القائمة الرئيسية

الصفحات

رواية فصليتى القوية الفصل الحادي عشر 11 - ريناد رينو

 رواية فصليتى القوية الفصل الحادي عشر  - ريناد رينو


رواية فصليتى القوية الفصل الحادي عشر

مهاب اتفاجئ برعد حط المسدس فى دماغه وعَمره وبيزعق 
مشغلينها فى الصحرا ؟ تشغل بنت بالفاس وف عز الشمس والحر انتو ايه يأخى حيوانات بهايم من كتر عيشتكم مع البهايم بقيتو زيها دى حتى الحيوانات عندها رحمه عنكم

فجأه رعد هز دماغه بقوه وبرق عنيه نتيجة ضربه جاتله من الخلف ولف وشه بالراحه لقى قمر ماسكه شومه ولسه هتنزل عليه تانى مد ايده وهو بينزل فى الارض وعنيه بتقفل يعنى بيقولها كفايه كده هقع لوحدى 😂😂😂
وفعلا رعد وقع على وشه
رهف شافت رعد بيوقع ومنظر الدم نازل من دماغه صرخت واغمى عليها مسكها احمد

ريناد انتبهت للمه دى وبتقرب عليهم وفتحت عنيها على وسعهم لما شافت اهلها واقفين وقربت منهم وهى بتصرخ بأساميهم واتخضت لما شافت رعد واقع ودمه سايح ومامتها مغمى عليها

ريناد :ماما رعد 😢مالهم يابابا مين عمل فيهم كده وبصت لمهاب اللى رفع اديه وشاور على قمر اللى خبت العصايه وراها لما ريناد بصت عليها 😁

ريناد :انتى عملتى ايه يازفته انطقى
قمر اتفتحت بزعيق :ايه كان حاطط المسدس فنفوخ اخوى وعاوز يطخه اسيبه يطخه يعنى ولا ايه وبعدين يطلع مين المحموقه قوى عليه ده

ريناد :دا اخويا رعد ياقمر
قمر : اخوكى اخوكى مهو كان هيموت اخوى اسيبه يموته يعنى ولا اسيبه يموته ولا هو اخوكى احسن من اخوى

احمد :يابنتى اهدى حصل خير شيلوه معايا ندخله جوا ونعقمله الجرح وبيخبط على خد رهف بيفوقها
ريناد هتشيل رعد لكن مهاب سبقها وشاله ودخله جوا واحمد شال رهف ودخلها جوه وريناد ابتدت تفوقه وهو ابتدا يفوق ويبص حواليه بتوهان لغاية ماعنيه استقرت على ريناد ابتسملها وهيقوم حس بألم فى دماغه من ورا حط ايده طلعت مليانه دم
ريناد :ارتاح ثوانى هعقم الجرح واخيطهولك
مهاب :معلش حقك عليا انا ياباشا قمر مكنتش تقصد تضربك جامد اكده

رعد :قمر مين
ريناد :اخت مهاب
رعد :مهاب مين
ريناد :جوزى
رعد :جوز مين
قمر :😄 فقد الذاكره
رهف ابتدت تفوق وبصت حواليها بضعف وعنيها جات على ريناد وقامت وصرخت وفردت اديها :يمه بنيتى
ريناد جريت عليها وحضنتها والاتنين بكو سوا بصوت عالى
رهف :اشتقتلك يابعد روحى
ريناد :وانتى وحشتينى اووى اووى

رعد :وانا دمى هيتصفى

ريناد ورهف بصوله وريناد جريت عليه :ياخبر نسيتك ياقلبى معلش وطلعت الخيط وعقمت الجرح وابتدت تخيطله

رعد باصص على ريناد :انتى كويسه
ريناد :انا زى الفل متخافش عليا
رعد بص حواليه وشاف قمر وابتسم
مين القمر
قمر :😁 انا اللى خبطتك على نفوخك من شويه وفقدت الزاكره
رعد رفع حواجبه بصدمه زاكرة ايه اللى فقدتها يابنتى
قمر :مش لساك من شويه مش عارف حد واصل
رعد 🤔
قمر : طب حتى بالاماره دول كام وشاورتله ب٣ صوابع
رعد :😳
قمر :اهه
مهاب :خشى جوا ياهبله وقدمى حاجه للضيوف
قمر :طيب حاضر ودخلت المطبخ وابتدت تحضر فى عصير

رعد بعد ماخلصت ريناد خياطة جرحه ولفتهوله بشاش مسك ايديها وقعدها على رجله
احكيلى ياقلبى كل حاجه جرتلك من يوم ماسيبتينا

ابتدت ريناد تحكى لرعد ومهاب متابعهم بعنيه وودانه بتطلع دخان من ساعة ماريناد قعدت على رجل رعد مش عارف ليه

