رواية تراث النهروان – الفصل الثامن والعشرون
part-28
طلعت رقم غيد ودكيت عليها شوية وردت
– هلاا بشمشون.
– نعلون مكطعه على راسج احسن.
– يماا هاي ليش؟
– معقولة يصير كل هذاا وما تكليلي؟
– شكوو شمشون؟!!
– تعرفين كلش زين شنو اقصد.!
كلتها واني اصلا ما اعرف شي بس اريد اشوف
هي
الي تحجي ويا بــارون وصاير شي بيناتهم لولا؟
غـيـد- شمشمون اني مالي دخل والله!
– لعد منو اله دخل؟
– عمج هوو الي حجه والله.
– شحجه عمي؟
– هو مايريد يلغي العقد وحتى كال اريد نكمل سوة ونسوي عرس
اني ماحجيت ولا كلمة مجرد كتله موافقة شعليه تلوميني!
صرخت وحطيت ايدي على حلكي بس كملت كلامها
– عزززةة حتتزوجين انتِ وبــارون!
– شمشووون!!!!
ياجلبة ما تبطلين هاي سوالفج امداج ولي.
– لا لا لحظة بعدين احاسبج عليها هاي اسمعي
بعد كم يوم
العقد مال نسرين وعبود.
– يااي فدووة الله يتمم على خير.
– اي وبــارون يكول اخذجن انتِ وغيد تشترن ملابس
بس مريم خل تولي من اخذها لـ سيف عود نشتريلها ملابس.
ضحكت وكالت
– حتى ماما تموتني ما تقبل هيج والله.
– ليش؟
– ماترضى، بس ما ابطل اشتريلي انتِ على ذوقج.
– ميخالف لعد راح اجيبلج جيس زبالة والبسه الج.
– طيح الله حظج ولييي.
سدت الخط بوجهي، ضحكت وشمرته
اممم هيج صارت بــارون تريد تتزوج وماتكلي؟
بسيطه
مرن كم يوم وماضل شي للعقد مال نسرين وعبود
طلعنه اني وسيف وبــارون للمول نشتري ملابس
وطبعا بــارون يكول ما اشتري نفسهن البستهن
بالعقد مالتي
اني وغيد البسهن وسيف يكله عندي البنطرون
الاشتريته بالعيد
ومايرضون يشترون شي سودنوني
وصلنه محل ملابس جبير وعجبني الملابس الي عارضهن من بره
دخلنه لجوة كمت افتر وسيف وبــارون وكفوا
يسولفون
ويا العاملين الموجودين بالمحل واني افتر
عجبني ثوب
يصير ذهبي ومخصر وبي لؤلؤ من يم الصدر كلش حلوو
بس المشكلة هذا طويل، لذلك كلت اخذه لـ غيد احسن
اخذته حطيته على جهه واني افتريت اريد شي على كدي
لو يطلعن طوال وعراض لو كصار كلش
بس
ما استسلمت، ضليت ادور بين الفساتين لحد مالكيت واحد
جان لونه ماروني غامق وهو ساده وكصير لكد الركبة
ومابي ردان مجرد تجه شفاف خفيف ومن يم الصدر
شذر باللون الفضي منثور عجبني حيللل!
اخذتهن وديتهن يم بــارون اخذهن مني وراح يدفع
سيف واكف يمي ويهمس
– هسه بــارون يشوفهن هواي يشك تشيرته ويكلج روحي بي للعقد.
– انجب لا تقلقني.
شوية واجه بــارون شايل العلاليك واشر يلة
– احم بــارونتي.
– ها عيني؟
– بعد بس الحذاء واريد شوووية هيجي شويونه ميكب ماعندي.
– من عيوني.
ابتسمت ولزمته من ايده اغور بـ سيف وسيف يضحك
عبالك هو اخوية الجبير شلون يسلكلي
دخلنه لمحل ثاني اشتريت منه احذيه ثنين واخذت
شوية ميكب ورجعنه للبيت، بدلت ملابسي بسرعه
وذبيت الحجاب، طلعت ثوب غيد صورته
ودزيته الها
– حلو لو نبدله؟
عفت التلفون علما ترد، وفتت للحمام اسبح
بس خلصت
لفيت شعري بالمنشفة وطلعت لكيت غيد راده
– يااايي حَبيت عاشت ايدج يروحي كلش حلووو.
– حبيبي تدللين وجبتلج هذا هم.
دزيتلها صورة الحذاء ردت بفويز بعد متتحمل
– حبيبيييييي شوكرااا عاشت ايدج كلش حلوات امووح.
ضحكت ودزيتلها فويز
– ترى مو اني جبتهم هذا زوجج المستقبلي روحي راسلي كليله شوكراا مو اني.
دزت رساله كاتبة
– من عيوني هسه اكله بــارونتي هذاا ابو الجهال.
– وجع يوجعج يا جهال هذولة صاير شي من وراي؟
– عابتلج كلمة التنكال.
– اممم تنكال مو؟
– ولي.
ضحكت وخرجت من المحادثة وصفيت الملابس وعلكتهن
حطيت ثوب غيد بعلاكه ويا الحذاء ودزيتهن بايد سيف
– وديهن الغيد كللها نهروان دزتهن.
– شتنطيني؟
طلعت الف انطيته
– واشتري الك بالرجعه.
