رواية عروس الجبايش الفصل السادس والأربعون 46 – بقلم ياسة الموسوي

رواية عروس الجبايش – الفصل السادس والأربعون 46

يُـمـن :- بس هددتني وحچت هيج امي طلعت الها تريد تكتلها لزمت امي ما خليتها اخاف عليها بعدهي مريضه ولا تروح تدفعها لو تضربها و راسها بعده مو زين صاحت امي عليه

— عوفيني عليها اعلمها شلون تهدد

— عوفيها يماا خليها تولي

عمتـي بديعـة بسرعة راحت وانا طببت
امي وسديت الباب امي فاتت للصاله وميته من القهر والعصبية انوب گامت للحمام تتقيأ وانا شفتها وانا تخبلت

اجيت اخابر على عمي ما خلتني گالت
ما بيه شي ركضت جبت الها ماي شربت وتمدد بالصاله و انا گاعدة يمها افرك
بـ اديها غمضت عيونها و ايدها على راسها

ربع ساعة تقريباً و عدلت گعدتها گعدت تباوع عليه وانا بس ساكته وراها گالت

— هذا الجنت خايفة منه شوفي من رفضته ما رفضته الشخصة لا بس رفضت هذه العائله والساس هذا يُـمـن بعدج هنا يمي ورجعت بديعـة وسوالفها من ترحين هنـاك شلون بيج

ما جاوبت لان حچيها كله صدگ رجعت گالت

— إني ما بيه بعد قهر وهبطات و للومة لايم جيـبي تليفوني انعل ابو الجابهم يا ابو العرفنا بيهم

— شـسوين بيه

— خليني اخابر عريس الغفله يسوي حل هاي من اولها هيـج تاليها شلون وياهم

گمت جبت نقالها انطيته الها كتبت رقمه ودگت عليـه ثوانـي ورد

— الو

— شلونك بُـرهـان

— اهلاً ام يوسف شلونج

— عندك رقمي

— اي عندي

باوعتلي وانا اشرت الها ما ادري ما منطيته اله رجع گال الها

— شلونكم اخباركم محتاجة شي

— والله احنه بنص الخير بنص السعادة وما محتاجين غير بس موقفك و فرض رأيك عليهم وهذا هوَ

— خير ان شاء الله شكو

حچى هيج ونبره صوته تغير رجعت جاوبته

— خالتك اجتنا النص البيت وهذاك الغلط والهدايد وتجاوزت لحد ما شبعت وبيها بخت إني مريضه لو ما مريضه اله احط عشر خياطات بـراسه واوديها الكم مدماية

— يا خالتي

— بديعـة الظالمة ، شوف بُـرهـان من الاول وإني اعرف هاي السالفه وهاي الشغله
فـ من هسه بعد گلبي خلينا نعبر النهر ما دامه ضيك لان راح تضل كل يوم واحد جاي مشوفنه طوله الحلو ومسمعنا صوته وخاطب علينا خطابات عظيمة خلينا كلمن يروح بحاله لان الوضع بعد ما يتحمل صبر ولا يتحمل تجارب وتنازلات البينا كافينا لان الصحة مو مثل قبل و طولت البال مثل قبل فـ زواج بعد ماكو و مخابرة و طب طلعة ماكو منا لمن تسوي الخطيبتك احترام وتقدير وراها بهذاك الوقت تعال وشلع عيوني واخذها منهن وهسه من رخصتك

حچت هيج وقفلت الخط بوجها وصاحت بيه اجيب نقالي انطيه الها گمت جبته الها اخذته وطبت الغرفتها وانا ضليت بالصاله بس شني ميته من القهر وعيوني گامت تحركني بس اگول الروحي والله ولا ابچي كافي بعد ما ابچي ولا اتعب روحي وين ما تصفه خليها تصفه انا هم تعبت بما في الكفاية وصفرت طاقتي الهنا وبس

شوية وگمت طبيت للغرفه اريد اقرأ بس
ما گدرت بالي مو وياي و مقهورة ومختنگه ذبيت الكتاب و گمت غطيت روحي بالغطا وغمضت عيوني ونمت من القهر ما گعدت بعد غير بالليل على صوت امي تگول العمي

— هذا العندي عاجبه عاجبه ما عاجبه الله ومحمد وعلي وياه

— بس مو هيج الحچي لازم تحلينها بالتفاهم لا تخربين على الابنية وهيَ
هسه يلا شافت باب الفرج

— يا فرج هذا اصلاً رجعت للظيم من جديد بعدين اما اخرب عليها لان هذول اني اعرف دواهم من الاول إذا ما نردعوا ونردوا وحسبوا الها حساب راح ياكلونها وترجع مدمغه بـين اديهم

— الولد اجى و گالج حل الموضوع ويا خالته ورجع حقج وحق بنتج بعد ماكو داعي للتشدد هذا يا مره

— ابو تميم الله يخليك إني هذا الزواج من الاول ما رايدته وگوه عليه صار، واليوم ما شفتها هذيج الادب سزز شلون تحچي وتهدد فـ خليني اضبهم شوية وخلي بُـرهـان اليوم ما ينام للصبح حتى باچر يگعد واحد جديد

— والله بعد ما ادري بيج بس خلي بالج بُـرهـان ما ينخسر

گعدت گعده و اسمعهم يعني جان هنا وما گعدتني وتعاركت وياه والله اعلم شسوت بيه زين هسه هوَ شعليه خطية

بقيت بالغرفه ما طلعت بس ميته من القهر ساعة و گمت لگيت بس عمي بالصاله يشرب نركيله سلمت عليه ورحت للحمام غسلت وراها للمطبخ لگيته جايب عشة وياه ومتعشين وعايفين الي حميته وگعدت تعشيت بالمطبخ وحدي ومن كملت عزلت المطبخ وغسلت المواعين البيه ورجعت للصاله گعدت يم عمي بسرعة گال

— امج اليوم جايتها الحاله

— اصلاً تخربطت و گامت تتقيأ

— لا والله

— اي والله وما قبلت اگلك ولا اخابرك

— لا حول الله

— هسه صارت زينه

— اي زينه فاتت نامت

— بُـرهـان جان هنا

— اي وامج تعاركت ويا هذيج العركة التخبل والله يا امج فـد مشكلة وكل اذيتج منها الولد متعارك ويا خالته ويا حاكم وحتى ويا امه وابو تالي امج ما انطته مجال وعاركته و سوتها هوسه عليه

— هيَ هم حقها تخاف عليه وتنقهر عليه

— لا مو حقها لان الولد متعارك وياهم وماخذ حقج منهم وموگفهم عند حدهم ماكو داعي تتصادم ويا هيج و إني ما حچيت وياها ولا ضغطت عليها لان بعدهي تعبانه وما اريدها تنقهر يُـمـن عمو معليج بيها وباچر إذا اجاج للجامعة گعدي ويا وسمعي منه وتفاهمي ويا بـ اسلوب لا تتشددين عليه

