القائمة الرئيسية

الصفحات

رواية فرعون الجزء الثاني البارت الخامس عشر بقلم الكاتبة ريناد

 رواية فرعون الجزء الثاني البارت الخامس عشر بقلم الكاتبة ريناد 

رواية فرعون الجزء الثاني بقلم الكاتبة ريناد


فرعون 2 
البارت الخامس عشر 15
بقلم /ريناد رينووو❤
غريب بعلو صوته :هى مين دى اللى ماتت انتا اتجننت ؟

طه بصوت باكى :والله ياغريب يبنى انا جاى طول الطريق ومش عاتل غير همك ،هتعمل ايه لما تسمع خبر موتها ...ربنا يصبر قلبك ياحبيبي انا عارف ان روحك فيها وهى كمان كانت روحها فيك الله يرحمها ..

غريب :بابا الحق دا بيقول على داده سميره الله يرحمها ! دا فاكرها ماتت اكيد غلطان ...انتا غلطان ياعم طه مش كده ؟ 

ماهر قام وراح لغريب وحضنه بضعف فمحاوله منه انه يهديه وهو فالحقيقه اللى كان عايز حد يهديه اكتر منه ...

ماهر :وحد الله ياغريب يبنى دا طريق وكلنا لازم نمشيه وكل واحد وله يوم محدد يخلص فيه اجله ..

غريب :بس ماتت بعيد عنى يابابا كان نفسى اشوفها واكلمها لاخر مره، دى وحشانى اوى هى ليه سافرت فالوقت دا بالزات، دى بقالها سنين كتير اوى مش بتسافر لاختها ولا بتزورها .

ماهر :وما تدرى كل نفس بأى ارض تموت ...وحد الله ياحبيبي وادعيلها بالرحمه والمغفره ...
غريب :وهى عملت ايه وحش عشان يتغفرلها يابابا دى عمرها مزعلت حد بكلمه حتى، دى اطيب حد فالدنيا ..

وبعدها شهق ودخل فنوبة بكا خلت اصوات الكل تعالت بالبكا من حواليه .

جميله :الله يرحمك ياداده سميره زى مايكون كان قلبها حاسس مشيت توصى فيا على غريب وماهر لحد ماتعبت ، كأنها عارفه انها رايحه تموت وخايفه تسيبهم ياقلبي ..

غريب :ماتت ازاى ياعم طه ؟ تعبت ..اتألمت ..ايه حصلها قبل ماتموت ؟ 

طه :ولا حاجه من دا ياحبيبي ...
اختها بتقول اتعشت معاها ودخلت صلت العشا ونامت بتصحيها اختها الصبح لقتها ميته ..

غريب :ياه ياداده حتى موتك حلو وهادى زيك ومحدش حس بيه ...انا عايز اروحلها يابابا ...ودينى ازورها وحياتك ياعم طه ..عايز اطلب منها السماح لو كنت زعلتها فيوم من الايام بدون قصد ..

جميله :زعلتها ايه بس ياغريب هو انتا ياحبيبي بتزعل حد منك ابدا ..اهدى يبنى وبأذن الله كلنا هنروح نزورها ،ونقرالها الفاتحه دى اقل حاجه نقدمهالها بعد العمر اللى قضته وسطنا ، بس هدى نفسك شويه الزعل مش حلو عليك ياحبيبي...

ليل بتنقل عنيها على الكل ومستغربه على كمية الحب اللى الكل شايلها فقلبه للست اللى اسمها سميره دى اللى يادوب شافتها مره ولا اتنين طول قعادها فالفيلا، 
ومستغربه اكتر من ماهر وجميله ومواساتهم لغريب وهما محتاجين لمواساه اكتر منه وكل واحد فيهم دموعه بتسابق التانى وكل همهم يهدو غريب ..

اما غريب فحالته بعد سماعه للخبر قطعت قلبها ...يمكن اكتر وحده حاسه بيه وباللى فقلبه تكون هى لانها مجربه فقدان عزيز القلب بيعمل ايه ..

