رواية فصليتى القوية الفصل الثاني عشر - ريناد رينو
رواية فصليتى القوية الفصل الثاني عشر
تانى يوم الصبح بدرى عن مهاب وتقريبا بعد الفجر بساعه مهاب وريناد وقمر صحيو على صوت عربيات كتير وقام فتح الباب واتفاجأ باللى شافو وقفل الباب بسرعه وبص لقمر وريناد وزعق بخوف :
هنموووووت استخبو بسررررررعه
قمر بصت لريناد ووقعت على الارض مغمى عليها ومهاب وريناد جروها واستخبو بسرعه تحت السرير
مهاب اول ماخرج شاف عربيات كتير سوده ضخمه وفجأه عربيه منهم اتفتحت ونزل منها عساكر كتير بينطو منها بسرعه وخفه وكل واحد بينزل بياخد مكان حوالين البيت ويقعد على ركبه ويوجه السلاح على البيت
ريناد لمهاب وهى تحت السرير :فيه ايه ايه اللى بيحصل بره
مهاب :اسكتى يافقريه يابومه ياوش الفقر هيعملولنا اباده جماعيه
ريناد :ليه يعنى فيه ايه
مهاب :انا كنت متأكد كنت متأكد بس شاكك
ريناد :متتكلم يازفت انتا سيبت ركبى
مهاب :انا كنت عارف انك مش مننا من لاول اكيد طلعتى مخلوق فضائى وقدرت وكالة ناسا تحدد موقعك متلاقيكى عتطلعى اشعاع ولا حاجه واكيد سكان الكوكب بتاعك جم عشان يستردوكى روحى يارناد معاهم روحى يابابا اركبى سفينتك الفضائيه وارجعى موطنك هتلاقى زيك كتير اهناك ومهتحسيش انك غريبه ومختلفه واوعدك كل يوم هبص للسما واعملك باى باى 🖐
ريناد ضربته على صدره :دا وقت هزارك يازفت
مهاب :😢امال ايه ؟ قوات البلد كلها متجمعه بره ليييه
ريناد سابت مهاب وبتفوق فى قمر اللى ابتدت تفوق وتفتح ببطئ وفى الاثناء دى باب البيت اتفتح واتخبط بعنف وحد بيقرب بجزمه ميرى شايفينو من تحت السرير وفجأه نزل بوز رشاش وجا بالظبط فوش قمر اللى حولت عنيها وعملت مغمى عليها تانى
مهاب وريناد بصو لبعض وبلعو ريقهم بصعوبه وغمضو عنيهم ومسكو ادين بعض واتشاهدو فسرهم
فجأه جالهم صوت هما عارفينه كويس
فتحو عنيكم
الاتنين فتحو مع بعض وبصوت واحد :😳رعد
رعد كان موطى وباصص من تحت السرير بوشه ومبتسم :خضيتكم صح
مهاب :روح ياشيخ اللهى يارعد ياولد رهف يجيك داء الميه لما تنقط تحت منيك وانتا ماشى
اللهى يارب يجيك داء الجرب ويعزلوك لحالك ومتلقى حد يهرشلك
الهى يارب الرشاش اللى فيدك ده يضرب طلقه بالغلط وتصيب رجولتك عشان متقدر تخلف زيي 😢
رعد :بااااس افصل شويه
مهاب :اللهى يفصلو درعاتك ورجليك وتمشى تزحف على بطنك وتتلولو زى التعبان يابعيد
يارب بليتنى بأخته وقلنا عادى لكن هو كمان له
اكده كتير كتير قوى قوى
رعد :وربنا يامهاب لو مبطلت عديد ونواح زى الولايا لاكون مفجر البيت ده وانتا جواه
مهاب :😢قادر وتعملها وخرج بالراحه وهو بيزحف بأديه ويجر باقى جسمه فى الارض وراح قدام رعدوبصله لفوق وهو على نفس الوضع
رعد :اقف يبنى انتا معطل مهمه وطنيه عن التفيذ
مهاب :ليه رايحين تفجرو ايلات وانا حلقت عليكم
