القائمة الرئيسية

الصفحات

رواية في عرين الحرب الفصل السادس 6 - شامة وتالا عباس

 رواية في عرين الحرب الفصل السادس - شامة وتالا عباس

رواية في عرين الحرب الفصل السادس

بعد فترة زمنية ........

الشوفير : تفضلو نزلو وصلنا
تامر تمتم لرفقاتو : كأنو مكتوب مسبح ال *** ولا أنا مو شايف

سارية : لا صح اللي قريتو هاد شكلو مخربط بالعنوان من وقت طلعنا معو وانا شاكك انو عقلو مو تمام

سعد للشوفير : معلم انت شكلك مخربط نحنا مو كروب سياحي مابدنا نتفسح ونغير جو
قبل مايحكي الشوفير ويرد عليه وصل ابو ضرغام

ابو ضرغام : ماتواخذوني ياجماعة اتاخرت عليكن بس كان لازم وصل العالم التانيين ع اماكنن

عمر : شو هالمكان ابو ضرغام شوف لوين جابنا الشوفير

ابو ضرغام : بس الشوفير مو مخربط هون رح تقعدو وترتاحو بينما ننطلق

طاهر : بالمسبح ؟؟؟

ابو ضرغام : اي بالمسبح واطمنو جواتو في غرف فيكن ترتاحو فيهن من السفر وشوي رح جبلكن غدا تتغدو ووقت يصير الطريق تمام مننطلق تفضلو ارتاحو هلأ
دخلو كلن لجوا بالفعل كان في غرف ومجهزة ومطبخ كمان صحيح شكلو ماكان كتير مقبول لكن بيفي بالغرض

***___________*****_________

لما صار المساء بعد ماجاب ابو ضرغام العشا اجتمع الكل على سفرة وحدة وبلشو ياكلو ويتعرفو على بعض..

"تامر"
انا تامر عمري 29 سنة .. ربيت بالميتم بدون اهل .. الشام كانت امي يلي ربتني .. ضمتني الها وعطتني حبها وحنانها .. لهيك عازز علي اتركها كتير ..
التقيت قبل سنتين بسارية يلي عمره 27 توفت امه من كم سنة وتعرّف علينا بالصدفة وقعدنا سوا وسعد متل اخي الصغير .. بخاف عليه من النسمة الطايرة عمره 25 سنة بس بتحسوه اوعى من هيك بكتير .. وكان ناوي يخطب حبيبته سلوى ..
نكشه سعد بايده والكل صار يضحك عليه كيف خجل ..

_ صارو متل اخواتي الصغار وبحس انو من واجبي دير بالي عليهن .. سكنا سوا ببيت صغير على قدنا .. كنا يوم نشتغل وعشرة لا .. سعد كان دائما يقنعنا نطلع بس انا كنت ميبس راسي .. بس آخر فترة الأمور تعقدت .. فلقيت احسن حل .. هو الهرب ..

"ينار"
انا ينار .. عمري 28 سنة .. الحرب ما خلتلي غير اخي يمان ..
حط ايده على كتف يمان وأردف ..
عمره 23 سنة .. اطلع عليه وضحك .. هو السبب بأني اطلع لهون .. والا انا بحياتي ما كنت فكر اترك بلدي...

بس لشوف اخي فرحان بهرب من الدنيا كلها كمان ..

كانت عم تطلع عليه نارين وهو اتطلع عليها والتقت نظراتن .. بس سرعان ما خجلت وزاحت نظرها عنه وقلبها عم يدق ..

كمل نيار حكي .. كنت خاطب .. وفسخت ... بلشو يسألوه ليه بس ما جاوب حفاظاً على مشاعر يمان .. لانه ما عرف انه بسبب الطلعة فسخ اخوه ..

"عمر "

انا اسمي عمر بكون اسمي عمري بالنسبة ل سالي هههه
عمري 29 سنة أشّر على تامر وحكا .. بقدك ..

حبيبتي ومرتي سالي عمرها 25
تزوجنا من خمس سنوات بس الله ما طعمنا ولاد لهلأ ..

اهلي توفو بالحرب .. واهل سوسيتي مسافرين ..

طالعين مع ناري .. نارين بعمر سالي 25 مع الاسف استشهدو كامل اهلها من كم يوم .. هي بتكون جارتنا وقريبة جداً مننا ..
قررنا نطلع سوا ..
وهي نحنا هون ..

"طاهر "

انا اسمي طاهر ..
عمري 30 سنة متزوج من اجمل امرأة بالكون .. اطلع برواء وحكا ..
رواء .. يلي روت روحي وقلبي ..
وجابتلي اجمل توأم بالكرة الارضية ..

تيم وتميم .. اشر عليهن وهنن بحضن امهن .. هي تيم وهي تميم ..
اطلع الكل فيه مستغربين كيف قادر يميز بينهم ..
بس ضحكت عليه رواء وقالتله ..
هاد تيم وهاد تميم .. مو دايما بتصيبها يا طاهر ..
ضحك الكل عليه وهو صار يضحك معن ..

بعد ما هديو رجع كمل .. وهي جارتنا تغريد .. مخطوبة وطالعة لعند خطيبا .. طلعنا كلنا سوا بما انها جارتنا وبتضل معنا احسن ...