ليل فاللحظه دى كان نفسها اوى تاخد غريب فحضنها وتطبطب عليه وتهدى ارتعاشة انفاسه وصوت بكاه المكتوم وتسيطر على انتفاضة جسمه بين دراعاتها لكنها رجعت افتكرت ان دا حلم مستحيل التحقيق وان غريب وحضنها ابعد من السما عن الارض .

********
سميه :نادر ممكن تفضل معايا شويه ؟
نادر اتنهد :عايزه ايه ؟
سميه :واحشنى ونفسى اشبع منك بقالك سنين بعيد عنى نفسى احضنك ، نفسى الاقى نادر ابنى الصغير الجميل اللى ضيعته منى وسابنى وراح يدور على الحب والحنان فحضن غيرى .

نادر :ندمانه ؟
سميه :فوق ماتتصور .
نادر :وشايفه ان الندم لوحده كفايه ؟ شايفه ان مجرد احساس بتحسى بيه بعد فوات الاوان هيصلح اخطائك ويمحى جرايم عشتى سنين بتجرميها فحق اللى حواليكى !

سميه :اتغيرت وفوقت والندم بياكل فقلبي اكل على كل حاجه ونفسى تسامحنى وتدينى فرصه تانيه اكونلك فيها الام اللى بتتمناها ..

نادر :للاسف فى حالات معينه بنشوف ان الانسان اللى قدامنا ضيع كل فرصهُ ورصيده فالسماح عندنا ، وحضرتك وحده من الحالات دى ، وشد ايده منها ومشى لكن لفلها تانى عند الباب :
واه على فكره ..انا مش غريب ياسميه هانم .. انا ابنك ، تربيتك ، وللاسف واخد من قلبك الاسود كتير اوووى ، يعنى لا بسامح ، ولا بغفر ، ولا بتخطى ، وراثه بقا مليش يد فيها ..
وخرج وقفل الباب وراه 
  
نازل على السلم وسمع دوشه وشاف غريب اخوه فحاله صعبه والكل بيهدى فيه كمل نزول بسرعه وهو مخضوض وقف وسطهم واتكلم وهو بياخد غريب فحضنه من حضن باباه :
فيه ايه مالكم غريب ماله حد فيكم يفهمنى ..

غريب :انا تيتمت يانادر ..امى اللى ربتنى وكبرتنى وتعبت معايا كتير اوى ماتت ، امى اللى كانت بتفضل طول الليل سهرانه وقاعده جمب سريرى وانا بزاكر سنين طويله مقدرتش اكون جمبها ليله وحده اودعها فيها قبل ماتسيبنى للأبد ...
داده سميره ماتت يانادر وسابتى ..

نادر غمض عنيه بحزن وشدد على غريب فحضنه وفضل يواسى فيه ويهديه لكن حزن غريب كان اكبر من اى مواساه ..

غريب :خدنى لاوضتى القديمه يانادر ..خدنى للمكان اللى قضينا فيه كل وقتنا انا وهى بس ...طلعنى يانادر مش قادر ...

اخده نادر وطلعه اوضته وقعده على السرير وقعد جمبه .
غريب :سيبنى لوحدى يانادر لو سمحت .
نادر :لأ مش هسيبك لوحدك ياغريب تفضل تاكل فنفسك من الحزن والقهر .

غريب بحده :ارجوك يانادر اخرج واحترم حالتى وقدر انى عايز افضل مع نفسى شويه .
نادر :حاضر ياغريب ، هخرج واسيبك حاضر ...بس هرجعلك تانى شويه كده .
غريب هز دماغه لنادر اللى خرج وسابه لوحده دفن دماغه فالمخده وهو بيشهق بأسم داده سميره.

خيم الحزن على كل سكان الفيلا وليل طلعت لاوضة جواهر اللى بقت اوضتها دلوقتى وعينها على باب اوضة غريب لغاية مادخلت اوضتها وقفلت الباب عليها ...

حاولت تنام لكن الم قلبها على المنظر اللى شافت فيه غريب منعها من ده ..

قامت ولفت فالاوضه شويه وبعدها فتحت الباب وخرجت بعد ماتأكدت ان مفيش حد صاحى للساعه دى ..

