رواية عروس الجبايش الفصل السابع والعشرون 27 – بقلم ياسة الموسوي

عــروس الچبـــايــش🌼

بــقلم يـــاســـة الحلقة (27)

…………..

يُـمن :- خلص كلامة الشيخ وطلع و عمي هاشم و عمي حسن طلعوا وراها وإحنه اجت امي گومتنا تريدنا نروح للصاله

هـوَ گام من مكانه و دار عليه وشال البرنص مال الفستان من راسي وباوع عليه مبتسم وراها باسني بگصتي و گال بصوت ناصي الف مبروك إحس بگلبي راح يوگف من گد ما يدگ سريع و دمي نشف

رجع لزم ايدي و مشاني للصالة والهلاهل والجكليت فوگانا من كل مكان گعدنا بمكانا اجت امه انطته علبه حمرة صغيرة اخذها فتحها طلع منها حلقـة ذهب

و يحچي بصوت ناصي يادوب اسمعة من صوت الهلاهل والركص

منـاف :- هاي الحلقـة مشتريها صار خمس اشهر وضامها الهذا اليوم يمكن تطلع جبيرة لو صغيرة او ما تعجبج ما اعرف بعد بس راح اشتريلج وحده ثانية على ذوقج المهم هسه احط حلقتي بـ ايدج

و هذا هو

لزم ايدي يريد يلبسني وانا ادية تگول سعفة

ما اسيطر عليهن متت هيج ارجف لبسنياها و رجع لزمني قوي منها ويگول

— اهدي

اريد اسيطر على روحي ما اگدر إذا اگول اسناني واحد يضرب بواحد يمكن تصير مبالغة للما گاعد يمي و شايفني بهذاك اليوم ليش هيج ارجف ما ادري مستحيه لو خايفه لو بردانه ما ادري بس جاي ارجف

الحلقة بيها شوية عرض عليه بس ما توگع من اصبعي زينه مقبوله و حتى تصميمها حلو و وزنها ثكيل

رجعت امي حچت ويانا حتى نگص الكيكة

شال ايدي و گصيناها سوى وراها اخذ بالشوكه ( الجطل) شوية يريد يوكلني وحده من خالاته گالتله وهيَ تضحك لا لا لاااا اوگف اكلو سوى بنفس الشوكة رفعت راسي اباوع عليها شفتها بعمر امي

و تحچي وتغمزله رد وهوَ يضحك

— يمعودة غير إذا اسويها هسه تحطني وتكتلني عوفنا الله ساترنا لا تخربنها علينا

هوَ گال هيج وصار الضحك ماله والي وكلهن يصيحهن هااااا من هسه سيادتك تخاف من هسـه مسيطرة عليك رجع ضحك بدون ما يرد وخالته جلبت اله يبوسني وتهوس بوسها ولا تخاف من امها والكل يصيح بوسها بوسها احس بروحي

سحت من المستحى

تقرب عليه و باسني بخدي وراها شال الكيكة يريد يوگلني ما رفعت راسي احس بروحي راح اموت گال

— بس شوية رفعي راسج

رفعت راسي و عيوني صارت بعيونه من صدگ شفته فرحان و يحبني شفت حبه الي بعيونه وكلني و انا رجعت وكلته وشربنا العصير و زهراء لازمة كامره صغيرة تاخذ بيها صور رجعت گالتله

— منـاف هسه اوگفوا اخذ الكم صورة وانتم واگفين

گام و گف وانا ضليت بمكاني رجع يباوع عليه و أمي بصفي گومتني چا غير اگوم

و رجليه توگف مثل رجلين الوادم ماكو ضالات وحده تطگ بوحده

هوَ بسرعة وبحركة مفاجأة سحبني عليه

و حظني من ظهري احس نفسي انگطع

شبيه يا ربي مستحية منه لو من الناس

يعني انا هذا مو اول عرس الي ليش هيج حالي

حظني من خصري و مقربني اله كلش

ضعت بحظنه شوية و حسيت عليه گام يضغط على خصري بـ ايده قوي حاولت اسحب روحي بس شدد لزمته ما گدرت اريد ابچي بعد ما اتحمل استحي

رجعت زهراء تحچي وياه تريدنا واحد يباوع على الثاني حتى تاخذ هيج لقطة هوَ عاد ما صدگ فرني عليه و حاظني بـ اثنين ادية من خصري صاحت عليه احط ايدية على صدره قريب رگبته رفعت إدية وحطيتهن مثل ما طلبت

بسرعة أبتسم و نزل راسه وشوشلي

بـ إذني

— يابة شگد حلوة تفلشين بنت الاوادم صدقة للخلقج الترفة إحس بروحي راح اموت وعلي

نزلت راسي مستحية ما اگدر ابقى اباوعله رجعت زهراء اخذت الصورة وانا بس كملت بسرعـة گعدت وهوَ راح طلع وره ما طلع بعشر دقايق ودوا على النسوان طلعن

وبس راحوا عمي والولد اجوا يمنا بالصالة اكيد من بعد ما لبست البرنص سلموا عليه وتباركوا و رجعوا طلعوا گعدوا بالاستقبال وره ساعة اخذو خالتي ام تميم والبنات و راحوا البيتهم

