القائمة الرئيسية

الصفحات

رواية فرعون الجزء الثاني بقلم الكاتبه ريناد البارت السادس و الثلاثون

 رواية فرعون الجزء الثاني البارت السادس و الثلاثون بقلم الكاتبة ريناد




رواية فرعون الجزء الثاني بقلم الكاتبه ريناد



فرعون 2 

البارت السادس والثلاثون 36. 

على الغدا تانى يوم من الحفله فالفيلا عند ماهر وبعد السهره وحفلت الخطوبه بتاعت ماهر وموده واللى ابتدت بعد الحفله الكبيره ماخلصت واضطر غريب وليل بسببهايباتو فالفيلا عشان اتأخرو ..

مريم :احنا راجعين الاسماعيليه النهارده ياجماعه نشوف وشكم على خير ...غريب فاقرب فرصه تجيب ليل وتيجى والا مش هسامحك ...

غريب :باذن الله هنييجى ياماما فاقرب فرصه اوعدك ...

ماهر : مستعجلين على ايه يامريم ماادينا قاعدين مع بعض كام يوم ؟

راضى :لا معلش اعذرنا ياماهر بيه لازم نرجع مينفعش نتأخر اكتر من كده عشان الشغل بقا منتا عارف .

ماهر :والله انا بفكر لو تنقلو شغلكم وتيجو تعيشو هنا فالقاهره واهو تبقو جمبنا وقريبين علينا ونعرف نشوفكم فأى وقت ..

الكل :ياااريت ، والله فكره ، اه والله بجد ...

راضى :صعب جدا ياماهر بيه ...هناك فالاسماعيليه الاهل والجيران والمعارف والاصحاب وعشرة العمر اللى مبقاش ينفع نستغنى عنهم فالعمر دا ولا هما يقدرو على فراقنا ..

مريم :يعنى هى المسافه مانعانا ياماهر؟ ، مااحنا كل يوم والتانى عندك اهو ...وبصت لأميره :

يلا يااميره عشان تروحى مع ليل تحضرى حاجتك عشان ترجعى السكن بتاعك تانى .

اميره بضيقه :حاضر ياماما مع انى بقيت بتخنق من البنات هناك ،ومن مشاكلهم، ودوشتهم اللى حتى مش بتخلينى اعرف اركز فمذاكرتى ..

ماهر :متسيبيها هنا يااميره واحلفلك ان طول مده قعادها هنا نادر مش هيهوب ناحيتها ولا يتكلم معاها مجرد كلام حتى، متضيعيش السنه من البنت مادام مش مرتاحه مش هتعرف تزاكر ولا تنجح .

راضى :لا طبعا مش هينفع خالص ياماهر بيه ، انتا ابو الاصول وتعرف الاصول كويس .

ماهر اتنهد بقلة حيلة وأميره بصت لغريب اللى هتتحرم منه من هنا ورايح بعيون بتلمع من الدموع و وبصت للارض وبلعت ريقها بمراره ...

لكن ليل اتكلمت :طيب انى حداى الحل ياجماعه اللى مش هيزعل حد وهيريح الكل ..ايه رأيكم اميره تفضل قاعده معانا فالشقه انى وغريب ...واهى منيها تعرف تزاكر زين ...ومنيها تونسنى وخصوصى ان غريب هيرجع لشغله وانى كل الوكت هقعد لحالى فالشقه الطويله العريضه دى ...ومكدبشى عليكم اميره بقت كيف ماتكون اختى واتعودت عليها وبقت اقربلى من روحى والله وكنت عاتله هم روحتها من حداى ومعارفاشى هعمل ايه ولا هتحدت مع مين طول الوكت بعدها ..هاه قولتو ايه اظن المشكله اتحلت وملكمش حجه عاد ؟

اميره رفعت وشها بمجرد ماسمعت اقتراح ليل ووشها ضحك وعنيها لمعت بلمعه غريبه وهى بتبص لغريب وبعدها بصت لامها بترجى 

راضى ومريم بصو لبعض ومريم اتكلمت لما شافت القبول فعنين راضى بحل ليل :

الظاهر ان مفيش حل غير ده ..خلاص يااميره ترجعى مع ليل وغريب على الشقه من النهارده ..دا لو مكانش يدايق غريب طبعا ..وبصت لغريب اللى ابتسم عكس البركان اللى جواه من حل ليل اللى فنظره مكانش اكتر من قيد بتقيد بيه حريتهم واستمتاعهم بالخصوصيه فشقتهم وعش حبهم :

لا ابدا ياماما هدايق من ايه يعنى ؟ مريم دى اختى زيها زى ناديه بالظبط وان مشالتهاش الارض نشيلها فوق دماغنا وجو عنينا .