رعد ضحك غصب عنه وريناد طلعت من تحت السرير :ايه اللى بيحصل بره يارعد ومهمة ايه دى
رعد غمزلها :مهمه تدريبيه تبع الجيش ولازملها منطقه صحراويه عشان تتم فيها
مهاب :ده على اساس ان الكتايب بتكون فى دريم لاند ولا ايه انتا عتتحدت مع ولد اختك ياحظابط
ريناد :تدريب ايه دا يارعد
رعد :تدريب مشروع زرع والقيادات شافت ان ارضك هى انسب مكان للتدريب ده
مهاب :😕نعم
رعد :انتا مستغرب ليه هو مش فيه حاجه اسمها مشروع حرب . يبقا فيه مشروع زرع
مهاب : 🙃طب والنبى لما يكون فيه تدريب مشروع رقص ابقا هاتهم اهنه برضو الله يخليك وهتلقى ارضى مناسبه برضو
بص هى ارضى انا مناسبه لكل حاجه اذا كنت مربى فيها فضائيين 😄
ريناد فهمت خطة رعد وابتسمت ابتسامه عريضه وضربت تعظيم سلام عسكرى :يارعد باشا انتا تعمل اللى عاوزه طالما فى حدود وظيفتك
مهاب بيلف وسطهم زى الكلب اللى ماشى على رجليه القداميه بس وجارر الورانيه وهما بيتكلمو وفهم ابتسامة ريناد وفهم كل الخطه
مهاب :ياولاد الجزمه عتعملى خطط من وراى يارناد انتى واخوكى طب اصبرو بس اقدر اقف على رجلى تانى ورب الكعبه يارناد لادفنك فى الارض اهنه
وانتا ياحظابط خد عساكرك واتفضل امشى من اهنه ومتشكرين ليك قوى
رعد :يامهاب انا عندى اوامر ادرب العساكر على التكيف مع حياة الصحارى وتعميرها هتتعاون معانا يامواطن ولا اجيبلك قرار من اعلى القيادات باخلاء الارض وجعلها كتيبه عسكريه نظرا لموقعها المتميز فى تضليل العدو
مهاب :الهى تتوه فى الصحرا متلاقى شجره تضلل عليك يابعيد وتتشوى فالرمله زى كوز الدره
انا مكنتش راضى بواحد يعمر معاى الارض عشان ميشاركنيش فيها جايبلى مصر بحالها تعمرها معاى وتشاركنى
رعد :اتحرك يامواطن لبره بسرعه
مهاب :مهو انا لو قادر اتحرك مكنت اتزفت من الصبح منك للاه الخضه على ريق النوم عتكون واعره قوى
رعد :يعنى مش هتقوم
مهاب :مش بيدى 😢شيلنى
رعد :نعم
مهاب :عاوزنى بره شيلنى غير اكده هفضل ازحف زى الكلب اللى عدت على نصه الورانى عربيه اكده طول النهار
رعد نفخ بقوه
مهاب :خلاص معاوزش منك حاجه ولف بنص جسمه القدامى شيلينى انتى يارناد معاوزنش حاجه منه العفش ده
ريناد شالته وخرجته بره قعدته عالسفره
رعد قرب تحت السرير وقمر شافت رجليه وعملت نفسها مغمى عليها لكن هو اكتشفها من حركة عنيها
رعد لف بخفه من الناحيه التانيه وبصلها وطلع فوق السرير بخفه
قمر فتحت بعد شويه لما حست انه مشى
واتنهدت بعنف الله يخرب بيوتكم ياعيال رهف قطعتو خلفى انا واخوى اللهى تتقطع
رقابيكم يارب
رعد شاور لريناد انها تتكلم وان هو مش موجود
ريناد :اخرجى ياقمر خلاص مشى
قمر :روحى الهى جاكى مشش انتى واخوكى
ريناد :بقولك مشى خلاص
قمر :😢اخرج كيف وانى عاااايم فى بحر الغدر وشط النداله مليان
ريناد ومهاب فطسو من الضحك ورعد وقع على السرير من كتر الضحك