بقينا بس انا وامي طبيت الغرفتي بدلت هدومي و من طلعت لگيت امي گاعدة

بالصالة وتبچي اول ما شافتني طلعت مسحت عيونها اجيت عليها متفاجأة وسألتها

— شبيج ليش تبچين

— ما بيه شي

— ليش تبچين

رجعت تبچي من جديد اجيت گعدت يمها واسأل بيها شبيج وهيَ ما ترد بس تبچي انوب گـالت

— فرحان و هاي دموع الفرح واخيراً ربي عوضج حبيبتي وكل الناس انتِ ، اتمنى حياتج كلها مثل هذا الفرح و عسى عيونج

ما تشوف الهم والحزن حبيبتي

اجيت شبگتها و لا ارادين بچيت وياها ورديت الها

— ولا عيونج تشوف الحزن والهم اريد ربي يحفظج الي ولا يحرمني منج

رجعت مسحت وجهها وأبتسمت وتگول

— تدرين طالعة تجننين أميرة واحلى من الأميرة بعد

ضحكت بدون ما ارد رجعت باستني وتگول

— اتمنى حظج مثل جمال وجهج وگلبج

حبيبتي ماما صيري سباعية و اكسبي رجلج خليه يتعلق بيج و ما يگدر على فراگج ولا على زعلج درسي شخصيتة زين وعرفي نقاط ضعفه شنو وادخليه من هذا الباب الرجال لو عمره ثمانين سنه يتقشمر بالكلمة الحلوة لو عمره ميه يتقشمر بالسالفه والضحكة والحبيبي والحياتي ودينهم ودنياهم غريزتهم إذا صرتيله مرآة كاملة بالليل يصيرلج مثل الزبد بالنهار

هيَ تحچي وانا ساكته وبس اسمع الها رجعت كملت كلامها وتگول

— فرضي شخصيتج من اول يوم و حط احترام بينكم من اول دقيقة ولا تعاملينه مثل ما جنتي تعاملين رائـف وكل شوكت ما جالج جنتي ساكته وهو يطب ويطلع يدوس عليج الرجال بصورة عامة من يشوف المره تعبر وتتنازل وتمشي راح يتفرعن عليها ويحسب هذا الشي واجب عليها وبيوم اللي تعترض راح يگلب عليها

و يطلعها غلطانة حتى لو هي صاحبة حق حبيبتي ماما ردي و احچي بس مو بكل وقت لا اكو اوقات تحتاج السكوت واكو اوقات تحتاج التغليس لان الحياة الزوجية ما تمشي ولا تنجح إذا تبقين واگفتله على الكلمة إني صح جاي احچي وياج بس  اعرف كلش زين ما تحتاجين هذا هيج حچي ولا تحتاجين النصيحة لان انتِ عقلج جبير و فاهمة و حكيمة بس واجبي اگعد واسولف وياج هاي السوالف ، بزواجج الاول ما جنت موجوده ومن اجيت ، اجيت متأخرة وما گدرت اسويلج شي لان لگيتهم مسيطرين عليج و منتهي موضوعج بس هسه لا اريدج من اليوم هذا تسيطرين على الكل و تصيرين الأمر والناهي

فهمتي حبيبتي

— ان شاءالله

— يلا گومي نامي شوية وارتاحي اليوم گاعدة من الصبح وتعبتي

گمت الغرفتي تمددت بس ما نمت بعد وقت وما انعس بس تعبانه وراسي يوجعني ساعتين تقريباً ورجع اجى عمي هاشم جايب ويا عشة طلعت تعشيت وياهم وراها كل واحد طب الغرفته ثاني يوم من گعدت امي گالت

— البارحة منـاف خابر عليه راد يحچي وياج و كتله نايمة إني ادري بيج بعدج گاعدة بس تقصدج ما اخليه يحچي وياج

باوعت عليها مستغربة ليش ما قبلت يحچي وياي و رجعت سألتها

— ليش ما تقبلين احچي وياه

— اريده شوية ينتظر خو ما بسرعة يجيله الموضوع حار ومكسب هههه

ضحكت و گعدت رجعت گالت

—  گـال يريد يجي علينه اليوم گتله عمج عازم جماعته

— ههههه

— حلو الانتظار يخلي المقابل يحس بقيمتك مو صح

ضحكت بدون ما ارد والتهينا باليوم مثل كل يوم بين القراية و تعزيل لحد ما صار الليل راجع دگ عليه من امي وجايبة النقال وجاية لاگيتني نايمة هاي المره من صدگ وهم ما گادر يحچي وياي اليوم

باليوم الثالث امي صادف بالصالون والساعه بـ 2 ونص الظهر جنت گاعدة بالصاله اقرأ سمعت باب الشارع يندگ

لبست حجابي و گمت اشوف منو وگفت وره الباب وگلت منو اجاني صوته يگول إني

بقيت بمكاني وگلبي عبالك اجى منبه وگام يدگ سريع بس سمعت صوته ما حچيت بعد رجع دگه مره ثانية و گـال