ريناد حكت كل حاجه حصلتلها من يوم ماسابتهم وكل حاجه عملها عشانها مهاب
الكل بيسمع ومهاب كبر فى نظرهم اووى والكل بصله بأمتنان وشكر وهو اكتفى بأبتسامه واتكى على عنيه

قمر جايه من جوه وحطت العصير وبصت لرعد وريناد وابتسمت وعجبها قربهم من بعض وراحت على مهاب وقعدت على رجليه زيهم لكن مهاب فتح رجليه وقمر وقعت وسطهم والكل ضحك وهى بصتله 😕
رهف :بسم الله قومى حبيبتى
قمر بكسوف :تسلميلى يام ريناد
وبرطمت بصوت واطى :نسيت انك جحش

مهاب :قومى يابت هتتجلعى ولا ايه طب دول عيال بحرى
قمر بصت لرعد وقالت بصوت واطى اوعدنا يارب بواحد من عيال بحرى

مهاب غمز لقمر اللى فهمت وقامت تحضر السفره ورهف وريناد راحو يساعدوها

احمد :انا مش عارف اشكرك ازاى يابنى ولا اكافئك بأيه على اللى عملته مع بنتى
مهاب :انا معملتش غير الواجب ياعمى وان كان على وجودها عندى لحد دلوك فده عشان خايف عليها لانى عارف مروان مهيسيبهاش فى حالها واصل ولو عرف انى رجعتهالكم هيرجع يههدكم من تانى ومش بعيد يعمل فيها حاجه وحشه وعاوزك تطمن من نحيتى ريناد دى عندى زى اختى قمر بالظبط ونفس الغلاوه

احمد :فعلا انا شفت مروان عند فيلتنا ومشى ملحقتش اسأله هو جاى هنا ليه
مهاب :اهو ده اللى خايف منه بس متقلقش كام شهر كده هينسى وهطلقها

ريناد سمعت كلامه وخبطت الطبق على السفره بغيظ ونفخت ومامتها شافتها وهى بتتصرف كده وبنظره وحده لمهاب وريناد قدرت تفهم اللى بيدور بينهم وكمان من نظرات ريناد لمهاب اتأكدت ان بنتها وقعت فى الحب ومحدش سمى عليها وبصت لمهاب وشافت انه يستاهل ان بنتها تحبه
لكن للاسف اتأكدت انه هو معندهوش مشاعر لريناد لانه حتى مش بيبص عليها

الكل قعدو على السفره ورعد وبباه انبهرو جدا بالاكل وحلاوته وشكرو قمر عليه

الليل ليل والكل خرجو بره ومهاب كالعاده ولع النار والكل قعدو مع بعض وابتدت ريناد تشرح لبباها هما بيعملو ايه فى الارض وشاف فعنيها حماس ولمعه وسعاده وهى بتتكلم وتشاور بايدها على الارض اول مره يشوفها وشاف فرحتها بحوض الكسبره بتاعها اللى زرعته

احمد :طب انا ممكن اجبلكم المعدات اللى تشتغلو بيها وادفع اجرة العمال وبكده هتقدرو تزرعو الارض
ريناد بصت لمهاب بعيون كلها امل وترجى انه يقبل العرض
مهاب :آسف مينفعش اقبل عرضك ده
احمد.:ليه يبنى انتا جوز بنتى وزى ابنى وانا
حابب اساعدك تكمل حلمك اللى واضح انه بقى حلم ريناد هى كمان

مهاب :له الحلم والارض بتوعى انا وريناد مينفعش تحلم معايا لانها اكده اكده مش هتكمل الحلم معايه لانى هطلقها قريب وهترجع لبيتها ودراستها وحياتها هى ايه اللى يجبرها تكمل فى الحياه دى وفى الظروف دى
ريناد عنيها اتملت بالدموع وهى بتسمعه وهو بينتزعها من حلمه بالسهوله والبساطه دى وقامت تتمشى ورعد لحقها واتمشى معاها
رعد :مالك حاسك مش طبيعيه
ريناد :ليه منا زى منا
رعد :لا اكيد مش انتى ريناد اللى اعرفها فيكى حاجه متغيره وهتقوليلى هى ايه
ريناد :قلبى
رعد :ماله
ريناد اتنهدت :حَب يارعد
رعد بصلها وابتسم :مش غريبه .
تعرفى انا نفسى لما سمعت اللى عمله مهاب معاكى حبيته كون انه انقذك من الزفت مروان وحافظ عليكى لغاية دلوقتى يخليكى تحسى نحيته بعرفان الجميل وتترجمى ده على انه حب
ريناد بضيق :يامهاب انا مش صغيره ولا بنت فى اعدادى عشان اخلط بين مشاعرى ومعرفش احدد احساسى بالظبط

