Ads by Google X

القائمة الرئيسية

الصفحات

إسكريبت وإتقابلنا بقلم يارا وحيد

 إسكريبت وإتقابلنا بقلم يارا وحيد

إسكريبت وإتقابلنا بقلم يارا وحيد



- تصبح علي خير يـ بابا 
= وانتِ من اهله ياحبيبتي 

دخلت انام بعد يوم مرهق طويل ، يا بخت المخده عايشه طول حياتها علي السرير، انا لو سبت نفسي انام النوم اللي انا عايزاه محدش هيشوفني تاني 

سمعت صوت تخبيط خفيف ، فتحت عيني وانا لسه مفوقتش اوي ، بصيت في الساعه لقيتها لسه 2 الفجر ، قمت فتحت الباب بس ملقتش حد واقف ، بصيت في الصاله لقيت النور مطفي والدنيا هدوء فـ عرفت ان بابا واخواتي ناموا خلاص ، اومال مين اللي كان بيخبط

رجعت تاني علي السرير ولسه هروح في النوم سمعت صوت التخبيط تاني ، طنشت وقولت يمكن بيتهيألي بس لقيت بردو حد بيخبط ، كأنه بيخبط علي الباب او علي حيطه بس مش عارفه الصوت ده جاي منين ؟! 

قمت من علي السرير وبدأت الف حوالين نفسي وببص الصوت ده خارج من فين ، ملقتش حاجه فـ رجعت ع السرير تاني ولسه هحط دماغي ع المخده عرفت الصوت جاي منين ، ده حد بيخبط ع الشباك بس مش ده المريب ، ده حد بيخبط علي الشباك من بره !!! 

قمت جري ع الشباك اللي كان مبين الشارع لأني قافله الازاز بس ، لقيت ضل بني ادم ، بس ازاي!! احنا في الدور السابع !! فتحت الشباك وانا بترعش ، وعرفت ازاي كان بيخبط ، كان طاير !!!!

- عااااااااا
حط ايده علي بوقي = شششش اسكتي متخافيش
- اممممم
= هشيل ايدي بس اوعي تصرخي 
- ممم
= اتفقنا؟! 
هزرت راسي - اممم
شال ايده = اهو 
رجعت لورا وانا مش مصدقه - انت... انت ازاي.... انت طاير!! 
= ينفع اخش الاول بس 
- تخش فين!! 
= اخش الاوضه هخش فين يعني 
قولت بتوتر - طب م انت ممكن تكون حرامي 
= هو انا لو حرامي وبعرف اطير هاجي اسرق اوضتك ، وبعدين اكيد مش هخبط واستأذنك يعني 
- معاك حق ، انت اكيد مش هتبقي بتعرف تطير وهتيجي تسرقني انا يعني 
قعد ع السرير = ممكن كوبايه مايه 
- انت بتشرب زينا؟! 
قال بسخريه = لأ مصاص دماء 
اتخضيت ورجعت لورا - احييه مصاص دماء يارب انا معنديش دم اصلاً مش عايز.... 
قاطعني = يا بنتي انا بهزر ، مصاص دماء ايه!! دول مش موجودين في الحقيقه اصلاً 
- يعني هو فيه حد بيطير 
= ممكن تجيبيلي مايه بس 
جبتهاله - اتفضل، ممكن تقولي بقي ايه حكايتك
= بصي يا ستي ، انا جايلك انتِ مخصوص 
قولت بأندهاش - انا!! 
= ايوه ، جايلك برساله
- انا مش فاهمه حاجه 
وقف ع حافه الشباك = هاتي ايدك 
- ايه!! 
= يلا هوريكي اللي انا جاي عشانه 
- وانا اقف ع طرف الشباك ايه!! هو انا مجنونه!! 
= ثقي فيا 
مديت ايدي بتردد - طب احنا هنعمل ايه؟ 
= غمضي عينك واتخيلي اكتر حاجه بتحبيها 
- وبعدين؟ 
= وبعدين خلي عندك ثقي فيا 
- وبعدين؟؟ 
= فتحي عينك
تكملة الاسكريبت 
فتحت عيني كنت طايره !! رجعه كانت مرفوعه من ع الشباك ومش لامسه اي حاجه! من الخضه صرخت ووقعت ع الارض 

