روايه أحفاد البارون كامله بقلم ايمان جمال عبر مدونة كوكب الروايات
روايه أحفاد البارون الفصل الخامس
ليل وصلت القصر بس طبعاً الكل كان مشي واللي موجودين البارون وفريدة بس وشريف راح المستشفى
ليل قاعدة مع فريدة: بصراحة القصر وحش أوي من غيرهم
فريدة إبتسمت: فعلاً، بيكونوا عاملين بهجة في المكان
البارون نزل وقعد معاهم وباين عليه إنه حزين
ليل: ممكن أعرف حضرتك مالك؟
البارون بحزن: مافيش
ليل بصت لفريدة ورجعت بصتله: حضرتك زعلان عشان هما سافروا؟
البارون اتكلم بحزن واضح: أنا زعلان إن حفيدي بيكرهني ياليل
ليل زعلت عشانه: ممكن تحاول تقربه منك
البارون: والله حاولت
فريدة إتكلمت: يابابا حضرتك طول الوقت قاسي عليه
البارون بغضب: هو عشان كنت عاوزه راجل ابقى قاسي
ليل بتحاول تهديه: ممكن حضرتك تهدى عشان ماتتعبش، واكيد كل حاجة هتتحل إن شآء الله
البارون بدعاء: يارب انا بجد عاوزه قريب مني
ليل: إن شآء الله
آخر اليوم الشباب والبنات وصلوا السخنة، بس طبعاً ذي ما فهد اتفق مع أدهم إنهم يروحوا الڤيلا الجديدة
جاسر نزل من العربية وواقف مستغرب: هو إحنا جينا هنا ليه؟!
أدهم: دي ڤيلا فهد
ملك بفرحة: بجد؟
أدهم: أيوا
أكمل: دي أول مرة نعرف إن عنده ڤيلا هنا
أدهم إبتسم: كان حابب يعملها مفاجأة بس بعد قرار سفر جدك معانا فقالي اجيبكم هنا
هاجر: بس جدو مجاش معانا
أدهم: ماهو فهد مايعرفش لحد دلوقتي أصلا إن جدي رفض يجي
آسر بتعب: طب ياريت ندخل عشان مبقتش قادر أقف
أكمل بسخرية: إيه تعبتي ياسوسن
آسر بغضب: إتلم يا أكمل
أكمل بغضب: احترم نفسك واعرف إنك بتتكلم مع اخوك الكبير
أدهم بعصبية: ماتحترموا نفسكم شوية هو أنا مش واقف
فهد خرج على صوتهم وواقف يتفرج عليهم ومربع إيده وساند على الباب وهما سكتوا لما شافوه
فهد: ماتكملوا خناق
آسر بغضب: اسأله قال إيه
فهد بهدوء بيبص لملك اللي جريت عليه حضنته وهو حضنها
ملك: كدا تمشي وتسيبني
فهد حاضنها بحب: معلش ياقلبي
أكمل واقف على أخره بسبب غيرته عليها وأدهم بيضحك عليه وهو بصله بغضب
أدهم بص لفهد: جدك مجاش معانا
فهد: وأنا مالي
أكمل سبقهم على جوا عشان هما أصلا تعبانين من الطريق
فهد قاعد معاهم: الأوض جاهزة فوق
ملك قاعدة في حضنه: أنا هنام في حضنك
أكمل قام بغضب: انا طالع أتخمد
فهد بإستغراب: ماله دا؟!