ضحك وطلع من البيت
كدرت ملابسي وكعدت اضحك متحمسه كلش حلوات
نزعتهن وبدلت ملابسي واخذتهن عطرتهن وعلكتهن
حظرت غراضي كلهن على صفحه ورحت اسوي عشة
لا بــارون هواي صرف اليوم يرادلة عشة معدل
تذكرت
الاكلة السواها تُـــراث الي كلت خل اجرب اسويها
ثرمت البطل كوة وثرمت الفلفل والطماطه
حمست البصل
والفلفل سوة، بعدين ذبيت فوكاهن بهرات صفره
وفلفل اسود وبابركه وماجي، لمن نحمسن زين
حطيت
الطماطه وضليت احرك بيها وغطيتها تستوي شوية
بس استوت جعصتها جعص بالخاشوكه وطلعت بيض
طكيتهن فوكاها وهن عيون بدون ما اخرب شكلهن
رشيت شوية ملح فوكاها وقبقت الطاوة ونصيت
النار وعلى صفحه ثرمت خيار بماعون
وحطيت
ليمون ويا وبصل طبعا بس بــارون ياكلهن
بس استوت طفيتها وحطيتها بالصينيه هي والطاوه
وحطيت الماعون وياهن وجبت كلاصات وطلعت ببسي
روح بــارون اليوم حتى اصابيعك اخليك تاكلهن
اخذت الصينية للهول وحطيتها يمه كعدوا هو وسيف
بــارون- اويلي هاي شمسوية؟
– هذا شكرر خاص مني الك.
– هههههه تدللين رواني شعندي غيرج اني.
سيف- ههههههه صارت على الوزن.
ضحكنه وكعدنه نتعشة وهم كلساع مادحيها صدك طيبة
بس الي سواها تُـــراث اطيب بهوااي الحقير غير يعرف كلشي
بس شعجب كل هاي الفتره لا اتصل ولاراسل لا هو ولا بــــراء
كملت العشة وكمت اغسل بالمواعين وبالي يمهم
بس كلت اكيد شغل عنده ومايجي للبيت وبـراء ملتهيه
واني ماريد ادك عليهم وازعجهم اكثر
كملت الماعين ورحت وديت جاي لـ بــارون وطبيت نمت
متحمسه للعقد، ثاني يوم كعدت من الصبح العقد يبدي بـ2
بدلت ولبست ثوبي بالبيت حتى ما اخذ ملابس وياي
سويت ميكب خفيف بالبيت وحطيت بس حمره لون احمر
شعري خليته على طولة بس رفعت نصه بماشة ام الفيونكه لونها اسود
لبيت الحذاء ولبيت فوكاهن صايه وسحبتها
وحطيت الشال على راسي
طلعنه وبــارون طالع كلش حلو روحي غيد هم خلقة وهم اخلاق
اشر على سيارة بالفرع وكال
– اخذتها من صديقي اوصلكم بيها لان مو مال نأجر.
هزيت راسي مبتسمه وصعدنه بيها وهو حرك اخذنه
لبيت خاله ام غيد وصلنه ونزلنه من السيارة دكينه
الباب طلعن ثلاثتهن
سلمنه
عليهن وغيد وبــارون بالعالم الموازي
تحمحمت
وهم انتبوا اثنينهم علينه
غيد ومريم لابسات مثل لبسي يعني هم صاية وشال
وجواهن ملابس الحفلة طلعت خالة ام غيد وكالت لـ بــارون
– اني ماكدر اروح يمة بــارون بس امانه هنه يمك
بس يخلص العقد جيبهن ويا نهروان للبيت.
– بعيوني خالة ولا يهمج.
ودعناها ومشينه للسيارة
وكفت وفتحت الباب الورا صعدت وصعدوا يمي
سيف ومريم وبــارون صعد ضلت غيد واكفه
نـــهروان- يله اصعددي!
ابتسمت وصعدت بالصدر بسرعه وسدت الباب
باوعتلي وضحكت
غمزتلها واشرتلها على بــارون باوعتله شافته ملتهي يسوق
ابتسمت وعضت شفتها الجوة وسوت اوكِ باديها بمعنى حلو
ضحكت وهي دارت وجها وكعدت عدل بسرعه
من شافته يباوعلها
وصلنه لبيت نسرين نزلنه وبــارون واكف كدامنه ويوصي
– ما اوصيجن بدون ركص لان طبعا راح تركصن
تلفونجن يمجن تونسن واخذن راحتجن بس بحدود!
تصوير ابدد ما اريدد ولا اي وحده تصورجن
نـــهروان
تلفونج يمج بس ادك عليج تطلعين وصلت؟؟؟؟
– وصلتت.
هز راسة وصعد بالسيارة، مشينه بسرعه وطبينه لبيت نسرين
طبينه وسلمنه على اهلها ولكينه البنات هناك ندى
وكم وحده من بنات دفعتنه سلمنه عليهن
نـــهروان- وين نذب الصايات؟
اجت اختها كالت
– انطيني اني اخذهم.
نزعنه الصايات وانطيناهن الها اخذتهن وباوعت علينه
– ماشاء الله راح تطلعنه كسر.
ضحكنه وهي ابتسمت وراحت
باوعت على غيد طالعه كلش حلوة لابسة فستانها
ومسوية شعرها ويڤي من الطرف وحاطه ميكب
خفيف بس مركزه بالعيون وراسمتهن بالون البني والذهبي
والحمره البني كلش حلوة وهي كعدت تحجي عليّ
– يا حقيرة باع لون فستانها شلون حلوو، عود ليش فستاني طويل وانتِ مطلعه زرورج؟؟؟
ضحكت وهي رفعت فستانها وتصيح
– وخري اني هم اريد اطلع زروري.
لزمت فستانها انزل بي واهمس يم اذنها
– مو بــارون يغاار يغاار مايقبل.
ابتسمت وهدت الثوب تعدل بي
– هاا لعد تمام.
ضحكت وكرصتها من اديها
التفت على مريم لابسة ثوب نيلي مخصر على الجسم
والردان تور شفاف وساده مابي شي بس ورد على الردان الايسر
وشعرها قصر مخليته نفس شكله وحاطه ميكب خفيف بس أيلاينر وحمره وطالعه كلش حلوة ونازكه بي
– لج مريم شهل جمااال؟
– هههههههه ذوق ماماا.
