رواية انتقام بدافع الحب بقلم ايناس طه
رواية انتقام بدافع الحب الفصل الخامس 5
عند رقية كانت قاعدة مع أهلها وفاجأة جاتلها رسالة من نفس الرقم
"لو عايزة تعرفي أنا مين قابليني بكرة هستني ردك علشان ابلغك بالمكان والمعاد وطبعا من غير ما تقولي لحد.. سلام "
رقية :بابا انا داخلة أوضتي أستريح شوية
والدها: ماشي يا بنتي
دخلت الاوضة مش عارفة تعمل إيه أو تتصرف ازاي عايزة تعرف الحقيقة وتوافق تقابله بس في نفس الوقت خايفة
________________________________
عند آسر في الشركة
كان بيلم حاجته وخارج
معتز: إيه يا عم مالك بقالك فترة مش مركز معانا خالص
لسة برضو موضوع أخوك شاغلك
آسر: انا لحد دلوقتي مش مصدق اللي حصل وانه طلقها بسهولة كده ده كان بيحبها
معتز: بصراحة أخوك اتسرع كان لازم يديها فرصة ويدي نفسه كمان انا معاه ان الموضوع مش سهل عليه وصعب يتحمله بس ميجيش عليها وخصوصا ان البنت دي باين عليها محترمة وبنت ناس ملهاش في الجو ده خالص ده انت حتي كنت دنجوان وعارف بنات كتير
آسر: غلبت معاه وحاولت اقنعه أكتر من مرة بس برضو مفيش فايدة
معتز: والله انا مش صعبان عليا غير البنت دي بس اللي عمل كده هيستفاد ايه لما يتطلقوا وليه يدمر حياة واحدة بريئة
تفتكر في حد بيكرهها أوي لدرجة انه يأذيها بالشكل ده
آسر: للاسف مبقيتش فاهم حاجة بس ايا كان هو مين مسيره أعرفه وان شاء الله تظهر برائتها
______________________________
تاني يوم الصبح عند رقية
لسة محتارة مش عارفة تتصرف ازاي لحد ما جاتلها رسالة تاني من نفس الرقم
"ها قررتي ولا لسة"
ردت بسرعة: انت مين وبتعمل معايا كده إيه
مجهول: هتعرفي وهجاوبك علي كل حاجة لما أقابلك
رقية بخوف: تمام وانا موافقة هقابلك امتي وفين
مجهول: تكوني جاهزة علي الساعة 4 واستني مني رسالة ابعتلك فيها العنوان بس نصيحة مني بلاش تتذاكي وتلعبي معايا تيجي لوحدك ومحدش يعرف أي حاجة وإلا بقي متلوميش غير نفسك سلام يا قمر
رقية لنفسها: وبعدين ياربي اعمل إيه مش هعرف أقول لأحمد أو بابا وخايفة أبلغ عنه
طب ليه مقالش علي المكان دلوقتي
معقول يكون بيراقبني
ساعدني يارب انا مليش غيرك
وقررت انها تروح فعلا لوحدها
_____________________________
رقية جهزت و بسمة كانت طلبت من والدها انها تعدي عليها في البيت و تاخدها علشان تغير جو شوية وفعلا خرجوا مع بعض
رقية طول القعدة وهي سرحانة وقلقانة وكل شوية تبص ف الساعة
بسمة: إيه يا بنتي مالك من ساعة ما خرجنا وإنتي ف عالم تاني
رقية بتوتر: هاااا لا أبدا مفيش حاجة
بسمة : مفيش حاجة ازاي هو انا مش عارفاكي
انا عارفة وحاسة بيكي وخصوصا من آخر رسالة اتبعتت من نفس الرقم
عارفة ان كان عندك امل تعرفيه بس متقلقيش هيتعرف وهيتحاسب علي كل اللي عمله اطمني ربنا كبير
وقالت بمرح : قوليلي بقي تحبي نروح فين بعد كده
رقية: عادي اي مكان
بسمة بقلق: رقية بجد في إيه انا قلقانة عليكي
هو الرقم بعتلك رسالة تاني
رقية بكذب: لا مبعتش
بسمة : متأكدة يعني
رقية إحنا اخوات وعمرنا ما خبينا عن بعض اي حاجة قوليلي حصل حاجة
وقطع كلامهم رسالة علي موبايل رقية
" 5 دقايق واتحركي من عندك وبعدها هبعتلك رسالة بالمكان"
رقية بخوف: معلش انا لازم أروح
بسمة: يا بنتي إحنا لحقنا نقعد
رقية: معلش تتعوض مرة تانية
بسمة: خلاص عادي ولا يهمك يلا بينا
رقية بتوتر: لا لا روحي انتي علشان متتأخريش وانا هروح لوحدي
بسمة: مالك يا رقية فيكي إيه شكلك مش مطمني
رقية بعصبية: مفيش حاجة انا هتمشي شوية عايزة اقعد مع نفسي ممكن
بسمة بإستغراب من حالتها: خلاص عادي براحتك
وكانت ماشية بس رقية وقفتها
رقية: بسمة انا آسفة بجد حقك عليا والله مش قصدي بس انا مخنوقة وتعبانة عايزة ابقي لوحدي شوية
وصدقيني هبقي أحكيلك كل حاجة بس مش دلوقتي
بسمة : ولا يهمك يا قلبي وبعدين انا مستحيل ازعل منك ومقدرة اللي انتي فيه بس المهم خلي بالك من نفسك وابقي طمنيني عليكي
رقية بإبتسامة:حاضر وحضنتها ومشيت
وبعد شوية رسالة جات ل رقية بالمكان
ركبت تاكسي وراحت علي العنوان
___________________________
عند يوسف في المستشفي كان قاعد سرحان وبيفكر في رقية
عمرو صاحبه: يوسف
يوسف: في حاجة يا عمرو
عمرو: اه في مش ملاحظ انك من يوم ما رجعت الشغل وانت علي طول سرحان إيه لسة بتفكر فيها مش كده
يوسف: مش قادر انسي اللي حصل كنت فاكر ان هنساها لما اطلقها بس كنت غلطان
انا لسة بحبها ومش قادر انساها ولا انسي اخر يوم شوفتها فيه لما كنت عندها ونظرتها ليا
خايف اكون ظلمتها
عمرو: ارجع واقولك انك اتسرعت وغلطت بس خلاص مش هينفع الكلام دلوقتي كل واحد راح لحاله
_________________________________
عند رقية
كانت وصلت المكان وكان عبارة عن شجر كتير زي جنينة بالظبط وهادية جدا مفيهاش أي حد كانت خايفة بس بتحاول تبان عكس كده
شوية وجاتلها رسالة "ادخلي وخليكي ماشية علي طول وهتلاقيني مستنيكي عند أول شجرة كبيرة هتقابلك "
دخلت رقية وفضلت ماشية زي ما طلب منها كانت قربت توصل للشجرة الكبيرة
وفاجأة لمحت شخص واقف هناك بس بضهره
وأول ما وصلت هناك ..لف وشه ليها
رقية رجعت خطوة لورا وقالت بصدمة:...آسر😲😲
آسر..
يتبع الفصل التالي: اضغط هنا
الفهرس يحتوي على جميع فصول الرواية كاملة: " رواية انتقام بدافع الحب" اضغط على أسم الرواية
تعليقات
إرسال تعليق