— ان شاءالله

رجعت گمت للغرفـة و ضليت گاعده وحدي لحد ما تعبت ونعست ونمت ومن گعدت ثاني يوم امي ضايجة ومالها خلك وإني ابد ما فتحت وياها موضوع ولا حچيت شي وهيَ نفس الشي ساكته لحد
ما صار وكت دوامي بدلت اريد اروح قبل
لا اطلع گالت

— البارحه اجانا و تعاركت ويا وگتله ماكو مره بعد و اليوم من يجي عليج گوليله امي ما تقبل احچي وياك و تريدني افصخ يُـمـن اني جاي اسوي كل هذا الخاطر مصلحتج ترى ما راح تفصخين صدك بس شويه خلي ينضب حتى يضب اهله وبعد ما يندگون بيج

— الله كريـم

— خلي النفسج قدر وقيمة وخلي يفرض احترامج وتقديرج على الكل ، هاج هذا تليفونج

اخذت النقال منها و بستها وطلعت من صعدت بالسيارة فتحته لگيته گومه مخابر وداز رسائل بقيت اقرأ بالرسائل كلها يعتذر من الموقف وكاتب شلون رايح عليهم ومتحاجي وياهم وراها داز راح يجي كلش هواي كاتب اكو بيهن امي فاتحتهن واكو لا ما مفتوحات

لحد ما وصلت للجامعـة اول ما طبيت شفته واگفـه ويا واحد من الدكاترة وجان مشغول يحچي وياه وراها شافني بسرعة دار للدكتور مدري شگـاله واجى عليه
وصل يمي قريب بس فد مره ضايج وتعبان
و گـال

— شلونج عمري

— زينه

— شلونه الوضع

— زين، انتَ شلونك

— اني بخير بحيث الخير طالع من خشمي

سكتت ما رديت رجع گال

— اعتذر على الكلام اللي سمعتيه من خالتي وعد بعد ما تتكر

— اتمنى ما تتكر ولا ارجع اشوفها ولا تشوفني بُـرهـان انا من البداية گتلك صعب ارتبط بيك لان انتم وياهم اهل بس وعدتني ما يصير شي مو زين وتالي من اول يوم والهجوم بلش

— من نشرت المنشور مخابر خالي على امي يتبارك ويعاتب ليش ما عازمينهم وليش ما منطينهم خبر وبعدين سأل منو العروس فـ امي حاچيتله ومن خالي الباقي خالاتي منتشر الخبر وهيَ الله يسلمها من سامعه على أساس متخربطه وماخذينها للمستشفى ورها جاية عليكم بدون علم عمي المهم إني رحت عليهم وطبيت بيتهم من بعد كل سنين الانقطاع و حچيت وياها ويا عمي و واثـق ورجعت حچيت ويا اخوالي واحد واحد و حتى خالتي سميعة هم سويتلج موقف وياها ومن هاي اللحظة إذا احد تعدى حدودة وياج تاخذين حقج من عيوني

— بس امي ما تقبل احچي وياك

— امج تكرهني وما تريدني من الاول واجتها فرصة من ذهب

— لا والله ما تكرهك بس بسبب المشاكل مال خالاتك جانت رافضه وتالي طلع حچيها صحيح

— مو گتلج حليت الموضوع ورجعت حقج وفرضتج عليهم واحد واحد و بعد محد يتقرب منج ابد، بس گوليلي الحل ويا امج شنو فهميني ترى للصبح ما نايم

— ما ادري

— ما تدرين شنو يُـمن ما اريدج بهذا الضعف اريدج قوية تقررين وتردين وتحاورين و حقج اطلعينا من حلگ السبع لا تگولين ما ادري

بقيت ساكته ما جاوبته رجع گال

— هسه فوتي للمحاضرة ومن تخلصين محاضراتج تلگيني منتظرج بالغرفة

— ماشي

عفته وطبيت للمحاضرة خلصت الاولى والثانية و بعدين اخذنا استراحة ورجعت كملت باقي محاضرتي ومن كملت وطلعت لگيته واگف يم باب القاعـة بس شافني طلعت أبتسم اجيت عليه گال

— كملتي

— اي

— يلا نطلع

— عباس راح يجيني

— انطيه خبر لا يجي اني اخذج اريد احچي ويا امج

بعدني هسه طلعت نقالي جاي ادگ على عباس دگت امي عليه رديت بسرعة گالت

— طلعتي لو بعدج

— هسه راح اطلع

— استعجلي شويـة

— شكو

— من تجين نحچي يُـمـن اهلي مشتعلين وروحي طالعة من خشمي تعاليييي بسرعة

حچت هيج وسدت النقال بوجهي سألني

بُـرهـان :- شكو

— ما ادري بس كلش ضايجة وعصبية انا اشوف خليني ارجع ويا عباس و اشوفها شبيها وبعدين اخابرك تجي تحچي وياها

— ماشي على راحتج بس لا تعوفيني بدون اتصال طمنيني عليج ماشي

— ان شاء الله

مشينا سوى للباب بقينا اقل الربع ساعة منتظرين عباس وراها اجى صعدني و راح و انا بعدني بالطريق رجعت امي دگت جاوبتها گالت

شهيناز :- طلعتي بعدج

— اي بالطريق شكو خوفتيني

— سلامتج كلش سلامتج كلشي ماكو مادام رجعنا الرائف وامه احنه بخير وسعادة يُـمـن رجعي ونحچي

حچت هيج و رجعت سدت النقال بوجهي ياربي السالفه مو خالية معناها صاير شي جديد من وره بيت عمي حاكم

ما صدگت اوصل انتهيت لحد ما وصلت
اول ما طبيت لگيتها گاعدة بالصالة وجهها اصفر كركم وترجف بس شافتني گالت

— يُـمـن اني شـصير منج

ما جاوبت رجعت گالت

— احچيييي

— امي ، شكو شبيج

— إني امج يعني احبج وما اكرهج و اريد مصلحتج موو صح

— اي صح

— اي زين لعد بُـرهـان تنسينه وزواج منه ماكووو

— ليش

— هذا الزواج ما منه غير الاذية و التعب والظيم واني وانتِ بعد ما بينا للتعب

— غير تفهميني شكو

— اني اگلج شكو رائـف خابرني و شكو شي يعجبج حچى وگاله ما خله كلمة ما گالها
لج يُـمـن يحلف ميت امام مأشر ويريد يرجع للعراق حتى بس يشوفج شلون تاخذين بُـرهـان وشلون بُـرهـان ياخذ ويحلف ميت أمام جانت بينج وبين بُـرهـان علاقة من جنتي بذمته

گعدت على الكرسي هبطت ما گدرت اوگف رجعت گالت

— ولج يمه هذول مو اودام والعيشة وياهم تگصر العمر وانتِ كافي عليج الظيم القديم وظيم منـاف انوب هسه ترجعين النفس المله القذرة وتكمل حياتج وياهم

— بس بُـرهـان شعليه بيهم هوَ وعدني بعد محد يتقرب عليه و اكيد ما يدري
بـ رائف مخابر عليج هسه اخابره واگله عليه