— فتحـي حبي

— امي مو هنا

— اعرف

— ما اگدر افتح وحدي بالبيت

— فتحي بابا شجاي اسويلج قابل بس اشوفج واروح مشتاقلج

بقيت حايرة شلون افتحله ومحد موجود

رجع گـال

— فتحي حبيبي وداعتج ما اسوي شي بس اشوفج واروح

— امي ما تقبل

ما سمعته بعد ولا رد عليه ثواني وصوت السيارة اشتغلت وراها راح رجعت للبيت

و حايرة السويته صح لو غلط ساعة اگـول صح وساعة اگول لا غلط هوَ بعد صار خطيبي و بيناتنا مهر لحد ما رجعت امي وإني باقية اخذ البيت واجيبة افكر

خليتها سبحت واكلت و اجيت حچيت الها شلون اجى وما فتحتله سكتت شوية وراها ردت

— هوَ صح عاقد عليج بس جيته بهيج وقت ويعرف إني مو بالبيت شوية واگفه لو منطيني علم راح يجي بفلان ساعة حتى لو اني ما موجودة عاد عندي خبر راح يجي

بس مع ذلك لازم ما نخلي علينا نقطه لان صار يومين يتصل وما تحچين وياه وهسه اجى وما فتحتيله راح يحس بنفسه مفروض عليج فرض اخذي التليفون

و روحي دگي عليه

بقيت گاعدة استحي من امي وهيَ عرفت بيه مستحية رجعت طلبت مني مره ثانية اروح اخابره شلت النقال ورحت الغرفتي ضليت لازمته و حايرة استحي اخطي هيج خطوة واخابره اخر شي بقيت ابرر الروحي واجبرها تتعلم عليه ولازم احچي وياه

و اتعرف عليه اكثر لحد ما طلعت رقمة لگيت امي مسجلته بالجديد دگيت عليه

ما رد انتظرته يرجع يدگ ماكو ما خابر گلت جوز زعل لان ما فتحتله الباب حطيت النقال على الميز و ضايجة بعدنا بدايتها

و بدأت الزعل وسوالف الزعل

ساعة تقريباً و دگ نقال أمي گمت من مكاني سريع واجيت اباوع على الإسم  شفته هوَ جاي يخابر أخذت نفس وسميت بـ إسم الله و رديت اول ما فتحت خط اجاني صوته يگول

— الو

–الو

— هلا بهلـ الصوت الحلو شلونج حبي

— الحمدلله

— جنت جوى والجهاز فوگ و ما ادري بيج داگه عليه

— اي مو امي گالت خابري

— هههه زين من قبلت امج و حنت عليه صار يومين حاطتني على المغذي

ما رديت رجع گـال

— اي عمري شلونج اخبارج

— زينه الحمد الله

— شكو ماكو

— ماكو شي

ضحك بدون ما يحچي وراها گال

— ايي يا حلوة منين نبدي

— شني يعني

— ههههه شوفي راح احچيلج على نفسي وراها تحچيلي عليج ماشي

— اي

— إني إسمي منـاف و أحبج كلش هواي

و ابوي اسمة حسن و أحبج كلش هواي وأمي إسمها أمل وأحبج كلش هواي

و أختي إسمها زهراء وأحبج كلش هواي

و عندي ولد حلو مثلج وأحبه واحبج كلش كلش هواي بعد تردين تعرفين شي ثاني

حچاها وضحكت ما جاوبت بس أبتسمت رجع يگول

— هسه إني خلصت بعد ما عندي حچي دورج انتِ احچيلي

— هههههه

— ههههه فدوة للضحكة الحلوة بس لا جديات والله إني أحبج وصار سنه شاغلة عقلي وگلبي وهاي شغله تعاي نتعرف ما نتعرف واحچيلي واحچيلك شو ما ادري شلونها إني اشوفها تعبانه المهم إني أحبج معناها راح اعرف عليج كلشي وانتِ بس تحبيني نفس الشي راح تعرفين عني كلشي يعني خليها للايام

— ان شاءالله

— بس  عندي شغله وحده اريدج تعرفينها من هسه شوفي حبيبتي إني إنسان شغلي متعب ومزاجي مرات يعني مو دائماً يتركب على حسب شغلي ويصير كلش متعب

فـ من هسه إني وياج خلينا نصير اصدقاء اشكي تعبي يمج وتشكين تعبج يمي

وان شاء الله عيونج ما تشوف التعب بيوم ما دام إني عايش

— ان شاءالله عمرك طويل

— ايي و هسه تحچيلي ليش ما فتحتيلي الباب اليوم

حچاها وضحك ردت

— مو محد بالبيت بس أنا

— بعد الانا واهلها بس انا مو غريب حتى تخافين من عندي

— مو قصة اخاف

— لعد شنو

— حسيتها صعبة والناس تباوع وامي ماكو

— تدرين يوم وره يوم جاي تكبرين بعيني

— رحم الله والديك

— ههههه والديج الجنه

— اريد اسألك سؤال باقي بالي وما مرتاحة منه

— يااا يابة يابوية بس سؤال واحد گولي الف سؤال مو سؤال واحد بله شنو هذا السؤال الشاغل بالج وما مرتاحة بسببه