رعد :طيب اهدى انا بقول وجهة نظرى
ريناد :لا وجهة نظرك غلط
رعد : طيب افترضنا انك بتحبيه زى مابتقولى ايه اخرت الحب ده

ريناد :معرفش بس اللى اعرفه ومتأكده منه انه عمره ماهيحبنى ولا يبصلى كبنت ابدا
رعد بصوت واطى :والله معذور
ريناد :متبرطمش اساسا كلكم كرجاله بتحرككم غريزتكم الحيوانيه وبتحبو البنت بناء على جسمها

رعد :اهى دى الحته الوحيده اللى لو وصفتى فيها الراجل بأنه حيوان مش هيزعل 😄
ريناد :سطحيين وكلاب
رعد :ايوه كلاب كلاب انا نفسى راضى اكون كلب وابن كلب ومتجوزش وحده زيك

ريناد :بقولك ايه هتنرفزنى ليه وتخلينى اطلع غلب الايام فيك مش انتا السبب فى كل ده وجسمى ده انتا اللى شجعتنى يبقا كده

رعد :نعععععم هتجيبيها فيا وانتى يختى لما كنتى كل يوم تتمرنى كنت بسقيكى حاجه اصفره واخدك معايا غورى ياريناد من قدامى
بدال مااضربك بوكس اخرشم وشك

ريناد نطت بسرعه قدامه واخدت وضع الضرب وفضلت تتنطط :طب تعالا كده بمناسبة الخرشمه وابتدت تضرب فيه برجليها واديها وهو يصد ويتحرك بمهاره عاليه وبين كل فتره والتانيه يديها ضربه فحته مختلفه

رعد وهو بيضحك :لياقتك قلت على فكره
ريناد :قَلت قَلت انا مش عاوزاها اصلا

الكل شايفهم من بعيد ومهاب مبتسم على حركات ريناد وخفة جسمها
قمر :يبووووى عيتنططو كيف القرود

ريناد ورعد رجعو بعد ماتعبو وقعدو معاهم تانى
احمد :اتتجننتو ليه وكسرتو بعض
ريناد :شحنة طاقه زياده وفرغناها
احمد :يعنى شغلك فى الارض ده كله مفرغش طاقتك ؟

قمر : والله اللى زى عيالك دول مفيش من نوعهم ياعم الحج دول معيعرفوش التعب واصل المفروض تحطهم فى محميه طبيعيه عشان تحافظ على الفصيله من الانقراض

رعد :بتقول ايه دى
ريناد :😂لا نصيحه اخويه اوعى تركز معاها دى . تتجنن على طول
مهاب مسك شبشبه وطلع لسانه وهيقوم
قمر :ابدا والله منتا قايم انا ماشيه لحالى
هقوم اعمل قهوه
مهاب : غورى تاك غوره

رعد فضل متابع قمر وهى ماشيه على البيت وبتبرطم بكلام كتير مش مفهوم ولا مسموع واتمنى لو كانت باصه عليه عشان يقرا حركة شفايفها ويعرف بتقول ايه

الكل فضل يتكلم ومهاب متابع ريناد اللى كانت فرحانه وبتتكلم بمنتهى السعاده وشاف كمان سعادة اهلها بيها وحبهم ليها ومش عارف ليه كان مبسوط اوووى لسعادتهم دى

اخدو السهره مع بعض وقررو انهم يدخلو ينامو ....دخلو البيت والرجاله نامو مع بعض فى اوضه والستات نامو مع بعض فالاوضه التانيه

قمر اول ماحطت دماغها على المخده 😴
رهف بأستغراب :رينوو لحقى البنيه اتخربطت
ريناد :لا ماأغماش عليها هى نامت كده
رهف :يمه بسم الله ماكملت ثوانى
ريناد :اه مهى بتحط دماغها عالمخده الباور بيتفصل علطول
رهف :😄غريبه هاى البنيه ونامت وفردت ايديها لرهف

رهف حاضنه بنتها ونايمين على السرير ريناد فحضنها وهى بتملس على شعرها بحب
ريناد :ماما انا تعبانه اوووى
رهف اتنهدت : اى بعرف بنيتى فاهمه عليج
ريناد :طيب اعمل ايه قلبى ياماما واجعنى وابتدت تبكى
رهف :شوفى حبيبتى رجلك بيحب ايش وساويه
ريناد :اللى بيحبه مقدرش اعمله لانه مش عندى جوزى عاوز وحده جميله وانا مش جميله ياماما
رهف :مين حكى هيك ماكو ست مانها جميله كل وحده وعندها جمال خاص ولازم تعرف مواطن جمالها وتبرزه وانتى عندك هواى جمال بنية قلبى بس محتاجه تعرفى كيف
تبرزى جمالك