– كلش حلوو.
بعدنه وحده تسلك للثانيه وتمدح بالثانيه اجت ندى تكمز
– بناات اجت نسرين اجتتتت.
طلعنه من الغرفه بسرعه وكفنه باب الهول مالتهم
ابتسمنه واحنه نشوف نسرين لابسة ثوب ابيض
طويل
وبي لؤلؤ مطشر على طولة والردان مالته جاي نص
ماصاعد على الجتف ورافعه شعرها بتسريحه كلش حلوة
ولابسة تاج ناعم وميكب تُرابي
ابتسمت الها وعيوني دمعن ما توقعت راح يجي يوم
واشوفها عروسة، نسرين وندى ومريم وغيد من ايام الابتدائية سوة
واكوا كم بنيه بس علاقتنه مو قوية مجرد نروح من صف لصف سوة
بس البنات هذني اني وياهن اخوات ونسرين طول عمرها
عبالك بتنه مو زميلة حركاتها الطفولية ودلعها
اخذت
عقولنه كلنه وكلوبنه من هي وصغيره تتصرف هيج
ولحد هسه
رحنه الها اني والبنات وهي من شافنته اجينه الها
شالت فستانها وتقدمت علينه وفتحت اديها
ضحكنه
وحضناها كلنه ونضحك
نسرين – شلون طالعه بنات؟
نـهروان – تشكين الحلك.
غـيـد – تخبللين فدوة لوجهج.
مـريـم – لج لو اني زلمة اله اخذج.
نــدى – هاي شنو خلصتن الحجي شكلها اني؟؟
ضحكنه وابتعدنه عنها
فاتت للكوشة هي وامها وراها واختها دخلنه وياهن
وشغلن اغاني وتحمسنه اني وغيد وطبينه نركص بالنص
طبن مريم وندى واخوات نسرين وبنات كرايبها
ركصنه
النسوان كلهن
بعدنه نركص وكالن اجوا الزلم، رحنه اخذنه الصايات
من اخت نسرين لبسناهن وانجر نفس كوة من الركص
لزمنه التلفونات بادينه خاف بأي لحظة يدك علينه بــارون
اجه ابوها وطلب منها تكعد ورا الباب، حطت امها الكبوس على راسها
والهيل والقرآن والمي ورد حظرن كلشي
وبده
السيد يعقد الهم وبس تم العقد ضج البيت بالهلال
كال ابوها يريد يدخل عبود، رجعنه ليورة سوينه
مسافه بينه وبين الكوشة، انفتحت الباب ودخل عبود
ضحكت على شكله صاير احمر من الخجل
كعد
بصف نسرين وامها انطتهم المحابس لبسها وهي لبسته
واخذ الذهب لبسه الها
لحد ما خلصت الحفلة تعبنه حيل وكاموا هم ركصوا سوة
ويهوسون ومن طلع عبود دك بــارون عليّ
اشرت للبنات يله
رحنه باركنه لـ نسرين وطلعنه من البيت
لكينه عبود
بعده واكف بره ويمه الولد من شافني ترخص واجه
بجهتنه يضحك وعيونه تحجي السعاده الي هو بيها
نـــهروان- الف مبروك عريسنه.
– هههههه يبارك بيج يابعد كلبي يوم الالج واوكفلج وكفة اخو.
– اروحلك فدوة ماتقصر فرحتلكم والله الله يتممها على خير يارب.
ابتسم وسلم على البنات وباركله اجه بــارون من يم الزلم
ويا سيف سلمنه على عبود وصعدنه بالسيارة
راجعين للبيت
وصلنه غيد ورجعنه للبيت، بس وصلت سبحت
وبدلت
ونمت فورا من التعب والركص…
” بـرهــوم ”
صاح تُـــراث وركض عليها، ركضت ورا اريد اشوف
واشوفها واكع بالكاع بدون نفس ولا حركه والدم
يجري من راسها ومن بطنها
تخبل تُـــراث كام يصيح ويحرك بيها شالها حطها بحضنه وهي لا تحرك
ايد ولا رجل وعيونها فاتحتهن بقوة وتباوع عليّ
كام تُـــراث يصيح بعلوا صوته نزل قمر بسرعه والعُثمان فاتح عيونه ويباوع على
تُـــراث بخوف وصدمه
طلع سجينه تُـــراث من خصره وركض على العُثمان
دفعه وكعه بالكاع ونام فوكاه والعُثمان يدفع بي ويصيح
– السبعع لاااا لاااا السبع.
– لك عُثمااااااااااان.
كالها وحط السجينه بنص كلبة ورجع طلعها وكام
يدج بي بنص كلبه ويطلعها ويرجع يدخلها
ركضت على قمر، نزعت تشيرتي ولفيتها بي والدم
يتنزل على ايدي وينكط بالكاع، باوعت على تُـــراث
العُثمان يشهك ويرافس جواه وصوته تغير روحه
تطلع بين ادين تُـــراث وهو ماعافة رجع يدج بي
وكام يصيح ودموعه تنزل بحركه ويدخل السجينه بجسم العُثمان ويطلعها ويصيح
تُـــراث- كتلللللل قمررررر ماااتت بنتيييييي ولككك كتلتهاااا
كتلتتت بنتيييييي ولك قمرررر كتلت قمرررررر.
حط السجينه بركبته وجرها لجوة شك جسمه بالسجينه
ويصيح طعنه اكثر من 50 طعنه وضل يدج بي ويصيح بصوت عالي
صوته راح من كد ما يصيح ويجر نفس حيل ويرجع يدجه ويصيح وهو يبجي
– بوووويةةة قمررر بنيتييييي.
