رواية فصليتى القوية الفصل الثامن - ريناد رينو
رواية فصليتى القوية الفصل الثامن
بعد مارعد وابوه رجعو مصر من غير مايطمنو على ريناد امها انهارت اول ماسمعت ان محدش يعرف بنتها فين
رهف :يعنى ايش ماكو ريناد خلاص راحت بنيتى 😢
رعد :كل ده بسببى دى مشكلتى وهى اللى اتحملت عقابها انها مش هسامح نفسى ابدا على اى حاجه هتحصل لاختى 😢واخد مفاتيحه وخرج على المعسكر و مبقاش يروح البيت وبقى يقضى كل ايامه بين العساكر وقلقه على ريناد بيترجم لعنف على العساكر وقسوه فى التدريبات
احمد كمان مبقاش مركز فى شغله ودايما سرحان وبيلوم نفسه انه وداها عند الناس دول بنفسه وهو عارف انه بكده بينقذ ابنه لكن بعت بنته للموت البطيئ
رهف كمان كانت حالتها حاله ومش عارفه حتى تعيش حياتها الطبيعيه من الحزن والخوف على بنتها ومن يوم ماغابت ريناد وهى الضحكه فارقت وشها وحتى محمود اللى روحها فيه مبقتش قادره حتى تقعد معاه زى الاول بقت فيه فجوه فعلاقتهم
اللى طول عمرها اقوى من الظروف
*****************
فى الصعيد عند حمد ومروان ،
مروان :الحمد لله ياولد ابوى المعدات الجديده سهلت الشغل وعتجيب الضعف والفلوس بقت كيف الرز
حمد :صلى فقلبك ياواكل ناسك ميحسد المال الا صحابه وانتا عينك مدوره كيف عين البومه
مروان :اللهم صلى عليك يانبى وربنا يزيد ويبارك
حمد شاف سلمى جايه عليهم :
عقولك يامروان امبارح الواد محمود واد عمك كلمنى وقلى انه راجع كمان شهرين وطلب يد البت سلمى
مروان :اديهالو خليه يلز بيها البومه دى
حمد.:والله انا بقول ارفضه اصل اخلاقه معجبانيش الواد ده معحبوش من زمان ياخى معارفش ليه
سلمى جات عليهم بالخطوه السريعه :اخلاق مين اللى معتعجبكش ياحمد اخلاق محمود اللى البلد كلها عتحلف بأدبه واخلاقه ؟
ولا انتا ليك حسابات تانيه ومعاوزش تجوزنى من اصله اصل يعنى هتلقو خدامه ليكم فين بلقمتها متشحططه مابين سراياتكم تخدمكم وتخدم حريمكم ولا تكونش خايف لتتكلف فى جوازتى ؟ اصلك تموت ع القرش
حمد :بااااااس اكده اعرفت رأيك فى الجوازه من غير لف ولا دوران ولا تعملى حالك مكسوفه وتقولى افكر وجلع البنات الماسخ ده
سلمى :له متخافش انا اصلا لو كنت سألتنى كنت هجاوبك طوالى واقولك ايوه موافقه اصلا انا مستنيه اغور من وشكم الفقرى ده بفارغ الصبر
حمد :على العموم مبروك ربنا يحبب الليف فى الكرنيف(سلالم النخل ) والتنين يولعو مع بعض وان كان على جهازك هجهزك احسن جهاز زكاة عن مالى وهعتبره صدقه لانك متستهاليش حتى ابره فمخيط
سلمى :والله معارفين لولا قلبك الطيب ده كنا عملنا ايه
حمد :كنتو رقصتو باليه هههع هع هع هع هع
مروان :او جابو شيبسى وكراتيه :هع هع هع
سلمى بصتلهم بقرف وسابتهم ومشت وهى بتكلم نفسها :قبر يلم القبر يبوووى عالسمبطه جاكم الهم ...تعالا بسرعه يامحمود خلينى اغور من اهنه واتنهدت :