ريناد :😢انا معنديش مواطن جمال خالص انتى مش شايفانى
رهف :تعرفى اكبر مشاكلك رينووو انك مانك حاسه من جواكى انك انثى جميله لان الجمال الداخلى بينعكس على الجمال الخارجى
انتى بيضه مع انك احترقتى من الشمس بس عادى وعيونك حلوات وتمك صغير وشعراتك يخبلون انتى بس كل مشاكلك انك معضله شويتين

ريناد :اهى هى دى اكبر مشكله عندى
رهف :لا مانها مشكله كبيره انتى بس اتركى تمريناتك القاسيه واتركى جسمك ينساب متل جسم اى بنت عاديه
ريناد :عضلاتى مش هتروح
رهف :لا بتروح بس انتى ابدأى وشغله تانيه ماتشتغلى بالارض بأيدك طول مازوجك شايفك متل الزلم ما بيشوفك بنيه بنوب

ريناد :بس انا لازم اساعده فى الارض
رهف :راح نلاقى خوش طريقه وما تشتغلى بيدك مرة تانيه

ريناد شاورت بدماغها لمامتها وحضنتها ونامت فى حضنها
الصبح بدرى رهف واخده ريناد فى حضنها وحست بأيد بتتلف حوالين وسطها بتحضنها
رهف لفت لقت قمر حضناها ابتسمتلها

رهف :معلش بس لما شفتك حاضنه رناد افتكرت امى الله يرحمها وافتكرت حضنها الدافى وغصب عنى ايدى حضنتك

رهف حضنتها وملست على شعرها :يابعد عمرى انتى ياروحى فيكى من اليوم تصيحينى ماما وانا من هاليوم بعتبرك متل ريناد
قمر حضنتها جامد وابتسمت

ريناد صحيت من النوم لقت مامتها حاضنه قمر :الله الله لحقت استولت عليكى البت دى

قمر :انا مستوليتش على حد هى لحالها لفت وحضنتنى وقالتلى من النهارده انتى بتى وريناد هرميها عشان بقالها كتير معاى وقدمت خلاص

رهف بخضه :يى لا تصدقى رينو والله كذابه الله لاينطيج راح تسوى فتنه من على بكرة الصبح

ريناد :😂 رهف متاخديش عليها دى بربع عقل اساسا

قمر :اكده يارهف انا كنت حاسه من الاول انك عتضحكى على وتدهلسى عشان تتسلى بى شويه ولما بتك صحيت رمتينى ورجعتيلها ومهمكش قلبى اللى هتكسريه روحى يارهف روحى لبتك وانا مع الايام هلاقى اللى ينسينى جرح قلبى 😣 هقوم احضر الفطار ونزلت وهى ماسكه قلبها وبتتسند على اى حاجه تقابلها

رهف 😳 يمه هالبنيه مالها
ريناد :متاخديش عليها
رهف :بس والله حبابه ودمها خفيف دخلت قلبى
ريناد : طب انا هخرج عشان اساعدها فى الخبيز
رهف بصدمه :شنو عم تخبزى رينووو
ريناد :بخبز وبطبخ وبخلى مهاب ياكل غصب عنه كل يوم بكتفه واكله من اكلى بالعافيه انا وقمر
رهف :يابعد عمرى وليدى حرام عليكن والله مبين عليه خوش رجال وآدمى ليش عم تعذبوه هيك
ريناد :اسكتى يستاهل وسابتها وخرجت

بعد شويه الكل صحى ورهف خارجه عليهم ولبست فستان من بتوع ريناد الجداد اللى ملبستهمش من ساعة ماجت وكان مخصر على الوسط وواسع من تحت وعملت شعرها ضفيره وحده وجابته على جنب وسابت خصل بعشوائيه نازله من شعرها
اول ما خرجت صبحت والكل رد عليها الصباح

مهاب :عمى على فكره انا زعلان منك 😢 انتا عملت شى فظيع عملت حاجه تبكى الحجر انتا اتجردت فيها من الانسانيه

الكل انتبه واحمد بخضه :خير يبنى عملت ايه والله معملت حاجه

مهاب :له عميلت لما تفرط فى بتك فلذة كبدك وتهون عليك وترميها فصليه بمنتهى القسوه يبقى عميلت طب كنت ابعت مرتك بدالها واهى اكده اكده معاك من زمان وشبعتو من بعض انا مش مسامحك 😢

الكل ضحك لما فهم قصده
احمد :لا رهف مقدرش استغنى عنها يوم واحد
مهاب :ورب الكعبه انا لو حداى مستغنى عنها دقيقه وحده احطها فمدليه اكده وامسكها فيدى وين مااروح
رهف بضحك :يى عليك ولك ريناد راح تقتلك
مهاب :ياشيخه انا مش عارف وحده بالرقه والانوثه دى تخلف دول كيف 🤔
الحكايه فيها سر كبير