— طليقتك

سكت ما جاوبني بقى ساكت شوية وراها جاوبني

— اكثر شي انقرف منه بعمري وحياتي هوَ هذا الموضوع مجرد ما تنذكر گدامي لو إسمها يمر عليه يصيبني غثيان بس ما دام مشغول بالج وتريدين تعرفين الموضوع حتى تأمنين وترتاحين راح احچيلج مجبور  لان من حقج تعرفين عني كلشي

سمعته شغل الجداحة وبقى يجدح بيها اكثر من مره وراها صار صوت قوي يمه يمكن شمرها وانفجرت وانوب گمت اسمع صوت جرارات تنفتح وتنسد حسيته كلش ضاج بس انجبر يجاوبني شوية ورد

— اجذب عليج إذا اگلج ما حبيتها بيوم من الايام لا بالعكس جنت أحبها و اقدرها وأحترمها و لو تريد عيوني انطيهن الها ما عفت عليها عازه بيوم من الأيام  وهيَ هم جانت زينه وياي وما مقصرة بحقي بس إني جنت اغلب ايامي بالدوام وما اتواجد يمها هواي يعني غيابي اكثر من وجودي لحد ما اخذت الها مره رادت تليفون ورحت جبتلها واجيت لان زوجتي وأم أبني ومأمن بيها هنا هيَ استغلت غيابي و أستخدمته حسب أخلاقها و تربيتها و من هذا اليوم الهذا اليوم اني اشمئز منها و إذا انذكر طاريها گدامي احس بغثيان ويلزمني صداع

فـ من هاي اللحظة وشيليها من بالج وابد ما اريدج حتى بينج وبين نفسج تفكرين بيها لان مستحيل بيوم من الايام اشوفها او تشوفني هيَ ماتت بالنسبة الي وانتهى امرها من زمان طويل

بقيت ساكته ما رديت لان حسيته كلش ضاج  و حتى نبرت صوته تغيرت وراها ترخص مني بحجه عنده شغل و نهى الاتصال

هنا انا ومن هاي اللحظة و شلتها من بالي واخذت قرار على روحي نهائياً ما اذكرها لا يمه ولا يم احد ثاني ولا حتى بيني وبين روحي

ثاني يوم امي عافت نقالها بالبيت وگالت إذا تردين شي اتصلي على خط المحل وره ما طلعت امي بساعة دگ عليه رديت

— الو

منـاف :- شلونج حبيبتي

— الحمدلله انتَ شلونك

— من اسمع صوتج اصير زين

ما جاوبت ضحك ورد

— اريد اجيكم إذا ما بيها ازعاج

— شوكت تجي

— هسه

— امي مو هنا

— وينها لعد مو هذا خطها يمج

— اي عافته يمي خاف احتاج شي

— هاا

— اي

سكت شوية وراها رد

— العصر من ترجع من شغلها اجي

— على راحتك

— تردين شي اجيبلج وياي

— لا تسلم الله يخليك

— ما مشتهية شي اكله شربه

ضحكت على الشربه ورديت

— لا والله رحم الله والديك ما تقصر

ضحك بصوت عالي و گال

— و الديج الجنه

انوب سكت وانا ساكته رجع گـال

— يُـمن حبيبتي إني خطيبج مو جيرانكم

— شلون يعني

— هههههه سلامتج گلبي

— الله يسلمك

— هههههه راح اروح عندي شغل والساعة بالخمسة امر الكم

— هلا بيك

قفله منه ورحت  دگيت على خط المحل انطيت الأمي خبر يريد يجي العصر گالت ما اتأخر ساعة وارجع للبيت

وصدگ ساعة وشوية واجت جايبة وياها تراك جديد يصير كمر ونص رد تريدني اللبسة ما قبلت اللبسة استحي بس ما قبلت عليه وبقت تحچي على ابو خطيبج وعاقدين بالاعتبار رجلج وماكو احلى من ايام الخطبة تبقى ذكرى اگعدوا واحچوا وطلعوا لحد ما غصباً عليه اقتنعت بيه

كملنا غدانا من وگت و نظفنا وفتت للحمام سبحت وطلعت لابسة التراك اجت امي سرحت شعري بالشسوار ومكيجتني خفيف و وگفت تحضر بالضيافة وحايرة وكل شوية جاية عليه معلمتني على شغله احچي هيج گولي هيج ضحكي هيج وردي هيج لحد ما دگ الباب گالت روحي انتِ فتحي

يُـمن :- لا انتِ فتحي

— ولجج امشي فتحي لا تشلعين گلبي هسه اجي وراج

رحت افتح اول شي گلت منو خاف افتح ويطلع واحد من ولد عمي وانا ما لابسة ربطه و نص ردن رد ويگول إني سميت

بسم الله وفتحت

طب و اول ما طب عيونه صارت عليه بنظره وحده حسيته فصلني تفصال وراها أبتسم دنگ عليه وباسني بخدي ابتسمت منحرجة ورجعت ليورة واحس خدودي صارت حارة