جاسر إبتسم: مافيش تلاقيه مرهق بس أنا طالع أنام
جاسر طلع ورا أكمل اللي كان ناقص يطلع نار من بوقه
جاسر بيضحك: غيور أوي إنت
أكمل بغضب: كلمة كمان وهطردك بارة الأوضة
جاسر قعد عالسرير وإتكلم بهدوء: طريقتك دي هتعرف فهد على فكرة
أكمل: وفيها إيه لما يعرف هو أنا يعني هتجوزها من وراكم
جاسر: ما أقصدش كدا يا أكمل اللي أقصده إن ملك دلوقتي مش طيقاك يعني لما فهد يعرف هتلاقي ملك رافضة الموضوع وساعتها فهد هيعرف إيه السبب وإنت بقى اللي هتكون غلطان ولو عملت إيه فهد مش هيوافق
أكمل: طب إيه الحل؟
جاسر: ياعم اتنيل أصبر لحد مانشوف هيحصل إيه
أكمل بصله بغضب: طب سيبني اتخمد بدل ما اخنقك
جاسر نام عالسرير: انا هنام هنا
أكمل بصله ومربع إيده: الأوضة دي اللي عجبتني
جاسر: وحد قالك إنك هتخرج
اكمل: امال إيه؟
جاسر: هنام جمبك
أكمل بغضب: قوم اطلع بارة
جاسر برخامة: إنسى أنا قاعد معاك
أكمل بصله بغضب ونام جمبه عشان هما تعبانين من الطريق
الكل دخل أوضته عشان يرتاحوا بس أدهم قاعد مع فهد في جنينة الڤيلا
أدهم بيبصلوا: عامل إيه دلوقتي؟
فهد بهدوء: كويس
أدهم بشك: متأكد؟
فهد بيهرب من نظراته: اه يا أدهم ويلا اطلع نام
أدهم: لا مش هنام
فهد قام وقف: براحتك انا طالع أوضتي
أدهم وقف: وفين أوضتي؟
فهد بصله وإبتسم: أعتقد يعني هي الأوضة واحدة
فهد سابه وطلع وأدهم واقف مبتسم على إبن عمه وصاحب عمره وبعد شوية طلع وراه والكل نام
نرجع للقاهرة في المساء، ليل كانت لسة في قصر البارون وشريف رجع من المستشفى
شريف بإستغراب: إنتي لسة هنا؟!
ليل إبتسمت: دا أوامر جد حضرتك طلب مني استنى شوية
شريف إبتسم: براحتك طبعاً واما تيجي تمشي هبعت معاكي عربية بالسواق
ليل: ماشي
شريف طلع يطمن على جده وبعد شوية السواق أخد ليل ووصلها للسكن وتمارا كانت واقفة في الشباك وشافتها وهي نازلة من العربية
ليل فتحت باب الشقة ودخلت
تمارا برخامة: ايوا بقى وبقينا بنركب عربيات
ليل ضحكت: إنتي جيتي امتى؟
تمارا: لسة واصلة من شوية
ليل حضنتها وقعدوا يتكلموا سوا
تمارا: يلا احكيلي
ليل: احكيلك إيه يابنتي
تمارا: اي حاجة، احكيلي عن الفهد
ليل إبتسمت وبصتلها: ماشفتهوش من امبارح
تمارا: ليه؟!
ليل: أصلهم سافروا السخنة يومين وراجعين
تمارا: يعني هترتاحي من رخامته وعصبيته
ليل قامت من جمبها وفتحت الدولاب وبصتلها: عارفة ياتمارا رغم انه كان بيضايقني بس القصر تحسيه كدا مالوش صوت من غيره
تمارا غمزتلها: هي الصنارة غمزت ولا إيه
ليل بصتلها بغضب: إيه التخلف دا صنارة إيه وزفت إيه إنتي كمان
تمارا ضحكت: أنا قولت يمكن
ليل بغضب: بقولك إيه إتخمدي أحسنلك
تمارا فضلت تضحك عليها ونامت وليل قعدت شوية مع نفسها ونامت
تاني يوم الصبح في السخنة، الكل صحي وعاوزين ينزلوا حمام السباحة بتاع الڤيلا