رجليها غصب عنها اخدتها على باب اوضته ...وقفت شويه ولفت عشان ترجع لكنها سمعت اااه منه خرجت متحمله باطنان من الالم ...

وقفت متردده شويه وبعدها من غير ماتحس لقت ايدها بتخبط على الباب خبطه والتانيه والتالته بعدها جالها صوته الياءس :قلتلك سيبنى لوحدى يانادر لو سمحت .

ليل بتردد :انى ليل ياسى غريب ..ممكن ادخل اتحدت معاك شويه ..
غريب مش هيبقى بيبالغ لو قال ان ليل هى الشخص الوحيد اللى كان محتاجله فالوقت دا وربنا فعلا بعتهاله ...رد من غير تردد ادخلى ياليل .

ليل فتحت الباب بشويش ودخلت بخطوات بطيئه لغاية ماوصلت عند سرير غريب اللى كان قاعد على الحرف ودافن وشه بين ايديه وسكتت شويه قبل ماتنطق :

مش هقولك متزعلش ومتبكيش عليها وانى شايفه هى كانت غاليه عنديك كيف ...له ياسى غريب هقولك ابكى ونزل دموعك ونضف قلبك عشان الدموع عتاخد من وجع القلب وهى نازله ...
ابكى على الغاليين عليك لغاية مافيوم هتلاقى دموعك نشفو لحالهم ومهما حاولت تنزل دمعه مهتلقاش ...هتلقى الدموع خلصت ..

غريب :ووقتها مش هيبقى فيه حزن تانى فالقلب ياليل ؟

ليل :الحزن على خسارتهم هيخف بس مكانهم هيقعد فاضى ومفيش اى حد تانى هيقدر يملاه ..هتحس انك فاضى من جواك ..مخوخ وروحك خاويه ومعدتش اى حاجه فالدنيا تسوى حداك حتى جناح باعوضه .

غريب :كلامك بيخوف ياليل مش بيصبر ويطيب !
ليل :انى مش عخوفك انى عقولك عاللى هتحس بيه بعد اكده وعقولك ان فيه احساس تانى مع الوكت هتحس بيه اعمق واقوى ولازمن تفضل قوى عشان تقدر تعيشه وتتحمله .
غريب : كلامك كلام وحده عاشت حزن متستحملهوش جبال ياليل !

ليل :حداك وكت تسمع ليل شافت ايه فحياتها وانتا بنفسك اللى تحكم حزنك هيبقى كد ايه قصاد حزن ليل وهمها ...

غريب :انا معنديش اكتر من الوقت ياليل احكى وانا سامعك ..

قعدت ليل على الارض وسندت ضهرها على الكوميدينو وابتدت تحكى لغريب كل تفاصيل حياتها اللى عاشتها بمرها اللى كان اكتر من الحلو اللى فيها بأضعاف ...

كانت تبتسم لكل زكره حلوه ..وتكشر او حتى تبكى مع كل زكرى مؤلمه ..وانهارت انهيار تام لما وصلت لموت سند ابنها وهى بتحكى ...كانت مندمجه لدرجة انها مكانتش ملاحظه دموع غريب اللى كانت بتنزل معاها وعليها زى الشلال وبيمسح فيها بكف ايده كل شويه وترجع تنزل من تانى .

*********
اما عند قاسم 
نعيما ياعمرى ..انا داخل آخد شاور وراجعلك بسرعه هاه ...

جواهر هزت دماغها وقاسم جرى على الحمام واخد شاور فالسريع وخرج ..
قاسم بيبص لقى جواهر نايمه على السرير ومغمضه عنيها قرب منها وباسها بوسات خفيفه وفضل يتكلم ويهمس جمب ودنها بكل كلام الحب والغزل لكن ملقيش منها اى استجابه 

وعشان هو مش غبي كان متأكد انها صاحيه من حركة عنيها لكن بتمثل النوم ، قاسم اتعدل وقعد على السرير شويه قبل مايقوم يلبس وينزل ويسيب الفندق كله وهو حاسس انه مخنوق برغم كل نسايم الهوا اللى حواليه ...