منـاف :- شلونج حبيبتي

— الحمدلله تفضل

طب يمشي وانا وراه لحد ما فتنا للديوانية گعد و اجيت انا گعدت مقابيلة باوع عليه وضحك أبتسمت ويا بس ما ادري على شنو جاي يضحك رجع گام من مكانه واجى گعد بصفي على نفس القنفة گلبي احس راح يوگف ايدگ بسرعة و ادية صارت ثلج شلبكتهن وحده بوحده اريد بس ادفيهن گال

منـاف :- شبيج قلقتيني ههههه

— شبيه

— شمدريني شو كلش متوترة و وترتيني وياج

— لا لا ما بيه شي

سحب ايدي ولزمها وبقى يمسد عليها بهدوء ويحچي بصوت هادئ

— شي طبيعي يصير عندج توتر بس مو هيج هدي عمري هدي شويـة

— لا لا ما بيه شي

— باعي بعيوني

رفعت راسي صارت عيني بعينه أبتسم

و تقرب عليه وهمس بـ إذني

— شرأيج نكسر حاجز التوتر هذا بوسة

بسرعة گمت و گفت ضحك و گام وراي لزمني من إيدي ورجع گعدني بس ما گعدني على القنفة لا گعدني على رجله وايده محاوطة خصري احس بروحي ضعت

و جسمي ما گمت اسيطر عليه ارجف  حچى بهدوء

منـاف :- تذكرين من صحتي وراي اگلك

هزيت راسي بلا ما اتذكر ابتسم و ذكرني بالموقف وراها كمل كلامة وگال

— من هذيج الاگلك لليوم اني ضايع وهسه بهاي اللحظة من صرتي بحظني يلا لگيت نفسي كلش أحبچ

حچى هيج وتقرب عليه وباسني حاولت اكوم ما گدرت ما خلاني لحد ما هوَ ابتعد من كيفه و رجع رفع راسي من حنكي

بـ اصبعة ويگول بهدوء

— متصافين بعد ماكو توتر ولا خاف مو

ما جاوبت

منـاف :- شنو رأيج نطلع باچر

— وين

— بكيفج وين تردين المكان اللي يعجبج نروحله

— ما ادري بكيفك

— نتعشة بمطعم لو نروح نزور الأمام الكاظم

ضحكت فرحانة يمكن بعمري كله زايرة بس مره وحده من جنت صغيرة بالابتدائية قبل لا يتوفاة ابوي رجع گال

— يمكن العرض مغري لدرجة گدر يخلينا انشوف هاي الضحكة الحلوة

— اي لان ما زايرة بس مره وحده بعمري كله بوكتها جنت كلش صغيرة

— الصبح عندي دوام راح احاول اطلع من وقت ونروح نزور متفقين

— اي

رجعت گمت من حظنه لزم ايدي ويگول

— وين

— اجيبلك شي تشربة

— شربت ما اريد اي شي

— وشوكت شربت

— ههههه قبل شوية

— يعني قبل لا تجي و انتَ من زمان اجيت و لازم هسه اجيبلك وبعدين امي سوتلك عصير طبيعي

— ههههههه يلا جيبي العصر و تعاي

طلعت اجيب العصير لگيت امي گاعدة بالصالة تخابر بـ خالتي ام تميم ما ادري شكو ما سألتها لان مستعجلة طلعت العصير من الثلاجة صبيته واخذته طبيت عليه لگيته مطلع نقاله و يگلب بيه من طبيت حطه على الطبلة و اخذ العصير من ايدي

منـاف :- شكراً

— بالعافية

اجت امي طبت علينا و سلمت عليه گام وگف يرد السلام و راها گعدت يمنا بقوا يسولفون هو وياها وانا رحت جبت الكرزات وباقي الضيافة الجايبتهن أمي

و اجيت من طبيت سمعته يگول الأمي

— ما عندي شي وخلال شهر واحد اكمل كل اجراءات الزواج

شهيناز :- وليش الاستعجال بعد وقت اليوم الثالث على خطبتكم اخذو وقتكم تعرفوا واحد على الثاني طلعوا تونسوا

— إني اعرفها كلش زين ما يحتاج اتعرف عليها وإذا عليها فـ بـاسبوع واحد تتعرف عليه لان ما عندي شي مضمون كلش واضح

حچى هيج وضحك

شهيناز :- ميخالف بعد وقت هسه عوفوها على راس السنه الجديدة حددوا موعد الزواج

— الله كريـم

بقت امي گاعد يمنا شوية وراها گامت طلعت وهوَ نفس الشي نص ساعة و خابروا بالشغل گام راح ومن وگف يريد يطلع دار على القنفة و أبتسم و يگول

— نسيت مدري دخت كله من وراج

حچي هيج و دنگ للعلاكة هوَ انا شفته من طب بـ ايده علاگه مال هداية بس ما حطيتها بالي ونسيتها حالي من حاله

شال العلاگة وطلع منها علبة فتح العلبة

و طلع منها سنسله ذهب وبيها حـرفي بالانكليزي تقرب عليه لبسنياها ومن كمل باسني برگبتي ويگول

— ذهب يلبس ذهب احتركوا اهلج شگد حلوة

— ليش هيج تكلف نفسك

— من يوم الخطبة وإني مقرر كل شهر اللبسج سنسلة ذهب لحد ما اوصل يم هاي الشامة التموت