فهد قاعد في الجنينة بيشرب قهوته وأدهم جه قعد معاه
أدهم: مش هتنزل باردوا؟
فهد من غير مايبصله: لا يا أدهم مش نازل انزلوا انتوا
أدهم: بس انت عارف ان ملك عاوزة تنزل معاك
فهد بغضب: قولت مش نازل يعني مش نازل
ادهم بهدوء: ماشي يافهد
البنات لبست مايوهات اسلامية عشان ينزلوا وآيه صممت تلبس المايوه اللي أدهم قال عليه لأ عشان تشوف ردة فعله إيه، الكل نزل ومجهزين نفسهم
أكمل بصوت عالي لأدهم: يلا يا استاذ ياللي قاعد عندك عشان ننزل نتسابق
أدهم بيبصله ووقف مكانه لما شاف آيه وهي واقفة مرعوبة من نظراته لأنه اتعصب وهي جريت على فوق وهو ضحك عليها غصب عنه
ملك بتبص حواليها: امال فين آيه؟
هاجر ضحكت: طفشت على فوق
سارة: يلا نشوفها
البنات طلعت تشوفها
هاجر واقفة شايفاها بتغير هدومها وبتضحك عليها: ماكان من الأول كان لازم يعني يبصلك
آيه بغضب: بت انتي اتنيلي انتي واخوكي
ملك وسارة واقفين بيضحكوا عليها وهي خلصت لبس ونزلوا تاني وكانت لبست بنطلون بأستك من تحت وواسع وعليه بلوزة بكم
جاسر شال ملك ونزل حمام السباحة واكمل هيتجنن منه وسارة طلعت فوق كتف اكمل: يلا بدل ما انت واقف تبص عليهم كدا
اكمل ضحك وحدف نفسه وبأخته، وادهم اخد هاجر ونزلوا سوا وطبعا الاشقية آسر وإسلام كمان نزلوا الكل نزل ماعدا فهد
ملك لجاسر: باردوا فهد مش هينزل؟
جاسر ابتسم: انتي عارفة انه رافض ينزل لا بحر ولا حمام سباحة
ملك بحزن: وهيفضل كدا لحد امتى
جاسر: فهد آخر مرة نزل فيها البحر كان مع بابا الله يرحمه ودي كانت اخر مرة ومن يومها واخد عهد على نفسه انه ماينزلش
ملك: بس انا عاوزاه ينزل معايا
جاسر ضحك: بطلي شقاوة عشان في ناس هنا هتتجنن
ملك بتبصله بعدم فهم: ناس مين؟
جاسر بص على أكمل ورجع بص لملك: يعني انتي مش عارفة مين
ملك هنا فهمت قصد اخوها ايه وبصتله بغضب: طب بطل كلام بقى بدل ما اغرقك
جاسر ضحك بصوته كله: ماتقدريش
ملك بتوطي راس جاسر في الماية على اساس انها كدا بتغرقه والكل بيضحك عليهم
ادهم: انتي بتعملي ايه ياملك؟
ملك وهي لسة حاطة راس اخوها تحت الماية: بغرقه
أدهم ضحك اوي: مين دا اللي بيغرق الاستاذ كاتم نفسه ولا همه حاجة ياختي
سارة ضحكت اوي: اتنيلي فضحتينا
ملك سابت جاسر بغضب وبصت على فهد اللي قاعد يتابع كل حاجة في هدوء: فهد
فهد بهدوء: نعم
ملك: عشان خاطري
فهد قام من ادامهم: لا ياملك
فهد ساب الڤيلا وخرج
أدهم: كملوا انتوا وانا هروح اشوفه
أدهم طلع اخد دش وغير هدومه وخرج ورا فهد اللي طلع قعد عالبحر وقعد جمبه
أدهم: وبعدين معاك
فهد بهدوء: هتقول كلام مالوش لازمة هقوم واسيبك
أدهم: بجد يافهد وبعدين معاك هتفضل كدا لحد امتى
فهد بعصبية: لتاني مرة بقولك لو مابطلت كلامك دا هقوم واسيبك
أدهم قام من جمبه: انا راجع الڤيلا يافهد وانا غلطان اني جيت وراك
فهد: اقعد يا أدهم