•••¶¶¶¶¶||||•••

بعد شوي من الأحاديث والتعريف اجا ابو ضرغام
ابو ضرغام : كيفكن شباب ان شاء الله عجبكن الاكل وارتحتو بالقعدة

طاهر : الحمد لله بس ايمتا الطلعة مو حابين نبقى هون كتير معنا عيالنا ومو ظابطة نضل هيك سوا
ابو ضرغام : والله الطلعة اتأجلت يومين كمان عم نستنا جماعات لتجي وهاد الرجال النشمي وعيالو ح يبقو معكن كمان
عمر: ليش نستنى ؟ نحنا مااتفقنا هيك جايين نطلع فورا مو هيك عاساس
و بلشو الشباب يضوجو ماعجبن الحكي
ابو ضرغام : طولو بالكن ياشباب مابصير هيك الشغلة مو سهلة لازم ننطر الجماعة لتكمل وتطلعو كلكن سوا روقو شوي اذا سمحتو
ينار : رح ننطر ونشوف بس مو اكتر من يومين
ابوضرغام : ان شاء الله خير هلا رح اترككن ترتاحو يلا السلام عليكم

دخل الرجال هو وولادو ومرتو وقعدو معهن بعد ماسلمو كان باين عليه كتير متدايق ومو
عاجبو شي

بعد فترة قصيرة قرر طاهر يستجوب هالغريب شو الشي اللي مدايقو ومعكر عليه

حط ايدو طاهر ع كتف الرجال وحكا : شبك أخي شكلك كتير مهموم بتحتاج شي فيني ساعدك بشي نحنا
حسن : اخ شو احكي لاحكي انا قصتي قصة
عمر : تفضل اخ شو كان اسمك بلا صغرة
حسن : اسمي حسن ٤٠سنة من الشقا والتعتير ..
عشت منن ١٢سنة مع اربع ولاد بشقا اكبر ..

عمر : باينتك كتير متعذب حكيلنا اذا ماقدرنا نساعدك منخفف عنك..

حسن : هاد ياسيدي انا كنت مسافر نظامي وطالع بالطيارة ولادي كل يوم يحكو عن أحلامهن بطلعة الطيارة كيف ح يطيرو بالجو فكرت فيها وقلت احسن من شقا التهريب وصعوبتو مع الولاد خليني بيع شقفة هالارض وطالعلن جوزات وسافر انا وياهن ..

سعد : اي وطالعتلن ؟

حسن : اي طالعتن ..

سارية : لكن شو عم تعمل هون

حسن : بدكن القصة من اولها ولا النهاية بس

نارين : لا احكيلنا انا بحب اعرف التفاصيل

انتبهت ع حالها كيف اتسرعت وحكت نزلت راسها بخجل وسكتت

حسن : طيب اسمعو
انتو بتعرفو لما بدك تطالع الجوازات لازم يكون الشخص حاضر فكل يوم انتع العيلة كلها وروح ع دائرة الهجرة والجوزات وهنيك بتشوف العالم كأنو يوم المحشر بالزور لاقدر حط رجلي

سارية : اي وبعدين

تامر: تحمس سارية هههه

حسن : اي المهم واقفين على هالدور شي عشر ساعات ليصير دوري أول يوم وأول ماصار دوري اطلع الموظف بالاوراق نظرة تفحصية قلي الصورة الشخصية لزوجتك لازم تكون بخليفة ملونة هي الخلفية البيضة مو مقبولة ..
رجعت عدلت الصورة كان خالص الدوام...
تاني يوم من بكير رحت كان قدامي شي خمسين شخص وكأنو بنامو هناك يازلمة وقفنا متل النهار اللي قبلو كل هاد وعيلتي معي لما صار دوري اطلع هيك قلي وين الطابع ** مو موجود بدونو مابعملك الوراق قلتلو دبرها من هون او من هون يازلمة قلي اسف وراقك بتصير مو قانونية ..
رجعت فتلت الدنيا على هالطابع لجبتو ب الف ليرة تخيل طابع هالقد قدو بالف وبدي جيب لكل الوراق كل هاد وقلت معلش المهم تمشي امورنا رجعت متل المرات اللي قبلها ووقفت انا وصلت قلتلو طمني ان شاء الله وراقي نظامية وقانونية وماضل شي قلي تمام التمام بس بدك تروح تدفع للبنك المصاري وترجع والبنك بهداك الوقت كان مسكر ..

نطرت لتاني يوم نزلت عالبنك دفعت ورجعت انا وصلت لعندو ختملي الوراق ومشاني قلت لحالي اجاني الفرج رحت عالموظف التاني لازم الولاد ييصمو والكل يبصم اطلع ع بنتي الصغيرة قلي مو هي نفسا البنت اللي بالصورة ياابن الحلال هي هي بنتي نفسا لا لا.. مو هيي انا احلف وهو يحلف قلي بالصورة قاصة شعرها وهون طويل لازم تصورها صورة جديدة ..
وماسمعتلكن الا هداك الصريخ ومرتي بلشت تتطلق اسعفتا عالمشفى ومن عجقتي فيها ضيعت الوراق واساسا المولود الجديد بدو جواز كمان حلفت ماارجع عيدا وبالناقص من هالجوازات حطيت اللي فوقي واللي تحتي عليهن وماطلعو وغير تعبتي وقررت اطلع تهريب ب هالمصاري يمكن اهونلي من الشنططة ..

طاهر : بعينك الله لك اخي مافي حدا مو متعذب ان شاء الله هلأ منطلع كلنا سوا وبما انو تعرفنا عليك كلنا صرنا مسؤولين عن بعض
عمر : اي اكيد صحيح ماالنا غير كم ساعة منعرف بعض بس نحنا ولاد بلد وحدة واخوة باذن الله مالنا غير بعض وخصوصا ب طلعتنا ع الغربة ان شاء الله رح نبقى سوا
الكل : ان شاء الله 

يتبع الفصل السابع اضغط هنا 

 




reaction:

تعليقات