 مريم بابتسامة حب :تسلملى دماغك وعنيك ياحبيبي ...

غريب :هاخد العربيه بتاعتك اروح بيها بعد اذنك يابابا لغاية مااشتريلى عربيه اليومين دول باذن الله .

ماهر :انا وعربيتى وكلى ملكك ياغريبي 

غريب :ربنا يخليك ليا يارب ياحبيبي 

خلصو الغدا وبعد الغدا بشويه مريم وراضى استعدو للسفر بعد مااطمنو على اميره اللى راحت مع ليل وغريب على الشقه بعد ماسلمو عليهم ..

غريب فالعربيه سايق وليل جمبه فالكراسى اللى قدام واميره فالكرسى اللى ورا ...

غريب طول الوقت يتكلم مع ليل لكنه ملاحظ عيون اميره اللى منزلتش من عنيه فالمرايه طول الطريق، واحساس مراقبتها ليه دا مكتفه وحاسس طول الوقت انه مخنوق من نظراتها دى اللى مكنتش بريئه بالمره واللى حاول يلاقيلها اى عذر لكن معرفش ..

وصلو الشقه وطلعو واميره دخلت اوضتها وفضلت فيها بعد ماحست ان غريب لاحظ نظراتها ليه وحست بديقته ومحبتش تخليه ينفر منها اكتر من اول يوم ليها معاه ...

نامت على السرير وغمضت وفكرة انها معاه فنفس المكان وقريب منها القرب دا مخليه الابتسامه مش بتفارق وشها .

اما ليل فدخلت اخدت شاور ولبست كاش جميل باللون التركوازى اللى بيعشقه غريب، ولبست الخلخال وفردت شعرها اللى نزل على ضهرها وكتافها بانسيابيه وبعض الخصل اتمردت على اطراف وشها مكونه دوامات حلزونيه اضافة لشعرها فوق جماله جمال وفوق سحره سحر ..

اتقدمت من الاوضه على غريب اللى كان نايم على السرير ومتمدد وحاطط ايده تحت دماغه وبمجرد ماسمع صوت رنة الخلخال غمض عنيه ورجع بخياله لاحساسه بالصوت دا واكتشف انه لسه له نفس التأثير عليه وان صوت اجراسه لسه ليها القدره انها ترقص دقات قلبه ..

ابتسم وكل ماتقرب منه ابتسامته تزيد وتوسع لغاية ماوقفت قدامه ..

اتعدل ومد ايده بسرعه واخدها فحضنه وضمها بايد والايد التانيه اتخللت خصلات شعرها وقربها من وشه وشمها بقوه وهو لسه مغمض ...

ليل حاسه ان قلبها هيقف وجسمها مش قادره تسيطر على رجفته مع كل لمسه من غريبها وكل مره يقرب منها كانها اول مره ..

وقعها غريب على السرير مره وحده وحاوطها بأديه الاتين مكون حواليها حاجز وحابسها بسجن جسمه وفتح عنيه وقرب من ودنها ووشوشها :

احساسى بيكى مش كل يوم ..لا دا كل ساعه بيزيد ويكبر اكتر من الساعه اللى قبلها ..انتى كنتى فين غايبه عنى من زمان ..قرب وابتدا يوزع قبلات خفيفه على كل وشها بعشوائيه ..

تعرفى انا عمرى ماعرفت وحده ولا كان فيه وحده فحياتى ، مكنتش حاسس انى فايتنى حاجه ، لكن من يوم ماعرفتك حسيت انى كان فايتنى كتير اووووى ..

فانتى ياسيدتى قد اختصرتى كل نساء العالم فى عينى ، 

يا امرأة اشهد فى حضرتها بان نساء العالم ملك يمينى ، 

وقبله من شفتيكى قادرةُ على اخمادِ جميع براكينى ..

ياأمرأة احسستً بانى ولدت وانا بين ذراعيها وتلاشت كل سنينى ..