ياترى فينك يامهاب هنت عليك ياولد ابوى اكتر من شهر بحاله متسألش على وقافل تلفونك به يامهاب طب مين هيسلمنى لمحمود بنفسه زى ماوعدنى ؟ طب ياترى الدنيا عامله فيكم ايه ؟ ياوجع قلبى عليكم يااخواتى 😢
بقلم /ريناد
*عند مهاب
قمروهى ماسكه كتاب فى ايدها :يعنى ياربى دنا بالدروس وكان عندى امل اعدى بالعافيه من السنه دى دلوك قلولى هعدى كيف انا ها هعدى كيييييف وانا تور لاهى فبرسيمه معفقهش فى المنهج ولا شى
ياحظك ياقمر حتى قلت يجينى ولد الحلال واتجوز ومش مهم التعليم جيت وادفنت اهنه مين هيشوفنى دلوك ولا يجينى 😢
اكتب يافطه ع البيت اقول فيه اهنه وحده عاوزه عريس يااااااخلق
ريناد :يبنتى محسسانى انك عندك ٤٠ سنه دانتى لسه مكملتيش ١٨ حتى مينفعش تكتبى كتابك متسربعه على الجواز ليه
قمر :اسكتى انتى مافهماش اصغر منك بيوم يعرف عنك بسنه الجواز ستره يحبيبتى الوحده تتجلعلها يومين مع جوزها وتجلعه هى كمان تخلفلها حتة عيل بدرى بدرى وتنجز فى الحياه هعمل ايه بالتعليم انا هخترع الزره اخترعوها خلاص هطلع القمر
طلعته الكلبه لايكه قبل منا اتولد بقرون يبقى انا اتعلم ليه المجتمع مستنى ايه من وحده زييى اضيفهوله بتعليمى
ريناد :دا انتى عندك نيجاتيف انارجى تغذى العالم كله
قمر :انا اصلا عنديش انارجى خالص لابوستف ولا نيجاتيف
ريناد :طيب بطلى مناحه وهاتى ورينى مش فاهمه ايه هشرحهولك
قمر :شاله يتشرح صدرك بشوفة المصطفى يارب وتتهنى واشيل عيالك انتى ومهاب على كتفى وافرح بيهم ويخليلك عضلاتك ويباركلك فيهم وفصحتك
ريناد بصريخ :بااااااااس افصلى يخرب عقلك جننتينى
قمر :خلاص سكت اهه بس اشرحيلى اى حاجه من اللى مش فاهمه فيه ايوتها حاجه ده
ريناد :اترزعى قدامى هنا ومش عاوزه نفس وركزى
مهاب فى الوقت ده قدر يلاقى شغل فى بنزينه بعد مالف كتير ملقاش وخصوصا انه معاهوش غير ثانويه ومفيش حد بيوظف بيها ولقى الشغل فى البنزينه حاجه كده مؤقته لغاية مايشوف حاجه احسن وابتدا شغل فيها له كام يوم
مهاب بعد يوم طويل رجع البيت ورمى نفسه على الكنبه
ريناد بصتله بشفقه على التعب والمشوار اللى كل يوم بياخده على شغله
قمر :تعالى الحقنى يامهاب تعالا شوف اختك
مهاب بخضه :مالك ياقمر جرالك ايه
قمر :ريناد شرحتلى وافهمت الدرس وحليت الاسئله لحالى 👏👏👏💃💃💃
مهاب :له متقوليش
قمر :ورب الكعبه صوح
مهاب :ربنا يكملك بعقلك الغايب عنك معارفهوش وين ده
ريناد :هحضر الاكل على ماتكون استحميت محضرالك غيار فى الحمام
مهاب :متشكر قوى ياريناد على كل العتعمليه معانا ده
ريناد :على ايه احنا عيله وحده ودا واجب عليا
مهاب :يعلم ربنا ياريناد انا كل يوم معزتك عتزيد فقلبى لغاية مابقيتى كيفك كيف قمر بالظبط
ريناد ادايقت من الكلمه دى ووشها قلب ومشيت من قدامه بسرعه
قمر لاحظت ديق ريناد وراحت لمهاب :البعيد تور معيفهمش واصل
مهاب بأستفهام :ليه يابت عملتلك ايه
قمر :فيه حد يقول لمرته انتى زى اختى
مهاب :مهى اكده فعلا
قمر :له هى مش اكده هى مرتك مش اختك على فكره