أدهم: لا يافهد مش قاعد
فهد وقف بعصبية وزقه قعده: اتنيل اقعد بقى
أدهم: ماشي يافهد
فهد بحزن: ماتزعلش مني
أدهم: فهد انا مش زعلان منك انا زعلان عليك
فهد بحزن واضح: انا نفسي زعلان عليا
أدهم: فهد الكل فاهم انك مش عاوز تنزل الماية عشان اخر مرة نزلتها كان مع عمي الله يرحمه قبل مايموت لكن محدش يعرف الحقيقة
فهد: يعني عاوزني اقول ان الفهد عنده فوبيا
أدهم: وفيها ايه يافهد؟ وبعدين احنا لحد النهاردة مانعرفش مين كان السبب في رفع منسوب ماية حمام السباحة
فهد: وليه متوقع انها اتعملت بفعل فاعل
أدهم: إحساس ياصاحبي
فهد: لا انت نسيت ان في اليوم دا الكل قال ان مكانش حد يعرف ان انا وانت كنا جوا؟
أدهم: جرا ايه يافهد دا انت اذكى واحد فينا ازاي هتصدق كل دا وبعدين احنا لما دخلنا الحمام الخاص بينا كان الحرس عارفين اننا جوا
فهد: بقولك ايه يا أدهم خلاص فكنا من الحوار دا انا كنت بموت فعلا في الوقت دا رغم ان انا بعرف اعوم جدا بس للأسف في اليوم دا انا كنت بين الحيا والموت وانت كنت بتغير هدومك في اوضة اللبس وانا معرفتش اخرج لولا ما انت خرجت في الوقت المناسب كنت انا مت
أدهم: بعد الشر عنك يافهد
فهد إبتسم: ربنا يخليك ليا يارب
أدهم: ويخليك ليا ويلا نرجع بقى
فهد: ماشي
بعد شوية رجعوا، والباقيين غيروا هدومهم وقاعدين عاوزين يتغدوا، ادهم طلع اوضته فوق بس وهو طالع آيه كانت نازلة واتقابلوا عالسلم وهي تيجي يمين هو يجي يمين تيجي شمال هو يجي شمال😂
آيه بكسوف: ممكن تثبت عشان انزل
أدهم ابتسم: لا
آيه بصتله بغضب: وبعدين بقى
أدهم ضحك: في ايه
آيه: عاوزة انزل
أدهم قرب منها واتكلم بصوت واطي: تاني مرة لما اقول كلمة تتسمع
آيه بصوت واطي: ما انا سمعت الكلام
أدهم: امال مين اللي كانت واقفة ادامي دي من شوية ولابسة المايوه اللي قولت عليه مايتلبسش
آيه بكسوف وهي باصة في الارض: ماهو انا طلعت غيرته
أدهم رفع وشها وخطف بوسة من على خدودها: ماتتكررش تاني
أدهم سابها وطلع وهي لسة واقفة مكانها مش مستوعبة اللي حصل ونزلت للبنات
ملك قاعدة جمب فهد: فهد
فهد: ها؟
ملك: ممكن نخرج؟
فهد ابتسم: اكيد بس عاوزين تروحوا فين؟
إسلام اللي رد: الديسكو
فهد بغضب: بتقول ايه ياحيوان انت
إسلام بخوف: هو انا قولت حاجة دا انا بجرب صوتي بس
اكمل ضحك: يلا ياجبان
آيه: عاوزين نخرج نتمشى شوية
فهد: تمام بس نتغدى الأول وبعد كدا نخرج
جاسر: تمام
شوية وأدهم نزل قعد وآيه عنيها ماترفعتش من الأرض
هاجر بتكلمها بصوت واطي: هو فيه حاجة ضايعة منك في الأرض؟
آيه بإستغراب: ليه؟!
هاجر ضحكت: اصلك بتبصي في الأرض
آيه ضربتها في كتفها بغضب: بت اتلمي
هاجر ضحكت بصوت: الله وانا عملت إيه
آيه بعصبية وبصوت عالي ونسيت أصلا ان الكل حواليها: بقولك إيه ماتبقيش انتي واخوكي
إسلام بإستغراب: ماله أخوها؟!