ريناد :😠وياترى ايه هو السر ياخفيف
مهاب : يعنى تكون مثلا عملت عمليت تلقيح فيكم وخصبوها من ديناصورات ولا حاجه

الكل ضحك
ريناد :والله اذا كنا احنا لقحونا من ديناصور فأنتا لقحوك من حاجه تانيه برضو من فصيلة الحيوانات بس مش هقول احسن تزعل

قمر :انا عارفه هتقولى ايه هتقولى الحمار صوح 😄
مهاب زغر لقمر
الكل ضحك وقمر معاهم ولا همها نظرات مهاب ليها اللى هتحرقها

الكل فطر وبعدها احمد ورعد ورهف استاذنو وروحو ومهاب كمان رايح على شغله شغل الموتوسيكل وهيمشى ريناد ندهتله
ريناد :مهاب
مهاب بصلها لورا
ريناد بأبتسامه :متشكره اووى
مهاب ابتسملها :عدى الجمايل بس
ريناد :لا انا برد الجميل علطول مش بسيب جميل الا لما أرده وعشان انتا السبب فى الفرحه اللى انا فيها النهارده انا هطبخلك النهارده بأيدى

مهاب :😢الله يعكنن عليكى ياباعيده ع الصبح وبعدين انا معملتش فيكى جمايل واصل ومش عاوزك ترديلى حاجه ردت الميه فزورك ياشيخه وشغل الموتوسيكل بسرعه خلاه عفر على ريناد رمله وطلع يجرى

ريناد مراقباه وهى بتضحك ولما بعد عنها وقرب يختفى فى الطريق اتنهدت وبصوت واطى لكن قمر سمعته :بحبك يامهابى

قمر من وراها بصوت عالى :عكشتك بالجرم المشهود عتحبى فخوى عههههههههههه

ريناد اتخضت :ياربى انا مش عارفه بتطلعيلى فأجمل اللحظات منين
قمر :انا عملك الاسود الملازمك على طول
نيهههههه يلا بطلى حب فى مهابك ولا هبابك وتعالى عشان تطبخى

ريناد :لا انا رايحه اشتغل فى الارض مش هطبخ اطبخى انتى
قمر بزعيق :بت انتى انا عمتك ولما اقولك تطبخى يبقى تطبخى سامعه ولا له

ريناد بصتلها وحطت دراعاتها ورا دماغها بطريقه اظهرت كل عضلاتها وبصت لقمر

ريناد :ولو مطبختش هتعملى ايه بقا
قمر بخوف مصطنع :😁هطبخ انا تحبى حاجه معينه اعملهالك على الغدا ياحبيبتى

ريناد ضحكت ضحكه خفيفه :اهو كده ناس تخاف متختشيش ومشيت على الارض وهى حاطه اديها فوسطها وكل عضلات جسمها بارزه وقمر مراقباها وهى ماشيه :

يامرى عليك ياولد ابوى وعلى حظك المربرب ايه دى متجوز وحش الصحراء

قمر اشتغلت فى الارض واخر النهار مهاب رجع وجاب معاه بذور قمح وابتدو يشتغلو فى الارض هو وريناد ويبزرو البزور وشغلو موتور الميه اللى فضل شغال طول الليل لكن مرواش غير مربع صغير جدا من الارض

مهاب صحى لقى ريناد واقفه فى الارض ومربعه اديها على صدرها وبتبص للارض

مهاب :قولتلك مهينفعش بس لما شفت لمعة الحماس فعيونك حبيت انك تجربى بنفسك تعبتى نفسك وتعبتينى عالفاضى

ريناد بغضب :انتا اللى خليت تعبنا عالفاضى الفلوس موجوده وكل حاجه محلوله لكن انتا اللى مخك مقفل مش فاهمه موقفك بصراحه

مهاب :افهمك موقفى... انا معاوزش حد يساعدنى ويجى بعد اكده يعايرنى بمساعدته ويقولى لولا وقفتى جمبك مكنتش هتعمل حاجه معاوزش حد يجى فى الاخر ويقولى انا عملتك فهمتى موقفى ولا لسه

ريناد :وايه اللى هيخلى حد يقولك كده الكلمه دى بتتقال لحد لما يقل اصله مع حد

مهاب :اهوووو هو ده مربط الفرس تعرفى اللى هيساعدنى هيحس انه مشاركنى فى كل حاجه وكل تعبى وشقاى واللى هعمله بعد اكده هيحس انه ليه حق فيه ولو جيت اعمل لنفسى خصوصيه منه يقولى ساعتها انتا قليل اصل