مهاب :بس انا معتبرها زيها زيك
قمر :بس هى معتبراكش اكده ياخى مش عتشوف البت عتتفرس كيف لما تقولها الكلمه دى ياخى شوف البت مستحمله معانا عيشه عامله كيف ولا بتكل ولا بتمل وواقفه معاك ويدها فيدك وقبل يدك كمان فى كل شي
مهاب :مشكلتها مش مشكلتى انا معشمتهاش بحاجه وبعدين انا مهحبش وحده راجل وجسمها بايظ من كتر الكلاكيع انا عاوز وحده رقيقه اكده حساسه لو جو عليها شويه هوا شداد تخاف وتجرى تتحامى فيا مش وحده تنفع رئيسة عصابه ؟ انا مهنكرش انها بت جدعه بس انا هعمل ايه بجدعنتها انا عاوز وحده احس جمبها انى انا الراجل مش احنا الاتنين زى بعض ياشيخه طيب انتى عتشوفى الحَلف اللى مخضر فأديها ورجليها ولا المقشات اللى فوق عنيها الحلوين دول ولا شنبها لما عتوقف فى الشمش يبوووى
طب اراهنك على حاجه ....شعر صدرها لو شفتيه هتلقيه اكتر من شعر صدرى انا شخصيا
قمر :طلعت تافه وسطحى ومعفن
مهاب :ايوووواه انا معفن خليها تشوفلها واحد نضيف عنى
ريناد كانت سامعه كل كلامهم مع بعض وغصب عنها مقدرتش تسيطر على دموعها ومع كل وصف لمهاب فى حته فجسمها كانت ريناد بتلمسها ودموعها تنزل فى اللحظه دى حست انها غلطت لما اختارت عيشة الرجاله دى حست انها ضيعت على نفسها فرصة انها تكون مع مهاب بسبب جسمها اللى بوظته بغبائها ....ليه ؟
سؤال سألته لنفسها :ليه هو بالزات اللى قدامه ببقى بنت ليه هو بالزات اللى عاوزاه يشوفنى بنت مش راجل اشمعنا مهاب؟ فيه ايه شاددنى ليه كده ؟
ومخلينى ببقا ضعيفه قدامه
حبيته ؟ ايوه حبيته وفيها ايه لما احب هو انا مش بنت ومن حقى احب ؟ لكن هو محبنيش ولا شكله هيحبنى فيوم من الايام
وعشان كده لازم احاول انى اسيطر على مشاعرى شويه وخصوصا ان هو عمره ماشجع مشاعرى دى. مش عارفه ازاى بس هحاول
قمر دخلت عليها المطبخ لقتها بتمسح دموعها قربت منها وحطت ايدها على كتفها وريناد اترمت فحضنها واتفتحت فى البكا
قمر :يقطعك يامهاب ياجحش انتا
ريناد :بعد الشر عليه متدعيش عليه
قمر :عتحبيه ياحبة عينى معلش هو الحب بهدله اكده اللهم بهدلنى بالحب يارب
ريناد ضحكت من وسط دموعها
قمر :ايوه اكده اضحكى محدش واخد منها حاجه واصبرى ياعالم بكره داسسلنا ايه حداه
ودلوك يلا هاتى الوكل عشان المقندل خرج من الحمام
ريناد :حاضر انا سخنت الاكل اهو
قمر :اخدت طبقين وحطتهم قدام مهاب ورزعتهم رزع
مهاب :قام الهواس عليكى
قمر بصتله ودخلت جابت باقى الوكل مع ريناد وقعدو كلهم على السفره
مهاب : مفيش حتة طرشى اكده تفتح النفس
قمر :عارفه انا الوكل ده مهيعجبكش عشان باين عليك عتاكل حجات تانيه بره اليومين دول مأثره على مخك
مهاب رفع حاجبه :حجات ايه العكولهه بره دى يختى
قمر :تبن
مهاب زور وريناد ضحكت بصوتها كله
قمر :زورت اسماله عليك كل بالراحه
مهاب :ياقمر هكسر نفوخك ورب الكعبه انا جلعتك قوى وابتديتى تقلى ادبك انا عاكل تبن ياجزمه