ياسيدةً نساءِ الارض يابحر من عشق يتدفق فى مجرى الدم فأوردتى واحتل جميع شرايينى ، 

ياشغفٍ احتل كيانى يانهر قد خُلق لاجلى ، انى ظمأن حد الموتٍ فهل من حضن يروينى ؟ 

ليل بصوت دايب وعيون زايغه :اكفايه ياغريب احب على يدك انى مش حمل كلامك الحلو ديه ...

عاوز تعمل فيا ايه تانى زياده ..انى حاسه انى فيوم هموت فيدك من كتر ماانفاسى عتتقطع واحس قلبي هينط من بين ضلوعى وانتا عتهمس فودنى بكلامك ديه .

غريب :لا ياليل مش كفايه ...عشان يوم ماهبطل اتغزل فيكى يومها اتأكدى انى بطلت احبك ..

وانا بوعدك وبحلفلك دلوقتى حالا ان اليوم دا مش هييجى طول منا عايش ..وعمرى مهبطل حب فيكى غير فحاله وحده بس ...وانا م...

وقبل مايكمل جملته كانت قطعاها ليل بشفايفها ومبعدتش عنه غير لما نسته الكلمه ونسته هو كان بيقول ايه ونسته نفسه ونسيت نفسها هى كمان معاه ..

غريب :ليل ممكن متقلعيش الخلخال دا من رجلك مره تانيه ؟

ليل :طيب قبل اكده كان عشان تعرف مكانى وموطرحى ...ودلوك ليه عاد ؟

غريب :هتصدقينى لو قلتلك ان قلبي متعلق فالخلخال ده ...وطول مانتى لابساه اكنك متحكمه فدقات قلبي بخطوة رجلك ؟ 

ليل غمضت عنيها واخدت نفس ومردتش 

غريب :مبترديش عليا ليه ؟ 

ليل :عدعى ربنا انه يديمك ليا ويقدرنى واكونلك كل اللى عتتمناه واكتر ...انى عحبك قوى قوى قوى ياغريبي ...

وغريبك بيعشقك ياعيون غرييبك ..هههه تعرفي انى دلوقتى بس اقدر اقولك عيون غريبك وتحسي اد ايه انتى غاليه عندى ...لكن الاول لو كنت قولتلك عيونى كنتى افتكرتى انك ملكيش اى قيمه عندى .

حضنت ليل غريبها وحطت دماغه على صدرها وفضلت تخلل صوابعها بين شعره لحد مانام والابتسامه مرسومه على وشه كأنه طفل نايم فحضن امه وهو مطمن .

**********

  الايام ابتدت تعدى جميله مفهاش اى حزن ..

*جواهر خلاص فالشهر السابع وحركتها تقلت وراحت الفيلا عند امها عشان مبقتش تقدر تعمل اى حاجه وكشفت وطلع فيها ولد .

*ماهر شركته وقفت على رجلها من تانى وقدر بفضل ربنا يرجع كل الفلوس اللى اتنصب على نادر ابنه فيها ..ورجع يشتغل على نطاق اوسع واكبر بمساعدة نادر اللى بقا اشطر من ابوه فالشغل ..واثبت كفائته لما استعان بخبرة ابوه وبقا يتعلم منه وعلى ايده ، لدرجة ان هو اللى بقى ماسك الشركه كلها وبياخد كل القرارات بس لازم يستشير ابوه الاول اذا كان القرار صح ولا غلط وماهر ملاحظ ان نادر كل قراراته اصبحت مدروسه وسليمه وصائبه واتعلم من غلطته وفرحان بيه جدا ..

فالوقت دا استعد هو وموده للجواز وجهزو كل حاجه وكلها اسبوعين وتكون فبيته وعلى ذمته ...اتفق معاها ان زياراته لشقتة القديمه هتفضل مستمره زى ماهى وممنوع منعا باتا انها تغير فيوم من الايام من علاقته بأميره ولا كلامه عنها ، وموده وافقت على شرطه واحترمت اخلاصه جدا وشافت انه مش من العقل انها تغير من وحده ميته او من مجرد زكريات ..