آيه فتحت بوقها من الصدمة انها نسيت نفسها وأدهم مش قادر يبطل ضحك على منظرها وسابهم ودخل جوا وفهد دخل وراه
فهد: هو إيه الحوار؟
أدهم بصله: حوار إيه؟
فهد غمزله😉: آيه
أدهم إبتسم: والله ما انا عارف أنا حاسس إني بقيت المراهق الكبير
فهد: يعني وقعنا؟
أدهم إبتسم: شكلنا كدا ياصاحبي
فهد إبتسم: طب وهي؟
أدهم حكاله كل اللي حصل من اول ماقرأ المفكرة الخاصة بيها لحد وقتهم دا
فهد: يعني حبيتها؟
أدهم: ايوا يافهد، انا ايوا ماكنتش بفكر فيها كحبيبة بس أنا بعد ماقرأت كلامها عني خطفت قلبي بجد
فهد إبتسم: ربنا يسعدك ياحبيبي
أدهم بحب: وعقبالك إنت كمان
فهد بغضب: تصدق بالله انت ماعندك دم
أدهم ضحك: دا كله عشان بقولك عقبالك لما تحب ذيي
فهد بعصبية: ايوا يا أدهم عشان انت عارف اني عمري ماهحب ولا فيه بنت تقدر توقعني
أدهم بتحدي: وانا هتحداك يافهد وهتشوف ودا هيحصل قريب
فهد بتحدي: تمام وانا هكسب التحدي يا أدهم
فهد سابه وطلع فوق
أدهم لسة واقف مكانه وبيكلم نفسه: هتشوف يافهد
نرجع للقاهرة شوية، ليل راحت القصر ذي عادتها كل يوم وقاعدة مع فريدة والبارون
البارون لبنته: كلمتي الولاد؟
فريدة: أيوا يابابا وكلهم كويسين
ليل: هما هيرجعوا امتى البنات وحشوني
فريدة: كمان يومين ان شآء الله هو بس فهد عاوزهم يغيروا جو قبل الامتحانات
البارون بص لليل: تحبي تروحي ليهم؟
ليل: لا انا كدا كويسة أوي مش ناقصة مشاكل معاه كفاية اللي حصل واللي لسة هيحصل
فريدة ضحكت: والله ياليل فهد مافيه اطيب من قلبه
ليل: باردوا ماليش دعوة بيه
ليل افتكرت انها نسيت تليفونها في اوضة البارون فوق فأستأذنت وطلعت تجيبه وهي خارجة حبت تروح ناحية الجناح الغربي وفتحته ودخلته وقاعدة تبص على الألوان الكئيبة اللي مالية الأوضة حتى الفرش كئيب، فريدة حست ان ليل إتأخرت فطلعت وراها واتفاجأت بيها في الجناح
فريدة: بتعملي ايه هنا؟
ليل بأسف: أنا متأسفة أوي
فريدة إبتسمت: مش كنتي لسة بتقولي مالكيش دعوة بفهد؟
ليل بحرج: أيوا ودي الحقيقة بس انا حبيت ادخل هنا معلش انا فضولية اوي
فريدة ضحكت: تعرفي اني مادخلتش الجناح دا من سنين
ليل: ليه كل دا؟
فريدة: دي أوامر الفهد
ليل: بس على حسب علمي ان الجناح مش بتاعه لوحده
فريدة: بالظبط بس الكلمة الأولى والأخيرة للفهد
ليل: للدرجادي مسيطر؟
فريدة: لدرجة كبيرة
ليل: طب ليه الجناح كئيب كدا؟
فريدة: بصي ياليل الفهد قلبه طيب بس حزين أوي
ليل بحرج: هو أنا ممكن أعرف ايه سبب الحزن دا؟
فريدة إبتسمت: هو اللي هيحكي مش أنا
ليل بإستغراب: هو؟!
فريدة: أيوا
ليل: ازاي؟!