قمر : امال ودانك طولو ليييه ؟ مهاب بتلقائيه حط اديه على ودانه
ريناد :😂
مهاب :ياقمر هموتك اقصرى الشر
قمر :😂ريناد شفتيه لما عس ودانه 😂
ريناد شاورت بدماغها وهى بتضحك
مهاب :وانتى كمان فشتك عايمه ليه طب هى واتهوست من زمان وانتى ؟
ريناد :على وشك مش عايشه معاكم
مهاب : على رأيك دا كفايه انك قاعده مع المخبله دى ليل نهار وسابهم وقام واداهم ضهره
قمر :يامرى شفتى الديل ؟ مهاب بتلقائيه حط ايده على مكان الديل وقمر وريناد خربو ضحك ومهاب رجع على قمر وفضل يضرب فيها فكل حته وهى تضحك وريناد تحوشه منها وهى بتضحك هى كمان... وفى الاخر اداها شلوت
قمر:شفتى الرفصه اللى رفصهانى دلوك دى اهى دى اكبر دليل وجريت من قدامه وقفلت اوضتها ومهاب واقف ومتغاظ منها وريناد بتضحك عليه
مهاب بصلها ورفع حاجبه وهى شاورت على بوقها وسكتت وهو دخل الاوضه بتاعته وريناد اتفتحت فى الضحك وهو من جوه قلدها ههههههههههااااى اههههه هتموتى من الضحك خدى نفسك
ريناد ضحكت اكتر ودخلت عند قمر بعد ماخبطت على الباب
ريناد :على فكره هيموتك فيوم
قمر :ميقدرش عيحبنى
ريناد :لكن عصبى
قمر :مش مع حبايبه مهاب مع اللى بيحبهم حاجه ومع باقى الناس حاجه ومع البيكرههم حاجه تانيه خالص وبيتحمل الهزار والشتيمه لكن اهم حاجه مش قدام الناس بالك انتى لو قلتله الكلمه دى قدام حد كان دفنى حيه فمكانى
ريناد اتنهدت :ميكس غريب
قمر :بس قلبه طيب والله لكنه بعض الاحيان معيفرقش بين مصلحته وضرره وده اللى وصلنا لهنه دلوك يعنى مثلا ايراد المحصول بتاع ارض ابوى هو اللى كان عيستلمه ومن خيبته يروح يوديه كله لحمد ومروان وميطلعش لانصيبه ولا نصيبنا ويقول مهى الفلوس قاعده حداهم هتروح فين يعنى
ريناد :دى طيبه وقلب ابيض
قمر :له دا هبل بعيد عنك مهى الطيبه لما عتزيد عن حدها عتقلب هبل وهطل زى اللى عند مهاب اكده
ريناد اتنهدت :على فكره اللى يشوفك انتى ومهاب ميقولش عليكم صعايده ابدا لا طريقه تفكيركم ولا نقاشاتكم ولا هزاركم مع بعض وخصوصا هزارك انتى وطريقة كلامك مع مهاب اللى انا مستغرباها جدا يابنتى انتى بتقولى كلام قدامه مفيش اخت تقوله لاخوها وهو مستحملك عادى كده ومش بيزعل منك
قمر :عشان انا ومهاب اتربينا على يد وحده اسكندرانيه تلاقينا محداناش عقد الصعايده دى هجين يعنى وياستى هزارى ده مع مهاب هو اللى عودنى من وانا صغيره اننا مفيش فرق بينا وبيعاملنا انا وحسن الله يرحمه كأننا اتنين صحابه ....عياله ...اى حاجه كده مفيهاش الخنقه فى الكلام بيناتنا
قمر اتنهدت :يابختكم ببعض ويابختك بمهاب فى حياتك
قمر فهمت حزنها :هقولك حاجه ياريناد ومتزعليش منى
ريناد :لا هزعل متقوليش
قمر :مش مهم اتفلقى المهم هقولك :انا عاوزاكى تستهمى من نفسك شويه اكده
ريناد :لا
قمر :متعانديش واسمعينى زين انتى مش هتعملى حاجه مستحيله احنا هنجيبو المنشار الكهربائى ابو متور اللى جوه ده وهنشيلو حشائش السفانا الناميه على اديكى ورجليكى دى