*ناديه من يوم حادثة الفيس وهى ماشيه على الصراط وبتحافظ على كل تصرفاتها ودايما وهى بتعمل اقل حاجه بتحط ابوها واخواتها قصاد عنيها ،

 حتى طريقة لبسها اتغيرت وبقت دايما عباره عن دريس طويله باكمام وفوق منها خمار ماليزى كبير مداري كل معالم جسمها ودا مخلى ابوها واخواتها فرحانين بيها جدااا .

*غريب رجع الشغل وقاسم معاه والاتنين عملو تيم جبار والجهاز من يوم مااتعينو فيه فتقدم وكل مأموريه ليهم مكافأه واترقو هما الاتنين ...غريب بيتخصم منه كل شهر مبلغ من فلوس نهاية الخدمه اللى اخدهم بعد الحادثه وهو آخر همه الفلوس وكل متعته فشغله والمغامره اللى بيعيشها كل يوم .

*ليل فوسط سعادتها حصل اللى كانت خايفه منه واللى نغص عليها صفو حياتها لما شكت انها حامل ومش راضيه تقول لغريب على شكها دا..

 وبتفكر بجديه انها لو طلعت حامل فعلا تنزل الطفل .. لانها مش هتستحمل تتولد ليل تانيه بلعنه تانيه تخليها عايشه هى وغريب فتعاسه طول عمرهم لانهم مش هيستحملو عذابها ...

وترجع تشوف لهفة غريب على الاطفال تتراجع شويه ،لكن لما تفكر فكل اللى مرت بيه تصمم على قرارها وكل الصراعات والنزاعات دى عايشاها لوحدها وحتى مفكرتش انها تشرك غريب فيها لانها متاكده من رأيه ورده عليها كويس وبتدعى ربنا فكل دقيقه انه يخلف ظنها ومتطلعش حامل فعلا .

*اميره مبقتش قادره تسيطر على نفسها قدام غريب اكتر من كده وركزت معاه لدرجة انه لاحظ وبقى مستغرب منها وطول الوقت بيتهرب ويتجنب انه يقعد معاها فمكان واحد لكن هى مش بتفوت فرصه تقعد جمبه فيها ولا تبص عليه ومش مهم اى حاجه تانيه ...

بقت تلح على ليل تحكيلها كل حاجه عن غريب بطريقه مريبه خلت حتى ليل تستغرب منها وابتدت تحافظ على كلامها معاها عن غريب بعد ماحست ان غريب والكلام عنه بقا محور حياة اميره ...

*نادر تقريبا كلامه هو واميره بقا شبه معدوم طول الفتره دى ..ومع انشغاله فالشركه مع ابوه تجاهل صدها ليه وسابها للايام وهى تبين ايه اللى غيرها من نحيته بالشكل دا واتمنى من كل قلبه ان ضغط الدراسه هو اللى موترها ومأثر على تصرفاتها بالشكل دا ..

وخصوصا بعد ماكلف حد يراقبها فالكليه واتأكد انها متعرفش حد غيره ولا ليها علاقه بأى حد فالجامعه غير بس اتنين زميلاتها اللى اتنقلو معاها من الاسماعيليه وبس كده .

*غريب :

طول الايام اللى فاتت دى وانا كان ممكن اقول انى اسعد راجل فالعالم ، لولا حاجه وحده بس مدمره كل سعادتى ...اميره بنت ماما مريم وخطيبة نادر اخويا.

 بقيت حاسس انها سجنانى بعيونها وهى بتراقبنى طول الوقت بدون كلل او ملل ..

بقيت باستغرب وانا شايفها بتبذل كل جهدها عشان تحاول تاخد مكان ليل فكل حاجه فحياتى ..

لما بطلب حاجه هى تجرى قبل ليل تجيبها ...لما برجع من شغلى بلاقيها هى مستنيانى قبل ليل بكباية ميه ساقعه وعملالى عصير 

وانا فالحمام لو نسيت الفوطه وطلبت من ليل تجيبهالى بمجرد مااتكلم الاقيها هى جريت عليا بيها 

هدومى ملاحظ انها مش بتخلى ليل تحط ايدها فيهم ولا تغسلهم بحجة ان ليل كفايه عليها شغل المطبخ وباقى شغل البيت ...

برفانى اللى كذا مره اشم ريحته عليها 

اوضتنا اللى دايما الاقيها فيها لما بتكون ليل مشغوله فالمطبخ او بتاخد شاور .