باوعت على الباب دخلوا المكافحه كلهم، جروا تُـــراث
من فوك العُثمان وهو مجلب بي ويحط السجينه بجسمه
زرفة تزرف والدم ترس المكان وهو مايرضه يكوم
جروا حيل وخروا وشالوا العُثمان والبقية طلعوهم
برة اجه واحد اخذ قمر مني ركضت على تُـــراث
كعدت كدامه وهو يجر نفس وجهه اصفر وعيونه حمر
بـرهــوم- تُـــراث!
باوعلي وغمض عيوني وكع بحضني فاقد
حضنته
بسرعه ولزمته وكمت اصيح
– لااااا تُـــراااااث تُـــرااااااث وكعع تعاااااالووووا.
اجوا بسرعه شالوا من حضني كمت وشلته وياهم وطلعنه للسيارة برة
جسمي
كام يرجف اريد احجي شي ماكدر اباوعله شلون صعدوا
بالسيارة فاقد وبالسيارة الثانية حطوا قمر والحراس والعُثمان
صعدت بصف تُـــراث وامسح على وجهه واهمس
– تُـــراث تُـــراث اخيك اكعد جسمي كام يرجف وعلي
فتح عيونك باوعلي تُـــراث ياروحي انتَ شو فتح باوعلي.
مغمض عيونه ونفسه عالي وجسمه يرجف وشفته
حط نزل راسة لجتفي وكام يهمس
– بنيتي قمر، قمر بابا.
غمضت عيوني وباوعت عليهم حركوا السيارة
ونزلونه يم المستشفى
نزلوا تُـــراث فاقد والسيارات الثانية نزلوا العُثمان وقمر والحراس
دك تلفوني فتحته وجاوبت بسرعه
– ها رضا.
– شصااااااار؟؟؟؟
– كتل قمر العُثمان وتُــراث كتله عرف بالخطه عرفهااا.
– كدرنه نلزمهم الي بالعراق ولزمنه اكثر من قاعده الهم
والي بإيران هم لزمناهم وللأسف الضحية من بينهم هي قمر.
غمضت عيوني وسديت الخط ركضت للمستشفى
وراهم مدخلينهم كلهم للثلاجه وماخذين تُـــراث
لغرفة الطوارئ، المكافحه محاوطه المستشفى كلهم
ونصهم واكفين كدام الغرفه مال تُـــراث
كعدت
بالكاع وحطيت راسي بين رجلية وبجيت
قمر
ماتت! ضليت ضام وجهي وابجي على صاحبي
شلون اواجهه
وبــراء شكللها اكلها ماكدرت ارجع قمر!!
– بـرهــوم؟
رفعت راسي بسرعه وامسح بوجهي تحمحمت وكمت
باوعتله، جان واحد من الرجال مال المكافحه
– هاا؟
مد بطل مي، اخذته منه وهو طبطب على ظهري
– الله يرحمها ويعوضكم ان شاء الله.
هزيت راسي بـ اي ومشيت من يمه وكفت كدام الغرفه
مال تُـــراث فتحت البطل توني اريد اشرب
وسمعت
صياح من الغرفه الي بيها تُـــراث
شمرت البطل من ايدي وطبيت للغرفه مالته
– تُـــرااااااث!!!
جان نايم على السدية ويصيح ويبجي بعلوا صوته
– قمرررر بااباا قمرررررررر.
– تُـــراااااات تُـــراااث كاافي اهددئ.
– ولك بـرهــوم كتللل قمرر ماتت ولك مااتت.
كام من السدية يريد يطلع وجسمه يرجف مايكدر يوكف
جريته حضنته حيل وهو مجلب بظهري ويشهك
– قمرر ولك ضرب قمري طلقة ولك طاحت بكلبها
بابا قمرر طاحت بيها الطلقة ولك طاحت بكلب بنتي قمرر .
حضنته حيل متمسك بي وهو يشهك ويبجي بعلوا صوته
– ولك بـرهــووم ماتت قمر بنيتي راحت اخخ كلبي بـرهــوم كلبي.
– اشش كافي ياحيل بـرهــوم كافي اروحلك فدوة
تُـــراث كافي تشفعلك يم الله هاي طير بالجنه.
طبوا دكاتره من برة يصيحون ويحجون بالإيراني
يحجون على تُـــراث لان كام وكف وهو ضربته جلطه
بعدني ما مستوعب رجع فقد بحضني
شالوا
شلته وياهم وهم يحطوله الاجهزه وهو يفتح بعيونه ويسدهن
عيونه صار حمر دم وجهه اصفر مديت ايدي ريد احطها على راسه
كاموا يصيحون الدكاتره وطبلوا مني اطلع
طلعت من الغرفه تلكاني دكتور ويا سستر كالوا وين يدفنون الطفلة لان ميته
وحاطينها بالثلاجة
سكتت مارديت عليهم هزيت راسي بـ ما ادري وكعدت بالكاع ايدي على راسي
انتظر الدكتور يطلع واستفسر على حالة تُـــراث
وتأخروا يله طلعوا كمت بسرعه وحجيت بالإيراني
– هاا شبي تُـــراث؟
– للأسف المريض دخل بغيبوبة.
– شنوووو!؟؟؟؟؟؟؟؟
– اي ولحد الآن مانعرف اذا ممكن يصحه بيوم او اسبوع او شهر واحتى ممُكن سنه.
– شتحجيي انتَ تووه صحة وحجي ويايي ياا غيبوبة هاااي!
– هاي اسمها صحوة مؤقته للأسف الجلطه كلش قوية
واجت بالدماغ خلي فترة تحت المراقبة وبعدين تستقر حالته.
– والطفلة؟
– متوفية وحاليا بالثلاجة. بس ننتظركم حتى نحظرها للدفن.