ريناد :😂 تشبيه قاتل
قمر :ولا قاتل ولا حاجه بس انتى اللى مشيفاش مراعى دينا اللى حداكى دى
لا والنصيبه ان دا الظاهر اكيد ماخفى كان اعظم 😆
ريناد :اخرسى انا معنديش سافانا غير فأيدى ورجلى ووشى بس وغير كده فله والحمد لله
قمر :طب وبالنسبه ل... وبصت لصدرها ريناد ضربتها بقلم خفيف انتى هتسمعى كلام اخوكى العبيط ده
قمر :بصى انتى كل حاجه فيكى اصدقها انتى اصلا كلك على بعضك اكده حاجه غريبه عجيبه
ريناد :ربنا يسامحك انتى واخوكى
قمر :هيسامحنى وهدخل الجنه بأذن الله بس انتى اسمعى كلامى
ريناد :لا مش هسمع ومش هغير نفسى عشان واحد مش شايفنى اصلا وكمان اللى يقبلنى بشكلى ده اهلا وسهلا مش هيقبلنى انا كمان مش عاوزاه
قمر :محسسانى انك هتعملى عمليات تجميل وتغيرى خلقتك دانتى هتنضفى يامعفنه
ريناد ضربتها بالمخده :انا عاجبه نفسى كده معفنه معفنه وابعدى عنى انتى واخوكى
قمر :خليكى زى الغوريلا اكده بشعرك الكاسى كل جسمك لغاية مايتلولو عليكى زى العوليق ويكتم نفسك وتموتى يامعفنه
ريناد رجعت لورا وجايه عليها مره وحده وقمر صرخت وريناد نطت فوقيها والسرير اتكسر بيهم هما الاتنين
قمر :عملتى ايه يافقريه حملك السرير اهو اتكسر اتكسر يابيج شو ارتاحى هنامو ع الارض
ريناد :ياريت رقابتك هى اللى اتكسرت يام لسان اطول منك عاوز قصه
قمر :بعد الشر على شاله خمد وخروان
ريناد :😂
*عند حمد فى المحجر
مروان :بقولك ايه انا بكره اجازه
حمد بصوت عالى عشان مش سامع من الالات :ليه خير عَطايه جديده
مروان :له
حمد :امال ايه
مروان :هندلى مصر
حمد :برضو لييه
مروان :مشوار اكده عاوز اتوكد من حاجه
حمد :طالما مهتضرنيش فى حاجه اعمل اللى عاوزه
مروان اتنهد فى سره :اه لو لقيت اللى عفكر فيه صوح ولقيتك عتتمرضغ فخير احمد المصرى يامهاب بعد ما خدت البت اللى انا جبتها لنفسى لاقطع خبرك .
مروان سافر مصر وفضل مراقب فيلا احمد المصرى وسأل وعرف ان لا هى ولا مهاب رجعو على الفيلا من ساعت ماسافرت الصعيد
مروان :امال هيكونو غارو فين دول 🤔
مسيرى هعرف طريقهم فين ولازمن ادوق الفرسه العفيه دى حتى لو هموت بعديها
وهيتحرك عشان يمشى لمحه احمد المصرى وهو راجع من الشغل بعربيته واستغرب من مجيه ونزل بسرعهه ولهفه عشان يسأله عن ريناد لكن مروان كان ركب تاكسى واتحرك واحمد ضرب العربيه بأيده بغيظ وعنف
********************
عند مهاب
التلاته قاعدين بالليل سوا قدام البيت ومهاب سرحان فى الارض قدامه
ريناد :انتا ليه مشتغلتش فيها ولا ابتديت تعمر فيها لغاية دلوقتى
مهاب اتنهد بقوه :انتى فاكراها بالساهل اكده دى عاوزه انفار وجرار وبزور وبير ميه وسماد ومواتير ميه وكل ده بفلوس كتيره قوى وانا ياموالاى كما خلقتنى انتى يعنى مفكرانى مبسوط وانا مبعد عن حبيبتى وسايبها اكده حزينه وعطشانه ومقادرش اروى عطشها ولا اشبع جوعها