 راح قعد على البحر لوحده وفضل هناك وقت طويل ميعرفش اد ايه لغاية مابص فالساعه لقاها الساعه ٢ونص بالليل طلع تليفونه واتصل على اكتر حد محتاجله فالوقت دا .

***********
غريب قام وراح وقف على الشباك وادى ضهره لليل اللى لسه مستمره بتحكى وساب دموعه تنزل بحريه على وشه بعد ماتعب من كتر مسحهم ورفع ايده فضل يدلك قلبه اللى حس فيه بنغزه قويه .

ليل بعد ماخلصت حكايتها :هاه ياسى غريب قولى حزنك واللى عشته ياجى ايه فحزنى واللى عشته .
غريب بصوت مخنوق :نقطه فبحر ياليل ..
ليل :انى حكيتلك حكايتى مش عشان ازيد عليك ولا اغُمك ...انى حكيتلك عشان اللى يشوف بلاوى الناس عتهون عليه بلوته وانى حبيت اهون عليك بلوتك ياسى غريب .

غريب :بالعكس ياليل انتى وجعتى قلبي اضعاف ...انتى ازاى بالقوة دى ؟ انتى ازاى قدرتى تكملى وسط مجتمع ظالم بالشكل دا، وازاى صبرتى ..والاهم من دا كله قلبك ازاى قدر يستحمل كل الحزن دا اذا كان انا قلبي تعب من مجرد السمع فمابالك بالقلب اللى عاش وشاف كل المعاناه دى ؟!

ليل :بعد موت سندى حسيت انى خلاص مش هقدر اكمل فالدنيا دى يوم واحد بعد منه ، لكنى دوست على نفسى وقويتها واتحملت عشان امى وابوى ملهمش حد غيرى ياخد باله منهم ويراعيهم بعد منى ...دفنت حزنى فقلبى وسكت بس كنت كل ليله وانا لحالى انبش حزنى تانى وافضل آكل فنفسى وكل والحنين كان بينخر فقلبى نخر عامل كيف السوس مابينخر العضم ..

غريب :كفايه ياليل عشان خاطرى انا قلبت عليكى كل مواجعك، انا اسف ياريتك ماحكيتى ولا اتكلمتى ولا افتكرتى ..
ليل :وهو انى كنت نسيت عشان افتكر ياسى غريب ! 

غريب :معلش ياليل ربنا بيهون وبيعوض كل شخص العوض المناسب ليه على اد بلوته .

ليل :الحمد لله على كل حال ..اقوم انى ارجع اوضتى الفجر تلاقيه قرب يأذن ...ليل حاولت تقوم لكنها حست بتنميل فرجليها من كتر القعده واتالمت وهى بتحاول تقف 
ليل :آى 
غريب بلهفه :مالك ياليل ؟ 
ليل :سلامتك ياسى غريب بس رجلى من كتر القعده نملت مش قادره اقوم ..

غريب راح ناحيتها ووقف قدامها ومدلها ايده ...هاتى ايدك اساعدك اقعدى على السرير شويه لغاية مارجلك تفك وتقدرى تدوسى عليها ..

ليل مدت ايدها اللى تاهت جوا ايد غريب وشدها قومها ،حاولت انها تخطى اول خطوه لكنها مستحملتش وكانت هتقع لكن غريب لحقها ومسكها باديه الاتنين وسندها .

ليل بأحراج :انى اسفه ياسى غريب حملت علي رجلى مره وحده مشالتنيش .
غريب وهو بيبلع ريقه وياخد نفسه بتوتر بعد مااديه غاصت فى شلال من الحرير محاوط ليل ..

ليل حست بأيد غريب بتمسك خصله من شعرها وبيكتشف طولها بكل استغراب سحبت شعرها من بين ايديه بسرعه واتحملت على نفسها ووصلت للسرير وقعدت عليه بتوتر .