بـرهــوم- ماندفن هنا حظروا كادر طبي نرجعها هي وتُــراث للعراق.
هزوا روسهم واحد منهم كال بالإيراني
– والرجال شنو نسويلهم؟
– ذبوهن بأقرب زبالة يمكم تاكلهن الجلاب اي شي.
هز راسة والبقية راحوا
ضليت كاعد انتظرهم وهم يحضرون كادر كامل للسفر
بس كالوا ينتظرون فتره لحد ما يسيطرون على حالتة
وبعد فتره طويلة كدروا يحظرونه رجعت للبيت
لكيت آدم شايل الغراض كلهن ومصعدهن بالسيارة
المكافحه كلهم راجعين بالطيارات الخاصه
وضال الصابط رضا
وكم رجال وياهم، صعدت ويا آدم ومشيه لمطار طهران
ومناك اجه الكادر وصعدوهم بالطيارة لان حاجز الضابط رضا
والبقية الي وياهم، صعدنه بالطيارة وطارت بينه
راجعين للعراق..
” بــــراء ”
كاعده على اعصابي يومين محد مخابرني ومطمني
عليهم لا بـرهــوم يدك ولا تُـــراث ضالة اكل بروحي
ومن الخوف والتفكير بطني احسها تتكطع من الالم
روحي رايحة من الخوف والقلق افتر بالبيت وايدي على كلبي
– ياارب يرجعون بالسلامة.
كعدت على التخم وعاصرة راسي وادعي
– ماماا.
فزيت بسرعه والتفتت على عزيز لكيته واكف بالباب ويبجي
رحت شلته وحضنته حيل
– ها يروح ماما شبيك حبيبي؟
– مااامااا اليد بابا تولااث!
كعدته بصفي على التخم لان ماكدر اشيله
– هسه يجي حبيبي كافي.
مسحت دموعه وهو يبجي ويصيح محروك كلبة
– مااا اليدد هو وقمرررر!
– هسه بابا بـرهــوم يجي ويجيبهم ويا مو شفته راح يجيبهم؟
هز راسة بـ اي وشهك يبجي حضنته امسح بدموعه واسكت بي
كوة سكت من انطيته التلفون يباوع بي خنس عليّ
عفته ضليت حاطته على رجلي وامسح على راسة
لليل على واني على كعدني ما اعرف اي شي ولا احد
دك وطمني ضليت الوب بمكاني وكلساع يجي بالي شي
بية مابية كمت كوه اسوي اكل علمود عزيز سويته
وكعدت اقنع بي ياكل ما يرضى انوب من تذكر ليش ما يريد رجع يبجي
– اليد بابا تولاث وبابا بلهوم وقمر.
– هسه يجون وليدي اكل حتى من يجي بابا تُـــراث ما يزعل منك لان متاكل.
– هثه ماااريد مااماا.
– اروحلك فدوة ماما بس شوية لخاطري.
قبل ياكل ما صدكت كعدت اوكل بي شوية واكل ويا بدون نفس
بس علمود البطني لا يصيرلة شي بسببي
مارضة
يكمل اكل عفته براحته اهمشي اكل، شلت الصينية
وحطيتها على الميز حتى مابية حيل اغسلهن
كعدت
مددت بالهول وعزيز بحضني يلعب بالتلفون
مر وقت طويل
واني انتظر لا مكالمه ولا حتى رسالة منهم تطمني
توني بديت اغفي اريد انام وسمعت الباب مال الشارع
ينفتح، طفرت بسرعه نزلت عزيز من حضني وركضت
فتحت باب الهول وكفت بالحديقة، انفتح الباب
جريت نفس براحه من شفت بـرهــوم ركضت حضنته حيل
وهو حضني وحط راسة بركبتي
– بـرهــوم.
– روحه.
ابتعدت اباوع عليّ واباوع ورا
– هاا؟ تُـــراث وقمرر وين؟ وينهم؟؟
بلع ريكة وباوعلي عيونه حمر وشعره مخربط وملابسة
مدمرات ماعرف شبيهن حسيت روحي راحت
لزمت
وجهه باثنين اديه وخليت عيوني بعيونه وهمست بصوت يرجف
– بـرهــوم جاوبني وينهم؟
بـرهــوم- قمر ماتت.
شهكت شهكه طالعه من كلبي وكعدت بالحديقة على ركبي
– لا لا لا لا.
كعد كدامي ولزمني من اديه مثبتني ويحجي
– بــــراء بــــراء اهددي بس اسمعيني اهدي لخاطر تُـــراث فدوة اروحلج.
– قمر ماتت ولج يمةةة.
كمت اشهك اريد اتنفس وادفع بي وهو حاضني حيل
ولازم ادية مثبتني بحضنه ويهمس بسرعه
– بــــراء فدوة رحتلج بس اسمعيني تُـــراث محتاجنه هسه بــــراء.
كمت اصرخ وابجي بحضنه وهو كعد بالكاع وحط
راسي بحضنه وحضني حيل ويهمس
– طير بالجنه الله يرحمها لا تبجين كافي موزين عليج.
– ولك خوووويةة تُـــراث الله يسااعد كلبك يمةةة
يسااعد كلبك خوووية تُـــراث.
باوعت على بـرهــوم وكمت اشهك واحجي
– وينن تُـــراث بـرهــوم اخذنيي لـ تُـــراث وينهه.
بـرهــوم- بالمستشفى.
– شبيييي؟؟؟؟ بـرهــوم شبيي تُـــراااث شبييييي!!
– كتلوا بنته كبال عينه شيصير بي اكثر من هيج؟!
غمضت عيوني وشهكت حط ايده على حلكي ويهمس
– بــــراء صوتج صوتج العالم نايمه واحنه بره كافي كلبي.
– ماااكدرر مااكدرر.