- اااه ضهري 
= انتِ اللي خضيتي نفسك 
- انت عملت كده ازاي؟! 
= عملت ايه؟! 
- انا كنت طايره 
ابتسم = انا معملتش حاجه ، انتِ اللي عملتي ، وبعظين يلا عشان منتأخرش 
- طب انا هطلع كده ازاي انا مش لابسه طرحه او.... يالهوي طرحه!! انا قاعده قدامك كل ده بشعري!! 
= انتِ لسه واخده بالك 
قمت عشان اجيب واحده - وسع كده 
= اساساً محدش شايفك غيري 
وقفت مكاني - ايه؟! 
= بما انك طيرتي فـ تقدري تتحكمي مين يشوفك من البشر 
- طب واقدر ارجع 
= ايوه عادي ، بمزاجك تختفي او لأ
ضحكت - ده علطول 
= لأ طبعاً لحد ما اوصلك رسالتي بس 
كشرت - يووه 
= ويلا بقي 

مسك ايدي ووقفنا علي الطرف شباك ، قدرت اطير تاني ، المنظر كان مخيف وخصوصاً ان شقتنا في السابع فـ كنت خايفه اوي ، بعد حوالي 5 دقايق الموضوع بدأ يبقي سهل وممتع لدرجه اني سبت ايده وبدأت الف حوالين نفسي ، الهوي بيخبط فيا من كل حته وشعري بيطير، كنت حاسه اني طايره ، ثانيه واحده انا طايره فعلاً!! 

- احنا رايحين فين بقي؟ 
= احنا هنفضل ماشيين في اتجاه القمر شويه وبعدين هتلاقي نفسك في حته تانيه 
- ازاي؟! 
= هتشوفي دلوقتي 

سكت وانا مش فاهمه ومش مقتنعه ، ما احنا لو فضلنا ماشيين ناحيه القمر هنخرج للفضاء ، ده بالدماغ كده، لكن فجأه احنا بنقرب ضرب في وشي نور جامد اوي الرؤيه اتشوشت شويه وبعدين رجعت وضحت ، وبعد م كنا بليل والساعه 2 ازاي بقينا الصبح!! ببص تحت لقيت بحر وفيه فالوسط جزيره كبيره ، والشمس منوره الدنيا كلها ، الغريب ان الشمس مكانتش مطلعه حراره، يعني النور كان في كل مكان بس الدنيا مش حر ، انا فين؟! 

- احنا فين؟ 
= مش مهم صدقيني مش مهم 
- اومال ايه المهم؟! 
= المهم اللي هو انا جايبك عشانه 
- اللي هو ايه بقي؟ 
مسك ايدي = تعالي 

نزلنا براحه علي الجزيره لحد ما وقفنا عليها ، مشينا شويه في وسط الشجر اللي موجود ع الجزيره 

- تعالي نقعد هنا 
= يعني انت مشحطتني بقالي قد كده عشان نقعد تحت شجره مكرونه 
ابتسم - ومخدتيش بالك انها شجره مكرونه؟! 
= ايوه ما انا عار... ثانيه واحده!! شجره مكرونه!! ده اللي هو ازاي؟ 
ضحك - مينفعش تستغربي كل شويه، فيه حاجات اغرب من كده ، اقعدي بقي 
قعدت جمبه والبحر كان قصادنا = هي ايه السفن دي 
- دي سفن قراصنه، بس بيصطادوا سمك 
= اممم قولي بقي جايبني هنا ليه؟ 
- بصي يا ملك ان... 
قاطعته = انت عرفت اسمي منين؟ 
- يعني بعد كل الحاجات اللي انتِ شوفتيها مستغربه اني عارف اسمك؟ 
= معاك حق كمل
تكملة الاسكريبت
- انتِ مؤمنه بالمعجزات؟ 
= الصراحه لأ ، يعني انا عندي اعتقاد ان زمن المعجزات خلص بس رجعت في كلامي بعد اللي حصل 
ضحك - طب وبتؤمني بالقدر والصُدف
= ايوه، كل حاجه بتحصل لسبب وعشان سبب ، مفيش حاجه من غير معني 
- هي دي الرساله اللي كنت عايز اوصلهالك
= نعم!! 
- اسمعيني بس ، كل حاجه بتحصل لسبب ، ومفيش حاجه ملهاش معني ، خليكي فاكره الجمله دي كويس 
= اشمعني ؟ 
- اعرفيها وخلاص ، وبما انك مؤمنه بالقدر والصُدف فـ انتِ سهلتي الموضوع عليا 
= اوعدك اني هفضل فاكراها ، بس انت جايبني هنا عشان كده؟! 
- الصراحه ايوه ، ده السبب الرئيسي وهي دي الرساله اللي كنت عايز اوصلهالك، بس دلوقتي هفرجك ع الجزيره كلها قبل م نرجع 
فرحت = بجد هنتفسح؟ 
- اعتبريها فُسحه 