ريناد :ياااه على تشبيهاتك دى بتتكلم عن الارض كأنها بنى ادمه من لحم ودم وبتحس
مهاب :طب مهى عتحس واكتر من البنى آدمين كمان . طب تعرفى ان الارض بتعرف صاحبها لو حنين عليها ولا قاسى تعرفى لو حنين بتديه من خيرها من غير حساب تعرفى كل مايمشى فيها برجليه تلاقى زرعها فرح وشب وكبر وزهر اما لو قاسى عليها عتزعل منه حتى الزرع لما بيمشى وسطيه بيطاطى منه وميرضاش يبص ليه وقلبه يدبل ويموت طب معمركيش مره سمعتى عن ارض زرعها مات مع ان صاحبها مكلفه وحاططله سماد وبيرويه علطول ؟ اهو الزرع ده بيبقى زعلان من صاحبه
ريناد فسرها :ياااه كل الحب والاحساس ده جواك للارض لشوية تراب امال حبيبتك هيبقى احساسك بيها عامل ازاى
قمر قامت بهدوء من جمبهم ودخلت جوه وخرجت فأيدها لفه وقربت من مهاب وادتهاله
مهاب :ايه ده
قمر :افتحها وشوف
مهاب فتح اللفه :ده دهب المرحومه امنا جيباهولى ليه ؟
قمر :خدهم وبيعهم وعَمر الارض بيهم واشترى كل اللى انتا عاوزه ولما الارض تطرح جيبلى مطرحه
مهاب ضم اللفه وابتسملها بحب :
ياقلبى الدهب ده هدية امك ليكى يعنى بتاعك انتى
قمر :منتا هتجيبلى غيره وبعدين انا وانتا ايه مش واحد وف مركب وحده ولازم نجدفو سوا عشان نوصلو لبر الامان ؟
مهاب :ياقمرى ياحبيبتى حتى لو بعتهم مهيعملوش حاجه الارض عاوزه فلوس كتير اكتر من كده بمراحل فهمتى . يعنى دسى دهباتك وسيبيها على ربك وبكره تتعدل
هنا ريناد دخلت البيت وطلعت بشنطه مربعه اشبه بالصندوق وجايه عليهم
مهاب :ايه اللى شايله الرجل الاخضر ده وجاى بيه
قمر :معرفاش
ريناد وصلت عندهم وحطت الشنطه قدام مهاب وفتحتها واول مافتحتها قمر ومهاب بصو لبعض
قمر:😲 ومسكت من الصندوق بأديها الاتنين دهب ياقوت فلوس مرجان احمدك يارب
لقيتى المغاره فين ودخلتيها لوحدك ياجاحده ومخدتنيش معاكى وكل عضلاتك دى ومقدرتيش تشيلى غير دول طب دنا ساعتها كنت هتقلب حماره واحمل على ضهرى يجى طن ومهحسش بيه كمان وهجرى بسرعة الريح افضى وارجع احمل تانى طب هى الكلمه لسه افتح ياسمسم ولا اتغيرت
ريناد :😂😆
قمر :انطوقى انتى هتضحكى قولى هى فين اتحدتى بسرعه قبل ماالاربعين حرامى يعاودو تانى
مهاب مسك الشبشب بتاعه و ضرب قمر على دماغها راحت مبطله كلام وفضلت مبرقه للصندوق وللفلوس والدهب فأديها وهى ساكته
مهاب :اتكلمى يلا عطلتها بس مش هتفضل عطلانه كتير الفلوس دى جبتيها منين
ريناد :دى فلوس كانت ادتهانى ماما وانا جايه عندكم وقالتلى يمكن تحتاجيها
مهاب :طب وجيباهالى ليه ياروح ماما
ريناد :مهاب انتا مش بتقول انى بقيت عندك فغلاوة قمر وبتعتبرنى اختك
مهاب :حصل
ريناد :طيب خد الفلوس والدهب ده واشترى بيه الحجات اللى لازماك وعَمر ارضك ولما ربنا يفرجها عليك والارض تجيب خير ابقا رجعهملى
مهاب :طيب انتى بتقولى لو زى قمر انتى شفتينى اخدت من قمر ؟
ريناد :عشان مش هيكفو
مهاب :له عشان انا معخدش فلوس من حريم وكمان عشان قمر متزنش تانى عشان عارف زنها عامل كيف