فريدة: ازاي دي بقى سبيها للأيام
ليل مش فاهمة كلام فريدة ولا عارفة هي تقصد إيه بس ما إهتمتش ونزلوا سوا لتحت
في المساء، كانوا خرجوا ورجعوا في آخر الليل والشباب بيلعبوا كورة وفهد قاعد يتفرج عليهم، إسلام بيشوط الكورة لأكمل جات في دراع فهد
إسلام بصدمة: حد يخبيني
ادهم بيبص على فهد اللي واقف بيبص لإسلام
جاسر: اجري يا أدهم هديه
أدهم بيقرب على فهد بشويش وفهد بص لإسلام بغضب: ايه اللي انت عملته دا ياحيوان
آسر بصوت واطي: دا على أساس إنك مش عارف ايه اللي عمله😂
فهد بغضب: سامعك ياحيوان
ملك ضحكت غصب عنها: هي إيه كمية الحيوانات دي بس يافهد
أدهم ماسك نفسه من الضحك بالعافية: أبوس إيدك اهدى
فهد بغضب: كفاية لعب بالكورة
إسلام بإستغراب: هو دا بس اللي إنت قولته؟
أدهم ضحك اوي: ماتلم ليلتك ياغبي بدل مايتغابى عليك
فهد لادهم: نعم انت كمان
البنات واقفين بيضحكوا عليهم وبطلوا لعب وقعدوا كلهم سوا سهرانين
جاسر: ماتيجو نلعب الصراحة
سارة: موافقة جداً
جاسر بص لأكمل: ها؟
أكمل: ماشي
إسلام وآسر: موافقين
أدهم لفهد: ها يافهد؟
فهد: العبوا انتوا
ملك بحزن: حتى دي هنلعبها لوحدنا باردوا
فهد إبتسم: معلش ياقلبي
بدأوا يلعبوا وأول دور جه على جاسر واللي هيسأله آسر
آسر بتفكير: إلا قولي ياجاسر هي النخلة فيها جمب بلحة
جاسر بغضب: نعم يا أخويا
أكمل ضحك: اخلص عشان لو ضربك مش هدافع عنك
آسر ضحك: اصيل يا ابو رحاب
جاسر: اخلص وإسأل
آسر: بتحب؟
جاسر: لأ
أدهم لف الازازة وجات عند أكمل ومن سوء حظه ان اللي هيسأله أدهم
أدهم: إلا قولي يا أكمل هو إنت بتحب؟
أكمل مكانش متوقع ان أدهم يسأله السؤال دا وبص على ملك اللي مكانتش مهتمية او بمعنى أصح عاملة نفسها مش مهتمية وبص لأدهم: بلاش السؤال دا يا أدهم
فهد متابع الحوار بهدوء وفجأة أتكلم: بلاش ليه يا أكمل؟
أكمل بتوتر: كدا
فهد كان ساند عالكرس فعدل نفسه ومركز أوي معاه: بس أنا عاوز أعرف إجابة السؤال دا بالذات يا أكمل
أكمل التوتر بان عليه وأدهم بيحاول يفهم فهد عاوز يوصل لإيه
فهد: ها يا أكمل ؟
أكمل بص على ملك ومن جواه خايف من فهد ومش عارف يرد يقول إيه وساكت خالص
أدهم بيحاول يعدي السؤال: خلاص هسألك سؤال تاني
فهد بتصميم: لأ يا أدهم
أكمل بصله: اشمعنا السؤال دا يافهد؟
فهد بصله أوي: عشان عارف إجابته كويس أوي
أكمل توتره بيذيد: تقصد إيه؟
فهد وقف: ما اقصدش حاجة انا خارج اتمشى
فهد سابهم وخرج والكل قاعد مستغرب
أدهم بص للبنات: اطلعوا فوق
البنات طلعوا فوق وسابوهم
أكمل لأدهم: فهد يقصد إيه؟
أدهم: مش عارف بس اعتقد إنه حاسس
جاسر: بالظبط يا أدهم وتوترك يا أكمل دا لوحده فضيحة
أكمل: طب أعمل إيه؟
أدهم: نصيحة مني قوم شوفوا فين واتكلم معاه
أكمل قام: تمام
أكمل سابهم ومشي واللي قاعدين أدهم وجاسر وآسر وإسلام
أدهم لإسلام: أخوك مش ناوي يجي؟
إسلام: رافض وبيقول لا
أدهم: عيل رخم أصلا
إسلام: إنت عارف إنه زعلان من فهد
أدهم بهدوء: هو اللي غلط لما وافق إن ممرضة تدخل البيت
آسر: ماهو كل دا عشان خاطر جدنا
جاسر بعصبية: يولع
أدهم بغضب: كلمة كمان وهقوم اضربك
نيجي لفهد قاعد عند البحر وأكمل جاي من وراه
فهد من غير مايبصله: كنت متأكد انك هتيجي ورايا
أكمل إتنهد: عاوز إيه يافهد؟