غريب :شعرك جميل اوى ياليل .
ليل :..........
غريب :مالك ياليل ساكته ليه انتى زعلتى منى؟
ليل :له مزعلتش ولا حاجه بس يعنى انى متعوده لما عاجى انام عفرد شعرى ولما طلعت قولت ان الكل نايم فالوكت ديه ويعنى ..

غريب :وانا اعمى ومش هشوف حاجه فجيتى بشعرك ..

ليل :مقصدش حاجه والله ياسى غريب انى ...قاطعها غريب :عادى ياليل متاخديش فبالك ..ريحى رجلك وروحى على اوضتك ناميلك شويه الفجر خلاص ساعه ولا ساعتين وهيأذن .

ليل :حاضر بس انتا كمان ناملك هبابه ومتخافش بكره جاى وفيه حزن برضو وبكا وكل حاجه توجع القلب ..

غريب بضحكه :يعنى قصدك الحزن قاعد متقلقش ...انا متشكر اوى ياليل بجد انتى هونتى عليا وفعلا وجودك جمبى الليلادى فرق معايا كتير اوى .

ليل :ولا يهمك ياسى غريب دانى اللى متشكره منك عشان سمعتنى وسمعت حكايتى من غير كلل ولا ملل .
فالاثناء دى تليفون غريب رن والبرنامج نطق الاسم ..كاسم كولينج ..
غريب باستغراب :قاسم ؟ وفالوقت دا ! اكيد فيه حاجه حصلت معاهم .

ليل بلهفه :طب رد عليه بسرعه ..
غريب بقلق :ايوه ياقاسم فيه ايه ..

قاسم بتنهيده :اهدى ياغريب مفيش حاجه انا بكلمك اطمن عليك عادى .

غريب :تطمن عليا الساعه داخله على ٣ الصبح ؟ 
قاسم باستغراب :سيبك من الساعه وقولى بس صوتك ماله مش طبيعى !

غريب :داده سميره ماتت ياقاسم .
قاسم :لا حول ولا قوة الا بالله انا لله وانا اليه راجعون ..دا امته الكلام ده ؟ 

غريب :عم طه راح يجيبها من البلد النهارده لقاها ماتت فبلدهم من يومين ...

قاسم :ربنا يرحمها ويصبرك ياحبيبي ..
غريب :هاه مش هتقولى بتتصل دلوقتى ليه ؟ 
قاسم شاف ان غريب مش فحاله تسمحله يزيد عليه ويشيله هم على همه :
قلبى حس بيك ياجدع وحسيت ان فيه حاجه حصلت معاك ..مش بيقولك اللى بيحب حد اوى بيحس بيه ..

غريب :ربنا يخليك ليا ياقاسم ويديم المحبه اللى بينا ...طمنى على جواهر .

قاسم :جواهر كويسه ...كويسه اوى ..سلام هسيبك دلوقتى حاسك مش قادر تتكلم ، وبالراحه على نفسك ياغريب ...
غريب :حاضر ياقاسم ...مع السلامه .

*************
ناديه قامت عطشانه وراحت على المطبخ شربت ميه وفكرت انها تطلع تطمن على غريب وتشوفه صاحى ولا نايم ....

وصلت اول السلم وكانت اوضة غريب فاخر الطرقه فوش السلم وشافت باب الاوضه بيتفتح و ليل بتخرج من اوضة غريب بتتسحب وتمشى وحده وحده بسبب تنميل رجلها اللى لسه مارحش كله وشعرها مفرود واول ماشافت ناديه ارتبكت لانها متوقعتش ان فيه حد صاحى فالوقت دا ونطقت بأستغراب :ناديه ؟  

ناديه بصتلها من تحت لفوق واتقدمت للاوضه و بصت لغريب اللى كان قاعد على السرير وسمع ليل بتنطق اسمها ونزلت من غير ولا كلمه وغريب بينده عليها مش بترد ..

ليل بقلق :يامصيبتى السوده هى فهمت ايه ؟ 

غريب :يعنى هتكون فهمت ايه وحده طالعه من اوضة واحد فوش الفجر وشعرها مفكوك وخارجه بتطوح مش قادره تمشى خليكى مكانها هتفهم ايه ..