قمر حست بحركته فوق السرير بصت لفوق
مهاب :الله يكسفك ياشيخه
قمر :😢 غصب ياولد ابوى وبعدين منتا لساك عامل زى المكسح اللى حداه شلل نصفى اهه هى عتبقا حاجه لااراديه
احنا لما عنتخضو عتحصلنا حجات غريبه
السرير عمال يتهز من ضحك رعد عليه وهو نايم
قمر :فرفط الهى تفرفط متقوم تانى
رعد من وسط ضحكه :وعاملينلى مشكله ومش عارفين نروى الارض طب وقفوها كل شويه فى حته وخضوها وهى تروى الصحرا كلها لا اراديا عهههههههههههاااااى
ريناد ومهاب خربانين من الضحك
قمر خرجت دماغها من تحت السرير وندهت على رعد
رعد نزل دماغه وهو بيضحك لسه
قمر :بص ياحظابط بما انك فى مهمه عسكريه فأى حاجه شوفتها تعتبر اسرار دوله
واى افصاح عنها اسمك بتخون بلدك والعيال يهاهو عليك ويقولو الخاين اهه😢
رعد ضحك بصوته كله لغاية ماوقع من على السرير جمبها وبصلها وسد مناخيره وخرج وهو بيضحك
قمر قامت واستحمت وخرجت لمهاب اللى يدوب رجليه ابتدت تفك من الخضه
قمر :عقولك ايه انتا لازمن تشوفلى حل فصواميلى الخربانه دى يعنى ايه لو نايمه جمب جوزى فى المستقبل وهزر معاى وخضنى اشخ عليه
مهاب :اتنيلى لو عارف اشوف حل كنت شفت حل لحالى فالاول
ريناد بتضحك عليهم جوا المطبخ وهى بتحضر الفطار وكل شويه صوت العساكر بره يعلى بحماس وهما بيعملو الحركه فى المكان
هاع هاع هاع هاع
مهاب طلع لهم ووراهم يعملو ايه ويبتدو من فين والعساكر انتشرت فى الصحرا زى الاسود وشويه وجات معدات حرث وتقليب للارض ومساويه وتجريف
مهاب :ايه ديه كمان
رعد :ايه دى معدات تدريب العسكر ومن مصر
مهاب :يااااحبيبتى يامصر
وابتدا الكل فى الشغل ومهاب بيبص على العساكر وهما بيشتغلو بهمه ونشاط وشويه وجات معدات حفر ومواسير
مهاب بص لرعد بتساؤل
رعد :مصر بتحبك اوووى يامهاب
مهاب :تحياااا مصر
مهاب حدد للعساكر المكان المناسب للبير والعساكر ابتدو يحفرو ويلفو فى المواسير عشان تنزل لتحت اكتر واكتر كانهم بيلفو دراع ساقيه
مهاب قلع جلابيته وفضل بالداخلى وراح يلف معاهم وهو بيغنى بسعاده بصوته الجميل
والعساكر ترد وراه :
هيلا هيلا.. هيلا ...هيلا هيلا
بأدينا نعمر صحارينا
وأتمر ارضك يابلادى
ومن خيرها راح ياكلو ولادى
هيلا هيلا ...الهمه يارجاله
صحارينا محتاجه شقانه
هرويها بعرقى وبدمى
دى بلادى وغاليه زى امى
يااخويا وولدى وواد عمى
يلا سوا نعمر صحارينا
وهيلا هيلا ....هيلا ...هيلا هيلا
بأدينا نعمر صحارينا
بقلم /ريناد رينووو
ريناد واقفه ومتابعه مهاب من الشباك والسعاده اللى مرسومه على وشه وبصت لرعد اللى قلع هو كمان وفضل يلف ويزق معاهم
قمر :له مش وقت تسبيل ياحبة قلبى حدانا جيش عاوز ياكل تعالى اسقطى فمجور العجين والنهارده مفيش مشكله انك تنزلى برجليكى عشان عاوزين كميات كبيره قوى وعلى فكره هسيبك تخبزى الخبيز كله لوحدك وانا هطبخ