حچى هيج و حط اصبعة على رگبتي عندي شامه برگبتي بس مو واضحة كلش خفيفه شلون شافها ما ادري عود بالخطبة جان شعري نازل عليها

نزل راسه وباسني برگبتي ويا ما باسني  دگ نقاله مره ثانية طلعه من جيبة وفصله

و ودعني و راح رجعت طبيت للصالة ومبتسمة سألتني أمي

— راح

— اي وجابلي هاي

حچيت وأشرات الها على السنسلة آبتسمت وردت

— بالعافية حبيبتي تستاهلين مهناية

گعدت يمها واحس گلبي طاير رجعت تسألني على الوصل مالت السنسلة گلت الها ما ادري ما انطانياه بس يمكن بالعلاگة مال الهداية بقى بالديوانية گمت جبت العلاگة واجيت لگيت بيها الوصل و يا 100 الف فد فشلت فشلة شگد عيب هم جايب گلادة وهم عايفلي فلوس بسرعة طبيت للغرفة وخابرته رفضة ورجع هوَ دگ

منـاف :- ها حبيبتي

— هاي ليش عايف فلوس بالعلاگه

— هذا مصرفج و ما دام انتِ بدمتي ما تاخذين من احد ثاني ربع حتى أمج

— الله يحفظك ويخليك

— ويحفظج حبيبتي الحلوة

رجعت سديته وطلعت الامي گلت الها على الكلام الگاله مال المصرف و على الزيارة وامي شكلها يوم وره يوم جاي تنعجب بيه اكثر واكثر ما عارضت وبسرعة گالت شكو بيها روحوا زورو وتونسوا

وثاني يوم بدلت وانتظرته وعلى الموعد اجى دگ الباب امي طلعت وياي سلم عليها ورجع سلم عليه و صعدنا بس شكله مدري شبيه حسيته ضايج مو مثل البارحه اليوم وضعه مختلف صعدت يمه ومشينا

هوَ ساكت وانا ساكته لحد ما خلصنا منطقتنا محد بينا يحچي وراها گـال

— حبيبتي

باوعت عليه بدون ما ارد لزم ايدي باسها وأبتسم و راها دخلنا بالجد والمفيد الراح امشي عليه باقي ايامي بقى لازم أيدي ويگول

منـاف :- انتِ صح ناعمة ولبسج حلو وما بيه غلط بس إني ما احبج تلبسين هيج لبس

— ليش شبيه لبسي

— مابيه شي بس ما احبه

— چا شلبس

— عباية

باوعت عليه مستغربة لان لا امه ولا اخته لابسات عبي رديتله

— عباية اسلامية قصدك لو عباية راس

— عباية راس العباية الزينبية

ما جاوبت بس تأكدت ميه بالميه راح اكل تبن ويا رجع گال

— هاا اشو ساكته

— شگول يعني

— حلوة العباية احلى من الجبه والبنطرون والتنورة كلها هيبة وستر وقار مو صح

— اي صح بس لا خالتي ولا زهراء لابسات شعجب تريدني أنا اللبسها

—  صح هنَ امي واختي بس انتِ شي ثاني تختلفين على الجميع وملكي الخاص ما احب احد غيري يشوفج حقي لو مو من حقي اريدج بس الي

ما جاوبت بس ضجت وتوترت احس راح تنلاص عليه وجني تورطت هيج فجأة ومن اجاني هذا الشعور صارت هوسة بعقلي وحرت حيره

بقى يحچي وياي و يقنع بيه ويحببني بالعباية و انا ابد ما اتعرضت جنت كلش مسالمة و عفته وحده يحچي لحد ما وصلنا ونمشي بالشارع اخذني على محل عبي  و اشترالي عباية من يم الامام

وللبسنياها صح حلوة وماكو استر منها

و ارقى وارتب منها بس ضجت مو منها لا ضجت لان حسيته راح يتعبني ليش هيج حسيت ما ادري

فتنا زرنا  و كل واحد راح بمكانة المخصصه انا بالنساء وهوَ و بالرجال صليت هواي بوكتها و دعيت هواي و طلبت من رب العالمين يكتبلي الخير والبركة ببركة الامام الكاظم تأخرت يله طلعت

بوقتها جنا متفقين يم باب المراد نلتقي وانا لان صار هواي ماجاية وبالاصل ما جاية هنا غير مره وحده فـ ما اندل وتيهت طلعت اباوع منا ومنا  و احس راسي افتر مشيت مسافة شفت هذول موظفين العتبه واحد منهم گاعد وحده اجيت عليه سألته على باب المراد خطية الولد گام من مكانه وآشرلي على الباب

بعدني يم الولد ما ماشية وصار فوگانا منـاف بس شنو كتله مال اعصاب اول كلمة گالها

— شسوين هنا

درت وجهي اباوع عليه ورديت

— ضيعت المكان والولد جاي يدليني

هزلي راسي  بمعنى امشي مشيت بس احس عافيتي انخرطت مني شو هذا شو صار واحد ثاني سمعته تشكر من الولد بكلمة ممنون و اجا يمشي وراي لا هوَ يحچي ولا انا لحد ما طلعنا من الباب الرئيسي للشارع وگف اشتره حلويات لوزينه وحلاوة شعرية وراها اخذ سيارة الابنة على الباتريات وطلعنا للگراج