مش بس كده ...نظراتها اللى بتبصلى بيها بحس انها كلها رغبه ...بفضل استغفر ربى واستعيذ بالله من الشيطان على الاوهام اللى بيزرعها فدماغى دى.. لكن كل مره ارجع اتأكد انها مش اوهام وانها حقيقه واضحه وضوح الشمس .

واتاكدت من دا اكتر لما نادر اشتكالى من جفا اميره وبُعدها عنه طول المده اللى فاتت دى،.. وحيرته وهو مش قادر يعرف ايه السبب ...سكت وانا ببصله ومش عارف اقوله ايه ؟

اقوله حبيبتك بعدت عنك عشان عينها من اخوك ؟ ولا اقوله سيبها دى متنفعكش ولما يسألنى طيب عن السبب اقوله ايه ؟ 

حسيت انى عايش فنار وحيره مابعدها حيره 

طول الوقت الفت نظر ليل ان اميره مينفعش تهتم بحاجه تخصنى او تتدخل فحياتى وكان ردها الدايم ان اميره معتبراك اخوها وبتتصرف على هذا الاساس ..وعيب لو قلتلها متساعديش فالبيت تقول مش عايزانى وعايزه تمشينى 

كل مره ببقى عاوز ازعق فيها واقولها ياستى اعملى كده ابوس ايدك خليها تمشى وتطلع من حياتنا ...

يمكن لما تبعد ومتشوفنيش قدام عنيها تعقل وتبطل التصرفات المراهقه بتاعتها دى وترجع لنادر ...

لكن لسانى يتلجم عشان مأبوظش علاقتهم ببعض ولا علاقتى بماما مريم وخصوصا انه خلاص باقيلها شهر ونص على امتحانات آخر السنه وتخلص وتمشى ..

*قاسم :اشتغلت مع غريب فقسم مكافحة المخدرات وبرغم التعب والمرمطه الا انه بعد كل مهمه الواحد بيحس بسعاده كده ويحس انه عامل انجاز لبلده فعلا ..

واللى كان مخلينى سعيد اكتر انى مع غريب وبقيت حاسس انه مسئول منى وانا مسئول منه وطول الوقت فكل مهمه مع بعض وبنحمى ضهر بعض ومع بعض بنعمل احلى شغل ...لدرجة ان اى تشكيل لمهمه او طلعه جديده اسمى واسمه بيتكتبو جمب بعض اول حاجه ..

غريب برغم سعادته الا انى ملاحظ الفتره دى انه مش على بعضه وانه اكتر وقت بقى يكرهه هو وقت رجوعه للبيت ...

شكيت انه يكون فيه حاجه بينه وبين ليل او انه ابتدى يمل منها او يكرهها ، لكن جواهر كلمتها واكدتلى انهم مع بعض زى السمن على العسل ...طيب امال ديقته دى وخنقته من ايه بس ؟ بعدين حللت وخمنت ورجحت انه ممكن يكون بسبب ان ليل ماحملتش لغاية دلوقتى مثلا ...

وطبعا مكدبتش خبر واقترحت عليه يروحو لدكتور عشان يشوفو موضوع الخلفه دا .، لكنه فاجأنى بأن الموضوع مش فدماغه اصلا ؟ اله امال فيه ايه بس ...

قررت ان بعد جواز موده وماهر هجيبه قدامى واقرره واشوف ايه سبب الحاله اللى هو فيها دى ايه... 

بس افضاله وارجع لوظيفة الطبيب النفسى بتاعتى اللى مامرستهاش عليه من ايام المدرسه العسكريه .

ويانا ياانتا ياصندوق يااسود ياللى اسمك غريب .

*موده :طول المده اللى فاتت دى وانا بجهز لفرحى وكل ما ماهر يحدد ميعاد للفرح آجله بحجه شكل ..صحيح اتخلصت من فوبيا الجراسيم واتغلبت على مرضى ..لكن طلعتلى فوبيا تانيه انيل وكل يوم مخليانى مش بنام الليل وانا بفكر هعمل ايه فالمشكله دى ؟ 

انا بشرتى بيضه زى الحليب ..لكن عندى اماكن فجسمى سمره وغامغه ودا مخلينى محرجه من نفسي اوى ...جربت كل حاجه للتخلص من المشكله دى لكن مفيش فايده ..وصفات من على النت ..منتجات وخلطات من صيدليات ..علاجات دكاتره ...لكن كل دا كان بيدى نتيجه اول يومين وبعدها ولا اى حاجه ...عملت حمامات مغربيه لدرجة انى سلخت طبقه من جسمى ..بس برضو السواد هو هو ...