شالني دخلني للبيت وكعدني على التخم حاضني
بـرهــوم- بــــراء.
ضميت روحي بحضنه ابجي واشهك
– يمةةة تُـــراث اخذني اله بـرهــوم اخذنييي لـ اخوووية اخذني.
– اخذج والله بس كافي مو احجي وياج بــــراء ياروحي كافي.
ضليت ابجي بحضنه لحد ما حسيت راسي يريد ينفجر
غمضت عيوني واشهك اريد بس راسي يهدئ
ماحسيت
بروحي من غفيت بحضن بـرهــوم واني ابجي
فتره وفزيت بسرعه اتلفت واشوف روحي بالغرفه
نايمة على الجرباية وعزيز نايم بصفي، فزيت بسرعه وكمت
طلعت من الغرفه مالكيت بـرهــوم بالبيت
اخذت
التلفون ادك عليّ مخلص الرصيد
– موو وكتك انتَ ابدددد.
دكيت على النت ماعدهم ضليت افتر وايدي على راسي
– بـرهــوم شلووون تعوفني هيج شلوون!
بعدني احجي وانفتح الباب مال الهول باوعت بسرعه
وجريت نفس من شفته بـرهــوم اجه عليّ وحط ايده على خدي
– شبيج بــــرائي؟
– بـرهــوم اخذني لـ تُـــراث.
– يله البسي لعد.
هزيت راسي وردت اركض صاح
– علىى كيفجج برااااء.
اخذت الشال لفيته بسرعه ولبست عباتي وطلعت
وهو شال عزيز وهو نايم وطلع كدامي سد البوب
وصعد عزيز حطه ورا بالسيارة صعدت وهو صعد وحركها بسرعه
وقت قصير وصلنه للمستشفى نزلنه بسرعه واني
بس اريد اوصل جسمي كله يرجف واحس كلبي
راح يطلع
من مكانه من كد ما يدك سريع خايفه اواجه تُـــراث
واشوف حالته خايفةة
مشيت ورا بـرهــوم، وعزيز عافة بالسيارة وصلنه
لممر جانوا بي ضباط هواي وزلم مسلحه كلهم واكفين كدام الباب
دنكت راسي وبـرهوم مشة كدام يحجي وياهم
ابتعدوا
كلهم من يم الباب وكفوا على جهه، اجه بـرهــوم لزم ايدي
ومشه وياي للغرفه مال تُـــراث وصلنه الها
اجوا
دكتور ويا سستر بـرهــوم حجه وياهم كال الدكتور
– تفضلوا.
فتح الباب وفات كدامنه فتنه ورا للغرفه
انصدمت واني اشوف حال تُـــراث حطيت ايدي على حلكي بسرعه
باوعت عليّ الاجهزة الي حاطينها على وجهه والكانونه
البأيده والاجهزه الـ على صدرة وبأصابيعه وجهه اصفر
وشفايفه صايرات زرك وسواد جوه عيونه
ركضت عليّ
اصيح وابجي، لزمت ايده وكمت اشهك
– تُـــرااااات.
جرني بـرهــوم عنه واني ابجي التفتت على الدكتور وصحت
– شبيي اخوووية شبيي ليش هيجي حاالته.!
– اخوج تعرض لـ صدمة قوية وانهيار عصبي حاد
وبسبب الصدمة اجته جلطه قوية بالدماغ
وبسببها
دخل بغيبوبة ولحد الآن مانعرف شوكت يصحه.
شهكت بصدمه وباوعت على بـرهــوم غمض عيونه بـرهــوم
عبالك جان يعرف فلتت روحي من بـرهــوم وكعت
على ركبي كعد كدامي بـرهــوم بسرعه ولزمني من ايدي ونتر بهمس
– بــــراااء تخبلتييي الطفلل البطنج ارحمييي لا تسووين هيج!!
– تُـــراث ولك تُـــراث دخل بغيبوبة يمةة كلبي
ولج يمةةة
اخووية راح يمةة اخووية ولج يمةة.
– بــــراء.
– بـرهــوم اخووويةةةة.
كلتها بصوت وكمت ابجي واباوعله والدكتور ماراضي
– لا لا اختي كومي بره مايصير هيجي يم راس المريض وتصيحين
هو متعرض لجلطة لازمه هدوء الله يخليج اطلعي برة.
كومني بـرهــوم واني اباوعله واشهك واجر بروحي من بـرهــوم
– خلينييي يمه بـرهــوم عليك الله خلينيي يمهه والله اموووت لاا تطلعني والله ماحجيي بعدد
عليك الله ماحجيي عوفنيي يمه.
– بــــراء كافي حبيبي كاافي يروحي مايصير تسوين هيج
والله هسه كم يوم ويصحه ميصير تضلين يمه شوفي
حتى الدكتور طلع ميصير احد يضل يمه.
كعدني على كرسي كدام الغرفه وجاب بطل مي يغسل بوجهي
ويشربني منه، باوعتله وهو باوعلي بقهر وعيونه مدمعات
كعد كدامي يمسح بوجهي من المي ويهمس
– بــــرائي، ياروح بـرهــوم انتِ اني يمج
واني وياج
لا تفكرين بيوم محد يمج سواء انتِ او تُـــراث
يوم يومين
ثلاثة اربعه يصحه ويرجع صدكيني بس مو قليل الي عاشة
كتلوا بنته كدامه حقة يصير بي هيج بس انتِ لا تضعفين
ضلي الاخت القوية الي سانده اخوها وزوجها
ما متعودين عليج
تضعفين هيج وتبجين بسرعة قوي روحج لخاطره.
هزيت راسي بـ لا ودنكت ابجي واهمس
– ماكدر بـرهــوم اضعف بيكم اني من احد بيكم
يتأذة
اني الأتأذه واني الاتعب بدالكم صدگوني من اشوفكم بخير
اني اصير بخير بدونكم اني لاشيء.