— واحنه نضل كل شوية هزي تمره يا نخله
كل شوية واحد هاد علينا و راكضين البُرهان تعال والله شوفهم واحچي وياهم شنو الجابرنه عليهم فهميني خلصت الزلم خلصت العالم خلصت الدنيا ماكو زلمه بالدنيا غيره

— وهاي انا اضل يوميه متزوجة واحد ترى انا هم بشر هم استحي وانقهر واضوج
و اتحسس انا الله خالقني من دم ولحم مو صخره ولا حديد يوميه تعاي عرسي على فلان و اقبلي بعلان وإذا ما ردت العرس تطلعلي سعدية وغازي يعني الا اموووت يلا اخلص

عفتها وگمت طبيت للغرفة وقفلت الباب عليه و دگيت على بُـرهـان ما عنده اتصل رجعت دگيت على الرصيد رفضه ورها بـشوية خابر

بُـرهـان :- ها عمري

— رائـف مخابر على امي ومتعارك وياها
ما حچت شگايل الها بس متعاركين ومهددها يرجع للعراق وهسه امي متخبله

سكت شوية وراها رد

— اي خل يرجع منو لازمه

— بُـرهـان امي متخبله وتنكز و هسه شبعتني رزايل وغلط

— بس شوية اخابرج

حچى هيج وسد الخط بوجهي وانا گمت بدلت هدومي وميته من البچي تانيته يخابر ماكو ما خابر

لليل وهوَ ماكو وامي اخذت قرار بعد ماكو لا عرس ولا بُـرهـان ولا اهل بُـرهـان ومخابرة عليه تريده يجي حتى تنهي الموضوع وياه بس ما مجاوبها راجعه مخابرة على عمي وخالتي نفس الشي ما رادين عليها انا متأكد بُـرهـان ما خلاهم يجاوبونها لان يدري بيها جاي تخابر حتى يجون يفركشون

خلص اليوم كله وانا عبالك سمجه متهورشة متعذبة عذاب وامي نفس حالي و بُـرهـان ماكو لا خابر ولا فهمت منه السالفه

ثاني يوم من رحت للجامعة عبالي اشوفه گلت جوز راح يجي يشوفني بس ما شفته ما جاي مدري شلون داومت ورجعت للبيت ومدري شلون راح تخلص ياربي

وصلت للبيت بس بدلت ونمت ما گعدت بعد غير بالليل كلش باوعت للنقال ماكو ما داگ ضل بالي عليه مو من عوايده خاف صاير شي بيه خاف تعارك لو صارتله مشكلة بسببي دگيت عليه ما جاوب

بعدين رجعت دگيت طلع عندي مغلق يعني قفل الخط ما يريد يحچي وياي إحس انشلت ونرگعت من القهر على روحي وعلى حظي بعدني بهذا الحال ودگت ريـام
بسرعة جاوبتها

ريـام :- شلونج يُـمـن

— بخير

— اعرف تعبانه ومقهورة وبالج يم بُـرهـان بس والله بُـرهـان مريض فد مره ومن البارحه لليوم نايم بغرفته باب الغرفه ما طالعة

— شبيه

— ما اعرف لا يقبل يحچي ولا يشارك احد بوضعه باقي بس ساكت ويطحن جكاير ويرجع ليورة

— يعني شنو يوجعه شي يشكي من شي
زين ليش ما يرد عليه وقفل الخط من دگبت عليه

— باعي والله إني ما اعرف شنو السبب كل اللي اعرفه صايرة بينه وبين رائـف مشكلة يعني فهمت من امي متخابرين وصاير بينهم كلام بس شنو هذا الكلام ما ادري وراها رأسن وضعه تخربط و ضغطه معلك من البارحه لليوم والقران وانتِ ممخلفتني بابا كل شوي يركض للمرض يجيبه يقيس ضغطه من گد ما تعبان وهسه يلا طلع من غرفته واجى عليه رادني اخابرج أطمنج هوَ زين وباجر يخابرج لان اليوم عنده شغل بس والله اني مو بـ ايدي من حچيتلج هذا الكلام ردت اخليج بالصورة امانه سوي نفسج متعرفين بموضوع رائـف خاف يحچي عليه بُـرهـان

— ماشي ريـام تصبحين علي خير

— وانتِ بخير

قفلت الخط منها و طلعت امي نايمة وعمي ما جاي اليوم والبيت فارغ افرغ من روحي گعدت على القنفه وحطيت راسي وغمضت عيوني و دموعي هيج تصب وحدها

بقيت مده طويله بهذا الحال وراها گمت غسلت و صليت الوتر و قريت قران بين ما يـأذن الفجر وراها اذن صليت الفجر ونمت
وانا گاطعه أملي من الدنيا والناس البيها بعدني هسه غفيت وسمعت صوت امي
تگعد بيـه فزيت شكو تگعد بيه گلت الها

— شكو

— گومي اخذج الوقت داومج راح يفوت

— بيش ساعة

— بـ 11 نص

— شبسرعة هسه نمت

— دگومي گومي اخذج الوقت

گمت مكسره تكسر وعيوني مورمه وراسي طبل بيه وهيج تفتر بيه الدنيا فتت للحمام على السريع سبحت و طلعت بدلت و اكلت كعك وجاي حتى ريوك ما تريگت وركض ركض رحت للجامعة

اول ما طبيت للجامعة بوجهي للمحاضرة الحمدلله لحگت عليها لگيت الدكتورة بعدهي ما بدأية بيها

خلص اول محاضرتين وطلعت للكافتريا راسي موتني اريد جاي بعدني هسه نزلت صار بوجهي بُـرهـان وگفت باوعتله بس هوَ ما شافني جان بـ ايده النقال ومشغول بيه مدري شيكتب

بقيت بمكاني واباوع عليه وهوَ ولا رافع راسه ولا انتبه اخر شي مشيت وصرت بصفه كلش قريب وتعديته وطلعته اول ما تعديت منه رفع راسه مدري شلون عرفني وهوَ منزل راسه

اجى وراي وصار بصفي يمشي ما وگفت ولا حچيت ولا حتى باوعتله گال

— يلا عاد شدعوة عيوني ليش هيج كارهتني وحتى السلام عليكم ماكو

وگفت وباوعت عليه و رديت

— انا كارهتك لو انتِ كارهني وما تريد تحچي وياي

— هذا اناا

— لا تعيب عليه

— انا اعيب عليج الله ياخذني إذا سويتها

— مو جاي تگول انا و هذاك اليوم تگول چا

— چا انا غير احبنج و گمت احچي مثلج چا شأسوي يبوية مو بـ ايدي هيج وحدها تطلع الكلمات غصب عني

— ليش ما ترد عليه وبعدين تقفل الخط

تعاي نگعد هناك ونحچي

مشينا للكافتريا گعدنا راح هوَ طلب اكل ورجع گعد گبالي واحط ايده علي الميز مثبت عكسه على الميز وكف ايده على خده ويباوعلي وساكت