مشينا شويه ع الشط لحد م وقف عند صخره مرفوعه كده وصفر ، صفر مرتين وانا مش فاهمه هو بيعمل ايه، صفر للمره التالته وفجأه لقينا حوريات بحر بأعداد كبيره عماله تطلع وتنزل زي الدولفين بألوان مختلفه، منظر عمري م هنساه ولا هشوف زيه 

- المنظر تحفه ، خيااالي مش ممكن 
= هيبدأوا يعملوا اشكال دلوقتي 
- شكلهم حلو اوي 
= دي حقيقه 
- مش متجوز واحده منهم 
ضحك = لأ 
- ليه؟! 
= عشان انا مش شايف واحده فيهم حلوه 
قولت بزهول - يجدع حرام عليك 
= هما ايوه شكلهم حلو بس شكلهم سوا ، يعني زعانفهم الملونه والاشكال اللي بيعملوها ، لكن مفيش واحده خطفتني فيهم فـ افضل باصص عليها من وسطهم 
- انت غريب 
= يمكن 

لقيت حوريه منهم شعرها اصفر وعينيها بُني ومبتسمه ابتسامه مُبهجه ، قربت مني واديتني طوق معمول من الصدف وحطته ع دماغي زي التاج وبعدين ابتسمت تاني وسابتني ورجعت البحر 

- الله بص شكله حلو اوي
ابتسم = دي حقيقه واضح انهم حبوكي
- انا كمان حبيتهم
= طب يلا الحق اوريكي باقي الاماكن 
- هو لسه فيه تاني 
= اكيد 

كنت ماشيه ماسكه ايده وبتلفت حواليا ابص ع الشجر بأنبهار ، هما ازاي بيزرعوا كل الحاجات دي!! 

- يلا وصلنا 
= انا مش شايف.. ايه ده!! 
- ده نهر 
= ما انا عارفه انه نهر بس ازاي ، نهر لبن!! 
ضحك - ايوه نهر لبن 
= يالله ع الجمال 

مد ايده وشد غصن شجره وبدأ يقطف منه ، كان بيقطف بسكوت!! 

- خدي البسكوت ده غمسيه في اللبن يلا 
جربت = ياربي طعمهم قمر 
- انا عارف انك بتحبي تغمسي بسكوت بالشاي بلبن بس احنا معندناش نهر شاي بلبن للاسف 
= لا يشيخ
ضحك - يلا اوديكي اخر مكان 

مسك ايدي كالعاده بس المره دي لقيته بيطير ، واحنا فوق بدأ يفرجني ع سفن القراصنه ويوريني السمك ، فضلنا نطير شويه لحد م وصلنا لحد مفيهاش حد خالص 

- ايه الصخره دي؟ 
= هتعرفي حالاً

ضغط علي طوبه معينه فـ فيه صخره كبيره اتحركت كأنها كانت باب للكهف ، رغم اني شوفت حاجات كتيره غريبه بس بردو استغربت جداً، مسك ايدي ودخلنا 

- ده يستي مكاني المفضل 
= مش ممكن!! 

ببص حواليا وانا مش مصدقه ، المكان تحفه حقيقي ، الكراسي فيه معموبه من الخشب ومتزخرفه بأحجار كريمه ، فيه جواهر ماليه الحيطه ولوح ازاي كبيره مكان حيطه وبيطل ع الجزيره والبحر 

- المكان تحفه 
= عيب عليكي 
- لأ بجد كلو اوي 
اتنهد = بما ان ده اخر مكان فـ عايز اديكي حاجه 
- ايه هي؟ 

فتح ايدي وحط فيها حجر كريم لونه فيروزي وملفوف حواليه حاجه زي السلك بس ناعمه ايه ، وبعدين مسك صُباعي وحطه فيه ، احلي خاتم شوفته في حياتي

اتنهد - دلوقتي للاسف الشديد لازم اروحك
= مينفعش اقعد شويه تاني 
- للاسف الموضوع خارج ارادتي
قولت بحُزن = طب يلا 

مسك ايدي وخرجنا من الكهف وبدأنا نطير ناحيه نجمه جمب الشمس وحصل نفس اللي حصل المره الاولي ونفس الزغلله ، الغريب اني لما رجعت للعالم بتاعي كانت الشمس لءه مطلعتش، وصلني لحد شباك اوضتي ونزلني