جر حسرة وكعد بالكاع كدامي ولزم اديه باسهن حيل
وحط راسة على رجلي، التفتت من سمعت احد يصيح باسمه
رفع راسة من رجلي بسرعه وكام من صاحوا عليّ
باوعلي ولزم ايدي مسح عليها وكال
– ضلي هنا هسه اجيج بــــرائي.
هزيت راسي وهو مشة باتجاه الضباط الواكفين بالممر
دنكت راسي صافنه وبس دموعي تنزل بهدوء وتنكط
على رجلي امسحهن ويرجعن ينزلن، شوية واجه
بـرهــوم مدلي ايده وكال
– كومي حبيبي.
– وين؟
– نرجع للبيت؟
– ماريد ماريد شلون ارجعع!
– بــــراء ضلتنه هنا ماتفيد والله هذولة الضباط كلهم هنا
والدكاتره كلهم ماعايفينه ابد، وهم لازم اروح للمركز وماكدر اعوفج وحدج هنا.
– بـرهــوووم.
كلتها بصوت مخنوك هز راسة ورفع ايدي باسها
– اجيبج والله يوميه نجي اجيبج لهنا بس هسه عزيز بالسيارة وانتِ تعبانه غير مره هم اجيبج وداعتج.
هزيت راسي ومشيت ويا طلعنه من المستشفى
صعدنه
بالسيارة باوعت على عزيز بعده نايم، رجعنه للبيت
شالة بـرهــوم ونزله طبينه للبيت حطه على الجرباية
واجاني بسرعه طلع اكل من الفرن حطه كدامي وشايل بيده عصير
حطهن على الميز ونزعني العبا والشال ويحجي بسرعه
– بــــرااء اروح وارجعع اذا لكيتج ما ماكله وعلي ازعل ولا احجي وياج كلممةة
وحتى لـ تُـــراث ما اخذج اكليهن بسرعه هسه اجيج خووش؟
هزيت راسي بـ اي وهو باسني براسي وبخدي وهمس
– ما اتأخر حبيبي اكلي يله.
طلع من البيت مستعجل وسد الباب ورا
لميت
دفعت الاكل وحطيت راسي على التخم وصافنه
ودموعي ينزلن بهدوء وبدون صوت، يجي بالي صوت تُـــراث
وضحكات قمر وشقاهم غمضت عيوني وماحسيت بشي بعد..
” نـــهروان ”
واكفه بالمطبخ ولابسة صدرية الطبخ وافتر وسيف وراي يحجي
– والله الكيكه اطيب.
– لاا سيفف اريد اسوي اكل اكل مو حلوياات
حتى تكول بنتي ناردة.
سيف- اي سووي كيكه!
– ولي انتَ تريد كيكه مو ماما اكوا واحد يتعشة كيككك؟؟؟.
صفنت افكر، ماما اليوم راح تجينه على العشة
شنو اسويلها؟
فكرت اسوي برياني احسن؟
– سيف وخر راح اسوي برياني.
وخرته وطلعت فديو على اليوتيوب تعليم طبخ البرياني
طلعت الغراض احظر بيهن وحطيتهن على صفحه
وبلشت اسوي الخطوات وحده وحده حمست الحشوا على صفحه
وطبخت التمن وبعدين ضفتهن سوة وحطيت البهارات مالته
وقبقته يتهدر وسويت التشريب وگليت الدجاج
وحظرت كلشي
وطبعا سيوفة ساعدتنيي
نصيت الجدورة وركضت سبحت بسرعه وبدلت ملابسي
لبست دشداشة لون بيجي وبيها حزام ذهبي ومخصره
حسيت نفسي چــنـة
طب بارون من بره ينزع بحذاء باوع مستغرب وكام يشم ويغمض عيونه
– لك اويليي شهلل ريحة الطيبه هاااي.
حطيت ايدي على خصري وكمت اهز بي
– احم احم هذاا طبخي.
– وضامته عليّ؟ لا ياظالمةة.
ضحكت وهو طب للمطبخ يغسل اديه ويحجي
– واني اكلج سويلي تكليلي باااارون ماا اعرووووففف.
كالها بصوت انثوي يقلد عليّ
ضحكت وكتله
– من عيوني بالمرات الجاية اطبخلك.
– ايي نشووف.
راح كعد بالهول وسيف يكله
– ترى اني هم ساعدتها والله.
– انتَ وين اكوا منك.
وجره باسها بخده وسيف يضحك فرحان
عقدت حاجبي وتخوصرت
– لا والله؟ سيف تبوسة وانيي استلمتني رزاايللل!
ضحك وكام جر وجهي وباسني بخدي حيل
ضحكت وابتسمت
– اشكرك اشكرك.
ضحك وراد يحجي اندك الباب راح بــارون يفتحه
وسيف طلع ورا، قبل لا يطبون باوعلي سيف بسرعه وكام يأشر بيده ويهمس
– هذاا رجلهاا جاي وياها البسي حجابج.
عقجت وجهي
بضوجه وطبيت جريت حجابي لبسته وطلعت
طبت
ماما وياها جهالها رغم هم صغار اصغر من سيف ولد ثنين وبنيه
طبت ماما ورجلها وراها رحتلها مبتسمه وهي حضنتني حيل
– بنيتي حبيبتي.
– شلونج ماما؟
– الحمدلله يـگلبي وانتِ؟ شنو هذا الحسن كلة والجمال؟
– هههه طالعه عليج غير.
