رواية خدمه من الجن العلوي الفصل الثالث 3 - بقلم محمد مهني

  رواية خدمه من الجن العلوي (كاملة جميع الفصول) حصريا عبر كوكب الروايات بقلم محمد مهني

رواية خدمه من الجن العلوي الفصل الثالث 3

خدمة من الجن ؟!

في الجزء الأول من حكايتي كلمتكم عن ناس غريبة كنت بشوفهم بيجولي.. كانوا ناس شكلهم أبيض.. شفافين.. وكانوا واخدين الجسم البشري لكنهم بيض أوي.. وحتى كان باين لبسهم الأبيض.. فضلت أشوفهم كتير.. وكانوا بيقعدوا معايا في اوضتي وانا بقرا قرآن.. ووقت ما كانوا بيجولي كان بيبقي في الليل.. وبرغم ان الاوضة مضلمه كنت بشوف نور شديد جوه الاوضة ولا كأن الشمس دخلت الاوضة!... 

وكمان شوفت كائن شكله غريب اوي؟ شوفته في مزرعة الخوخ وانا بعمله تصييف.. و كان طويل.. طوله 3 متر.. ولابس لبس الكهنة.. عباية سودة وماسك عصاية وخارج من مقدمتها زي حديدة بالطول.. زي المنجل اللي بنشوفه في أفلام الرعب.. 

وحابب اوضحلكم حاجة.. الكاهن ده كان زعيم الجن اللي راصد الأرض.. رصد للكنوز.. والقطة السوده كانت هي الكاهن!..

انا قلت لكم في الجزء الأول ان الكاهن زعيم الناس البيضة اللي كانت بتجيلي.. لكن ده مش صحيح انا اللي فهمت النقطة دي خلص من صاحب الحكاية وهو وضحالي... 

المهم نرجع لحكايتنا.. 

ومن الحاجات اللي كانت بتحصل معايا كنت ابقى تعبان كنت أقول في سري مثلا ان عندي برد كنت ألاقي نفسي خفيت.. وعلموني الطيران.. انا أصلا عرفت ان حلم الطيران واني اتجول في اماكن بعيده زي المدرسة.. وبالمناسبة كانت بعيده عن المزرعة... عرفت ان ده إسقاط نجمي؟ والاسقاط النجمي ده حالة من خروج الروح من الجسد لوقت معين.. الروح فيها بتبقى حرة ومش مقيدها الجسد.. وتقدر وقتها الروح تسافر لاماكن بعيده جدا.. لالاف الكيلومترات.... 

لكن الاسقاط النجمي ده عشان تعمله بيبقى محتاج طقوس معينه تتعمل.. انك مثلا بتفضل لفترة تعمل تأمل.. وتلبس ملابس معينه.. وتاكل أكل معين.. والنومة كمان بتبقى بطريقة معينه.. وبتفضل شهور لحد ما بتوصل لحالة الاسقاط النجمي.. وكمان عشان تسيطر على روحك بتحتاج تعمل حاجات معينه.. 

يعني الاسقاط النجمي حالة روحانيه مش اي حد بيقدر يدخلها ويسيطر عليها.. لكن انا قدرت ادخل للحالة دي وكنت كمان مسيطر على روحي! وانا أصلا كنت طفل متعداش العشر سنين!.. 

فضلت على كده لحد ما بقى عندي عشرين سنه.. ولما سبنا المزرعه واخدنا شقة في القاهرة.. أبويا حكى لشيخ من اكتوبر وجالي.. وسمعته قال ( انا هشيلهم عنه) وبمجرد ما الشيخ ده.. واسف اني بقول عليه شيخ لانه طلع دجال للأسف.. من وقتها مبقتش أشوف اي حد من الأرواح او معرفش كانوا ايه.. مبقوش يجولي خالص!.. 

بس بقيت أشوف حاجات تانية؟

بقيت أشوف شياطين.. وكوابيس بجد مرعبه اوي.. وحياتي كلها بقت سوده.. بجد الدجال ده اذاني!.. 