لكن ياحزنى فين الطبيخ اللى هيكفى الناس دى كلها 😢
لسه بيتكلمو وسمعو صوت عربيه وقفت قمر بصت من قدام الباب وشافت عربيه مكتوب عليها القوات المسلحه للسلع الغذائيه ونزلت ناس منها وابتدو ينزلو فى اكياس كتير مغلفه ولحوم ودجاج متلج وكل لوازم الطبيخ
قمر :ياما انتا كريم يااارب فرجت يارناد يلا اخبزى وانا هطبخ
قمر :بس طلعى العيش حلو
ريناد :لا متقلقيش دول بياكلو اى حاجه مبيدققوش اهم حاجه الحاجه تكون بتتمدغ
دول وحوش يابنتى
قمر :الله يطمنك
رعد زغد مهاب فى كتفه وشاورله بدماغه على العربيه ومهاب بصلها وبصله بذهول
رعد :مش بقولك مصر بتحبك 😉
مهاب :والله مش عارف هرد جمايل مصر دى كيف انا
رعد :اتنازل عن الارض للدوله 😂
مهاب :😢عقولك يارعد باشا لم عساكرك وروح انا مبطل ملاعبش تانى
رعد ضحك بصوته كله وكملو شغل
عند قمر عسكرى من العساكر شافها اخدت الاكياس كلها من العربيه وبتدخل فيها جه يجرى عليها
العسكرى :عن ازنك ياأنسه هدخلهم بدالك
قمر :تشكر يادفعه والله
العسكرى ابتدا يدخل معاها الاكياس على فكره انا ممكن اساعدك انا بعرف اطبخ كنت شغال فى مطعم قبل الجيش وانتى مش هتقدرى تطبخى لكل العساكر لوحدك
قمر ؛والله يبقى كتر خيرك يادفعه والله
مصطفى :اسمى مصطفى
قمر :قمر
مصطفى :نعم
قمر :اسمى قمر
مصطفى :امممم
رعد من بعيد شاف مصطفى مع قمر ومش عارف ليه اتنرفز وراح عليهم
رعد :بتعمل ايه هنا ياعسكرى
مصطفى :هساعد الانسه فى الطبيخ يافندم
رعد :لا مفيش داعى اتفضل انتا على الخدمه يلا
مصطفى :تمام يافندم ومشى
قمر :😢ليه اكده ياظالم كان هيطبخ معاى
رعد :انا هطبخ معاكى
قمر لوت بقها :اذا كان اختك البت معتعرفش وععلم فيها مفيش فايده علم فى المتبلم هتعرف انتا
رعد :هعمل زى ماهتقولى وبعدين اياكى طول مالعساكر هنا اشوف خيالك بره البيت
وبعدين ايه ده وشد شوية شعر كانو باينين من طرحتها
قمر :شوفو الواد ..؟ اوعى ياواد ياولعه طب دانتا كنت سايب اختك تقعد وسطهم بشعرها كله ومش بس شعر راسها وبشعر صدرها كمان هتعمل نفسك حامى الارض والعرض اهنه
رعد :😂يابنتى اختى عادى تقعد زى ماهى عاوزه دى ارجل منهم ومحدش هيبصلها وخصوصا عشان شعر صدرها اللى بتقولى عليه ده لكن انتى
قمر :اني ايه
رعد :قمر وانتى قمر
قمر : ههههع طيب مامعروفه دى لازم قمر وابقى قمر امال قمر وابقى زنوبه 🤔
رعد :طب خشى قدامى جوا ياكتلة غباء ومشفكيش طلعتى دماغك بره الباب لغاية مالعساكر تمشى
قمر :اسمع اهنه ياحظابط انا هدخل لكن هدخل اسوى الوكل بس لكن بعد مااخلص هطلع والف وسط العساكر براحتى ومحدش فى العالم ده شوف فى العالم يقدر يمنعنى
رعد عمر مسدسه وحطه فى دماغها :
انتى بتقولى ايه يابت انتى انتى هتعصى اوامرى
قمر : حتى لو كتلتنى برضو مش هخاف وهطلع عند العساكر يعنى هطلع تعرف كل اللى بيحصل ده ربنا مدبره عشانى انا ..