ابتسمت خجلانه وضحكت، باوعتله ماما كلش حلوة
ولا عبالك هي امي ناعمه حيل وجسمها رشيق
وشعرها الاسود رافعته
وملامحها ولون عيونها وبساطة لبسها كلش حلو
اعترف اني اول ما تزوجت وعافتنه واحنه صغار
كرهتها حيللل وصرت يوميه اغلط عليها لان بسببها
شلت مسؤلية سيف وكوة كدرنه نعيش احنه
لان حتى بــارون
جان صغير مو حمل مسؤولية بس من كبرنه وصارت تجي علينه
هواي تغيرت تصرفاتي وياها وكدرت اتعود على الموضوع
ماما من طائفه مُختلفة بابا جان شيعي وهي سنيه
وبعد وفاته فورا تزوجت شخص من نفس عشيرتها
والي هو نفسه زوجها حاليا
من شافني حاضنه ماما ابتسم وباوعلي درت عيوني عنه
وباوعت على الجهال، ابتعدت من ماما وكتلها
– اكعدي ماما.
كعدت واجه سيف حضنها وهي تبوس بي رغم ما عاش وياها هواي
بس كلش يحبها، باوعلي رجلها الي اسمه فراس وكال لجهاله
– روحوا سلموا على اختكم بابا.
اجوا ثلاثتهم وكفوا كدامي باوعتلهم بحسره
ولد ثنين واحد اسمه أيمن والثاني انور والبنية طيبة
باسني بخدي وابتعد واجه ورا انور هم باسني وابتعد
وكفت كدامي البنيه صغيره يمكن حتى مو بالمدرسة
باوعتلي وتريد تبوسني بس خجلانه، حسيت نفسي
حقيره مهمها كان هم يضلون اخواني من بطن وحده
جريتها من اديها وهمست
– شسمج ياحلوة؟
– طيبة.
كالتها بخجل ابتسمت وباوعت على ماما
– احسها تشبهني!
ازدهــار- اي عندي صور الج من جنتي صغيره حيل تشبج.
ابتسمت وبستها بخدها، راحوا الولد كعدوا يم فراس
وهي راحت كعدت بحضن ماما وماما تضحك
– هاي اختج حبيبي ليش تستحين منها؟
ابتسمت وكمت
بــارون- بس بالشكل تشبها روان من جانت صغيره
ابدد ما تستحي لو تخاف من احد.
ضحكت وباوعت على بــارون ابتسم وحط ايده على جتفي
فـراس- ولحد هسه؟
رفعت تك حاجب وبــارون كاله
– بالعكس، بس الشخص اليندك بيها مسموح الها تسوي بي كلشي
بس هسه كبرت وصارت تعرف شوكت تخجل وشوكت تخاف
وشوكت تطول لسانها وشتحجي.
ضحكت وضميت وجهي وماما كالت
– تربيك بعد.
ابتسم بــارون وفـراس يباوع علينه وبنظرات حاده
كسرت الملل الي صار اني من كمت وكلت
– خل اصب الكم العشة الي طبخته بايديي.
ماما- نادره بنيتي.
ابتسمت ورحت للمطبخ
اجت طيبة وكفت يمي وكالت بهمس
– اساعدج؟
ابتسمت الها وهزيت راسي انطيتها السفره وكتلها
– روحي افرشيها انتِ وسيف.
اخذتها وراحت تركض للهول، طلعت مواعين كبار
وصبيت بيهن سويتهن اربع مواعين كبار وحطيت
الدجاج فوكاهن وصبيت التشريب واجوا الجهال
وسيف وياهم ياخذون بيهن، اخذت المقبلات والمي اخر شي
وكعدت يمهم وماما وبــارون يمدحون بالطبخ مالتي
ابتسمت وكتلهم
– بالعافية.
بدينه ناكل ونسولف بمواضيع عاديه وماما تسال على الكلية
– ان شاء الله السنه التجي ارجع ادرس هي ضلت بس سنه وحده.
– ان شاء الله.
كملنه اكل وشلنه الماعين وطبعا الجهال وياي
وماما واكفه يمي
تسال بية على الحجاب وشعجب لبسته وخاف مجبورة
– بالعكس ماما اني لبسته لان صار لازم البسة
والحمدلله لبسه عن قناعه والتزمت بي.
– الحمدلله، الله يهديج حبيبتي.
– يوم الالج.
– ههههههه والله فراس هواي يلح ويريد البسة بس ما متعوده عليّ.
– اني هم بالبداية ما رتاحيت بي بس بعدين تعودت وصرت ما احب اذبة.
راحت ماما للهول واني عزلت المطبخ واخذتلهم الجاي
وديته الهم، شربوا الجاي وضلوا شوية وراحوا
ودعناهم
وطبينه للبيت، بــارون كال يريد يطلع من البيت
عنده شغل بالمحل مالتهم هو وصديقة وسيف
كعد بالهول يلعب بلي
عفتهم اني وطبيت للغرفه بدلت ملابسي
ومددت على الجرباية
باوعت شوية بالتلفوت وغفيت بسرعه من النعاس
كعدت ثاني يوم الصبح من وكت لان نايمة من وكت
غسلت وطلعت بالهول لكيت سيف نايم بمكانه بالكاع
والبلي مشتغل وغرفة بــارون مسدوه يعني نايم
شلت سيف كوة وطببته لغرفتي حتى يضل نايم ميكعد
وعزلت الهول ومددت على التخم اباوع يوتيوب
اجتني رساله من الواتساب، فتحتها جانت من هُمام كاتب بيها
– صباح الخير، اليوم عندج شي؟
استغربت شكو؟ رديت عليّ
– هلا صباح النور، لا ماعندي ليش؟
– هلا بيج، اذا ماعندج شي اتصل؟
– اتصل.
دك فورا، جاوبته
– ها هُمام خوماكو شي؟
– لا، نـــهروان اليوم اريد ادز امي عليج.
– شتسوي؟
– تخطبج الي!
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.