طول الطريق ساكت ما يحچي وياي لحد ما صعدنا بالسيارة شغل ومشى وبس طلعنا من الگراج گالي

— مره ثانية من تضيعين لو تخربطين بشي ما تسألين ولد ماشي

— چا اسألمن

— العتبة متروسة نسوان شوفي التعجبج وسأليها ماكو داعي تسألين الرجال

عيب

— شني عيب هذا الرجال موظف بالعتبة واجبة يدلي الناس و يساعدهم وماكو داعي الهاي الهوسة انا ما مسوية شي غلط

— اي

حچى هيج و سكتت وانا ضليت بسكتي بس احس بروحي انطحنت طحن موقف وره موقف مبين راح اكل تبن يابو تبن

لحد ما وصلني للباب و قبل لا انزل انطاني الحلويات مالتنا و گال

— لا تضوجين مني ماشي إني خفت عليج لان انتظرتج هواي و من ما اجيت تأخرتي گلت هاي هيَ ضاعت

ما جاوبت بس إبتسمت وراها ودعته ونزلت دگيت الباب فتحه تميم انصدم من شافني لابسة عباية مد راسة يباوع المناف وراها اشر بـ ايده المناف يسلم طبيت وهوَ طب وراي ويگول

تميم :- شنو هاي

— ههه عباية

— اللعب

ابتسمت و طبيت للصاله لگيت عمي وامي گاعدين واول ما شافوني نفس صدمة تميم

شهيناز :- الزيارة مقبولة

يُـمـن :- قبل الله اعمالج

— شنو هذا

— هههه عباية

— شنو اشتريتيها لو شنو الموضوع

— اي

تميم :- يعني انتِ لبستيها لو لبسوها الج

ما جاوبت بقيت ساكته وعمي رد بمكاني

— خير ان شاءالله حلوة العباية شكو بيها

شهيناز :- انتِ قابلة لو لا

يُـمن :- اي ما عندي مشكلة حلوة وعلى گدي ومستورة ليش ما اقبل

سكتت بس تباوع عليه تريد تشوف ردت فعلي صدگ قابلة لو بس حچي رجعت ترخصت منهم وطبيت الغرفتي بدلت وگعدت رجعت امي فتحت الباب و طبت وراي بيدها النقال گالت هذا مناف جاي يخابر

اخذته منها و رديت اگول الو الو ماكو صوت رجعت سديته رجع دگ مره ثانية

رديت من جديد

— الو

منـاف :- ها عمري وين انتِ

— بالبيت

— منو عدكم

— محد بس عمي و تميم

— وليش تميم عدكم

— شني

— شيسوي تميم يمكم

— هوَ دائماً يمنا يجي ويا عمي ومرات يجي وحده يجيب شغلات البيت ليش تسأل

— هيج عاد بس لان شفته يمكم عبالي اكو شي صار

— لا ماكو بس احنه واحد يجي للثاني يعني بيت واحد

— زين لعد اروح إني

— الله وياك

سديته من عنده وصفنت صفنه بحيث دخت بزماني هذا مبين عليه الهسه ما متخطي الخيانة والهسه ما يثق بالنسوان عود صدگ حظي ويسويها وارجع للظيم من جديد

بعدين سكتت واگول خليني انطيه فرصة وما استعجل بالحكم جوز مو بقصده وسأل على تميم  وإذا على العباية فـ عادي العباية ماكو استر منها و هناك يم بيت جدي كلنا جنه نلبسها ونشدها على خصرنا وين المشكلة إذا  هسه صعدتها علي راسي ولبستها كامله

بيومها انقهرت و ضجت بس ما خليت اللوم عليه و عفتها وبررتله گلت عادي جوز مو بقصده

مرت الايام هادية ماكو شي مو زين هوَ كلش طيب وحنين ونفسة كريمة ويحبني

باليوم يخابر أكثر من مره و كل يوم جمعة يجي يشوفني وما يجي فارغ لا ما يعوف شي ما يجيبه وياه

وهاي الايام زهراء ومراد جانوا يحظرون العرسهم والكل مشغول بالتحظيرات والتجهيزات وياهم  هوَ اخذني اشترالي هدوم العرس بـ ايده حتى الحذاء جابها وكلش كريم وين ما اكو شغله راقيه وزينه يروح يجيبها ورجع اخذلي عباية ثانية لحد ما رجعت محمله تحمل

ومن رجعنا امي اجت تشوف الملابس

گالت كلش حلوات بالعافية بس شو ما جايبه للحنه

يُـمن :- يمكن نسى سالفه الحنه ما اشترالي و انا استحيت اگله بعد للحنه عود هوَ  خطية كل شوية يسألني خو ما نسيتي شي ما محتاجه شي بعد

— يلا مو مشكلة باچر إني اخذلج فستان

حلو مال حفله بنات لان خالتج لم تميم گالت نروح نحتفل ويا زهراء بيتهم مسوية حفله

— الله كريم

ثاني يوم امي راحت من الصبح اشترلي فستان للحنه و بما انو الحنه بس للبنات  والحفله بس حفله خاصة بينهن جابت فستان قصير بدون ردان يجنن يجنن انا الما احب هيج لبس حبيته ومتت عليه