ريناد اتنهدت :منطق غريب
مهاب :بالنسبالك ....وبعدين انتو ليه عاوزين تحرمونى من انى ابدا اول خطواتى بنفسى
سيبونى اخطى واقع واقوم واتعتر لغاية مااوصل لهدفى ولف ريناد عليه ومسكها من دراعاتها :
ريناد انا فاهم قصدك ومقدر تعبك معاى لكن ارجوكى فموضوع ارضى بالزات مهرضاش بأى نقاش وياريت لو لى فقلبك شوية معزه صغيرين كد اكده وشاور بصوابعه سيبينى براحتى
ريناد اتنهدت ووطت دماغها وهو سابها وراح على شغله وهى قعدت فى الارض وباصه للميه اللى واقفه مش بتتحرك من مكانها والارض بتشرب فيها بعطش شديد

********************
فى الصعيد
عدو يومين على ابطالنا

مروان :ايه ياولد ابوى مقررتش هناخدو ارضنا كيف من مهاب الكلب
حمد :مش هناخدوها ومش ارضنا وطلعه من دماغك الزفت ده وانساه خلاص

مروان :كلام ايه ده
حمد :زى ماسمعت انا سالت وعرفت ان الارض دى مهاب اشتراها من سنين وفى الوقت ده مكانش لسه ابوك مات ولا كان مهاب بيحاسب على محصول الارض بنفسه وكمان ابوك مكانش حداه فلوس يديهالو
فطالما مسرقناش يبقى خلينا بعيد عنه

مروان :وده من ميته ده
حمد بزعيق :من دلوك ورايح افهم ياغبى احنا شغلنا عيكبر كل يوم عن اللى قبله ومحتاج تركيز مننا احنا الاتنين ومش فاضيين لمشاكل دلوك تلهينا عنه انا اشتريت المحجر اللى جمبينا بمعداته بكل حاجه فيه وصاحبه اداهولنا والدفع على دفعات يبقى نخلو ادينا احد من سنانا عشان نسددو تمنه انتا تعرف اننا بالمحجرين دول طوقنا كام بلد متاخدش غير من محاجرنا يعنى بعد اكده نغلو زى مانغلو فى الزلط والرمل محدش يقدر يفتح خشمه ولا حتى حد يقدر يجيب من بعيد عشان اللى هيوفره فى النقله هيخسره فى كرا العربيات فهمت يابجم
والخطوه الجايه عاوزين نعمل مصنع طوب كبير عشان يبقى حدانا الشيئ وحدانا الشيئ لزوم الشيئ فهمت

مروان هز دماغه
حمد :اقطع دراعى لو كنت فهمت شيئ

مروان فى سره :انتا بعدت ياحمد لكن انا عندى حق عند مهاب ومش هسيبه وهاخده يعنى هاخده

**********************
عند مهاب

مهاب الصبح راح لشغله
قمر بتخبز قدام الفرن وتغنى بصوت جميل جدا

انا زى اى بت فى الدٍنيا كولها
عدوب من كلمه حلوه تلمسنى واحسها
وافضل فاكراها دايما وفقبى ادسها
وانتا حنين علي حتى فلمست أدي
لو تطلب عمرى كله ياحبيبى عليك شوى

وفضلت تعيد وتزيد فيها

رعد فى الاثناء دى كان وصل الارض عشان يشوف ريناد وسمع الصوت الجميل وراح نحيته ووقف ورا قمر اللى بتغنى وترقص بأديها وكتافها ومندمجه اوووى وعمال يضحك عليها

رعد :بعيدا عن كلام الاغنيه اللى دمرتيه وعجين الفلاحه اللى من الصبح بتعمليه لكن بجد صوتك جميل جدا

قمر اتخضت وبصتله :انتا اهنه من ميته
رعد :من اول الاغنيه
قمر :يمرى اتفرجت عالشو كله
رعد بيضحك وهزلها دماغه
قمر :يادى الكسوف 😔
رعد :لا عادى بس صوتك الجميل غطى على كل حاجه
قمر ابتسمتله :شاله يخليك ...تعالا خد عيش سخن بيبقى حلو قوى وهو لساتو طالع من الفرن
رعد قرب واخد من قدامها وحدة عيش :مهو لازم يطلع حلو عشان اللى خابزاه قمر وغمزلها

قمر :😄 ايوه انا الخبزاه
رعد كشر بنص وشه :مفهمتيهاش صح ؟
قمر :هى ايه
رعد :لا ولا حاجه هى رينو فين
قمر :فالارض الحزينه عتبرم زى اللى عليها غزاله معتقعدش
رعد لبس نضارته ومشى قدامها وهو بياكل فى الرغيف وقمر متابعاه بعنيها ومبتسمه
يبوى عالطول والعرض والحلاوه اهو ديه صوح اللى يتقاله انتا امك نحله هههههعههههع

قمر فاقت على ريحة شياط ودخان كتير طالع من الفرن وبصت لقت العيش اللى فيها اتحرق وطلعته :
يمرى العيش اتحرق نحله تقرصك ياقمر يام عين زايغه اهو شوفى ربنا عملك ايه .
بس والله الواد الظبوط ده حلو ورجعت تغنى من تانى