ليل :ياسنه سوخه دى ناديه قارشه ملحتى من غير حاجه اش حال دلوكيت ...والله هاين عليا اطلع ارمى نفسى من فوق السطح .

غريب :اهدى بس انا بهزر ناديه صغيره ومستوى تفكيرها ميوصلش لكده انا متأكد ...انا هنزل اشوفها كانت جايه عايزه ايه واقولها انى احتجت مساعدتك فأى حاجه او انك جبتيلى قرص للصداع مثلا ..

ليل :يبقا كتر الف خيرك ياسى غريب انى كله ولا حد يفكر فيا حاجه بطاله الموت حداى اهون من اكده ..

غريب :ممكن لو سمحتى متجيبيش سيرة الموت مره تانيه ...ويلا على اوضتك انتى وانا هتصرف قولتلك ...
وبعدين طول مانتى مش عامله حاجه غلط مش عاوزك تخافى من اى مخلوق سامعه ياليل ..

ليل:حاضر ...تصبح على كل خير 
غريب :وانتى من اهل الخير .

غريب نزل ورايح على اوضة عمته وناديه لكنه وقف بعد ماسمع صوت ناديه بتكلمه وهى قاعده فالصاله : انا هنا ياغريب.

غريب لف ناحية الصوت وراح عليها 
 :ايه ياناديه بنده عليكى مبترديش عليا ليه ؟ 

ناديه :عادى شفت انى طلعت فوقت مش مناسب لحقت نفسى ونزلت .

غريب :ناديه! ..ايه الكلام دا وايه الاسلوب اللى بتتكلمى بيه دا ؟!

ناديه :عايزنى اتكلم بانهى اسلوب ياابيه بعد اللى شوفته ؟

غريب :تقصدى ايه ياناديه ...انتى مش واثقه فاخوكى ؟ انتى للدرجادى شايفانى معنديش اخلاق ؟ هى حصلت لكده ياناديه !

ناديه :بص ياغريبوو انتا اكتر حد فالدنيا عارفه انه لايمكن يغلط ولايمكن يعمل اى حاجه وحشه وواثقه انك ولا حتى هتفكر فيوم من الايام ...
لكن اللى مش واثقه فيها هى اللى بتستغل ظروفك وبتحاول تقرب منك بكل الطرق لانها متأكده ان اى راجل بيشوف مش هيتكلم معاها مجرد كلام حتى فملقتش غيرك انتا ..

غريب :قصدك ان ليل بتستغل عمايا صح ...قصدك انى عشان بقيت اعمى فانا بقيت سهل اوى ينضحك عليا مش كده ..مش دا قصدك؟ 

ناديه :انا مش قصدى كده انا ...
غريب :انا فهمت قصدك كويس اوى ياناديه ...وصدقينى انا دلوقتى مش عايز اقول شايف عشان انا مش بشوف ..لكن حاسس بنسخه تانيه من سميه قدامى وهى اللى بتتكلم ...

نفس الافكار ونفس الاسلوب ..بس نسخه من سميه القديمه لان سميه ابتدت تتغير للاحسن فالوقت اللى بنتها بتتحول لنسختها القديمه ...

ناديه جرحها جدا الكلام والتشبيه وحست ان غريب طعنها طعنه قويه فقلبها بتشبيهه ليها باكتر حد كارهه شخصيته وتصرفاته .

ناديه ردت بقسوه :تنكر انك ابتديت تحبها ؟ 
غريب :انتى بتقولى ايه !
ناديه :مش انا اللى بقول ..كلامك معاها ..لمعة عنيك وهى بتكلمك ...فرحتك بقربها ..الحجج اللى بتطلعها من تحت الارض عشان طول الوقت تكون جمبك ..كل دا واضح وضوح الشمس ..

غريب :ودا مزعلك اوى كده ليه ؟ كون انى احب او محبش دا يفرق معاكى فأيه ؟ 

ناديه :اولا كون انك تحب دى حاجه تفرحنى وتفرحنى جدا كمان ...حب ياغريبو بس مش ليل ..
انتا تستاهل احسن من ليل بكتير اوى ..ليل مش هى الانسانه اللى تستاهل اسمها يكون مع اسمك .