يُـمـن :- ريـام گالت مريض البارحه

— ما بيه شي بس شويه ضغطي تخربط

— ليش ما جاوبتني ويومين ما مخابر ولا سأل

— شويه الضغط لاعب عليه و مالي خلك احچي شي خلصتها نايم اليوم يلا تحسنت وهاي اجيت اشوفج

— شبيك شكو

— ماكو شي شبيه

— يعني ما بيك شي

— اي ما بيه زين لا يضل بالج انتِ شلونج شلونه الوضع ويا امج

— بعدهي على موقفها

— اليوم اجيكم بالليل و احچي وياها لان عندي هواي سوالف وياها وما اگدر اجي وعمج ما موجود الافضل هوَ گاعد حتى ننفق على كل شي

اجى الولد جايب الاكل حطه گبالنا وراح گال

— يلا عمري اكلي

— ما اريد

— اكلي يروحي وخليني اكل وياج ما ماكل صار يوم ونص

حچى هيج وشال فنكر بالشوكة و يريد يوكلني باوعت للطلاب ورجعت اباوع عليه ضحك و گال

— شبيج

— عيب منا الناس

— مرتي وحبيبتي الناس شكو بيناتنا

— ميخالف عيب استحي

— واني ما استحي فتحي حلگج

— لا

— شوفي إذا ما تفتحين حلگج وتاكلين راح اگوم اوكلج غصباً عليج

تقربت عليه واكلت ضحك ورد

— هني ومرني هههههه

— شلون راح تقنع امي وهيَ فد مره ضايجة و كل ما حچيت وياها تردلي خلصت الزلم ما بقى غير بُـرهـان

— ههههههه

— عليمن تضحك ترى والله امي فد مره ضايجة

— امي نفس امج من ردت اخطبج گالت قابل خلصت النسوان بس يُـمـن بالعلم مره هههههه

— ههههه اي والله صدگ قابل خلصت النسوان هسه ليش هاي الاذية

سكت و يباوعلي وهوَ مبتسم وراها رد

— الأذية اللي تجي منج هاي اكبر راحه وسعادة بالنسبة الي وخلصت النسوان الجواب اي خلصت النسوان وماكو غير مره بالدنيا يُـمـن إني احبج فوگ ما تتخيلين يعني جاي اقاتل قتال الابطال بس حتى اصبح يوميه بهاي العيون الحلوة

سكتت ما رديت اخجل ارد رجع گال

— من جنت مراهق جنت اقرأ روايات واتابع افلام اجنبية جانت البطله اللي تطلعلي بالفلم لو بالرواية هيج نسخه منج هادئة نازكة ناعمة حبابة جنت اموت بنزاكتها واتمنى زوجتي المستقبلية تطلع مثلها بعد بهذاك الوقت جنت حيل متعلق بهذه السوالف وامنية حياتي احصل مثل هاي البطلات لحد ما افترت الدنيا وكبرت
و عقلت و تغيرت فكرتي ونظرتي للحياة
وراها اجيتي انتِ وفتي بحياتي و رجعت راهقت بشوفتج من جديد ورجعت نظرتي للحياة مثل قبل هيج گلبي يصير من اشوفج ، يُـمـن أنتِ بطلة روايتـي و امنية مراهقتي وحلـم شبابي اموت بيج

— عفيه انا ما اعرف ارد على هيج حچي

ابتسم وجاوب

— اعرف فـ لا تبررين وإني اصللً عاجبني سكوتج و كلامج وخجلج وكلشي بيج احسج تستاهلين تنحبين و تستاهلين تنسعدين وتعيشين الدنيا صح احسج تستاهلين تعيشين بعالم ما بيه زعل ما به صوت عالي مابيه حزن ما بيه نقص هيج اريد اخليج عايشة بعالم مثالي اكثر من اللازم عالم كله حب عالم وردي بلون خدودج الحلوة هاي

احس انشحطت من كلامة و لا اردياً گحكيت ضحك و رد

— اسم الله صحة ههههه يلا كملي اكلج المحاضرة طارت هههه

رفعت ايدي اباوع للساعة بادية قبل خمس دقايق وانا ما حاسة على الوكت

يُـمـن :- يمااا صار خمس دقايق من بدأت المحاضرة

— ههههه شعدكم يا استاذ

— دكتورة انغام

— سهلة اني احچي وياها كملي اكلج حتى تلحگين على المحاضرة الجاية

— اي بس لا تحچي شي بعد خليني اكل

— هههههه لا ما احچي اكلي بالعافية

نزلت راسي اكل وهوَ رجع ياكل لحد ما خلصنا و شربنا جاي و طلعنا نريد نصعد
ويا ما طلعنا صرنا قريبين من الحديقة هوَ باوع الجهه الحديقة وگال

— حبيبتي شوفـي

درت وجهي على المكان اللي يباوع عليه شفت حمامة بيـضه نازل بالگاع و تمشي
بهدوء رجع هوَ ابتسم وگال

–هيج أشوفج مثل هاي الحمامـة البيضـة

أبتسمت و عيوني صارت على الحمامـة رجع باوع عليـه و عيونه كلها حب بقى مده طويله يباوع عليه وانا متت من الخجـل
رديت عليـه

— ليش تباوع عليه هيج

— ما اعرف بس إحس عيونـي ما تشبع من شكلج الحلـو

دگ نقاله طلعه من جيبه وهوَ مبتسم بس شاف الاسم تغيرت ملامحة وشكلة مدري شصار بيه و توتر گتله

— رايحة باي

— الله وياج

حچى هيج و افتر ومشى سريع وانا رحت للقاعة طبيت بس بالي كلش مو وياي قلقت ليش هيج تغير من المكالمة خاف صاير شي وما گال لان ريـام گالت متخابر ويا رائف وهسه ابد ما فتح الموضوعة وياي ويومين هو تعبان وماله خلك وضغطه صاعد وهسه من شاف الاسم تغير وتوتر
وحتى راح سريع بس لا صاير شي لو سامع شي بس ما يحچي

خلصت باقي المحاضرات بس فد مره بالي طاير وراها طلعت للبيت لگيت خالتي ام تميم عدنا سلمت عليها وطبيت الغرفتي بدلت وطلعت گعدت يمها اقل الساعة وسمعت نقالي يدگ رجعت للغرفـة اشوف منو لگيت بُـرهـان يدگ

جاوبته بعدني هسه بديت احچي وياه وطبت امي فزيت لان ادري بيها ما تقبل احچي ويا گالت منو هذا ما جاوبت رجعت گالت احچي وياج منو هذااا رديت بُـرهـان
صاحت بصوت عالي

— گتلج ما تحچين وياااااااه لو ما گلت

— يما بس افهمج

— وغمه الغمتج ولا اسمع صوت انجبي وجيبي التليفووون

جرت النقال من ايدي و ردت عليه

— وانتَ ما ناوي تجي اطلگ جاي اخابر عليك وما ترد اخابر على اهلك ما يردون شلون يعني الا ادزلكم شرطة يگض الباب يلا تردون