عشان يدينى فرصه وانا لايمكن هضيع فرصتى
رعد :فرصه لايه بالظبط
قمر :فرصه للتزاوج ربنا عارف ان المخروبه دى معيجيهاش رجاله بعتلى كل دول عشان انقى وانا لايمكن اضيع فرصتى بيدى اعذرنى يابيه بس دى غريزه وقانون البقاء هو اللى عيحركنى
رعد بزهول :بت انتى اتلمى اما انتى منخوليا صحيح
قمر :اتلم ليه عقول حاجه حرام ولا عيب انا عاوزه اتجوز ...ات ج و ز عشان اشارك فى المحافظه على الجنس البشرى
رعد شال المسدس من على دماغها وحطه على دماغه هو :اموت نفسى عشان ارتاح من غبائك
قمر : 😌موت بسرعه عشان انتا واقف فى طريق سعادتى وبتعرقل سير المنظومه البيئيه
رعد :ادخلى قدامى ياقمر ادخلى وفضل يزق فيها
قمر :بس هطلع بعد مااخلص طبيخ ادينى عقلك اهه
رعد :هخلى العساكر تغمض عنيها ومحدش هيبصلك
قمر :هقولهم خلاويص واخليهم يفتحو 😄
رعد :لطفك ياااااارب طب بقولك ياقمر انتى مش هتموتى نفسك عشان تساهمى فى بقاء الجنس البشرى خلاص انا هساهم معاكى
قمر :😃صوح
رعد :ايوه صوح ودلوقتى قدامى على جوه
قمر بتوهان وهى بتبصله وبتهز نفسها وهى شايله الاكياس :ليييييه
رعد :ايه اللى ليه
قمر :هندخلو جوه ليييه
رعد :عشان نساهم
قمر كرمشتله نص وشها وهى بتزعق :ليييه
هو انتا فاكرنى انثى شمبنزى من غير جواز ولا حاجه نطلعو فوق الشجره ونمارسو الرزيله ؟
وبزعيق :له ياحبيبى فوق انا قمر على سن ورمح ومععملش الغلط واصل
رعد سد بوقها بأيده :هتفضحينى الله يخرب عقلك ادخلى ادخلى جاك طلقه تدخل فى نفوخك
قمر :وتهون عليك ام اشحتو يابو اشحتو
رعد 😕إشحتو
قمر :ايوه اول عيل عشان يعيش وميتحسدش هسميه شحتو عشان هشحته من ربنا
رعد بصوته كله :مصطفى يامصطفففففى تعالا يابنى اطبخ معاهااااااا واى حد من الكتيبه عاوز يطبخ معاها يييجى وقول لام نياظى تجيب نياظى يطبخ معاهاااا
دى هتسمى ابنها اشحتو 😭😭
قمر :ايوه شحتو هه😛😛😛
رعد :غورى ياشحاته من قدامى انا غلطان اللى جيتلك كنت بفكر ازاى وفأيه انا ؟ وسابها ومشى بالخطوه السريعه
قمر حطت ايدها على بوقها وبتضحك عليه وهو ماشى يبرطم مع نفسه :والله لأجننك ياحلو يامفتول العضلات انتا وعضت على شفتها التحتنيه وهزت دماغها اااااخ ناولنى الصبر يارب
قمر ابتدت تطبخ ومصطفى جه وساعدها وعملو طواجن فى الفرن كتير ونظرا لقلة الطواجن دخلو الحلل جوا الفرن
مصطفى :برضو ميكفيش الاكل ده
قمر :مفيش اى حله ولا طاجن تانى
مصطفى بص حواليه وابتسم :بس لقيتها وراح جاب طشت المونيوم كبير وخلى قمر غسلته كويس وعمل فيه بطاطس باللحمه المفرومه ومن فوق رصه كله قطع فراخ متبله
قمر :ايوه عشان بوراك ميتنططش علينا تانى
مصطفى :الله دانتى متابعه بئه
قمر :عيب عليك
مصطفى طب يلا ارفعى قصادى نوديه الفرن
قمر :لاااا ارفع ايه استنى انا هجيبلك اللى تنفع للطلعه دى :رناد بت يارناد
ريناد دخلت عليهم وكلها هباب فى وشها واديها من الفرن والخبيز
مصطفى بصلها واتخض ورجع لورا
قمر :متخافش اليفه😂
وبصت لريناد :ارفعى ياوحش الصحراء وودى على الفرن
ريناد برقتلها بعنيها جامد
قمر :متبرقيش ياوكلاهم مش محتاجه تبرقى واوعى حد يلمحك من العساكر بمنظر امك ده مهيتعرفش على نوعك وهيطخك برصاصه فنص راسك هيفكرك مخلوق مفترس عايش فى الصحراء بيتغذى على لحوم البشر انا قلتلك اهه