غريب قام وقف ومشى ووقف مره وحده قبل مايطلع السلم لف لناديه لناديه وقلها :
ياخساره ياناديه ...انى عمرى متوقعت ان تفكيرك ممكن يكون كده فيوم من الايام ،فعلا خساره ..
وطلع السلم وراح على اوضته دخل وقفل الباب وراه واتمدد على السرير ..

ناديه دموعها نزلت وهى بتراقب غريب بيبعد بعد ماسمعها كلام اول مره فحياتها يقولهولها ، لكن مسحتهم بسرعه وقررت انها من النهارده ياهى ياليل اللى بسببها غريب اول مره فحياته يزعل منها بالشكل دا او حتى يعاملها بالاسلوب الجاف دا ...

*************
تانى يوم الصبح 
فالبلد .
زوزو بهمس 
حسنيه ياحسنيه ..

حسنيه بصت لزوزو وتخطتها وعدت من جمبها من غير ماترد عليها ولا حتى تعبرها وخبطت على باب اوضتها هى ومحروس ودخلت وقفلت الباب فوش زوزو ..

زوزو :اه يامحروس الكلب عملتلها غسيل مخ بسرعه لحقت نفسك ياواطى ..

لكن زوزو فضلت مستمره فمحاولتها انها تستفرد بحسنيه لغاية مانجحت وجرتها بره قدام البيت غصب عنها ..

حسنه :اوعى سيبينى عاوزه ايه منى ياغراب البين ياخرابة البيوت .

زوزو :معلش ربنا يسامحك بس انا هقولك حاجه وبعدها اعملى اللى عايزه تعمليه ..

حسنيه :قولى اللى حداكى وخلصينى مش فاضيالك ..

زوزو :محروس جوزك ..
حسنيه :اشمعنه .
زوزو :مش هاقولك هو بيعمل ايه عشان مش هتصدقينى ...بس عايزه منك حاجه وحده بس ..راقبيه ..اتسحبى بعد ماتخرجى وارجعى بصى من خرم باب الاوضه وشوفى هو بيعمل ايه وهو لوحده هو وبنته جواهر ..

حسنيه :هيكون عيعمل ايه يعنى ؟ 
زوزو :هتشوفى بنفسك ..طب بزمتك مسالتيش نفسك بيخليكى تخبطى قبل ماتدخلى عليه كل مره ليه ، 
طب بلاش دى مسألتيش نفسك البنت دايما ساكته معاه ومش بتبكى غير معاكى ليه ؟ 

طيب غير كده مسألتيش نفسك هو بيصر دايما ان البنت تفضل معاه طول الوقت ليه ؟ 

كل دى حجات هتعرفى اجابتها لما تراقبيه ياحسنيه ...وبجد انتى صعبانه عليا من دلوقتى على اللى هتشوفيه وربنا يكون فعونك ..

حسنيه :خلصتى حديت ؟ 
زوزو :ايوه خلصت وقولت اللى يخلص ضميرى عند ربنا .

حسنيه :طاب اتزاحى من قدامى هطلع ارضع البت الا تلقاها جاعت ..

زوزو :ادخلى من غير ماتخبطى ومتعمليش صوت برجلك وانتى طالعه على السلم وبتقربي من الاوضه ..

حسنيه :طيب حاضر ..يلا اوعى وزقتها ومشيت ...

حسنيه طلعت السلم لكنها جت على آخر درجتين تلاته وخفت صوت مشيتها وكمان راحت اتسحبت لحد الاوضه ووطت على الباب وبصت من الخرم بتاع المفتاح وشافت محروس وهو شايل البنت على ايديه وبيغنيلها وبيهز فيها بحنان ويغني ماما زمانها جايه والبنت رايحه فالنوم على ايده .

حسنيه ابتسمت وندمت عشان مسمعتش كلام محروس فأن زوزو عايزه تخرب بيتها وسمعت كلامها على جوزها وعملت زى ماقالتلها ...لكن الاتنين مكانوش يعرفو هما بيتعاملو مع مين ...