كأن الاماكن دى فيها آبار بترول بتنز مازوت ومستنيه حد يكتشفها ...آخر ما زهقت من نفسي وماهر زهق منى وافقت على الميعاد اللى حدده للفرح وخلاص ...وقررت انى اخليه هو اللى يكتشف آبار البترول بنفسه ...خليه يتصدم ..احسن قليل عليه مين قاله يحبنى انا بالزات ؟!

طبعا هنعيش فالفيلا وماهر قالى ناخد الدور الفوق ونطرد العيال دى كلها تحت بس انا مرضيتش وقولتله سيب كل واحد مكانه عشان ميحسوش انى بفرض سيطرتى عليهم من اولها، او بتحكم فحياتهم او بفرض عليهم سلطه من اى نوع ...

واخترت انى اقعد معاه فالاوضه اللى تحت اللى قاعد فيها وخصوصا انها كبيره وبتطل على الجنينه الورانيه ومش بطاله ...

ماهر وافق لما لقانى مصممه بس اصر ان ليلة دخلتنا لازم نقضيها فأوتيل عشان نكون على راحتنا ..وبعدها هنقضى اسبوع عسل فأى مكان نختاره .

ماما ماجده طول الوقت بتحضرلى فحاجتى وكل ماابص عليها الاقى دمعتها على طرف عينها وخصوصا لما تبصلى وانا اكون مندمجه بعمل اى حاجه ...

حبيبتى حاسه بيها وعارفه انها مش متخيله فكرة بعدى عنها ...برغم انى عذبتها هى وبابا كتير معايا لكنهم استحملونى وقابلو مرضى بكل قبول ورضى وصبر ودى حاجه عمرى ماهنسهالهم ابدا ...

حتى عبده طول الوقت مبرطم بوقه وهو باصصلى زى العيل الصغير وبحس انه لو حد عمله اقل حركه هيعيط بدموعه ...

حبايب قلبى ربنا يحفظهم ويباركلى فعمرهم والله منا عارفه هستحمل بعدى عنهم ازاى ؟ 

***********

الايام بتجرى والنهارده الفرح ..

موده راحت الكوافير ومعاها ناديه واميره ...

ماهر بيلبس فالفيلا وطول الوقت بيغنى ويدندن ....افرح ياااقلبي لك نصيب تبلغ مناك ويا الحبيب افرح ..افرح ...افرح يااااقلبي ..وكل ماتخلص يعيدها من تانى ...

غريب وليل بيلبسو فشقتهم ...

ليل جريت من الاوضه على الحمام مره وحده وقفلت الباب وفضلت ترجع وغريب بره الحمام بيخبط عليها وهيتجنن عاوز يدخلها يشوف فيها ايه 

فتحت الباب اخيرا وخرجت وشها مخطوف ومسكت دماغها وكانت هتقع لولا ان غريب بسرعه لحقها واخدها بين ايديه وشالها ودخلها حطها على السرير .

غريب ضمها عليه بخوف وقلق :ليل مالك ياقلب غريب حصلك ايه ؟ 

ليل اول ماقالها كده وكأنه اداها تصريح بالبكا وفضلت تبكى وتشهق وهى متأكده دلوقتى انها حامل بدون شك ..

غريب بيحاول يهدى فيها وبعد محاولات كتير اخيرا ابتدت تهدا وترد على غريب 

مفياشى حاجه متخافش ياغريبي ..انى بس حاسه بشوية برد فمعدتى ليا كام يوم ..وكمان الليله اللى عدت حلمت بابوى وامى جولى وهما زعلانين منى ، حتى سند فردتله درعاتى مرضاشى ياجى لباطى ..عشان اكده تلقانى نكدانه من وحدى اكده . 

غريب :بس كده ؟ ياستى ليكى عليا من بكره نسافر البلد ونزورهم ونطلع ثواب على روحهم ...بس فالاول نروح للدكتور نطمن على تعب معدتك دا ..معقوله ليكى كام يوم تعبانه ومتقوليليش ياليل ؟

 لكن الحق مش عليكى حقك عليا انا عشان كان لازم احس بيكى من غير ماتتكلمى ..عندى انا دى يانور عينى .