ريناد بغيظ :تعرفى انا لو مكنتش مشغوله كنت وريتك شغلك ياقمر لكن من حسن حظك انى مشغوله ورفعت الطشت بسهوله ومشيت بيه بخفه
مصطفى اول ماشافها عملت كده :الله اكبر الله اكبر مين الوحش
ريناد دخلت الاكل الفرن ورجعتله وقفت قصاده عاوز تعرف انا مين ثوانى هعرفك ونادت على واحد من العساكر
كريم عبد الله تعالا هنا
كريم كان من الدفعه اللى قبل مصطفى اللى كانت ريناد بتدربهم وكانت دايما تعاقبه ب٥٠ ضغطه لانه كان بيخالف الاوامر وبيضحك كتير
كريم جه بأستغراب ووقف قصادها وبيبص لريناد قوى
ريناد :عسكرى مجند كريم انزل ٥٠ ضغطه
كريم بفرحه :ريناد باشا وضربلها التحيه العسكريه
ريناد ضحكت بخفه :عامل ايه ياكريم والدفعه كلها عامله ايه
كريم :بخير وتمام وزى الفل من بعدك يافندم
ريناد بتضحك بصوتها كله :بقا كده ياكريم وانا اللى قولت وحشتكم
كريم :لا ياستى متشوفيش وحش ربنا يلهيكى عننا دى الدفعه يدوبك ابتدت تشم نفسها ووشوشهم ابتدت ترد فيها الدمويه
ريناد ؛:😄على العموم انا جيالكم قريب وهتتحاسب على كلامك ده
كريم :ولا تقدرى تعمليلى اى حاجه
ريناد رفعت حاجبها ":ليه يعنى
كريم :عشان دول اخر ٤٠ يوم ليا فى الجيش وبعد كده افرررراج
ريناد :فلٍت من تحت ايدى عالعموم مبروك لأنهاء المده بتاعتك على خير ودلوقتى يلا بالخطوه السريعه على تدريبك
كريم ادى تحيه عسكريه لريناد وجرى بالخطوه السريعه
ريناد بصت لمصطفى
مصطفى :بصى ياباشا اللى ميعرفك يجهلك وبالنسبه ليا انا تحت امرك فى اى حاجه تطلبيها وانا قدامى لسه سنتين و٦ شهور وعلى حسب مااستشفيت من كلام الاخ كريم انها هتكون ايام سوده على ايدك لما ترجعى الكتيبه تانى برغم انى مش عارف وحده ست هتعمل ايه هناك لكن برضو انى خايف 😢
قمر :له متخافش مهتعملكش حاجه دى قلبها اوبيض وغلبانه وعلى ماهتروحلكم اخوى هيكون روضها 😄
ريناد بصت لقمر ونفخت ودخلت عند الفرن تانى
******
الكل منتشر فى الصحرا وبيشتغل بهمه والارض بتتحول لخطوط بالطول ومهاب شايفها قدامه وهى بتتغير وكأنها عروسه والكل بيجهز فيها عشان تطلع فى اجمل صوره
العصر اذن والعمال ابتدو يتعبو ورعد ادالهم اوامر يروحو عند البيت والكل راح وقمر ومصطفى ابتدو يطلعو الاكل ورعد ومهاب يرصو للعساكر وريناد جايه بالعيش وادته لمهاب اللى اخده وهو باصص الناحيه التانيه
ولما بص على ريناد حضن العيش ونط لفوق
مهاب :ايه يارناد النار ولعت فيكى وطفوكى ولا ايه متفحمه ليه ياماما
ريناد :من الفرن
مهاب :ايه كنتى بتدخلى تفوديها وتمسحيها بدماغك ياماما..؟ كنتى تدخلى راسك وتلفيها جواها وهى مولعه وتطلعيها تانى ؟
مكل الناس بتخبز يامقندله غورى يارناد خشى جوا لحد يلمحك من العساكر يفضى خزنت الالى فيكى روحى عامله كيف النخله اللى ولعت فيها النار وكلت ليفها وكرنيفها ومقعدش غير قلبها من جوه جاكى الحنضله
ريناد :هى دى كلمة شكرا اللى بتقولهالى بعد ماخبزت الخبيز ده كله لوحدى على العموم هى عادتك ولا هتشتريها 😢وجريت لجوه
مهاب :مقصدتش يامفحمه خدى اهنه تعالى هخلى العساكر يسبحوكى ويفركوكى بالرمله وهترجعى تلمعى تانى وكيف الجديده بالظبط