ما سمعت شنو جاوبها بس ردت عليه بعصبية

— قسمة مالك عدناا اخوالك ما تگدر عليهم وسوالفهم ومصايبهم ما تخلص وبنتي كافي عليها الضيم العاشته ما عايزة ضيم جديد اليووم تجيب الشيخ وتجي اطلگ غير هيج ما عندي

سدت الخط يوجهه ورجعت عليه و تگول

— انتِ اشو ما تفتهمين اني حچيت

— بُـرهـان يحبني و ما يقبل يعوفني وحچى ويا اخواله و يا رائـف و انتهى الموضوع

— لااااا ما انتهى ولا راح ينتهي يُـمن هذا الزواج ما وراه غير بس شلعان الگلب وإذا عاحبج شلعان الگلب روحي تزوجي يطبج طوب

عافتني وطلعت واخذت النقال وياها بقيت انا بالغرفه واسمع خالتي ام تميم ما راضية عليها شلون هيج تحچي والولد خوش ولد ورايدها وشاريها وإذا على خواله وخالاته
اكيد ما يسكت الهن ويحل الموضوع وياهن

شوية واجى عمي سمعته گال الامي بُـرهـان مخابرة يريد يجي

و وره صلاة المغرب اندگ الباب راح عمـي فتحله الباب و فوته للديوانيـة وراها صاح على امـي راحت يمهم هيَ وخالتـي واكيد من يگعدون بالديوانية انا ما اسمع شي واضل هيج وحدي احترك

شوية واجت خالتي صاحت عليـه تريدني اسوي جاي رحت للمطبخ اريد اسوي جاي اجت وراي سألتها

— شنو الأخبار

— زينه لا يضل بالج الولد درة معدل وكلامة مرتب ترتب وامج ما تگدر عليه اكلها اكل بـ اسلوبة كله عيني وعيني

— ههههه

— ههههه والله يا حبيبتي انتِ تستاهلين اللي يسعدج ويريح بالج و بُـرهـان مرتب ولايگلج وان شاء الله ينكتب الكم الحياة السعيدة والتوفيق

— ان شاءالله، زين هم حچالكم مخابر على رائف

— اي مخابرة ومتحاجين بيناتهم و يگول حليتها بس ما سولف تفاصيل گال بس خابرته

رجعت راحت يمهم وانا حضرت الجاي ومن كمل اخذته ودگيت الباب ما طبيت اخاف من امي صاح عمـي تعالي بابا

طبيت والصينية بـ ايدي اول شي انطيت العمي وراها انطيته اخذه من ايدي و گال بصوت ناصي شكراً

رجعت انطيت الخالتي وامي و ردت اطلع گالت امي تعاي گعدي ، گعدت رجعت گالت

— انتَ عبالك اني ما اريدك الشخصك لا
و الله بس اني من هاي السوالف رافضة هذا الزواج ادري راح يصير حچي و تصير تصرفات مو زينه انتَ تدري شگد هيَ تعبت وشگد تأذت ومرت عليها ايام الله وحده يعلم بيها وبعد كافي تعب وأذية اريدها ترتاح و تستقر شنو ذنبها تخلص عمرها بهذا العذاب

بُـرهـان :- حچيت وياج وانطيتج كلمة اللي صار بعد ما يصير و هاي ارجع اعيدها مره ثانية گدامكم وگدامها إذا احد بيوم من الايام حچى وياها كلمة وحده غلط لو تصرف تصرف واحد يسئ الها يابة لا تعدوني ويا الزلم ام يوسف يُـمـن راح تصير زوجتي يعني كرامتها من كرامتي و تقديرها من تقديري ومستحيل اقبل احد يمسها بحرف واحد

–من بعد هذا الكلام أني شگول إذا انتَ هيج تحچي و حليت وضعك إني خلص اسكت و ابقى بس ادعيلكم بالخير

— اي هو هيج احنه نريد بس دعائج وسكوتج والباقي سهل

حچى هيج وضحك رد عمي

— يُـمـن كلش طيبة و حبابة وما بيها أذية على احد والها حلگ ياكل ما يحچي وبعمرها ما علت صوتها ولا حچت كلمة غلط عينك عليها امانه يمك بنتي

— قابل تعلمني بيها والله اعرفها اكثر من ما اعرف نفسي و اصلاً إني ماخذها بس حتى ادللها بالله العظيم

— الله يهنيكم ويسعدكم ان شاءالله

— ان شاء الله، نهاية الشهر اني لازم ارجع
ما اگدر ابقى اكثر و اريد قبل لا ارجع اكمل عقد المحكمة وجوازها و اجراءات السفر

شهيناز :- يا سفر شلون تسافر و دوامها

— جاي احاول اسويلها استيداع

هـاشـم :- ما اعتقد اكو استيداع الطلاب البكلوريوس بس الماستر والدكتوراة

— اي صح بس جاي احاول بالواسطه والمعارف بلكي احصل نتيجة

— الله كريم

— بعد إني اترخص منكم

حچى هيج و گام عمي راده يبقى يتعشة بس ما قبل استاذن و طلع عمي گال طلعي ويا خطيبج بابا طلعت وياه وصلته للباب
وقبل لا يطلع دار عليه و گال

— نهايتي على ايد امج يابة شخلصها وياها موتتني

— غير تخاف عليه

— محد يخاف عليج بگدي بس شأسوي بعد مجبور اتحملها الخاطرج

— بُـرهـان ترى ما اقبل تحچي على امي

— ههههه شوكت حچيت يابة ترى هاي عمتي وبيبه اطفالي المستقبليين شلون احچي عليها بس هيَ الله يسلمها شادة وياي شده تريد اطفرني بس والله ما اطفر گاعد على گلبها

— هههههه

— اروح فدوة للضحكة الحلوة ، صدگ سؤال عود انتِ ليش هيج حلوة ونازكة حتى بضحكتج

— يمكن لان تحبني تشوفني هيج حلوة

— لا والله انتِ حلوة اكثر من اللازم وإني رجال جبير ما اتحمل هاي الحلويات الزايدة يصعد سكري

— بيك سكر

— هههههه بس من اشوفج يصير بيه سكر و خفقان

— وضغط

— لا الضغط يصير بس للمظلومين المضطهدين وإني وياج بلعلالي

— يارب دوم تبقى هيج

— بوحودج بقربي إن شاء الله يلا يروحي تصبحين على خير

— وانتَ بخير

طلع و انا سديت الباب وراه ومن رجعت سمعت عمي وخالتي يحچون ويا امي عليه ويمدحون بيه و هيَ ساكته وره ساعة تميم اجى وجاب عشة و يا وبس فات انهرجنا هرج جايب وياه علاوي وعلاوي نسخة منه بالسوالف والحركات