ليل بخضه :له دكتور له انى هبقا زينه لحالى ..خليك جارى بس انتا وانى هبقا زى الفل ..دخلت فحضنه اكتر وهو باس جبينها بكل حنان وهو بيهمسلها ..

طيب هتقدرى تروحى الفرح ولا منروحش ونفضل قاعدين هنا لوحدنا بلا فرح بلا بتاع ،وكمان عشان اقولك حاجه سر فبوقك وخصوصا ان خميره مش هنا 

ليل بضحكه خفيفه :والله لو سمتعك عتقول عليها خميره هتزعل منك قوى قوى ...دى عتحبك ياغريب انى مش عارفه ليه قارش ملحتها اكده ...دى البت واقفالك وقافي .

غريب :حبها بورص ...قال تحبنى قال ..تعالى بس غيرى الهدوم دى خلينا نشوف شغلنا قبل خميرة العكننه متوصل ..ومسك هدومها بيشد فيها ..

ليل بضحك :وه ياغريب سيب خلجاتى مهغيرش انى ، هنروحو الفرح مينفعش تقعد وتسيب ابوك فيوم زى ديه لحاله.

غريب :ليه يعنى هو انا هعرفه يعمل ايه ؟دا مدوبهم اتنين يامه ...اتنين ايه قولى اتنين وعشرين ، اتنين وتلاتين ، ماهر ميتخافش عليه خافى علينا احنا ..

************

الفرح ابتدا فجنينة الفيلا على الديق العيلتين وبس ونادر وقاسم هما اللى راحو جابو العروسه و البنات من الكوافير على الفيلا ..

ماهر كان طاير من الفرحه بموده وموده الخجل باين فعيونها وطول الفرح وهو يتغزل فيها وهى وشها يبقى احمر زى الطماطم من الكسوف ومش قادره تسكته ولا تقوله عيب عشان هو دلوقتى بيعاكس بورق رسمى ..

اما غريب فاطول الفرح عينه على ليل ومتابعها وهو قلقان عليها وخصوصا بعد ما لاحظ خمولها والتعب اللى باين عليها ومبطلش يلوم فنفسه على اهماله ليها ..

نادر شد اميره من دراعها غصب عنها برغم اعتراضها واخدها لركن بعيد متداري فالجنينه لكنه بيطل على اوضة ماهر واللى يبص يقدر يشوف اللى فيها بوضوح ..

اميره سحبت دراعها منه واتأفئفت وربعت ايديها وهى باصه بعيد ناحية الاوضه وبتهز رجلها بعصبيه وهى بتكلمه :فيه ايه يانادر بتجرجر فيا زى البهيمه قدام الناس كده ليه ؟ 

نادر :طب بذمتك فيه بهيمه زى القمر كده ؟

اميره قلبت عنيها بملل ومردتش عليه ..

نادر :يااميره كفايه كده بقا وحشتينى وهموت عليكي ...انتى ايه مبتحسيش ...

وهنا كل كيان اميره اتبرجل وهى شايفه غريب ماسك ليل وبيتسحب بيها على الاوضه اللى قصادها بتاعت ابوه ماهر ودخلو وقفل البال وراه .

غريب قرب من ليل وابتدا يبوسها بوسات خفيفه وبعدها اخد شفايفها فبوسه عميقه واميره شافت المنظر دا واتخيلت ان غريب بيبوسها هى وجسمها كله خدر من الاحساس، ولفت على نادر بعيون زايغه وشفايف بتترعش ونادر بلع ريقه و ضعف فساعة شيطان زى مابيقولو ومقدرش يقام اغراء شفايف اميره وانقض عليهم زى النسر واللى جننه اميره اللى كانت دايبه ومتجاوبه معاه ومغمضه عنيها ولا كانها هى اللى مكانتش طايقه تبص فوشه من شويه

نادر فاق لنفسه وبعد عنها مره وحده لما حس انها محتاجه للهوا وهى همست وهى مغمضه :

انا بحبك اوى ياغريب .....

.

.

.

وللحكايه بقيه .....

بقلم /ريناد رينوو

يتبع...

لمتابعة البارت السابع و الثلاثون الأخير إضغط هنا

reaction:

تعليقات