قمر :سيبها ياهباب حرام عليك البت من الصبح فرحنالك وعتخبز لحالها لما شربت المر وانتا معندك ريحة الدم
مهاب :هصالحها دلوكيت بس ادخليلها الحوش ومتطلعيهاش اكده قدام الناس
العساكر اتغدو واخدو استراحه وعملو شاى فى حله كبيره على الحطب وشربو وقامو يكملو شغل من تانى
قمر بتلم فى الحاجه مكان الغدا ولقت العساكر ماسحين الاكل كله وحتى العيش خلصو عليه
قمر :يامرارى دا حتى العضم قرشوه مسابوش حاجه كويس انى شايله حبة وكل وعملت حسابى انا ورناد
مهاب قرب لريناد فى الحوش وحط ايده على كتفها ريناد بصتله ونزلت ايده ولفت الناحيه التانيه
مهاب :متزعليش منى عضحك معاكى وبعدين بصى انتى اكيد مشفتيش وشك وجابلها مرايه ريناد بصت فيها واتخضت
مهاب :اهه شفتى انتى خفتى من حالك يبقا انا اعمل اييييه
ريناد :خلاص ياهباب قوم شوف وراك ايه
مهاب :له مقايمش عشان جعان مرضيتش اكل معاهم عشان اكل معاكى وهوكلك بيدى
ريناد بصتله وابتسمت
مهاب :😢 يبوووى عامله زى الراجل اللى كان بيخترع الفنكوش
قمر جابت الاكل ومهاب غمس لقمه ومدها لريناد :يلا هم ياديناصور
ريناد كشرتله
مهاب :عضحك والله يلا افتحى خشمك عشان معارفش موقعه فين بالظبط
ريناد فتحت بوقها ومهاب حطلها اللقمه وريناد عضته بقصد
مهاب :صوابعى ياماما دى مش صوابع طرشى حاسبى ياحبيبتى وكلى لحالك
يأمه تفتحى خشمك وانا ارميلك وانتى القفى
ريناد ؛:ليه كلبه
مهاب :له يبوى كلبة اية لاسمح الله انتى شايفه حالك عتعضى ابسلوكلى
ريناد ضحكت ومهاب ضحك معاها وقمر سرحانه ومبتسمه وماسكه رغيف وبتقطم فيه كل شويه قطمه وهى باصه بعيد وسرحانه فى رعد وجماله وكلامه معاها
مهاب :استر يارب
ريناد هتفوقها من سرحانها
مهاب :له سيبيها خلينى اكل منابها 😄
ريناد :حرام عليك
مهاب :اسكتى انتى واكل منابه ومناب قمر وقام مشى
قمر فاقت وبتدور على منابها فى الطبق ملقتهوش وبصت لريناد لقتها بتاكل فى آخر حتة لحمه ودخلتها بوقها
قمر :😢حرام عليكى اسرح شويه تاكلى منابى دنا يتيمه وغلبانه وانتى عتاكلى حاجة اليتامى منك للاه ياسعرانه هتروحى من ربنا فين
ريناد هتتكلم :متتكلميش ازلطى مناب اليتامه نزلى السحت فبطنك الهى تاكلى من شجرة الزقوم يابعيده ومشيت وهى بتاكل فى العيش حاف 😢
المغرب اذن ورعد ادى امر للعساكر ترجع للمعسكر وهو قرر يبات عند مهاب فى البيت
وطلب من العساكر تيجى عربيه وحده بكره عشان البير مش فاضله غير كام متر ويجيب ميه والارض مش باقى فيها شغل كتير
وفعلا العساكر اتحركت ورعد فضل مع مهاب
رعد دخل ياخد دش ومهاب جابله جلابيه من بتوعه عشان معاهوش غيارات
رعد استحمى ولبس الجلابيه وخرج والجلابيه كانت قصيره عليه
قمر اول ماشافته ضحكت :عامل كيف مسرحية العيال كبرت 😂
مهاب وريناد بصوله وضحكو
رعد :اخوكى قزعه اعملك ايه
قمر :له اخوى طبيعى انتا واختك واكلين العشب الشيطانى 😂
رعد :ربنا يقصر لسانك ده ياشيخه
ريناد :امين يارب احلى دعوه دى ولا ايه
قمر :يا خفه انت واختك ياكوتو موتو ياخواتى 😏
مهاب :يلا ياقمر حضريلنا عشا
قمر :له
مهاب:بت ياقمر اختشى وقومى
قمر :له تعبانه ومقدراش الجعان يقوم يجيب لحالو انا عن نفسى شبعانه
مهاب :يابت
قمر :😗
مهاب بيضرب اديه فى بعض وبص لرعد :