**********
جميله صحيت الصبح وخبطت على اوضة ماهر ودخلت بعد ماجالها صوته :ادخل .
جميله :صباح الخير ياماهر ...عامل ايه انا طول الليل قلقانه عليك وعلى غريب اوى .

ماهر :صباح النور ياجميله ، بصراحه حتى انا كمان طول الليل قلقان على غريب لكن اطمنت لما سمعت صوته قبل الفجر بيتكلم هو وناديه .
اكيد مسابتهوش واصرت لغاية ماجبرته يتكلم معاها غصب عنه ، اصلك متعرفيش غريب ايه بالنسبه لناديه ، غريب دا عندها ملكيه خاصه وفحته كده مقدسه عندها مفهاش الا غريب وبس .

جميله :بصراحه غريب بيحط نفسه فالمكانه دى عند اى حد من اللى حواليه ..حبه بيفرض نفسه على كل القلوب اللى بتعرفه .

ماهر :ربنا يحبب فيه الخلق ويحفظه ويبعد عنه كل شر ويخفف عنه ، انا مش عارف الولد دا هيفضل يستحمل فصدمات كده لغاية امته !

جميله :ربنا كبير ياحبيبى وبأذن الله هيجبر بخاطره قريب بحاجه جميله تعوضه عن كل اللى شافه فحياته .

ماهر :ونعم بالله ...هو لسه صاحى ؟ 
جميله :الظاهر لأ عشان مبعتش على القهوه بتاعته هو وسميه .

ماهر :طيب اطلعى اطمنى عليه وطمنينى ياجميله عشان مش هقدر اطلع السلم .
جميله :حاضر ..انا اصلا كنت طالعاله لوحدى من قبل ماتقول ..وسابته وخرجت طلعت لغريب ..

جميله خبطت خبطتين خفاف ولما ملقتش رد فتحت الباب بشويش ودخلت شافت غريب نايم غطته وخرجت بعد ماخمنت انه اكيد منمش غير دلوقتى .

راحت لاوضة ليل وخبطت ليل ردت عليها فتحت الباب ودخلت شافتها قاعده بأسدال الصلاه على المصلايه وبتسبح .

جميله :صباح الخير ..ايه صحيتى متأخر النهارده وبتصلى الصبح قضى ولا ايه ؟ 
ليل :له ابدا صليت الفجر حاضر وفضلت قاعده اسبح ومحستش بالوكت لغاية دلوك .

جميله :تقبل الله ياحبيبتى 
ليل :منا ومنكم صالح الاعمال يارب .
هغير وانزل حالا اشوف اللى وراى ياخاله واحضر الفطور .

جميله :ارتاحى ياليل مفيش حاجه وراكى والفطار انا حضرته هتنزلى تفطرى معانا تعالى مش عايزه تنزلى دلوقتى براحتك ياحبيبتى انا لقيت نفسى جمب اوضتك قولت اصبح عليكى .
ليل :له هاجى افطور معاكم ..وبالمره اطمن على ماهر بيه وسى غريب .

***********
جواهر بتفتح عنيها الصبح بكسل وبصت شافت قاسم باصصلها وانفاسه عاليه وباين عليه انه فقمة غضبه ..

قاسم فضل مثبت عنيه عليها ولسه كلامها اللى سمعه امبارح منها وهى نايمه بيرن فودانه بنبره صعيديه اول مره يسمعها تتكلم بيها ..

بعد عنى ...اكفايه حرام عليك ...انى تعبت ..فينك يابوى تعالا حوش عنى محروس معدتش متحمله ..

جواهر :صباح الخير ياقاسم .
قاسم :مين محروس ياجواهر ؟ 

فلحظه قشعريره سرت فجسم جواهر وحست ان الهوا اختفى من رئتينها وبتحاول تاخد نفسها او تبلع ريقها مش قادره ...

وللحكايه بقيه ......

بقلم /ريناد رينووو 
لمتابعة البارت السادس عشر إضغط هنا


reaction:

تعليقات