فهد وقف ادامه بهدوء: انت اللي جاي ورايا فإنت اللي عاوز مش انا
أكمل: انت عاوز توصل لإيه بإني أجاوب عالسؤال؟
فهد بيبصله أوي: عاوز أعرف الإجابة
أكمل بتوتر: بس إنت قولت إنك عارف الإجابة
فهد بهدوء: وافرض إني عارف الإجابة تفتكر أكون صح؟
أكمل بتردد: معرفش
فهد قعد مكانه تاني وبص للبحر: يبقى إرجع الڤيلا
أكمل وقف ادامه: أيوا يافهد بحب وبحب اختك
فهد بصله: انت شايف نفسك بتقول إيه؟
أكمل بشجاعة: أيوا يافهد
فهد وقف ادامه وأكمل بيرجع لورا
فهد بيبصله من فوق لتحت: خايف ليه؟
أكمل: فهد بلاش غباء
فهد بغضب: غباء ايه؟
أكمل بهدوء: بص أنا جاوبتك عالسؤال بلاش مد إيد عشان أنا مش عاوز أخبي عليك حاجة
فهد قعد مكانه تاني: وهي؟!
أكمل: مالها؟
فهد: بتحبك؟
أكمل خايف يحكي اللي حصل
فهد بعصبية: ماترد
أكمل: أنا هحكيلك بس من غير مد إيد
فهد: اتفضل إحكي
أكمل حكاله كل حاجة من اول ماعرف إن ملك بتحبه وانه قالها إنها بالنسباله طفلة لحد دلوقتي، فهد بيسمع كل حرف بإهتمام وأكمل خايف من ردة فعله
أكمل: ساكت ليه؟
فهد: بسمعك
أكمل: أنا خلصت كلامي
فهد قام وقف: إعتبر إن ماسمعتش حاجة
أكمل: يعني إيه؟!
فهد: يعني إنسى اللي في دماغك
أكمل: إنت تقصد إيه باردوا يافهد؟
فهد: يعني انت شايفها طفلة خليها بقى بالنسبالك طفلة
أكمل: لا يافهد هي مش طفلة وانا بحبها
فهد: واعتقد إنها بعد اللي إنت قولته ليها زمان خلاص كرهتك
أكمل: يبقى تسألها وساعتها هتعرف إنها بتحبني يافهد وساعتها هطلب إيديها منك
فهد بصله أوي: وأنا موافق يا أكمل يلا نرجع وهسألها
فهد أخد أكمل وراجعين الڤيلا واكمل طول ماهما ماشيين بيفكر ملك هتقول إيه، فهد وصل وطلب من ملك تنزل ونزلت واللي كانوا واقفين فهد وأكمل وأدهم
ملك: خير يافهد؟
فهد بهدوء: هسألك سؤال وتردي عليا بصراحة عشان ردك هو اللي هيخليني أخد قراري
ملك بإستغراب: سؤال إيه؟
فهد بص لأكمل وبصلها: إنتي بتحبي أكمل؟
ملك إتفاجأت بسؤال أخوها ومعرفتش ترد
أكمل إتكلم: ردي ياملك
فهد بغضب: ماتتكلمش
ادهم واقف بيسمع بهدوء
ملك بصت لفهد وإتكلمت: لا
فهد: لا إيه؟
ملك من جواها عكس اللي هي بتقوله: مش بحبه
أكمل مكانش متوقع إنها ترد كدا كان عنده أمل إنها تكون لسة بتحبه ذي ماهو حاسس وواقف مصدوم من اللي بيسمعه
فهد بصله: أظن دلوقتي سمعت ردها
أكمل بيبصلها وكأنه بيقولها ليه كدا
فهد وقف ادامه وإتكلم بغضب: ماتبصلهاش
أكمل بصله: حاضر يافهد
أكمل سابهم وطلع على أوضته
ملك طلعت بسرعة على أوضتها وفضلت تعيط أوي والبنات مستغربين
هاجر: في إيه ياملك؟
ملك بإنهيار: مش عاوزة إتكلم
سارة: ردي علينا وقولي حصل إيه
ملك بعصبية ودموع: قولت مش عاوزة أتكلم
آيه: إحنا قلقانين عليكي
ملك بصتلها وإتكلمت: هقولك حاجة يا آيه إتأكدي ان أبيه أدهم بيحبك ولا لا مش شايفك طفلة
سارة: إيه لازمته الكلام دا ياملك؟
ملك بعصبية: لازم تعرف هي إيه بالنسباله والأحسن تفضل بعيدة عنه بدل مايجي اليوم اللي تقف ادامه وتقوله مش بحبك
هاجر بشك: إيه اللي حصل ياملك؟
ملك بصتلهم: والله ماقادرة أتكلم
البنات سابوها على راحتها وهي فضلت تعيط ومنهارة
في الأوضة عند أكمل بيجهز شنطته
جاسر: رايح فين؟
أكمل: هرجع القاهرة
جاسر: ليه؟!