ريناد :طب ده منطق يعنى
مهاب :ده المنطق بتاعى انا وده قانونى ودستورى اللى ماشى بيه ولازم كل اللى حوالى يمشو عليه وبعدين انتى عارفه الارض تاخد قد ايه وقت عشان تتعمر وتجيب محصول زين ؟ سنين وتعب وجهد
طب انتى ايه هيقعدك معاى سنين وانتى كام شهر وماشيه
ريناد حست ان الكلمه دى خنجر اتغرز فى قلبها وحست انه مش عاوزها تشاركه فى حلمه ولا حتى تساعد فيه
ريناد :اه صحيح متأسفه نسيت الحته دى
مهاب :متنسيهاش تانى
ريناد :حاضر بعد اذنك
ومسكت الدهب والفلوس اللى فأيد قمر وحطتهم فى الصندوق بعنف وقامت دخلته جوه
ورجعت والضيق مرسوم على وشها وقعدت وبصت لقمر اللى لقتها لسه على وضعها وبتبص على اديها الفاضيه ومبرقه
مهاب :معلش نسيتها ومسك الشبشب وضرب قمر تانى فوق دماغها قمر بصت يمين وشمال وبصت فأديها وابتسمت 😄
الواحد بقا يتخيل حجات عجيبه اليومين دول تصورو اتخيلت انى ماسكه دهب وفلوس وماليه ادى الاتنين دول وفضلت تقلب فأديها
مهاب وريناد :😂😂
قمر مسكت كباية الشاى وابتدت تشرب فيها وهى مبرقه للنار :الفلس عفش عيخلى الواحد يحلم احلام يقظه والله
مهاب :ابقى تقلى هدوم تانى مره الا احلام اليقظه دى واعره قوى وعتختلف على حسب الحته البردانه فيكى خودى بالك انا نبهتك اهه
قمر وريناد :😅😆
قمر :فهمتك يامينحرف
مهاب :😂 طب يلا قومو ادخلو جوا الا الجو برد والديابه هتتلم دلوك احسن يخطفو وحده منكم ويريحونى ...قصدى يزعلونى
ريناد اتنهدت وقامت وقمر مدتلها ايدها :
قومى خالتك العجوزه الا الركب اتهشهشت يابنيتى
مهاب :خدى بالك احلام اليقظه دى بتأثر عالركب
قمر :يقطع احلام اليقظه وسنينها
مهاب :😂 تصبحو على خير
قمر وريناد :وانتا من اهل الخير
مهاب :امين يارب ابقا من اهل الخير زييكم الا انا الغلبان الوحيد وسطيكم دلوكيت
قمر وريناد دخلو وحضنو بعض ونامو
قمر :رينو
ريناد :هممم
قمر :متزعليش منه انتى خساره فيه والله
ريناد :انا زعلانه عليه عشان هيخسرنى يابنتى ويعرف قيمتى بعد مااسيبه وساعتها هيعض اصابع الندم
قمر :يااااااحلاوتك يارينو اهو انا هفرح فيه واتفرج عليه وهو بيعض اصابع الندم دى
ريناد :طب نامى نامى وبصوت واطى نامت على اخوكى حيطه
قمر :ابقى نامى عليه انتى ودعوتك هتتحقق خخخخخ
ريناد :طب اتخمدى احسن اكتم نفسك بالغطى ده واخلص منك
قمر :نمنت يبوووى هدى اعضائك وبعد لحظات 😴
ريناد :لا حول ولا قوه الا بالله ايه البت اللى النوم عندها بزرار دى تدوس عليه تنام 🤔
ريناد حاولت تنام واتقلبت كتير لكن مقدرتش مجالهاش نوم قامت وخرجت بره الاوضه وسمعت صوت جميل جدا بيغنى من بره وبصت من الباب لقت مهاب سرحان وبيغنى
بصوت حزين ومبحوح
طبيب جراح جراح الناس اداويها
وياما جراح سهرت الليل اداريها
شافونى قالو متهنى
من كتر الفرح بيغنى
تعالو واسالو عنى
تعالو اسألو عنى
انا اللى بيا جراح
اطبه الكوووون متشفيها
اطبه الكون متشفيها
ريناد قربت منه بشويش وهو انتبه لها