رعد راح على ريناد وشافها قاعده ومهمومه وبتملى ايدها رمل وترفعها وتفردها والرمل ينزل من بين صوابعها

رعد قعد جمبها :وده من ايه ده انشاء الله
ريناد :زهق على احباط على كل حاجه وحشه فى الدنيا لما يجتمعو فى حد بيعملو كده
رعد :ياساتر يارب مكنتى حلوه من يومين حصل ايه
ريناد اتنهدت :الحال بيتبدل فى لحظه
رعد :طب احكى
ريناد :طب هات حته رغيف
رعد :لا
ريناد :طب كنت جبتلى وحده مفطرتش
رعد :احكى وقومى افطرى لكن دى مديهانى قمر 😍
ريناد :امممم قمر قولتلى ..ربنا يسترررر
ابتدت ريناد تحكى لرعد كل حاجه وكل اللى قالهولها مهاب
رعد :على فكره عنده حق وبعدين دا انسان عصامى عاوز يبدا من الصفر ويبنى نفسه بنفسه انتى ايه مزعلك
ريناد :امته يامهاب دا لازمله سنين عشان يقدر يبنى نفسه ويجيب معدات للارض هياخد كام سنه طيب على مالارض تبتدى تطرح عمر بحاله يارعد
رعد :وانتى بالشكل ده هتموتى من الزعل ومحدش هينفعك

ريناد :غصب عنى انتا متعرفش انا حبيت الارض دى واتعلقت بيها ازاى
رعد :طبعا مهى غلاوة الارض من غلاوة صاحبها 😉

ريناد اتنهدت :صاحبها المجننى.. هباب على قول قمر
رعد ضحك :على فكره مشكله قمر دى
ريناد :مش مشكله وحده دى كل مشاكل العالم كلها متجمعه مع بعض كونو قمر

رعد :هى ايه ظروفها
ريناد :ايه الحكايه ؟ اوعى انا بقولك اهو هتندم حيث لا ينفع الندم وقد زعتر من بعتر على قولها
رعد :طب هى عندها كم سنه
ريناد :فى ال١٨
رعد :ياااه دى صغيره اووى
ريناد :ومجنونه ابعد عنها

سمعو صوت قمر من وراهم :بقا اكده يارناد يابت رهف قاعده تقطعى ففروتى قدام اخوكى وانا اللى مهونتيش علي وجيبالك طفح وعامله لكينج كونج اخوكى ده شاى طب والله خساره فيكم ولفت وراجعه

رعد :طب انا متكلمتش ادينى الشاى

قمر :وادى الشاى اهه وكبته فى الارض خلى الارض تشربه احق منكم عالاقل تطرح شجرة شاى واستفاد منها ولفت ورفعت دماغها لفوق ومشيت بالخطوه السريعه

رعد :😳ايه البت دى
ريناد :هى دى قمر طب خدت بالك من شجرة الشاى اللى هتطرح من التفل دى 😂
رعد :ايوه 😂
ريناد :اهى دى اقل حاجه عندها ... مش بقولك ..عشان تبقى تصدقنى

رعد :طب يلا استأذن انا سلميلى على مهاب
ريناد :استنى هروح البيت معاك جوعت

ريناد ورعد راحو على البيت وريناد دخلت ورعد دخل دماغه وبيبص يمين وشمال فى البيت جاله صوت من وراه

قمر :انا مش جوه اسحب رقبة الظرافه دى من جوه
رعد ضحك :وانتى ايش عرفك انى بدور عليكى
قمر :يعنى عارف انى انا ورناد بس اللى قاعدين والبيت وشايفه قبل اكده كنا قلنا عيكتشفه يبقى عتدور على مين

رعد :بطمن على ريناد بعد مادخلت

قمر كرمشت نص وشها :ليه هى كانت دخلت تل ابيب 😏
رعد ضحك بصوته كله ولبس نضارته ومشى وقمر مراقباه وبصوت واطى :امشى تاك القرف فى حلاوتك

رعد :اهو انتى
قمر عضت صباعها وبرقت عنيها :يبوووى هو واخته عيسمعو دبة النمله يخرب مطنهم

ودخلت جوه البيت لقت ريناد قاعده تاكل وهى بتضحك واول ماشافتها زادت فى الضحك
قمر :اضحكى ياخاينه العشره مش مسمحاكى ولا مسامحه اخوكى الحلو العفش ده

ريناد:بقولك اخويا لا
قمر :اشمعنا
ريناد :ده ظابط جيش وبيطلع اجيال عشان تقدر تحارب لو قربتى منه انتى هتجننيه وهيطلع اجيال زى كركر والبلد تضيع 😂