حظرت انا العشة و جبته گعدنا نتعشة سوى بعدنا هسه اكلنا وگال

— يُـمـن رحمه الروح ابوج من يجي بُـرهـان عليج اخذي تليفونه وحظري رقمي

— ههههه ليش

— شگتني وصلتين من گد ما يخابر ماكو هيج خلفتج ونسيتج كل شوية ودگ شهيناز ما تنطيها شهيناز زعلت يُـمـن ضايجة يُـمـن متغيرة يمكن گاعد تبچي شهيناز صيحت عليها شهيناز اخذت تليفونها شهيناز طالع …. شهلـ الوضع هذاا

هـاشـم :- طيح الله حظك احچي عدل

— على كيفك شدعوة عاد ضجت قابل ما عدنا… بس مرتك عدها وضجت هيج

خالتي ضحكت وانا احس اختنكت من الفشلة يا ربي شگد طايح حظ وما يستحي
رجع عمي صاح بيه

— انجب حيوان هذا شقى

— يابة موتني ادري اني عم ولد خال ابنية وكل شوية مخابرني يريدني واسطه ترى ماكو هيج ترى اخربها عليه واخليه يدگ ويلطم

— اي بكيفك وتخربها

— بكيفي وداعتك وهاي خالتي الصاكه هسه بكلمة مني تغير رأيها و تسويله بااي

شهيناز :- والله يا ابو علي هذا لطش لطشة بعد ما نخلص منه للموت

يُـمـن :- شبيكم تحچون عليه هسه شسموي الكم الولد

تميـم :- ايبااااااااااااة شنوووو هاي تطورات يابة تطورات ادافعيلة و گدامي وگدام امج طالعة عيونج ولج

— ههههه اي غير تحچون عليه وهوَ ما مسوي شي والله حباب ويحبكم

— خاله الظاهر الأستاذ مشتغلها صح بحيث مطلع الها اللسان ومخليها ادفع عليه گدامنا

شهيناز :- هذا الأستاذ يوكع اكبر واحد إذا هوَ وگعك انتَ ما تريده يوگع الفاهية هاي

— زين ما تگولين وگعج انتِ و قشمرج
بـ ساعة وحده وخلاج تسكتين وبعد ما تعترضين

— ههههههه وگعني و وگع ابوك وامك لا انوب امك خلصتها اي والله حقك اي والله حجك ذهب هههههه

ام تميم :- والله عمي الولد خوش ولد وهذاك الحچي الحلو

— لج يوم شلون عنده اخت تكتل خلقه واخلاق يگولن نفس سوالفه هيج بالضبط

علاوي بس سمع ابو هيج حچى طفر من السفرة وصاح الا اگول الماما عليك

متنا عليه من الضحك وتميم ضحك ورد

— هيَ ماما توديك وياي تراقبني ما تدري اني افرغ من جيب ابوي

يُـمـن :- ههههه زين ليش من جيب عمي مو جيبك

— لا إني جيبة ثكيل عمج خطية ما ملحگ اثنين نسوان بركبته ، يلا يابة ورق 25 مال العشة والفين صمون والفين ببسي

— بعدين نتحاسب

حچى هيج وضحك وكام لان كل مره يگله بعدين نتحاسب وما ينطيه يقشمره وتميم من سمع هاي الكلمة رد لا قبضت

وره العشة انفتح موضوع زهراء و مراد
الهسه زعلانه والجهال يم ابوهم والبارحه بالليل رايحين يشوفونها وباجر يجيبهم
ما يقبل يرجعها و مخابرته ومراسلته اكثر من مره تكول التوب اذا تحچي و تتدخل بعد بس خل ارجع الخاطر الجهال بس هوَ قافل عليها

بيومها بقوا يمنا لحد اخر الليل وراها تميم اخذ خالتي و عمي بقى يمنا واول ما راحوا انا طبيت الغرفتي اريد انام اجت امي وراي
گعدت يمي و گالت

— من اليوم بعد ما اعترض على شي ناويته ولا اگولج لا حتى لو جان غلط راح اعوفج تاخذين قراراتج وحدج و تفكرين بمصيرج وحدج وإني راح اضل بظهرج وسانتدج الاخر العمر اليون بُـرهـان ودعني و قسم
و انطاني كلمة و اني جاي اشوفه صدگ يحبچ ومشتريج بروحه و مستعد الكل المخاطر الخاطرج و هيج حب صعب تلگينه بهذا الزمن الهذا السبب راح اعوفج وما ادخل ولا احچي شي بس بالمقابل اريدج تصيرين قوية تردين و تحچين و ما يضيع حقج

— الله لا يحرمني منج حبيبتي

حچيت هيج وحظنتها رجعت حظنتني
و تگول

— رجلج على ما علمته وابنج على ما ربيتيه يُـمـن من الاول خليه يتعلم على احترامج وتقديرج و حبج خلي يساعدج ويوفرلج ويسعدج ويدللج من الاول خليه يتعلم ويعلم الناس انتِ خط احمر ومحد يتعدى حدوده وياج

— ان شاءالله

— اريد الله يوفقج و يسعدج غير هيج ما اريد

— واني اريد الله لا يحرمني منج

— ولا منج يا حبيبتي

گامت طلعت وانا تمددت بمكاني ونمت يومين مرن بهاي اليومين مشينا بمعاملة العقد و الجواز وراها مشت باقي الايام طبيعية ماكو شي مهم غير بس اهتمامة بيه وكلام الكله حب وحنيه لحد ما كملنا اجراءات الجواز و العقد

و رحنا أنا ويا وامي عقدنا بالمحكمة
ومن رجعنا نزلنا امي للبيت وانا ويا طلعنا
تغدينا برى ومناك اخذني للألعاب بيومها
صدگ رجعت طفلة لا على گلبي هم ولا على گلبي حزن

ما خله لعبة ما صعدني بيها ويتعامل وياي مثل الطفل وطريقته وياي بالكلام تجنن كله يسألني نسوي هاي لو هاي نجيب هاي لو هاي تختارين شنو بـ رأيج منو احسن

و هاي الطريقة مستخدمها وياي من اول ما عقدنا جاي يحسسني رأيي مهم وانا صاحبة القرار وكلش جاي تتحسن شخصيني من وره معاملته هاي واسلوبة هذا

بيومها رجعنا للبيت بالليل ورجعت فد مره تعبانه من گد ما لعبت و ركضت بسرعـة نمت بدون تفكير وبدون اذية وثاني يوم من رحت للدوام اجى وگال الطلب انرفض ما اگدر اخذج وياي لازم تكملين السنه هنا

جان كلش ضايج و مقهور وانا عود حاولت اغير من الجو شوية بس ما فك ضايج فد مره لان مجبور يسافر هذا الاسبوع وانا بعد ما اگدر اسافر ويا لان عندي جامعة ودوام

خلصنا هاي الايام سوى لحد ما رجع سافر
ومنا وبعد صار وقتنا على النت اكثر من قبل الليل ونهار الخط مفتوح بيناتنا وبالليل يفتح كامره اشوفه ويشوفني وعلاقتنا ماكو مثلها كلش حلوة وكلها احترام وحب وطريقة تعامل وياي تجنن بحيث كله اني جاي يحسسني القرار قراري والحياة انا اقودها حتى ملابسه يصورهن قبل لا يلبسهن وانا اختار اله