معلش ياباشا هى اكده لما تمكر تبقى كيف الحمار الحارن اللى مهما ضربو فيه معيتحركش
رعد : سيبها هى تعبت فعلا اوووى النهارده خليها ترتاح
قمر :الهى يجبر بخاطرك ويملا جيبك ويستر عيبك ويبشبش الطوبه اللى تحت راسك ياشيخ
رعد :يبشبش الطوبه 🤔
قمر:ايوه باعتبار ماسيكون بعد عمر طويل يعنى بدعيلك للدنيا والاخره
رعد :على العموم انا هاروح اجيب عشا حد عاوز اجيبله وبص لقمر
قمر :😁والله ابغى لكن استحى
رعد :لا متستحيش اللى استحو ماتو هجيبلك معايه
قمر 😗
رعد 😳
مهاب :اتحشمى ياواكله ناسك
رعد دخل المطبخ وخرج وهو عامل سندوتشين اخد واحد وادا واحد لقمر
قمر اخدت الساندويش منه :شاله يارب يطعمك مايحرمك ياولد رهف ياحنين يابو قلب طيب
فتحت الساندوتش ولقت فيه زتونه بس :
شاله يخرب مطنك يابعيد
رعد :😂
قمر :زتونه ؟اختك تاكل منابى فى الغدا وانتا جايبلى شندوتش فيه زتونه معلموكمش فى المدرسه اللى عياكل مال اليتيم ربنا عيعمل فيه ايه 😢
رعد وريناد ومهاب ضحكو عليها كلهم
قمر :والله منا واكله وهخش انام اهه ودخلت الاوضه وحطت دماغها على المخده. ومفيش ثوانى 😴
رعد :😳دى هتنام من دلوقتى
ريناد : دى تلاقيها نامت قبل ماتوصل السرير دى احد المواهب المدفونه بتاعت قمر يبنى
رعد :لا دى عاوزه قناة ديسكفرى
ريناد ومهاب :😂😄
مهاب سابهم سوا وخرج بره ورجع بعد شويه ونده لريناد واخدها وخرجو على حته قرب البيت وفجأه مسك حبل ولفه حوالين جسمها كله وهى بتلف مش فاهمه حاجه وفجاه نزلها وقفها جوا حفره وردم عليها
ريناد :مهاب انتا اتجننت ولا ايه مهاب هتعمل ايه
مهاب :انا مش حلفت برب الكعبه بدرى هدفنك اهنه ادينى عدفنك يارناد فكرك هسكت على خضة بدرى اللى عملتلى شلل نصفى دى ولا الغلبانه اللى شخت على روحها دى داانتى واخوكى هتتنفخو النهارده
مهاب دفن ريناد مخلاش غير دماغها باينه
ريناد :😢 حرام عليك يامهاب خرجنى والله انا مكنت اعرفه هيعمل كده ورحمة بابا
مهاب :رحمة بابا 😳
ريناد :😢قصدى وحياة بابا
مهاب:على العموم انا هسيبك اكده للصبح وانتى وحظك عاد صبحتى عايشه هطلعك
لكن عاد حنش جالك وباسك بوسه مشبك فى خشمك عقربه لسعتك فعينك ديب جه خطف دماغك ورمح بيها يبقى سامحينى عاد
ريناد 😭لا يامهاب والنبى
مهاب :على العموم متخافيش ممكن ربنا يسترر معاكى وميجيكيش غير كلب يتبول على دماغك بس وعشان مياكلكش انا هحطله شوية عضم جمبك كنت داسسهم من ورا العساكر بدرى اهه عشان تشوفى انا قلبى طيب كيف
مهاب سابها ودخل وهى فضلت تصوت وتبكى 😭يامهاب حرام عليك يامهاب طب شيل العضم هيلم كل حاجه عليا يامهااااااب
ياترى ريناد هتعمل ايه والصبح هيبقى منظرها ايه وايه رد فعل رعد على اللى مهاب عمله فأخته
كل ده هنعرفه فى البارت القادم
حبايبى عاوزه اعرف العدد الفعلى لمتابعين الروايه فضلا وليس امرا اضغطو لايك
لايك واحد واحد بس ومن قدم لايك بيداه التقاه وهنيالك يافاعل الخير والثواب
😢شفتونى وانا بشحت لايكات ؟ طب مصعبتش عليكم ؟ فضلتو تحرمونى من اللايكات لغاية ماوصلتونى لكده يمهل ولا يهمل يمهل ولاااا يهمل
بقلمى :اليائسه محطمة النفسيه😢 ريناد 😢
يتبع الفصل الثالث عشر اضغط هنا
تعليقات
إرسال تعليق