قسته طلع فت عليه لحد العصر خابرني يسأل عليه انطيته خبر باچر اروح ويا امي للصالون نحظر روحنا للعرس ما گال شي رد بالليل امرلج انطيج فلوس الصالون

— لا ما يحتاج فلوس هيَ امي تسويني صالونها هذا

رجع وراها يأكدلي إذا محتاجة شي اريد شي وانا اشتكر منه لحد ما ثاني يوم رحنا للصالون حفينا و رتبنا وطلعنا عرايس هم انا وهم امي

وهيح خلصنا باقي الايام بالتحظيرات للعرس لحد ما وصل يوم الحنه خابرني الصبح الساعة بثمانية جنت نايمة ونقال امي يم راسي لان بالليل جنت احچي وياه وبقى يمي ما اخذته رديت عليه متفاجأة

— الو

منـاف :- صباح الخير

— صباح النور

— گعدتج

— لا عادي شكو

— ماكو بس هسه نزلت اريد اروح للدوام اشو سمعتهم يحچون مسوين حفله مال حنه مدري شنو

— اي

— وامي گالت على أساس تجون تحتفلون هنا يمنا

— اي صح

— بس إني ما اشتريلج ملابس للحنه

ضحكت و رديت

— هههه يعني هسه مخابر بهذا الوكت على مود الهدوم

— اي لعد شـ تلبسين اريدج ارقى وحده بيهم

— امي اخذتلي للحنه لا يضل بالك

— شـنو فستان لو بنطرون لو شنو بالضبط

— ههههه فستان ويخبل

— زين لعد طمنتيني شلون هبطت قبل شوية گلت بقت بدون ملابس وكلهن راح يبدلن وهيَ لا

— ههههه لا اشتريت

— اموت عليج رجعي نامي يلا عمري

قفلته من عنده وبعد ما گدرت انام طلعت سبحت و تريكت وامي نفس الشي گعدت وراها بدلنا هيج شي عادي يعني مو مال الحفلة ورحنا البيت عمي لان الحفله العصر

الاجواء يمهم تخبل صدگ عرس وفرحة للعصر و بدلنا ورتبنا على حسب الاصول قبل لا نطلع دگيت عليه سألته وين هوَ رد

— مو بالبيت انتم اجيتوا

— هسه راح نطلع

— عباتج حبيبتي لا تنسينها

— لا ما انساها

— فدوة الروحج شگد احبچ

قفلته من عنده وره عشر دقايق طلعنا البيتهم جنا بس نسوان ومراد ويانا راح يحنيها وتميم واثنين من جماعة مراد راحوا وياه ما عافوا وحده احنه طبينا وتميم والولد ضلوا بالباب

لگيناها مسوية حفله تموت وهيَ طالعة اية من الجمال كلشي بيها حلو ومرتب والاغاني و الركص واجواء الفرح تخبل

اندمجت ويا البنات وكلش تونست واخذت على الجو والاول مره بحياتي اصير اجتماعية الهاي الدرجة  امي كلش فرحانه بيه وخالتي ام مناف كل شوية جايبتني معرفتني على وحده وره ساعة اجت وحده من خالتهم صاحت عليه اجيت يمها اشوفها شتريد گالت

— حبيبتي أمي صعدي فوگ جيبي الشاحنه بغرفة زهراء حتى نشحن الديجي راح يطفة

صعدت فوگ ومأمنه محد موجود عمي طالع ومنـاف طالع والبيت بس نسوان بيه

إني اصلاً ما اندل غرفة زهراء هيج صعدت عليك يا الله

بعدني هسه فتت بالصاله الفوگ اريد ادور غرفة زهراء انفتح باب واحد من الغرف وطلع منـاف منها يضحك بس بهت وهوَ يشوفني وانا جمدت بمكاني مستحيه من عنده شلون هيج صعدت عيب طلع من الغرفـة واجى عليه ويگول

— هيج جنتي لابسة يم بيت ابو تميم

يتبع ……

يــاســة 🌱

على أساس بـ 12 ينزل البارت بس ما كمل وهذا الشي مو بـ ايدي و بنفس الوقت ما عفتكم بدون بارت ولحد هسه الساعة خمسه ونص الفجر واني سهرانه اكتب حتى اكملة وانزل وفوگاها النت لگيته خلصان والخاطركم فعلت على الرصيد وما عفتكم تالي اجي الكى هذا الهجوم والحجي الما بيه كل معنى،  من هسه الما عاجبها الموضوع تعوف القصة لا تقراها لا تبقون تتمننون لان جاي تقرون انتوا تقرون البارت بربع ساعة واني اكتبة بيومين خلوا الله بين عيونكم انتوا تستمتعون بالقراءة واني اتعب بالكتابة يعني ما مستفادة شي غير بس التعب حرام هذا الحچي الزايد وبعدين إني ما فارغة عندي بيت ومسؤولية ودراسة ومع ذلك ما عفتكم وبقيت ملتزمة وياكم مع الأسف عليكم