اهلها ابد ما عافوني كل اسبوع يمر ابو وامه ويجيبون وياهم اشكال الغراض ومن يطلعون لازم يعوفون مصرف انا وامي ما نقبل بس ما يسمعون من عدنا

الشهر والشهرين والثلاثة مرن واحنه سوى
والهدوء بحياتنا ماكو مثله وكلش مرتاحه
وبعد اي موضوع من بيت عمي حاكم ما نفتح ولا انذكر

عطلت الكورس الاول و حاول يجي بهاي العطله بس ما گدر و راها رجعنا داومنا كورس ثاني و هاي السنه الاخير و دگ امتحانات و واجبات بس الحلو بيها جان يهونها عليه و يشرحلي الصعب والما فاهمته وبالامتحانات يبقى وياي لحد ما افوت للأمتحان

وهيج خلصت الايام وعدت ومشت بكل راحه اما اللي صار خلال هاي الايام
ابن مراد مصخن وبالليل وهـوَ نايم من گد صاعدة حرارته مشمور اخذوا للمستشفى و من وصل خبر الزهـراء جابتها امها للمستشفى وراه ابنها ومنا ورجعت المراد

بس رجعت بشروط مراد وهاي المره الأخيرة الها وراها يطلگها إذا بقت على نفس الطبع ونفس التصرفات

وهيج تعدت و مشت حياتي وخلصت سنه دراسية من اصعب واحلى السنين وبيوم حفلة التخرج مالتي جان عنده امتحان و ما گدر يجي صح ضجت لان ردته وياي بهذا اليوم بس بعد ما بـ ايده شي وخطية ما هوَ عافني للحظة وحده بس مده الامتحان سد الخط وياي ورجع خابر عليه اول ما طلع

بيومها امي وعمي و ريـام اجوا وياي وقبل لا تخلص الحفلة بشوية اجى تميم شگد فرحت بيه ومن صدگ حسيته اخوي اللي الله عوضني بيه

ولهنا وخلصت المرحلة الجامعية وخلصت وياها ايام صعبه ومواقف اصعب ما اتوقعتها تخلص وتعدي عليه بيوم من الايام بس خلصت و صارت ذكرى من ذكريات حياتي

وره ما عطلت بشهر وشوية تقريباً جنت گاعدة بالصالـة على البلازمة وامي بالمطبخ تسوي غده اندگ الباب راحت امي تفتح وانا بمكاني و مشغولة اباوع مسلسل تركي

شوية واجت يمي للصالة و گـالت روحي شوفي الاستقبال خو ما بيها شي عمج خابر راح يجي هوَ وصديقة

مشيت للاستقبال الباب مسدود شي قليل
فتحته وطبيت ويا ما طبيت تفاجأت لگيته واگف منتظرتني طفرت من مكاني ما مصدگه عيوني وهوَ ضحك وفتح اديه الي
رحت عليه حظني قوي و باس راسي ويگول

— يا يابة شگد مشتاقلج

— ليش ما گتلي راجع

— مفاجأة

— والله عاد شلون مفاجأة حلوة

ضحكت ورجع حظني من جديد وهاي المره باسني بجبيني ورجع يگول

— صايرة كلش كلش حلوة هاي عود إني يومية اشوفج بس بالواقع لااا صايرة غير شي يا عمري شگد احبج

— انتَ هم صاير حلو

— لا هاي الشغلة ادري بيها من زمان احچيلي شي جديد

— ههههههه لا تصير مغرور

ضحك و گعد و گعدني بصفه وكلش فرحانه برجعته بوقتها حچينا كلش هواي
و گعدنا كلش هواي ورجع انطاني هواي شغلات جايبهن هداية الي ويا من السفر وبعدين راح

امي رادته يبقى يتغده ما قبل گال غير مره سلم علينا و طلع و ثاني يوم بلش مشوار تحضيرات العرس

الاتفاق صار بس هالشهرين انا بالعراق وراها اطلع ويا للبنان وشوكت ما يخلص دراسته نرجع نستقر بالعراق

بلشنا جهزنا للعرس نيشان بدلات صالون
الزايده الناقصـة كلها انا ويا حظرناها
لحد ما كملنا كلشي وحددنا الخميس العرس

العرس اللي انحرمت والمراسيم اللي ضلت بنفسي من قبل اليوم جاي اجهز الها ويا الإنسان الصح الإنسان الحبني
من گلبه حبني الشخصي مو الشخصة
الإنسان اللي تحدى كل الظروف والعادات والتقاليد وفاز بيـه

امي وگفت عليه اله اسوي شعري ميش ما قبلت اسوي ما احب هذا اللون بس ما عافتني بحالي الا سويته بس طلع يجنن
عليه وكل شكلي تغيره عليه

ورجعت كملت كل شغلاتي من حفافة تنظيف ترتيب لحد ما وصل يوم الخميس انا حنه ما سويت ما ردت بس العرس سويته

وهاي المره امي اخذتني الصالون معروف بـغداد ما قبلت هي تسويلي گالت لا اريدج
بهذا اليوم ما ينقصج شي ولا يعوزج شي اريدج اطلعين احلى عروس شافتها عيني

وفعلاً البدله المكياج الشعر كلشي جان مميز ونازك وحلو بحيث الاستايل اللي سويته بهذاك الوقت يمكن لو بعد ميه سنه ما يروح مديلـة زواجنا صار بنهاية بشهر التاسع بسنه 2018

خلصت ترتيب وتجهيز و رجعت للبيت خالتي ام تميم وبناتها وعبيـر لگيتهن جايات
واول ما فتت شغلن الديجي و گامن البنات يركصن و امي تركص وياهن وقبل لا يجي بربع ساعة دزلي رساله كاتب بيها

— يا من قاومتُ لأجلها العالم والزمان…
لم يكن الانتظار سهلاً لكنني أقف الآن على أعتاب الوعد الذي لا يخلفه القدر
الآن ليس هناك عادات ولا تقاليد
هناك أنا وأنتِ فقط
أنتظرُ اللحظة التي سأحتوي فيها تعب السنين. كوني مستعدة لرحلة حبنا الخالدة. أنا قادم لأكون وطنكِ الأبدي.