- اديني رجعتك تاني 
رديت بحُزن = هتمشي؟ 
- ايوه 
= هو ازاي الشمس لسه مطلعتش؟ 
- عارفه كل الوقت اللي قضيناه هناك ده؟ 
= ايوه 
- رغم انه عدي حوالي 5 ساعات الا انه في الحقيقه عدي 7 دقايق بس 
= 7 دقايق!! 
- ايوه التوقيت بيختلف بين هنا وهناك 
= فهمت 
- انا كده وصلت رسالتي وعملت اللي عليا ، بفكرك للمره الاخيره ، مفيش حاجه بتحصل من غير سبب كل حاجه ليها معني ، اوعي تنسي 
= مش هنسي متخافش 
مد ايده عشان يسلم عليا - سلام يا ملك 

جيت امد ايدي بس حسيت بدوخه جامده ومسكت دماغي وسمعت صوت بيقول 

- ملك يا ملك فوقي يا بنتي ، كل ده نوم، يا بنتي قومي بقي
تكملة الاسكريبت
فتحت عيني لقيت فرح اختي بتخرج من الاوضه والنهار طلع ، كل ده كان حلم!! معقول؟! هو الصراحه اللي مش معقول انه يكون حقيقه ، بس كنت حاسه انه حقيقي، بصيت ع ايدي ملقتش الخاتم ، مديت ايدي تحسس ع شعري ملقتش طوق الصدف ، ابتسمت ع الحلم الجميل ده 

قمت غسلت وشي وحاولت اشيل الموضوع من دماغي ، عملت كوبايه شاي بلبن وساندوتشات جبنه وطلعت افطر في البلكونه 

- صباح الخير يا ملك 
= صباح النور يا بابا ، غريبه اول مره تتأخري كده في النوم ، ده انتِ اول واحده بتصحي فينا 
- معلش راحت عليا نومه 
= طب كنت عايز اقولك ان فيه عريس جاي النهارده 
- والله يا بابا انا تعبتلك، كل شويه عريس وفي الاخر عمري م بلاقي واحد مناسب 
= معلش تعالي ع نفسك وجربي تقابليه 
- حاضر يا بابا  

قمت صليت المغرب وبدأت البس ، لبست فستان سماوي وعليه خِمار نفس اللون بس منقوش ، سمعت صوت بره فـ عرفت انهم وصلوا ، شويه وفرح دخلت تقولي عشان اطلع ، شلت الكوبايات وطلعت 

خرجت الصاله وانا ببص عليهم اتسمرت مكاني ، ده هو!! ازاي مش ده كان حلم !! ازاي!! 

حطيت الكوبايات علي الترابيزه وانا لسه مش مركزه ولا مستوعبه ، ازاي هو حقيقي! مش كل البنات بتبقي مكسوفه لما تطلع ، وفي الروايات المفروض البطله تطلع وهي باصه في الارض وبعدين تتفاجأ بيه !! انا طالعه ببص عليهم ليه؟! مببصش في الارض ليه؟! مفوقتش من سرحاني غير ع صوت بابا وهو بيقول يسيبونا لوحدنا 

- احم ازيك 
= الحمد لله 
- فيه اي سؤال حابه تسأليه؟ 
= انت ليه اخترتني انا بالذات 
- الصراحه شوفتك مره وانتِ ماشيه واعجبت بيكي وشوفتك بعديها مره كمان ، حسيت ان دي علامه ، انا مؤمن جداً ان كل حاجه ليها سبب وان مفي... 
قاطعته بسرعه = وانا مفيش حاجه ملهاش معني 
بصلي بذهول - انتِ حلمتي بنفس الحلم؟! 
= انت حلمت بإيه؟ 
- انك جيتي خدتيني من ايدي لعالم تاني ، وقولتيلي متنساش الجمله دي 
ابتسمت = انا حلمت العكس ، انك انت اللي جيت خدتني من ايدي لمكان تاني 
ضحك - ممكن اخدك دلوقتي من ايدك بردو 
= نو بعد الكتاب يا بشمهندس ، نحن بنات عائلات محترمات
مد ايده في جيبه -عرفت انك بتحبي الهوهوز وانك تغمسي البسكوت في الشاي بلبن فـ اتفضلي ، انا جبت الكيك والبسكوت وانتِ عليكي الشاي بلبن 
= ماشي يسيدي ، اعمل شاي بلبن 
- احم اتفضلي الخاتم ده هديه بسيطه 
= ده... ده شبه اللي كان في الحلم 
= عارف ، دورت عليه كتير 
- شكراً ، حقيقي شكراً 
ضحك = قولتيلي بقي بتعرفي تطيري ؟! 

لو أنّ الحب كلمات تكتب لانتهت أقلامي، لكنّ الحبّ أرواح توهب، فهل تكفيك روحي؟❤

#واتقابلنا ❤! 
#يارا_وحيد❤!!


reaction:

تعليقات