحدنا
حلا : انا ما جبتش الاكل عشانك انا جايباه لاختي
فارس : انتي متغيرة عليا اوي على فكرة
دلف حازم و ليلة التي تحمل بيدها بوكيه ورد و بالونات باللون الازرق
ليلة بحماس : هاااي
مصطفى بسعادة : ليلة هاي .. ازيك
الممرضة : كدة اكتمل العدد و لا لسا في تاني يا دكتور تميم ؟
تميم : لسا في جدو و ابويا و عمي في البيت و في يزن خطيب دينا لسا ما اجاش و في زيزي بقا و قرايب حبيبة دول مش هنا بس ممكن يجولنا
الممرضة بضحكة : لا كدة نفضي المستشفى كلها
فريدة بحدة : انتي واقفة عندك بتعملي ايه ؟ مش ركبتي المحلول ؟ يلا بقا على شغلك
الممرضة : يفندم العدد كبير اوي و ممكن يأثرو على صحة البيبي و الام .. المفروض يخرجو
فريدة : هيا شوية و هيمشو خليكي انتي بنفسك
تركتهم الممرضة و خرجت
تميم : فريدة ما ينفعش كدة .. البنت ما قالتش حاجة غلط .. من ساعة ما دخلت و الكل بيعاملها وحش .. انتي عايزاها تقول علينا همج و متخلفين ؟
فريدة : الله الله يعم الحساس .. خوفت على مشاعرها ؟
تميم : مش وقت عبط و خناقات تافهة .. حبيبة تعبانة و لازم ترتاح .. ممكن تقوليلي ابنك فين يا هانم ؟
فريدة : اه صحيح .. طنط فين اسر ؟!
خولة : سبته مع عمك عدنان قولت شوية و هتروحي
فريدة بشهقة : يلهوي .. حبيبة انا همشي و هرجعلك بعدين .. الف سلامة عليكي
حبيبة بضحكة : الله يسلمك
اوس : مدايقة من وجودهم ؟
حبيبة : لا خالص بالعكس .. مبسوطة اوي باللمة دي
تميم : بس خودي بالك ممكن ينقلو للبيبي فايروسات ده لسا مولود و مناعته ضعيفة .. و دول كلهم رايحين جاين .. لو ما روحوش هيجي الامن و يخرجهم كلهم
حبيبة بخوف : اوس .. مشيهم لو سمحت مش عايزة البيبي يتعب
اوس : حاضر يا حبيبتي … يلا يا عيال اطلعو برا
حلا : مش هنخرج
اوس : حبيبة عايزة ترتاح .. زياد خودهم وديهم البيت
حسين : يلا يا حلا زودوتها اوي .. امشي قدامي
حازم : انا كمان لازم امشي يا اوس .. الف سلامة ع الهانم
اوس : ربنا يسلمك .. هترجع مصر ؟
حازم : اه ليلة عايزة تشوف مامتها
مصطفى : بس احنا ملحقناش نشوفكم
حازم : مرة تانية يا مصطفى .. ليلة يلا
دلفت فرد الامن و قالت بصوت حاسم : الزيارة انتهت لو سمحتم اخرجو
دينا : كنا هنخرج من غير ما تقولي
خرج الجميع و استسلمت حبيبة للنوم بينما اوس ينظر للطفل بسرحان
سعاد بابتسامة : ربنا يخليكم لبعض و يفرحكم بيه
*******************
في الساحة الخارجية
دينا : حازم بيه ممكن اتكلم مع حضرتك شوية ؟
حازم : اتفضلي
دينا : بصراحة الموضوع يخص يمنى هانم مراتك
حازم : وفري وقتك يا مدام دينا .. انا مش مهتم اعرف حاجة
دينا بغضب : …………. يتبع
” اسفة ع التأخير ، ان شاء الله بكرا في بارتين ”
مغامرات عائلية 2
همس كاتبة
الفصل التالي: اضغط هنا
يتبع.. (رواية مغامرات عائلية الجزء الثاني) اضغط على اسم الرواية لتجد الفهرس كاملاً بجميع الفصول.