بچيت وانا اقرأ كلماته إحس صدگ يحبني وصدگ هذا عوضي وجزات صبري، شعوري ما اگدر اوصفه رهبه على فرحه على خجل على توتر ما عبالك متزوجة من قبل ولا عبالك ماره بكل مصايب الدنيا
كلشي بهذاك اليوم اله ذكرى بذاكرتي
ما اگدر انسى للحظة منها

فات علينا لابس بدله رسميـة سودة والقميص ابيض وشكلة يجنن من گد
ما مرتب بوقتها حبيت شكله و ترتيبة وستايلة وفرحته و حنيته عليه وحتى نظرات الانتصار اللي بعيونه

اول ما گعد اخذ ايدي باسها وبقى لازمها وراها طلعنا من بيت امي البيتي الجديد
من عالمي العالمة ويا ما گمت من مكاني دعيت ربي يجبر بخاطري و يسعدني ويكتبلي بكل خطوة راحه بال و عوض
عن كل اللي عشته وشفته

طلعنا ايد بـ ايد وامي و امه ورانا يطشون جكليت وامي تبچي وامه تبچي صعدت يمه بسيارته و طلعنا البيتهم جانوا مسوين عرس كلش قوي وعازمين هواي ناس

فتت للبيتهم و انا اردد اللهم صل على محمد وآل محمد وبارك لي ببركة محمد وآل محمد

گعدت بالاستقبال واباوع للناس والناس تباوع عليه و بما انو الكل صار عنده خبر انا بيوم من الايام جنت مرت رائـف فـ الفضول دافع الناس كلها بس حتى تجي تشوفني
وتحضر العرس بحيث ماكو مره بعشيرتهم ما جاية

اخوالها و نسوانهم وبناتهم كلهم جايين وحتى سميعـة و جانينها موجودات بس غادة ما جايـة اما بديعـة ما اجت ولا اي احد من بيت عمي حاكم حظر بس الباقين كلهم قافلين بيوتهم وجايين

طلع هوَ برى يم الزلم وره صلاة لمغرب ورجع دخل يريد ياخذني للفندق ريـام صاحت بس الله عليكم هدوء بس خلوني اشغل هاي الأغنية صار مرتين اسمع بُـرهـان مشغلها ويسمع بيها

هوَ ضحك و گالها لااا ههههه

شغلت الاغنية وعلت كل صوتها وهوَ ضحك ونزل راسـه خجلان حرجته الاغنية مال هيبت البدر انطيني بوسه واجت علينا گومتنا تريدنا نركص ما قبلنا لا انا ولت هوَ وهيَ لحت عليه الا يركص عليها اسمعه گال عيب شـدسوين طفيها وهيَ ترد لاااا حباب والله حلفت الا اشغلها واركصكم عليها بيوم زواجكم

گومته ورجعت گومتني انا نبتت بالكرسي ما قبلت اگوم رحع هوَ مدلي ايده وسحبني ويا ركص عليها وانا بس لازم واگفه وإحس راح اموت من الخجل يربي شگد عيب والمعازيم كلها تباوع النا و بس انا ويا وبالوسط لزم ايدي وركص عليها وهوَ يضحك جانت الاغنية تگول

— اريد اللگالي ختله وباب مسدود
— واخذ بوسه طيبة من هل الخدود
— ناخذ اجازة فد سنه نگضيها بس انتَ وانا
— بكل الناس معلينا ننسى الدنيا خلينا

اغنه هذا البيت ويا المطرب وباوع للناس واشر ورجع يباوعلي ويركص يابة متت متت من الخجل

ورجع يگول يرب اهوى واريد وياه ولازم ايدي ويركص فرحانه انوب كلمات الاغنية
تفشل يربي وهوَ، اندمج يركص فرحانه وريـام تركص ويا فرحانه الفرحه من كل گلبها واثنينهم لازمين ادية ويركصون وانا احس انصهرت من الخجل

لحد ما خلصت الاغنية نفس انگطع تقرب باسني بـراسي و طلعنا للفندق والطريق كله مشغلها و يركص عليها وكل شوية وينصي الصوت ويباوعلي و يگول

— تشوفي ذوقي شلون طلع سوقي وبيئة

لحد ما وصلنا للفندق وقبل لا نفوت للغرفـة سوينا جلسة تصوير وصورنا كل اللقطات حلوة وكل اللي صار وعشته بهذاك اليوم حلو وما انسى ابد ولا أنسى اي للحظة من عنده

وراها فتنا للغرفـه و من اول ما فتنا بدلنا وصلينا اثنينا ركعتين صلاة الشكر وراها
گعد وگعدني مقابيله وباس ايدي و گال

— من اليوم وإني وياج روح وگلب واحد انتِ حبيبتي و صديقتي و زوجتي وعيوني الاثنين و إذا غلطت بحقج بيوم من الايام عاتبيني وإذا قصرت بحقج نبهيني و إذا تعبت و انضغط من الدنيا احتويني انتِ أميرتي و كنزي الثمين اتمنى احبج الحب اللي يليق بيج وانطيج كل حناني وكل السعادة اللي تنسيج العشتية من اليوم اريدج تنسين كل اللي مريتي بيه ونبدي
اني وياج عمر جديد ما بيه غير بس الحب والسعادة والتقدير والأحترام يُـمـن إني كلش أحبج وهسه وقبل وبعد وللموت
لا اسف على كل للحظة عاندت بيها القدر والظروف ولا ندم على حب حبيته الج اموت عليج وعلى كل دقيقة بحياتي مرت وانتِ بيها

……….

— أيتها الفاتنةُ المنتظرة التي حاربتُ لأجلِها قسوةَ الأعرافِ وجمودَ الأهل
هيا لنجعلْ هذه الليلةَ بدايةَ إبحارنا الهادئ
حيثُ أنتِ القبطانُ والميناءُ والسماءُ والسفينة وأنا ذلك: المُتعَبُ العائدُ الذي ألقى بمجاديفِ الصراعِ جانباً، المُستسلمُ لدفءِ مياهكِ بعدَ عاصفةِ الرفض. أنا ذلك المحيطُ المُتدفقُ الذي كانَ يُصارعُ المدَّ والجزرَ خارجَ أسواركِ، والآنَ يتعهدُ بأن يكونَ صامتَ الهدوءِ تحتَ قيادتكِ. أنتِ الآنَ وحدكِ البوصلةُ الوحيدةُ التي أثقُ بها وبـ سُكونِ حُضنكِ أجدُ مرساةً تمنعُ قلبي من التيهانِ بعدَ اليوم دعيني أضعُ إرثَ معركتنا جانباً، وأغرقُ في تفاصيلِ خريطتكِ الدافئة، لأكتشفَ فيكِ عالماً لم تصفهُ لي الحكاياتُ ولا الأساطير. في هذا القُربِ، لا قوةَ لي إلا بكِ، ولا ضعفَ لي إلا أمامكِ. فلتكنْ هذه الليلةُ عهدَ الوفاءِ الصامتِ، عهدَ الابتعادِ عن كلِّ ما حاولَ أن يُفرقنا. أنا ملكُكِ، ومُلكيَّةُ الحبِ لا تحتاجُ لـتوقيع!” تكلّمي الآن يا حبيبتي، فصوتكِ هو الصدى الوحيدُ الذي أسمحُ لهُ بدخولِ فردوسنا الخاص.”

يتبـع…..

حاولت اختصر الاحداث بهذا البارت
واختم كل التفاصيل بيه بس ما گدرت

يتبع.. (رواية عروس الجبايش) اضغط على اسم الرواية لتجد الفهرس كاملاً بجميع الفصول.