ريناد :طب والله انتى ظالمانى 😢ياظالمه روحى قلبى وشعر رجلى غضبانين عليكى وسابتها ودخلت جوا

ريناد بتضحك بصوتها كله
قمر :اضحكى ياجاحده اضحكى قوى 😢

رعد وصل عند فيلتهم واول مادخل شاف رهف مع محمود وهما 💏
رعد :مقلنا اتهديتو رجعتو تانى للانحراف ليه
احمد :اخرس ياولد وتعالا قولى كنت فين

رعد :رحت لريناد
رهف :حبيبه قلبى شلونها
مهاب :والله يارهف زعلانه ومدايقه جدا
احمد :ليه
رهف :يي شو يلى جرا فى هاليومين كانت فرحانه وما احلاها

رعد حكالهم على كل حاجه
احمد :طيب انا عندى حاجه هتفرحها جدا وقام جاب ورقه ووراها لرعد اللى رفع حواجبه بصدمه

رعد :عملت ده امته
احمد :من اول مارجعت من عندها وشفت اللمعه اللى فى عيونها لما كانت بتتكلم عن الارض وانا حلفت انى مش هسمح لحاجه فى الدنيا تطفيها وبعت ناس سالت على اصحاب الارض اللى جمب ارض مهاب وحواليها واشتريت منهم ٦٠ فدان طبعا نظرا لاصرارى علو السعر جدا لكن مش مهم المهم ريناد تكون مبسوطه وتقدر تعمر ارضها زى ماهى حابه وتسيب ارض مهاب يبقى يعمرها براحته

رعد :بس انتا كده مش هتفرحها كده هتدمرها لان هى حبت الارض عشان هى ارض مهاب وعاوزه تعمرها عشان تشارك فى تحقيق حلم مهاب
احمد :لكن مهاب مش عاوزها فحياته ولا حتى فحلمه
رعد :لكن هى بتحاول وع العموم ابقى روح وقولها وشوف رد فعلها
احمد :لسه مش دلوقتى لما الالات اللى مشتريها توصل عشان تبتدى فى ارضها علطول

رعد :طب تعالالى كده هنا شويه
احمد قربله
رعد حط ايده على كتافه :انتا جبت فلوس الكلام دا كله منين
احمد :ايه منين دى ياولد هو انتا فاكرنى معاييش فلوس ولا ايه ؟ الفلوس دى انا جمعتها عشان اروح ادفعها لحمد ومروان واخلص ريناد من اديهم لكن لما لقيتها مبسوطه قلت افرحها بيهم وكده كده طلعو من زمتى ليها

رعد :ربنا يخليك لينا ياحمودى يارب
رهف :لا هو حمودى لحالى
رعد :خوديه يختى اشبعى بيه وزق احمد على رهف وقع عليها
رهف :يمه اسم الله حبيبى
احمد :ولددد انتا مش متربى وبص لرهف و💏
رعد :🙈 انتو مبتشبعوش الله يقرفكم ومشى

************************************

تانى يوم الصبح بدرى عن مهاب وتقريبا بعد الفجر بساعه مهاب وريناد وقمر صحيو على صوت عربيات كتير وقام فتح الباب واتفاجأ باللى شافو وقفل الباب بسرعه وبص لقمر وريناد وزعق بخوف :
هنموووووت استخبو بسررررررعه
قمر بصت لريناد ووقعت على الارض مغمى عليها ومهاب وريناد جروها واستخبو بسرعه تحت السرير

ياترى يامهاب ياحزين ايه اللى هيحصلك

احداث كتير مشوقه وحلقات ضرب نار انتظرونى فى الحلقات القادمه

رساله بصوت قمر لكل قراء الروايه

(على فكره رناد حبيبتى زعلانه منكم قوى وعتقول انتو مش مقدرين تعبها واصل البنيه صوابعها طرشقت من كتر الكتابه عشانكم وعشان تضحككم وتسليكم وانتو البعده مفيش تقدير مفيش لايك مفيش كومنت يفرحها وعتابعو فى صمت هى عارفاكم وعشان هى طيبه ومش عتعمل زى باقى الكاتبات وتوقف الروايه وتهدد وبتنشر كل يوم حلقه واتين انتو بتستغلو طيبة قلبها 😢 معلش يارناد ياحبيبتى امسحيها فيا انا دى بس اوعى تكون ريحتها وحشه 😄 عضحك معاكى متزعليش كركركر 😁
طب الهى يارب بحق زنقتى دى تحت السرير اللى متفرحها بلايك وكومنتين تلاته يرزقها بحمد ومروان فى حياتها واللى تفرحها يرزقها برعد ولا مهاب فى حياتها اهه انا دعيت )

بقلم حبيبة قلبى /ريناد 😘رينووووووو

يتبع الفصل الثاني عشر اضغط هنا 


reaction:

تعليقات