ريناد :صوتك حلو اوووى
مهاب ابتسم :منمتيش ليه
ريناد :مجاليش نوم
مهاب :بتفكرى فأيه ولا فمين
ريناد :وايه عرفك انى بفكر فحاجه
مهاب :عشان معينام الليل الا خالى البال
ريناد :وياترى بقا انتا بالك فأيه
مهاب :فى بكره
ريناد :متخفش من بكره وسيب بكره على بكره
مهاب كمل كوبليه جاد شويرى مع بوسى فى الاغنيه دى
ريناد :😂 بالزمه دا شكل واحد باله مشغول بحاجه ده
مهاب :ميغركيش الضحكه المرسومه على وش الناس متعرفيش تحتيها فيه ايه
ريناد :فعلا كلامك مظبوط
مهاب :طب يلا قولى
ريناد: اقول ايه
مهاب :اللى مصحيكى لحد دلوكيت
ريناد كان نفسها تقله انتا لكن لسانها مطاوعهاش :بصراحه اهلى وحشونى اووى وكنت عاوزه اطمن عليهم واطمنهم عليا
مهاب :قريب قوى هاخدك واوديكى عندهم بنفسى بس اصبرى شويه حتى بعد ماقمر تخلص امتحانات ونفوقو ...واتنهد قوى
ريناد :مالك
مهاب :سلمى وحشتنى قوى انا كمان وعاوز اروح اطمن عليها زمانها هتتجنن علينا وانا كمان هتجنن واطمن عليها بالزات انى قصرت معاها قوى فى الفتره اللى فاتت دى
ريناد :اتصل بيها
مهاب :له عاوز اشوفها بعينى مينفعش الاتصال كمان عاوز ازور قبر حسن عشان وحشنى قوى
ريناد :طيب خد اجازه يومين وروحلهم
مهاب :وهو ده اللى هيحصل
ريناد :طب بقولك ايه متغنى والنبى
مهاب :قومى يابت خشى جوه معغنيش غير وانا لحالى عستحى 😊
ريناد :😏
مهاب :قومى جوه يابت قولتلك
ريناد :مش داخله
مهاب :خلاص ادخل انا خليكى ياكش ياجى ديب ياكلك ولا اقولك اتمشى اكده اشويه فى الارض اذ ربما تعتريلك فى شوية رمال متحركه يبلعوكى ومنلقوش منك الا الشبشب جاى يتدحرج الصبح ونعملولك زى شيبوب معمل لعنتر ابن شداد
ريناد:غور يامهاب اتخمد ونام الهى تنام عليك حيطه
مهاب: يعنى مهتقوميش
ريناد :لا
مهاب :براحتك ودخل جوا البيت وقلد صوت ديب
ريناد بصوت عالى :قديمه
مهاب بصوت عالى :حلوفه
ريناد ابتسمت وفضلت سارحه مع النار كتير ومهاب مقدرش ينام ويسيبها بره لوحدها وفضل قاعد قصادها على الكنبه جوا البيت وعينه عليها ومتابع ملامحها اللى ضوء النار اتعكس عليها وزادها جمال على جمالها وابتسم بس كشر مره وحده لما رفعت اديها ورا رقابتها واتاوبت وظهرت عضلاتها مكبره فى ضوء النار
مهاب :جودزلا يخرب بيت ابوكى وبرضك راسك مش بتاعتك اهه
ريناد دخلت عشان تنام وشافت مهاب على الكنبه اللى اول ماشافها عمل نفسه نايم قفلت الباب ودخلت جابتله غطا وغطته وغصب عنها لقت نفسها بتقرب منه وبتطبع بوسه رقيقه على خده وسابته ودخلت قفلت الباب
مهاب فتح عنيه بالراحه وحط ايده مكان بوستها :وبعدين معاكى يابت الناس اخرتها هتكون ايه معاكى
ولف نفسه بالغطى ونام وهو مبتسم
ياترى يا مهاب قلبك هيرق على رينووو ولا
عقل الصعيدى هيتحكم فى قلبك ؟ احداث كتير جميله خفيفه مشوقه فى البارتات القادمه انتظرونى
بقلم /ريناد🌻رينووو
يتبع الفصل التاسع اضغط هنا
تعليقات
إرسال تعليق