أكمل بعصبية: مافيش ياجاسر أنا عاوز امشي
جاسر بيحاول يفهم في إيه: طب فهمني في إيه
أكمل بصله بحزن: مش قادر أحكي
أكمل جهز شنطته ونزل وأخد تاكسي وراح شركة السياحة اللي فيها الاتوبيسات وركب الاتوبيس اللي هيتحرك بعد ساعة للقاهرة ومحبش يرجع بالعربية
أدهم كان في اوضته وما اخدش باله إن اكمل مشي وراح لأوضته بس جاسر كان لوحده
أدهم: اكمل فين؟
جاسر: نزل مصر
أدهم اتفاجئ بردة فعله دا: مشي من امتى؟
جاسر: من ربع ساعة
أدهم: اخد العربية؟
جاسر: لا قال انه هيروح شركة السياحة القريبة مننا دي عشان ياخد اول سوبر چيت نازل مصر
أدهم: تمام
أدهم نزل اخد عربيته وفي طريقه لأكمل، وأكمل كان قاعد منتظر معاد سفره واتفاجئ بأدهم ادامه
ادهم واقف ادامه: تقدر تفهمني ايه الجنان دا
أكمل بهدوء: هو عشان هنزل مصر ابقى مجنون؟
أدهم قعد جمبه: ايوا يا أكمل لان كدا غلط
أكمل بحزن: غلط؟ هو إيه اللي غلط يا أدهم؟
أدهم: انك تهرب
أكمل: انا مش بهرب انت وفهد اللي دايما شايفني ضعيف
أدهم: لا يا اكمل مش شايفينك ضعيف بالعكس انت قوي بس عيبك إنك مش بتعرف تتصرف صح في الوقت الصح
أكمل وقف واداله ضهره واتكلم: أنا فعلاً إتصرفت غلط لما فكرت إني أحب
أدهم وقف وشده من دراعه بعصبية: وانت شايف حبك لملك غلط؟
أكمل بصله وإتكلم بوجع: أنا حبيتها يا أدهم ممكن اكون حبيتها في وقت غلط بعد ماهي انجرحت مني بس حبيتها أوي والله
أدهم زعلان عشانه: طب ممكن ترجع معايا؟
أكمل: مش هقدر يا أدهم والله وسبني على راحتي
أدهم: وتفتكر فهد هيعدي سفرك دا؟
أكمل إبتسم بحزن: فهد شافني وانا خارج يا أدهم حتى محاولش يوقفني
أكمل اخد شنطته وخلاص هيمشي بس وقف وبص لأدهم: ارجعلهم وانا هرجع مصر
أكمل سابه وركب الاتوبيس اللي كلها دقايق ويتحرك، أدهم فضل واقف منتظر أي ردة فعل من أكمل بس خلاص الاتوبيس بيتحرك من ادامه بس أدهم اتفاجئ باللي مكانش متوقعه خالص
يتبع الفصل التالي اضغط على(روايه أحفاد البارون ) اضغط على أسم الرواية
تعليقات
إرسال تعليق