في الليلة اللي الدجال ده كان ف شقتنا وقال لابويا ( انا هشيلهم عنه) حصل معايا حاجة مرعبه اوي؟ نمت اليوم ده.. وانا كنت بنام في الاوضة انا وامي واخويا.. كنت انام انا في النص.. واخويا ع الحرف.. وامي جوه.. المهم نمت وصحيت على حد بيزغدني ويصحيني؟ عارف لما حد يجي عليك وانت في سابع نومه ويهزك جامد.. هو ده حصل معايا.. ولما صيحت مكنتش عارف اتحرك! حاجة مسكاني من ايدي جامد ومكتفاني.. وحاسس ان كل جسمي مشلول.. وحتى مكنتش قادر اقرا قران!.. 

دي حالة اسمها الجاثوم.. بتحس انك متكتف وحاسس باللي حواليك.. لكن مش قادر تتحرك ولا تتكلم.. 

فضلت على الحاله دي لحد ما جسمي فك وصحيت مفزوع.. وباخد نفسي بالعافية.. وحتى امي صحيت ع فزعتي.. وطمنتني وانا فضلت اقرا قران لحد ما هديت ونمت.. 

وبعدها على اللي حصل معايا بقى!..

عارفين لما تكونوا في خناقه.. وبتتخانق مع واحد وتقدر عليه.. فهو يمشي ويجيب أصحابه! هو ده اللي حصل.. انا صحيت وكنت متكتف جامد اوي.. تكتيفه عمري ما اقدر أوصف مدى الصعوبه اللي فيها! حتى فضلت كتير.. يعني اتمسكت مده كبيرة!.. 

وبعد معاناه فوقت من التكتيفه دي.. 

ومن اليوم ده مبقتش الناس البيضه اللي كانت بتجيلي! وبقى الشيء الاساسي عندي هو التكتيفه اللي بصحى عليها! يوميا اصحى متكتف.. وحتى اهلي عرفه.. وبقو لما يشوفوني متكتف.. بيعرفوا من حاجة واحده بعملها وهي ( ااااااه) كنت بقولها.. لانها الجملة الوحيدة اللي تقدر تقولها وانت مش بتحرك لسانك.. لكن اي جملة فيها تحريك لساني مكنتش أقدر أقولها... 

امي لما كانت تسمعني بقول ( اااه) كانت بتهز فيا لحد ما أقوم.. لكن في مرة صحيت متكتف.. وفضلت اقول ( ااااه) وهنا شوفت امي دخله عليا.. وقعدت جنبي وقالت لي ( بس اسكت ماتقوش اه) وغريبه هي ماصحتنيش المرة دي ليه معرفش؟ هي بس كانت بتقولي أسكت.. وفي ثواني لقيتها اختفت من جانبي.. ولقيت امي في لحظتها دخلت عليا! وهي اللي صحتني! ولما قلتلها انتي كنتي قاعده جنبي من شوية ومش بتصحيني ليه؟ كنتي بتقوليلي اسكت! فلقتها بتقولي ( انا لسه دخله حالا) يعني ايه مين اللي كانت قاعده جنبي من شوية؟! 

ومن اكتر المواقف اللي بجد خلتني أخاف وكنت هتشل من الخوف.. الموقف ده؟!

يومها كنت لوحدي في الشقة.. وكنت لسه داخل انام.. وانا اصلا متعود انام متأخر يعني سته او سبعه ع ما بنام.. نمت كالعادة حاجة صحتني.. وعرفت طالما حاجة صحتني يبقى انا هتكتف.. وفعلا اتكتفت جامده أوي! وفضلت أحاول اقرا قران.. لحد ما خرجت من بوقي آية.. فهنا اتفكيت.. ولما اتفكيت قومت وقعدت نص قعده ع السرير! وبعدها شوفت اللي محدش يستحمله؟!

كنت شايف في رجلين ماشيه على البطانية.. رجلين مدورة مش زي رجلينا.. بتمشي من أول طرف في البطانية... تمشي يمين وشمال يمين وسمال.. ولحد ما بقت عند بطني! فهنا اترميت على ضهري.. وحاجة مسكت ايدي الاتنين وكتفتني بالعكس!... 

عارفين لما تمسكوا حد من أيده الاتنين وتلفوها جامد ورا عند ضهره وتضغطه!.. 

ده اللي حصل معايا اتكتفت من ايدي بالعكس!.. 

   •تابع الفصل التالي "رواية خدمه من الجن العلوي" اضغط على اسم الرواية